Inamuna Thanu Wira Niphwanye Yoosoma ya Biibiliya
1. Nipakeke exeeni akhala wira ti vooxankiha ophwanya yoosoma ya Biibiliya muttetthe ahu, ni nthowa xeeni?
1 Nyuwo munoona oxankiha omphwanya mutthu wira mmusomihe Biibiliya? Nto nvikanihe omwaavya. Yehova onnaareeliha atthu yaale anivikaniha opaka yootthuna awe. (aGal. 6:9) Vano nrowe niwehe inamuna 5 sinirowa wookhaliheryani.
2. Ninrowa ovaha sai yoosoma ya Biibiliya mukwaha woopacerya oxukurya?
2 Ovaha Yoosoma ya Biibiliya Mukwaha Woopacerya: Atthu anceene annisuwela wira ninnikawa irevista A Sentinela (Owehaweha) ni Despertai! Masi khanisuwela wira ninnivaha soosoma sa Biibiliya. Tivonto, pooti weererya ovaha yoosoma ya Biibiliya mukwaha woopacerya okathi munilaleerya anyu khula empa. Nave-tho pooti waakoha atthu munaaxukurya anyu anisiveliwa ekeekhai akhala wira anniphavela omusoma Biibiliya. Akhala wira khaniphavela, nyuwo pooti ohiya iliivuru sahu ni ovikaniha waakhaliherya. Mwa ntakiheryo, munna mmosa aahiviriha iyaakha sinceene amuxukuryaka mulopwana mmosa ni mwaarawe omuhiyeryaka irevista khula mweeri. Nihiku nikina, nuumala onvaha irevista sa niinano, aahuupuwela, khurukunuwa nto khaakoha anamathelana ale: “Munniphavela omusoma Biibiliya?” Mootikinihiwa, awo yaahaakhulasa wira: “Aayo, ninniphavela”. Vano awosa aabatiziwa.
3. Xeeni vahinitthuneya ahu wuupuwelaka wira atthu otheene anirwa mmuthukumanoni aakhalana yoosoma ya Biibiliya? Mutthokiherye.
3 Mwaakohe Ale Anirwa Mmulokoni: Muhuupuwele wira atthu otheene anirwa mmuthukumanoni aakhalana yoosoma ya Biibiliya. Munna mmosa onihimya so: “Soosoma sinceene saarina aka kaapacerinhe ni yaale yaarwa mmuthukumanoni”. Murokora mmosa aahupuwela olavulana muthiyana oowuuliwa muru yoowo aarina anaawe axithiyana oobatiziwa mmulokoni. Muthiyana owo aahiviriha iyaakha 15 orwaaka mmuthukumanoni, masi aaphiya okathi saapacerya aya mithukumano ni aakhuma simalakaru. Muthiyana ole aaheemererya omusoma Biibiliya nto khiixutta ekeekhai. Murokora ole onilepa so: “Kinnoona othunku mwaha woolipelela iyaakha 15 wira kimukohe muthiyana ole akhala wira aaniphavela omusoma Biibiliya!”
4. Ninrowa ophwanya sai yoosoma vaavo nnaakoha ahu akina onithoonyerya atthu?
4 Mphavelase Othoonyeriwa Atthu: Murokora mmosa onnimananiha waahoola akina vaavo anirowa aya wiiriha soosoma saya sa Biibiliya. Eemereriwaka ni mulipa onisomiha, owo onnimukoha ole onisoma aamusuwelaka mutthu mukina oniphavela omusoma Biibiliya. Nto okathi muninvaha anyu mutthu onimuxukurya anyu eliivuru Biibiliya Oniixuttiha Exeeni, pooti omukoha so: “Munnimusuwela mutthu mukina oniphavela eliivuru ela?” Ikwaha sikina, anamalaleerya ni mapioneero khaniwerya omusomiha Biibiliya mutthu animphwanya aya mmuttettheni. Tivonto, mwaasuweliheke anna awo wira mookhalana okathi wira mwiirihe yoosoma ya Biibiliya.
5. Xeeni vanitthuneya ahu waakoha ale ahikhanle anamoona ari mmulokoni mwahu, akhala wira anniphavela omusoma Biibiliya?
5 Ale Athelanne ni Mutthu Oohaamini: Niireke mmulokoni mwanyu aakhala anamalaleerya athelanne ni mutthu ohinaamini? Atthu akina oohaamini khaniphavela omusoma Biibiliya nuule athelanne aya. Masi, pooti weemererya omusoma ni mutthu ohikhanle mmusi aya. Nto ti vooreerela omukoha iyawe wala mwaarawe ori Namoona muhinatthi olavulana nuule ori oohaamini wira musuwele enamuna yooloka yoomulaleerya.
6. Moota xeeni mavekelo anikhaliherya aya ophwanya yoosoma ya Biibiliya?
6 Mavekelo: Muhiyeveihe owerya orina aya mavekelo. (Yak. 5:16) Yehova onnileiherya owiriyana mavekelo ahu akhala wira annivarihana ni yootthuna awe. (1 Yoh. 5:14) Munna mmosa ahaareere waatteliwa miteko aahivekela wira okhalane yoosoma ya Biibiliya. Amwaarawe yaaniikoha akhala wira owo anwerya omukhapelela ole aamusomiha awe, vanceenexa akhala wira aamukhalana mixankiho sinceene. Nto, aahimuleela Yehova mixankiho iya, vaavo anvekela awe wira iyawe ophwanye yoosoma. Voohivira isumana piili, Muluku aahaakhula mavekelo awe vaavo pioneero mmosa mmulokoni amphwannye awe mulopwana aaphavela omusoma Biibiliya. Vano pioneero ole aahinvaha munna yoosoma ele. Mwaarawe onihimya so: “Akhala wira mutthu mukina onoona wira ti vooxankiha wiiriha yoosoma ya Biibiliya, miyo kinihimya so: ‘Nvekeleke moohihiyererya muhimyaka ele enooxankihani. Hiyo noophwanya ohakalala vanceene ovikana ntoko suupuwela ahu’”. Nto akhala wira munoovilela, munoowerya ophwanya yoosoma ya Biibiliya ni okhalana ohakalala wowaakhaliherya atthu ophwanya ephiro ya okumi woohimala.—Math. 7:13, 14.