MWAHA WA VAKAAPANI | YESU TI MOOPOLI MOOTA XEENI?
Xeeni Nintthuneya Ahu Woopoliwa?
‘Mutthu oyariwe ni muthiyana onikhala okathi vakhani, ni tosareya ohawa. Onlikana n’ithutu eniphuwa, khunyàla nananoru: ori ntoko muttutthi onivira ohemelaka’.—Yobi 14:1, 2.
Okhuma khalai, atthu annuupuwelela wira vaamureera vaakhanle wira ninkhala ntoko amiravo mahiku otheene. Masi, mooriipiha murima, otheene ahu ninnookhwa. Nnaamwi masu a vasulu-vo yaalavuliwe ni Yobi iyaakha sinivikana 3.000, olelo-va nlelo masu awo ta ekeekhai.
Atthu anniphavela okhala mahiku otheene. Biibiliya onihimya wira Muluku oopweha yoophavela eyo vamurimani vahu ni wiiwexexa ele enitaphulela aya okhala voohimala. (Musuweli 3:11) Niireke ti vookhalela Muluku oophenta opweha vamurimani vahu etthu ehiniwerya ahu ophwanya? Akhala wira nnaari, nto muhaakhula saana. Biibiliya onihimya wira okhwa ti nwanani, nto owo onrowa “opwetexiwa”.—1 aKorinto 15:26.
Tthiri okhwa nwanani. Khaavo mutthu orina murima wooloka oniphavela okhwa. Mwa ntakiheryo, yaattamelaka yowoopiha, ninnikhuma opuro owo, ninniipitha wala otthyawa. Okathi ninwereiwa ahu, ninnirowa oxipitali. Ninnimananiha osyaka itthu saarowa oniiva.
Niireke ahaavo mathowa annikupaliha wira nwanani ola a khalai onoopwetexiwa? Aayo. Yehova Muluku, Mpattuxa ahu, khaapanke apinaatamu wira ekhaleke mwa iyaakha vakhaani nuumala-vo ekhweeke. Okhwa khokumiheriwe ni Muluku. Owo aalakenle wira apinaatamu ekhaleke mahiku otheene valaponi; nto yoolakela awe enimwiiraneya.—Yesaya 55:11.
Nto okhwa onrowa opwetexiwa sai? Mwa iyaakha sinceene sivinre, apinaatamu aamananiha omaliha okhwa, masi khuhiweryaka. Mahiku ala, nlelo atthu annivikaniha ophavela omaliha okhwa. Masientista annipaka ivasina ni mirette wira emalihe iretta sikina. Awo annimananiha osoma makhalelo a itthu sirina okumi. Mapuro manceene, atthu annikhala iyaakha sinceene ovikana eseekulu evinre. Masi, okhwa khonxinttiwa. Biibiliya onihimya so: “Othene anotthikela muntthupini memmo”.—Musuweli 3:20.
Masi sihaavo ihapari sooreera. Khaninreerela waaroromela apinaatamu wira amalihe muxankiho ola. Yehova Muluku oopaka marehereryo wira onoopole voohimya sa okhwa. Nto onrowa omurumeela Yesu Kristu wira opake eyo.