Mwaakhaliheryeke Annawe Kristu Moororomeleya

“Imara sothene samwirelanyu mmosá àxikhani ala, ari axinn’aka, mwakìrela yomi!”​—MATH. 25:40.

MWAAROWA WAAKHULA SAI?

Moota xeeni Yehova onikhaliherye awe wiiwexexa oratteene nlikanyiho na ipwittipwitthi ni ipuri?

Ti pani ovahiwe muteko woolaleerya?

Xeeni ola oryaawe okathi wowaakhaliherya axinnawe Kristu?

1, 2. (a) Malikanyiho xeeni Yesu aahimeeryale awe awiixutti awe oophentexiwa? (Nwehe elatarato yoopacerya.) (b) Exeeni enitthuneya ahu osuwela voohimya sa nlikanyiho na ipwittipwitthi ni ipuri?

YESU aalavula ni awiixutti awe oophentexiwa Pedru, Andreya, Yakobo, Yohani. Awo yiira amanle ene owiiriyana malikanyiho yaalavula sa murumeyi oororomeleya ni ankhili, imwali 10, ni italento. Nto Yesu aamalinhe mwaha ole olavulaka nlikanyiho nikina. Owo aahilavula voohimya sa okathi “Mwana a mutthu” vanirowa awe waaphukela “atthu a maloko othene”. Tthiri nlikanyiho nle naahavara murima awiixutti ale! Nlikanyiho nla Yesu onilavula igrupu piili, emosa enilikana ni ipwittipwitthi akina ni ipuri. Ni aahiromola egrupu ekina yootepexa otthuneya yeeyo enihimya awe okhala ‘annawe’ “Mwené”.​—Mmusome Matheyo 25:31-46.

² Atthu a Yehova annixankiheya ni nlikanyiho nla okhuma khalai, okhala wira ninlavula ele enrowa waakhumelela atthu muhoolo. Yesu onnitthokiherya nthowa naya akina anrowa aya waakhela okumi ohinimala variki akina arowaka wiiviwa. Okumi ahu onilipa ni wiiwexexa ele Yesu yaahimyale awe ni opaka itthu moovarihana ni ekeekhai eyo. Okhala wira mwaha ola onnaavara atthu anceene, nto vannireerela wiikoha so: Moota xeeni Yehova onikhalihenrye awe wiiwexexa nlikanyiho nla? Xeeni nikhanle ahu oohimya wira nlikanyiho nla ninttittimiherya muteko woolaleerya? Ti pani ovahiwe muteko woolaleerya? Xeeni olelo-va vakhanle aya okathi wowaakhaliherya “Mwené” ni ale anaahimya awe okhala ‘axinnawe’?

MOOTA NIKHALIHERIWE AHU WIIWEXEXA NLIKANYIHO NLA

3, 4. (a) Itthu xeeni sootthuneya sinrowa onikhaliherya wiiwexexa nlikanyiho na ipwittipwitthi ni ipuri? (b) Exeeni yaahimmye aya erevista Zion’s Watch Tower ya 1881, ephavelaka otthokiherya nlikanyiho nla?

³ Wira niiwexexe oratteene nlikanyiho na ipwittipwitthi ni ipuri, hiyo nihaana osuwela itthu iya tthaaru: waasuwela ale anihimmwa, okathi wa ophukela, ni mathowa aniiriha akina ohimmwaka okhala ipwittipwitthi wala ipuri.

⁴ Erevista Zion’s Watch Tower ya 1881, yaahimusuwanyeiha Yesu okhala “Mwana a mutthu”, yoowo-tho oniireliwa “Mwené”. Alipa-oomusoma Biibiliya, yaanisoma masu ari Biibiliya King James Version, yaawo ani “annaka”, yaahimyaka ale yaarowa olamulela ni Kristu ni atthu otheene yaarowa okhalaka valaponi mParayiisu. Nave awo yaakupali wira ovalaanyiwa wa ipwittipwitthi ni ipuri waarowa wiiraneya muhina mwa Omwene wa Iyaakha Ekonto Emosa wa Kristu. Yaanikupali-tho wira atthu yaarowa ohimmwa okhala ipwittipwitthi mwaha wa weettela nlamulo na Muluku na ophenta.

5. Myaakha sa 1920, moota xeeni waalokiheriwe aya wiiwexexa wahu nlikanyiho na ipwittipwitthi ni ipuri?

⁵ Wanipacerya wa myaakha sa 1920, Yehova aahaakhaliherya atthu awe wiiwexexa malikanyiho. Erevista The Watch Tower ya 15 a Outubro 1923, yaahihimya wira Yesu ti “Mwana a mutthu”. Masi yaahiwanyeiha orattene masu ari mBiibiliyani anaasuwanyeiha oratteene annawe Kristu wira ti ale yaarowa olamulelaka wiirimu, ni yaahihimya wira ipwittipwitthi ti ale anilipelela okhala valaponi alamuleliwaka ni Omwene wa Kristu. Nto okathi xeeni onirowa aya ovalaanyiwa wa ipwittipwitthi ni ipuri? Mwaha ole waahihimya wira annawe Kristu yaarowa olamulelaka wiirimu, okathi wa Olamulelo wa Iyaakha Ekonto Emosa, nto khivaaweryaneya okhaliheriwa wala ohikhaliheriwa ni atthu ari valaponi. Ti maana aya ovalanyihiwa wa ipwittipwitthi ni ipuri onrowa wiiraneya Omwene wa Iyaakha Ekonto Emosa ohinatthi opacerya. Moovarihana ni mwaha ole, mathowa animwiiriha mutthu ohimmwa okhala epwittipwitthi mwaha woowi anneemererya wira Yesu Pwiya aya ni aniphavela wira Omwene waaruhele mireerelo.

6. Moota xeeni wiiwexexa wahu waalokiheriwe aya myaakha sa 1990?

⁶ Mwaha wa wiiwexexa iwo wa naanano, atthu a Yehova yaahipacerya wuupuwela wira khula mutthu aarowa ohimmwaka okhala epwittipwiithi wala epuri wuukiseryani wa makhalelo ala a itthu, moovarihana ni moota mutthu owo sinaakhula awe okathi onilaleeriwa awe. Masi, eriyari ya myaakha sa 1990, wiiwexexa wahu waahilokiheriwa. Myaha miili saakumiheriwa ni erevista Owehaweha ya15 a Outubro 1995, yaahooniherya olikana wa masu yaalavuliwe ni Yesu ari va Matheyo 24:29-31 (mmusome) ni Matheyo 25:31, 32. (Mmusome.)a Nto mwaha ole waamanle sai? Mwaha mukina wa erevista yeele aahimmye so: “Ophukeliwa wa ipwittipwitthi ni ipuri onrowa wiiraneya muhoolo”. Masi okathi xeeni tthiri? “Eyo enrowa wiiraneya nuumala ‘maxakha malupale’ anihimmwa va Matheyo 24: 29, 30, vaavo Mwaana a mutthu ontthuna awe orwa ni ‘ovuwa wawe’. . . . Nto onrowa opwetexa makhalelo ala ootakhala, onrowa okilaathi opaceryeke waaphukela ni owiiva atakhali”.

7. Wiiwexexa xeeni wookhweya orina ahu mahiku ala wa malikanyiho a Yesu?

⁷ Olelo-va, ninniiwexexa oratteene nlikanyiho na ipwittipwitthi ni ipuri. Voohimya sa osuwanyeihiwa wa atthu aniromoliwa, Yesu tori “Mwana a mutthu” wala Mwene. Yaawo yaahimmwa okhala “annawe” ti alipa-oowoottihiwa athiyana ni alopwana, anrowa olamulelaka wiirimu. (aRom. 8:16, 17) “Ipwittipwitthi” ni “ipuri,” anihimmwa atthu a maloko otheene. Atthu awo khiyoottihiwe ni munepa wootteela wa Yehova. Ankhi okathi woophukeliwa atthu? Itthu iyo sinrowa okhumelela waattamela wanikisa wa maxakha maalupale, yaawo ari vakhiviru. Nthowa xeeni nniwiiriha atthu ohimmwaka okhala ipwittipwitthi wala ipuri? Ophukeliwa waya onrowa okhala yookhumelela ya enamuna yaakhapelenle aya anna a Kristu oowoottihiwa ni munepa wootteela ari valaponi. Vano vanaattamela aya wanikisa wa makhalelo ala ootakhala, nto ninnitteeliwa murima okhala wira Yehova onnuupulula nlikanyiho nla ni ale makina alempwale va Matheyo ikapitulu 24 ni 25!

MOOTA XEENI NLIKANYIHO NLA NINNITUMERERYA AYA OLUTTUWELIWA OLALEERYA?

8, 9. Exeeni ipwittipwitthi sinihimmwa aya okhala “anaxariya”?

⁸ Nlikanyiho na ipwittipwitthi ni ipuri, Yesu khoniromola mooluluwanya muteko woolaleerya. Nto xeeni ohimmwaka wira nlikanyiho nla ninnittittimiherya muteko woolaleerya?

⁹ Yoopacerya, nwehe wira okathi ole Yesu aixuttiha orumeelaka malikanyiho. Nto vannooneya wira Yesu khaaphavela olavula sa ovalaanyiha ipwittipwitthi ni ipuri sa ekeekhai. Vamosaru, owo khoniixuttiha wira khula mutthu onihimmwa okhala epwittipwitthi aarotoko waavaha yoolya, ikuwo, murette wala waaxukurya axinnawe Kristu aryeene mukhatteya. Ohiya-vo, Yesu aaphavela ottittimiherya moonelo wa ipwittipwitthi voohimya sa annawe. Owo onnihimya ipwittipwitthi okhala “anaxariya”, okhala wira awo annisuwela wira Kristu ookhalana egrupu ya alipa-oowoottihiwa nlelo ari valaponi, ni wira ipwittipwitthi sinnaakhaliherya okathi ola wooxankiha.​—Math. 10:40-42; 25:40, 46; 2 Tim. 3:1-5.

10. Moota xeeni ipwittipwitthi sinaareerela aya murima axinawe Kristu?

¹⁰ Yanenli, muthokorerye makhalelo a okathi Yesu aalavunle awe masu ala. Owo aatthokiherya ekanyeryo ya orwa wawe ni omala wa olumwenku. (Math. 24:3) Wanipacerya wa mwaha awe, Yesu aahihimya wira ekanyeryo ya orwa wawe yaarowa ohela muhina yowiiraneya yuulupale, eyo piiyo, ihapari sooreera sa Omwene saarowa ‘olaleiwa mulaponi mothene’. (Math. 24:14) Nave ohinatthi olavula nlikanyiho na ipwittipwiitthi ni ipuri, Yesu aahilavula nlikanyiho na italento. Ntoko sitthokiheriwe aya mwaha ovinre, nlikanyiho Yesu apanke awe aattittimiherya wira athareli awe oowottiwiwa, “annawe” yahaana okhalela nthiti muteko woolaleerya. Masi, egrupu yaamukhaani ya alipa-oowoottihiwa ahanle valaponi aakhalana muteko muulupale, wa waalaleerya atthu a “maloko othene” wanikisa ohinatthi ophiya. Nlikanyiho na ipwittipwitthi ni ipuri ninnooniherya wira aakhala atthu yaarowa waakhaliherya alipa-oowoottihiwa. Ti maana aya, enamuna emosa ale anihimmwa okhala ipwittipwitthi anooniherya aya waareerela murima annawe Kristu, ori waakhaliherya muteko woolaleerya. Muteko owo wookhaliherya, exeeni enihela awe muhina? Niireke eyo enihela muhina waakhaliherya werutthuni ni mmuupuweloni paahi, wala yookhala etthu ekina?

TI PANI ANIVARA MUTEKO WOOLALEERYA?

11. Nikoho xeeni ninkhumelela ni nthowa xeeni?

¹¹ Olelo-va, anamuceene a awiixutti a Yesu ari imilyau 8, khahiyo alipa-oowoottihiwa. Nto awo khiyaakhenle italanto iye Yesu aavanhe awe arumeyi awe oowoottihiwa. (Math. 25:14-18) Vano nookhala nikoho nla, ‘Niireke muteko woolaleerya onnaahela muhina maKristau ahikhanle oowoottihiwa’? Nto muthokorerye nthowa ninniiriha waakhula wira aayo.

12. Exeeni enniixuttiha aya masu a Yesu alempwale va Matheyo 28:19, 20?

¹² Yesu ahaalakiherya awiixutti awe wira alaleeryeke. Nuumala Yesu ohihimuxiwa, ahaahimeerya atthareli awe wira yaapakeke awiixutti, ni owiixuttiha wira yiiweleleke itthu “sothene” saarumale awe. Yooruma eyo yaahela muhina muteko woolaleerya. (Mmusome Matheyo 28:19, 20.) Ti maana aya, awiixutti otheene a Kristu ahaana olaleerya, hata alipelelaka orowa wiirimu wala okhala valaponi.​—Mit. 10:42.

13. Exeeni enitaphulela aya yowoonihiwa ya Yohani, ni nthowa xeeni?

¹³ Eliivuru ya Wisupulula ennooniherya wira muteko woolaleerya waarowa ovariwaka ni igrupu iya piili, alipa-oowoottihiwa ni akina. Murummwa Yohani ahooniheriwa “mwar’awe mwapwittipwitthi”, eyo piiyo, apinaatamu 144.000 anrowa olamulela ni Kristu wiirimu, yaalattula atthu “amphavela màsi èkumi”. (Wis. 14:1, 3; 22:17) Maasi awo a nthoonyeryo anitaphulela marehereryo a Yehova a owoopola apinaatamu etampi ni okhwa, orumeeliwaka mukuttho woowoopola wa Kristu. (Math. 20:28; John 3:16; 1 Yohani 4:9, 10) Mukuttho wa Yesu ti etthu yuulupale eniirela mpantta muhupi onilaleya ahu, yoowo onihooleliwa ni alipa-oowoottihiwa, onaaphwanyiha mureerelo atthu aniwiixuttiha ahu. (1 aKor. 1:23) Mwa yowoonihiwa ele, Yohani aahoona-tho egrupu ekina ehiniirela mpantta mwaarawe mwaapwittipwiitthi. Awo nave annirummwa ohimya wira “Murwé”! Awo anniiwelela yooruma eyo yaalattulaka atthu akina wira arwe awuryeke maasi. Egrupu eyo ya nenli ti ale arina nlipelelo na okhala valaponi. Tivonto, yowoonihiwa ela enitaphulela wira atthu otheene yaale aneemererya “orwa”, aakhalana muritti wa waalaleerya akina.

14. Onitaphulela exeeni wiiwelela “ikano sa Kristu”?

¹⁴ Atthu otheene aneettela “ikano sa Kristu”, ahaana olaleerya. (aGal. 6:2) Yehova khorina malamulo manli. Mwa ntakiheryo, owo ahaahimeerya aIsarayeli wira: “Ekano ela emosaru enovarani nyuwo othene, anamurwa walá axinene elapo”. (Okhum. 12:49; Onam. 24:22) MaKristau khaneettela Nlamulo na Moise. Masi otheene ahu, okhale oowoottihiwa wala nnaari, nihaana weettela “ikano sa Kristu.” Malamulo awo anihela muhina itthu sotheene aixuttinhe awe Yesu. Etthu yuulupale Yesu aalakihenrye awe awiixutti awe ti ophentana. (Yoh. 13:35; Yak. 2:8) Nto enamuna yoopacerya ya wooniherya wira ninnimphenta Muluku, Kristu ni apinaatamu akhwiihu, ti olaleerya ihapari sooreera sa Omwene.​—Yoh. 15:10; Mit. 1:8.

15. Xeeni vanihimmwa aya wira yooruma ya Yesu ennaahela muhina athareli awe otheene?

¹⁵ Masu Yesu aaleela awe atthu vakhaani annivareleya muteko wa atthu anceene. Mwa ntakiheryo, Yesu aahipaka nivarihano na Omwene ni arumeyi awe ale 11, masi wataana iwo onnaahela muhina atthu 144.000. (Luka 22:29, 30; Wis. 5:10; 7:4-8) Vamosaru, Yesu aarumme atthareli awe vakhaani, yaale yamoonale nuumala ohihimuxiwa, wira yavareke muteko woolaleerya. (Mit. 10:40-42; 1 aKor. 15:6) Masi arummwa awe otheene oororomeleya a eseekulu yoopacerya yaanisuwela wira yooruma ele yaanahela muhina awo nave, nnaamwi yahaatonko omwiiwa Yesu olavulaka. (Mit. 8:4; 1 Ped. 1:8) Nave-tho, olelo-va Yesu khonatoko olavulana khula mmosa a anamalaleerya a nthiti aniphiyerya imilyau 8. Masi awo annisuwela wira ahaana omwaamini Kristu ni wooniherya waamini waya iwo yaalaleeryaka atthu.—Yak. 2:18.

OLA OKATHI WOOREERELA WOWOONIHERYA OROROMELEYA

16-18. Mwa inamuna xeeni ale aniphavela ohimmwa okhala ipwittipwitthi anaakhaliherya aya annawe Kristu, nto xeeni vanitthuneya aya opaka eyo nenna-va?

¹⁶ Satana oniwana ekhotto ni alipa-oowoottihiwa yaale nlelo ari valaponi, ni owo onrowa otepaka waatuphela, “okhala wira òsuwela wira orina okathi vakhani pahi”. (Wis. 12:9, 12, 17) Nnaamwi alupatthiwaka vanceene, alipa-oowoottihiwa annihoolela ekampaanya yuulupale ya olaleerya enivariwa olelo-va. Moohaaniherya, Yesu ori vamosa ni awo, okhaliheryaka wiimananiha waya.​—Math. 28:20.

¹⁷ Nummuru nuulupale na ale anrowa ohimmwa okhala ipwittipwitthi annoona okhala eparakha yuulupale waakhaliherya axinnawe Kristu, ohiya paahi mmuteko woolaleerya, masi-tho mwa inamuna sikina soovirikana. Mwa ntakiheryo, awo aanivaha musurukhu ni okhaliherya otekiwa Ipa sa Omwene, Ipa Sinipakiwa Mithukumano Suulupale, ipa sa ofiliyaali ni moororomeleya anniwiiwelela atthu anithanliwa ni “murumeyi òroromeleya ni ànkhili” wira ahooleleke miteko iyo.​—Math. 24:45-47; aHéb. 13:17.

¹⁸ Voohipisa malaikha ale avarelenle ipheyo sa opwetexa olumwenku, anrowa ohiya ipheyo iyo wira apaceryeke maxakha maalupale. Eyo enrowa okhumelela nuumala ovahiwa ekanyeryo yookiserya axinnawe Kristu yaawo nlelo ari valaponi. (Wis. 7:1-3) Ehinatthi opacerya ekhotto ya Harmagedoni, alipa-oowoottihiwa otheene anookuxiwa arowaniwaka wiirimu. (Math. 13:41-43) Tivonto vanihimya ahu wira ola okathi wooreerela ale anrowa wooniwa okhala ipwittipwitthi, opacerya waakhaliherya annawe Kristu moororomeleyaxa.

[Enoota]