Emusi ya Yesu Yaahirowa Oyerusalemu

Vano yaari elimwe. Waahiphiya okathi wira Yosefe ni etthoko awe, apatthani ni amusi awe arowe oYerusalemu. Yaarowa omwiira Paasikha, attharihelaka Nlamulo na Muluku. (Otumererya 16:16) Okhuma oNazarethi orowa oYerusalemu, saari ikiloomo 120. Okathi ole, atthu anceene yaahirowa oYerusalemu. Vano Yesu aarina iyaakha 12. Ntoko aalimalenle awe, Yesu aahihakalala osuwela wira waahiphiya okathi woorowa otemplo oYerusalemu wira amwiire Paasikha.

Yesu ni emusi awe khiyoona wira Paasikha niira na nihiku nimosa paahi. Maana nihiku na Paasikha ti naapacerya aya Niira na mahiku 7 na Iphaawu Soohiheliwa Miropo. (Marko 14:12) Nave waathokoreriwa okhala okathi wa Paasikha. Orowa, okhala ni otthika oYerusalemu, waamaliha isumana piili. Masi mwaakha ola, mwaha wa itthu saamukhumelenle Yesu, yaahimaliha okathi munceene. Nto eyo yaahiiraneya okhala wira yaahikhumelela etthu yaawiirinhe otthikela oYerusalemu.

Yeettaka mukwaha wootthikela oNazarethi, Yosefe ni Maria yuupuwela wira Yesu aari ni amusi aahiiso apatthani awe yeettana aya vamosa. Masi nuumala wiila, awo yaaheemela wira arupe, nto yaahoona wira Yesu khaakhanle. Tivonto, yaahirowa omwaavya eriyari ya atthu yeettana aya mukwaha, masi khiyamphwannye. Mwanaya ole khooneya! Yosefe ni Maria yaahitthikela oYerusalemu wira yamwaavye.

Yaahimwaavya nihiku noopacerya ni na nenli, masi khiyamphwannye. Nto, nihiku na neeraru, awo yaahimphwanya ori ene mutemplo. Yaahimoona Yesu okilanthe ene eriyari ya awiixuttihi aaYuda. Yesu aanaawiriyana ni waakoha, nto awiixuttihi ale yaanitikinihiwa mwaha wa osuwela wawe.

Maria aahimukoha wira: “Mwan’aká, munìrelenle-ni sisa? Atith’inyu ni miyo nowavyani nìniwene murima n’uxanka”.​—Luka 2:48.

Yesu aahitikinihiwa woona wira anamuyari awe khiyaasuwela opuro aari awe. Yesu aahaakoha wira: “Mwakiphavelela-ni? Khimwasuwela wira kihana othokorerya itthu s’Atithi aka?”​—Luka 2:49.

Nuumala Yosefe ni Maria omphwanya Yesu, yaahitthikela oNazarethi, vano owo aanivikaniha owiiwelela. Nave aaninnuwa moosuwelani ni mwerutthuni. Nnaamwi aari mmiravo, Yesu aanivara itthu saamusivela Muluku ni atthu. Tthiri okhuma onamwane awe, Yesu aanivaha ntakiheryo nooloka na osiveliwa itthu somunepani ni waattittimiha anamuyari awe.