Nivarexexe Moonelo wa Biibiliya Voohimya sa Naakhwa​—Mpantta 2

Okathi onikhwa awe mutthu, atthu a vatthokoni, amusi, ni apatthani, ikwaha sinceene anniwara ikuwo sinooniherya okhweliwa. Ti vootthuneya osuwela wira ikuwo sinooniherya okhweliwa sinihimmwa-va, khahiyo seiye ninwara ahu khula nihiku wala ikuwo siniwariwa okathi mukina, masi-tho sikhanle oowariwa vaavo mutthu onirowa awe onaakhwani. Ikuwo sinihimmwa-va, siniwariwa paahi mwaha wookhweliwa. Ikuwo iyo sinniwariwa moophavela wooniherya wira mutthu owo ookhweliwa. Ikuwo iyo ti sa ikoore sirina yootaphulela ya vameekhaaya moovarihana ni sookupali sa itiini sa khalai. Itiini iyo saanikupali wira ohaavo wataana eriyari ya alipa ookhwa ni atthu akumi. Nto atthu anniwara ikuwo iyo nihiku nimosa, mahiku vakhaani, myeeri sinceene, mwaakha mmosa, wala ovikana-vo.

² Nivarihele Muteko Malakiheryo a Biibiliya: Wanipacerya: atthu a Yehova khanooniherya oriipiwa waya murima ntoko siniira aya “atthu akina ahinroromela”. (1 aTes. 4:​13) Wa nenli: hiyo khinimphavela opaka etthu ekhanle ‘owakwattuliha atthu’ akina. (2 aKor. 6:⁠3) Moovarihana ni malakiheryo ala, niikoheke so: ‘Niireke owara ikuwo sinooniherya okhweliwa khoniwiiriha akina wuupuwela wira miyo kinitthara sookupali ni soolema sihinivarihana ni Biibiliya? Ekuwo ela khenaakwattuliha ale anisuwela sookupali ni sowiixuttiha sa Anamoona a Yehova voohimya sa naakhwa? Wala owara ikuwo iya khonirowa onyoonyiha yowuupuxerya ya murima ya anna? Niireke khonirowa waatteettheiha anna akhoottale owara ekuwo ela, wala atonko olupatthiwa mwaha wa yoothanla aya?’a

³ Mwa malakiheryo otheene anireerela othokorerya, ehaavo etthu yuulupalexa enireerela ahu wuupuwelela: Hiyo khanniphavela opaka etthu enirowa onveeha Yehova. (Mir. 27:11; aKol. 1:9, 10) Osuwela wira ikuwo sinooniherya okhweliwa sinivarihana ni yookupali yoowi alipa ookhwa annisuwela etthu, nto eyo ehaana oniiriha osyaka otthara yoolema ela ekhanle oohonona ompatthani orina ahu ni Yehova. Hiyo ‘khaninwerya olya va mesa va [Yehova] ni vamesa va Satana’.​—1 aKor. 10:21, 22.

⁴ Ekeekhai wira akina khanisuwela yootaphulela ya ikuwo iwo siniwariwa vaavo mutthu onikhweliwa awe. Wala, khaniwerya otthokiherya nthowa naya anisiveliwa aya vanceene owara ikuwo iya sinivarihana ni naakhwa. Okhala wira anamunceene anniwara ikuwo iyo ahisuwelaka yootaphulela aya, khahiyo mathowa anniiriha waatakiha. Ovekela ni wuupuwelela malakiheryo ala, onoonikhaliherya osuwela mathowa anniiriha osyaka otakiha yoolema ya owara ikuwo sinooniherya okhweliwa.

⁵ Ikuwo Sooreerela Owara Onaakhwani: Ikuwo xeeni sinireerela owara naarowaka onaakhwani? Okhuma khalai, iliivuru sa murumeyi oororomeleya ni ankhili sinnithokorerya mwaha ola.b Hiyo ninnitumereriwa okhala ooreera murima ni owara ikuwo soophwanelela ni sooratteliwa seiyo sinooniherya wiiyeviha. Ikuwo iyo pooti okhala soohitepa waarya nuupuwelelaka wira ninrowa “etthoko eripiwe murima”. (Mus. 7:⁠2) Wira nisyake waaveeha wala waanyoonyiha akina, khivanireerela owara ikuwo sootepexa waarya wala ikuwo sihinivaha nttittimiho. Tthiri, khula mutthu pooti othanla ikuwo siniphavela awe owara; masi, osuwela wahu saana mukhalelo wa alipa ookhwa onooniiriha wooniherya nttittimiho vaavo onikhwa awe mutthu ni ohiwara ikuwo soolema sa okathi owo.

Moota Woolokiherya Masikho

⁶ Masikho a maKristau ahaana opakiwa mwa nttittimiho mwa enamuna enooniherya otthara malakiheryo a guvernu ni orattela murutthu. Nto, ehipakiwe yoolema ehinivarihana ni Biibiliya, akhala wira masikho awo anoopakiwa mwa enamuna enaamaaliha ale akhweliwe otthariheliwaka Biibiliya ni wooniherya saana ekeekhai ya alipa ookhwa. (aÉf. 5:7-11) Wa khula etthu enirowa okhumelela omasikhoni, ehinyoonyihe yowuupuxerya ya murima ya anna. (1 aKor. 10:32) Moota xeeni malakiheryo ala a Biibiliya anivareleya aya muteko voohimya sa olokiherya masikho a maKristau?

⁷ Tani Arina Muritti Woolokiherya Masikho? Mittetthe sinceene, amusi oohaamini anuupuwela wira awo aakhalana edireito yoothanla okathi ni moota anrowa aya opakiwa masikho. Masi mwa ekasamento ya muKristau, mulopwana ni muthiyana oothelana tarina edireito yoopaka soothanla suulupale sinikhaliherya ikumi saya ni sa anaaya. Nto anamuyari, amusi, hata anna ammulokoni, ahaana ottittimiha moonelo wa Biibiliya. (Math. 19:5, 6) Eyo pooti ovareleya muteko voohimya sa onvitha mmusiihu namphenta ahu. (Maph. 23:19; 35:29) Wira nisyake ‘watana n’ale ahinamini’, muKristau ohaana ottittimiherya wira mareheryo otheene a masikho apakiwe moovarihana ni malakiheryo a Biibiliya. (2 aKor. 6:14-17) Itthu xeeni sinittuneya opakiwa wira niiwelele malakiheryo a Biibiliya?

⁸ Mwaasuwelihe Akina Ele Eniphavela Anyu: Akhala wira mun­na wala murokora onoolepa edukumento ohinatthi okhwa ohimyaka soophavela sawe voohimya sa masikho awe, vanookhweya ovaanela ni amusi, okhala wira awo pooti ottittimiha edukumento elempwale ni ole okhwiiye. (Maph. 50:5) Edukumento erina nsina na ole olempe ni masina atthu aniirela onamoona, ennikhaliherya vanceene. Edukumento eyo ehaana ovalaanyiwa ni ewarakha yeeyo mutthu onilepa awe ohimyaka moota sinirowa aya okaiwa mihakhu sawe. Ale anuupuwelela itthu sa muhoolo ni arina ankhili ni miruku, annisuwela wira khanitthuneya olipelela wuuluvala wala okhalana eretta ehinivoniwa wira alepe edukumento eyo. (Mus. 9:​11) Tivonto, itthu ntoko: moota sinrowa aya opakiwa masikho, tani anireerela olipeleliwa ohinatthi ovithiwa, opuro onrowa awe ovithiwa, ti pani onrowa ohoolela ni ovara etthu eri yotheene enivarihana ni masikho awo, itthu sootthuneya sinireerela osuweliha nlelo mutthu oryeene mukumi.

⁹ Akina pooti oxankiheya voohimya sa olepa edukumento enihimya itthu siniphavela aya wira sipakiwe yakhwa vale. Masi, ole onipaka eyo ti muKristau owunnuwela ni oophenta. Ale anisuwela ekeekhai ya Biibiliya, annisuwela wira opaka eyo khom­mwiiriha mutthu waakuva wala opisa okhwa. Ekeekhai wira olepa epaphelo enooniherya wira amusi oohaamini ahihoolele miteko sinrowa ovariwaka okathi wa masikho, pooti waanyoonyiha wala waaveeha amusi awo. Tivonto, varyaaya vootthuneya waaleela amusi ahu nihinatthi okhwa, ohiya waahiyerya amusi ooriipiwa murima olokiherya itthu iyo, okhala wira awo pooti okhanyererya opaka sowiira soohiloka seiyo saheemereriwa wala okupaliwa ni ole okhwiiye. (aFil. 2:4) Opaka etthu eyo ya miruku, onitaphulela wira mutthu owo onnaaphenta ni waacalela akina.​—aÉf. 5:28, 33.

¹⁰ Nipakeke Exeeni ni Amusi Ahikhanle Anamoona? Mapuro makina, nuumala okhwa mutthu ehaavo yoolema ya opakiwa muthukumano mowaakuveya. Anamunceene annipaka yoolema ela aphavelaka nikhaliheryo. Yoolakela aya ori ovaanela wa amusi wira yoone moota woophavelasa musurukhu ni nikhaliheryo na masikho, ni opaka soothanla voohimya sa okathi ni moota onrowa awe ovithiwa ole okhwiiye. Masi, sowiiraneya sinnooniherya wira okathi owo ehaavo yowoopiha yuulupale ekhanle oomwiiriha muKristau oweemererya amusi oohaamini ohoolela masikho. Ntoko noonale ahu, Biibiliya onnooniherya wira khivanireerela waahiyerya amusi oohaamini ahoolelaka masikho, okathi yoowo anna a mmulokoni anilokiherya aya miteko sikina sa naakhwa owo. (2 aKor. 6:14) Tivonto, akhala wira ole okhwiiye aari muKristau oororomeleya, khivaarowa okhala vooloka oweemererya amusi ahikhanle Anamoona opaka “muthukumano aya” wira ahimye moota sinrowa aya opakiwa masikho. Nave-tho khivaarowa okhala vootthuneya wira anna ahikhanle amusi wiirela mpantta mithukumano wala ovaha malakiheryo voohimya sa naakhwa.

¹¹ Etthoko ya eKristau moopixa murima ni mooreerela, ehaana ohimya marehereryo apakiwe voohimya sa naakhwa. Nto khivanitthuneya waakhoottiherya amusi ahikhanle Anamoona vaavo aniphavela aya okhaliherya. Masi, sai akhala wira amusi akina annithipelela opaka itthu soohiloka? Nto ti vootthuneya ovikaniha okhala oororomeleya ni moolipa murima, waatthokiherya mooreerela sookupali sahu sa eKristau. Tthiri, akhala wira ole okhwiiye aahilepa epaphelo yaahimya moota saaphavela awe wira ovithiwe, eyo enookhaliherya wira osyakiwe ovaanyihana ni onyakulihana.

¹² Nto nuumala opaka itthu iyo sotheene, akhala wira nlelo amusi oohaamini anithipelela ohoolela masikho awo, nto amusi owaamini pooti ovarihana okhuma onaakhwani iwo. Akhala wira eyo enimwiiraneya, pooti olavuliwa mwaha oSalau wa Omwene wala opuro mukina woophwanelela wira aamalihiwe ni ‘ohakalalihiwa ni Solem­pwa sa Muluku’ ale ariipiwe murima mwaha wookhweliwa ole yamphenta aya. (aRom. 15:4; Esal. 119:50) Hata murutthu ohikhanle opuro owo, mareheryo awo anirowa okhala oophwanelela ni ooreerela. (Otum. 34:5-6, 8) Nnaamwi sowiira soohiloka sa amusi oohaamini sincereryaka oriipiwa murima ni woona owereya mwaha wookhweliwa, hiyo, ninnimaalihiwa osuwela wira Muluku onniweha wiimananiha wahu omwiiwelela, yoowo onaavaha arumeyi awe oororomeleya “owerya wulupalexa”.​—2 aKor. 4:7.

[Inoota]