Niireke Munoowerya Okhaliherya Mmulokoni Mwanyu?

OHINATTHI orowa wiirimu, Yesu aahaahimeerya awiixutti awe wira: “Munrowa okhala anamon’aka . . . mpakha omalenle elapo”. (Mit. 1:8) MaKristau oopacerya yaarowa owerya sai yooruma ela?

Martin Goodman, prusoore a Universidade Oxford onihimya wira “muteko ola waahiwiiriha maKristau ale okhala oovirikana ni atthu a itiini sikina, waahela muhina aYuda, yaakhala muttetthe wa oRoma”. Yesu aaneetta mittetthe soovirikana olaleeryaka. Attharaka ntakiheryo na Yesu, maKristau eekeekhai yahaana osuwela wira olaleerya “ehapari yorera y’Omwene wa Muluku” waataphulela owaavya atthu yaaphavela osuwela ekeekhai ya Biibiliya. (Luka 4:43) Ti nthowa naya miloko sa maKristau a eseekulu yoopacerya yaarina aya “arummwa”, nuulumo nintaphulela anamuhupi aahiiso atthu arummwale. (Mar. 3:14) Nto Yesu aahaaruma atthareli awe wira: “Vano, murowé, mwawixuttiheke atthu a maloko othene”.​—Math. 28:18-20.

Olelo-va khanrina arummwa ale 12 a Yesu, masi arumeyi a Yehova annooniherya munepa wa arummwa ale. Awo annaakhulela nlattulo nna ni moolumo oowi: “Miyo kiri va: kirumekeni”. (Yes. 6:8) Atthu anceene athaamale arowaka mapuro oorakamela, ti yaale yiixuttihiwe Exikola ya oGileadi. Akina aathaamela mittetthe sikina sa elapo aya. Anceene a atthu awo ahiixutta nttaava nsya wira akhaliheryeke miloko aahiiso igrupu sinlavula nttaava nno. Anna ni arokora ala athaamenle mapuro makina aahiiso aniixutta nttaava nsya khahiyo wira yaarina mikhalelo saakhweiherya opaka marukunuxo awo. Masi yahaana wiimananiha ni wooniherya omphenta waya Yehova ni namwaattamanani aya. Nuumala ovarerya mikhalelo saya awo yahoona wira yanwerya okhaliherya. (Luka 14:28-30) Nto anna ni arokora anipaka marukunuxo ala annikhaliherya vanceene.

Masi, mikhalelo sinnivirikana. Maana khahiyo wira Anamoona otheene anoowerya othaamela mapuro makina aahiiso wiixutta nttaava nsya. Nto niireke nnoowerya wooniherya munepa wa omisionaario hata muloko ahu?

MUKHALE MISIONAARIO MMULOKONI MWANYU

MaKristau a eseekulu yoopacerya yanooniherya munepa wa omisionaario, nnaamwi maKristau manceene yaapaka eyo elapo aya. Tthiri moolumo Paulo aamutumerenrye awe Timootheyo yaanivareleya muteko wa maKristau ale ni annivareleya muteko wa arumeyi a Muluku olelo-va: “Mwetteke mulaleyaka ehapari yorera, munvareleke Muluku muteko womalela”. (2 Tim. 4:5) Yooruma ya olaleerya muhupi wa Omwene ni waapaka awiixutti, ennivareleya muteko wa maKristau otheene. Nto, mikhalelo sinceene sa muteko wa omisionaario sinnivareleya muteko mmulokoni mwahu.

Mwa ntakiheryo, misionaario othaamenle elapo ekina ohaana omananiha olimalela mikhalelo sa elapo eyo, okhala wira itthu sinceene ti soovirikana. Ankhi akhala wira khaninwerya othaamela opuro woothowa anamalaleerya? Niireke noosuwela itthu sotheene sa muttetthe a muloko ahu? Niireke khokhanle moota mukina wowaaphwanya atthu? Mwa ntakiheryo, mwaakha wa 1940, anna yaahitumereriwa othanla nihiku nimosa vasumanani wira alaleeryeke mphironi. Niireke nyuwo pooti opaka etthu emosaru? Ankhi olaleerya murumeelaka ikarinyu sinipwehiwa iliivuru? Niireke muhuupuwela orumeela inamuna iya sa olaleerya ihapari sooreera, waaniheryasa inamuna seiyo sihitonko anyu orumeela?

Okhalana moonelo wooloka onoonikhaliherya oluttuweliwa ni wooniherya nthiti muteko woolaleerya. Nto ikwaha sinceene, ale aniivahererya othaamela mapuro oothowa anamalaleerya aahiiso anirumeela miloko sinilavula nttaava nikina ti yaale alimalenle olaleerya. Tivonto anna awo annikhaliherya vanceene akhala wira tanihoolela muteko woolaleerya. Tthiri ikwaha sinceene mamisionaario tanihoolela miteko sa muloko mpakha okhumelela anna oophwanelela a mapuro awo. Akhala wira nyuwo mwa munna oobatiziwa, niireke munniphavela “muteko wo wettiha muthukumano”, aahiiso ophavela waarumeela anninyu mmulokoni?​—1 Tim. 3:1.

MUKHALIHERYEKE

Sookhala itthu sikina sikhanle ahu ookhaliherya mmulokoni, ohiya paahi muteko woolaleerya ni weemererya miritti mmulokoni. Tivonto, otheene ahu, amiravo ni oowunnuwela, alopwana ni athiyana, nnoowerya waakhaliherya anamalaleerya ahilimalenle.​—aKol. 4:11.

Wira niwerye waakhaliherya annihu, nihaana waasuwela saana. Biibiliya onnitumererya wira “nùpuxeryaneke” okathi onithukumana ahu. (aHéb. 10:24) Moolumo ala anooniherya wira nihaana waacalela annihu ni ophavela osuwela itthu sinaaxankiha. Masi eyo khentaphulela wira nihaana ophavela osuwela itthu sihinniira mpantta. Itthu iyo pooti okhala iye sinixankiha muupuwelo aya, moonelo aahiiso somunepani. Waakhaliherya annihu khahiyo muteko wa axitokweene ni arummwa oorumeela paahi. Ekeekhai wira okathi mukina ahaana okhala anna awo anaakhaliherya ale atteettheyale omunepani. (aGal. 6:1) Hata vari siiso, otheene ahu nnoowerya waakhaliherya anna ni arokora oowuuluvala, aahiiso imusi sirina mixankiho.

Mwa ntakiheryo, okathi Salvatore aapwante awe, eyo yaahimwiiriha otumiha mireerelo sawe, empa awe, ni mireerelo sa amusi awe, nto aahixanka moota emusi awe yaarowa aya ovilela muxankiho ole. Munna mukina a mmulokoni aahisuwela muxankiho ole. Aahinvaha musurukhu, aahimukhaliherya Salvatore ni mwaarawe ophwanya muteko, ni aahiviriha mahiku manceene anwiriyanaka ni olipiha emusi yotheene. Nto okathi owo waahiwiiriha olipiha wataana waya. Nnaamwi yahaareere oxanka wanipacerya, vano okathi imusi iye piili sinuupuwela aya okathi sivirihale aya vamosa, sinnihakalala.

MaKristau eekeekhai khanikhalela milili ekeekhai. Nittharaka ntakiheryo na Yesu, nihaana waasuweliha akina soolakela siri mBiibiliyani. Hata niweryaka othaamela mapuro makina aahiiso nihiweryaka, hiyo pooti opaka ele eniwerya ahu wira naakhaliherye atthu otheene. Nave nnoowerya opaka eyo muloko ahu. (aGal. 6:10) Vaavo vanipaka ahu eyo, nnoophwanya ohakalala onikhumelela mwaha woovaha, ni waakhaliherya akina ‘nivaraka miteko sorera sa khula enamuna’.​—aKol. 1:10; Mit. 20:35.