Ireferensia sa Okumi ni Orummwa Ahu Ekaderno Enirumeeliwa Omuthukumanoni ya Novembro
5-11 YA NOVEMBRO
MIHAKHU SINIKHUMA MBIIBILIYANI | YOHANI 20-21
“Munnikiphenta, vowavikana akin‘ala?”
nwtsty Inoota soosoma sa Yoh 21:15, 17
Yesu ahimukoha Simoni Pedru: Ovaanela nno wa Yesu ni Pedru wiiraneyale nuumala Pedru omukhootta Yesu ikwaha tthaaru. Yesu aahimukoha Pedru ikwaha tthaaru nikoho nooriipiha murima ophavelaka osuwela akhala wira Pedru aahiriipiwa murima tthiri mwaha wa etthu aapanke awe. (Yoh 21:17) Yowiiraneya enihimmwa Yoh 21:15-17, aarumeeliwa averbo anli a eGriki: a·ga·paʹo, ni phi·leʹo. Mwa nttaava na emakhuwa moolumo ala oomanli ataphuleliwe so: ophenta. Yesu aahimukoha Pedru ikwaha tthaaru ohimyaka so: “Munnikiphenta?” Ikwaha soopiili Pedru aahaakhula wira aanimphenta Yesu. Wanikisa waya Yesu aahimukoha-tho Pedru wira: “Nyuwo Munnikiphenta?” Nave Pedru aahaakhula ohimyaka masu yaale aalavunle awe khalai. Khula okathi Pedru aakhula awe, ooniherya ophenta wawe. Yesu aahittittimiherya wira ophenta wa Pedru wammukhaliherya waalyiha ni waakukhula atthareli a Yesu mwa omunepani. Yesu aahaahimya atthareli awo okhala “ipwittipwitthi”. (Yoh 21:16, 17; 1 Ped 5:1-3) Mwa ikwaha tthaaru Yesu aahimweemererya Pedru wooniherya ophenta wawe, nto nuumala-vo aahinvaha muritti wa okhapelela ipwittipwitthi sawe. Mwa enamuna eyo, Yesu aahooniherya tthiri wira aahimulevelela Pedru mwaha woomukhootta ikwaha tthaaru.
“munnikiphenta, vowavikana akin‘ala?” Nuulumo noowi “vowavikana akin‘ala” pooti wiiwexexiwa wira khahiyo enihimmwa ekwaha emosa masi sinceene. Asomi akina anoona okhala vookhalela otaphulela so: “nyuwo munnikiphenta vanceene ovikana moota munaaphenta anyu awiixutti ala akina ankiphenta aya?” wala “nyuwo munnikiphenta vanceene ovikana moota awiixutti ala akina ankiphenta aya?” eyo piiyo ihopa yaatonthe aya wala itthu saavarihana ni nakoso a ihopa. Nto vanikhala wira eveersu ela emphavela ohimya so: Nyuwo munnikiphenta vanceene ovikana mihakhu? ‘Akhala wira ti siiso mulyiheke ipwittipwitthi saka’. Mwaha wa itthu saamukhumelenle Pedru, nikoho nle naari nootthuneya. Nnaamwi Pedru aari mmosa a awiixutti oopacerya a Yesu, (Yoh 1:35-42), owo khaamutthanre Yesu mwa okathi ene yoowo aalattuliwe awe. Ohiya-vo owo aahitthikela muteko woototha ihopa. Sivinre ene myeeri, Yesu aahimulattula Pedru wira omuhiye nakoso awe ni okhale ‘mutothi a atthu’. (Mat 4:18-20; Luk 5:1-11) Moohipisa nuumala Yesu okhwa, Pedru aahihimya wira aarowa ototha ihopa, nave awiixutti akina yaahimutthara. (Yoh 21:2, 3) Nto onikhala wira Yesu aaphavela omooniherya Pedru otthuneya waya opaka yoothanla yaarowa omukhaliherya muhoolo. Niireke Pedru aarowa othanla muteko awe woototha ihopa seiyo suukeliwe ohoolo wawe? Wala aarowa opweha opuro woopacerya soophavela sa omunepani olyihaka ipwittipwitthi wala atthareli a Yesu?—Yoh 21:4-8.
emara yaneraru: Pedru aahimukhootta Pwiya awe ikwaha tthaaru; vano Yesu aahinvaha eparakha ya wooniherya muupuwelo awe ikwaha tthaaru. Vaavo Pedru aapanke awe eyo, Yesu aahimutumererya wooniherya ophenta iwo opwehaka opuro woopacerya miteko sa Muluku ni itthu sikina. Hoothe ni anna akina oororomeleya, Pedru aarowa olyiha, olipiha ni okukhula ipwittipwitthi sa Kristu, eyo piiyo, atthareli awe oowaamini. Ekeekhai wira otheene aya aathanliwa, masi ahaana ovikaniha olyihiwa mwa omunepani.—Luk 22:32.
Otokosa Itthu sa Efaita Soomunepani
nwtsty enoota yoosoma ya Yoh 20:17
Muhikivaré: Nuulumo na eGriki noowi haʹpto·mai pooti otaphuleliwa so: ‘okwata’ wala ‘ovara mmatatani’. Anamataphulela akina anitaphulela so: “Muhikikwate”. Yesu khahiyo aamukhoottiherya Maria Madalena onvara, maana owo khaakhoottihenrye athiyana akina onvara okathi yanwenhe aya nuumala ohihimuwa, Biibiliya onihimya wira athiyana awo “yahinvara inawu”. (Mat 28:9) Vanikhala wira Maria Madalena aanoova wira Yesu aamutthikela wiirimu. Mwaha wa ophavela wawe okhala ni Pwiya awe, owo aaninvara Yesu wira ohirowe wiirimu. Wira Yesu omukupalihe Maria Madalena wira khaarowa omunyanyala, aahimukhoottiherya onvara ni aahimuruma orowa waaleela awiixutti akina ihapari iye sa ohihimuwa wawe.
nwtsty enoota yoosoma ya Yoh 20:28
Pwiy’aka ni Muluku aka!: “Pwiya aka miyo ni Muluku a [ho the·osʹ] miyo!” Asomi akina anihimya wira moolumo ala yaalavuliwe ni Tome omuhimyaka Yesu anooniherya otikinihiwa, masi aamuroihela Muluku, Tiithi awe. Atthu akina anihimya wira eGriki yoopacerya enivekela wira moolumo ala ahaana wooniwaka wira aaroiheliwa Yesu. Hata vari siiso mwaha ene onihimmwa ni moolumo oowi “Pwiy’aka ni Muluku aka” anniiwanyeya saana ipantte sikina sa Soolempwa sa Muluku. Okhala wira mwaha onilavuliwa onooniherya wira Yesu aahaaroihela atthareli awe muhupi waahimya so: “Miyo kinrowa w’Atithi, yawo-tho akhanle Atith’inyu: kinrowa wa Muluku aka, yowo-tho okhanle Muluku anyu”. Khaavo mathowa akhanle oonikupaliha wira Tome uupuwela wira Yesu aari Muluku Oowerya Sotheene. (Nwehe enoota yoosoma ya Yoh 20:17.) Tome aahimwiiwa Yesu onvekelaka “Tithi” awe, omuhimyaka okhala “Muluku mmosáru èkekhai”. (Yoh 17:1-3) Nto etthu yaamwiirinhe Tome omuhimya Yesu okhala “Muluku aka” waari mwaha wa omoonaka Yesu okhala muluku ohiya Muluku oowerya sotheene. (Nwehe enoota yoosoma ya Yoh 1:1.) Aahiiso owo aahilavula ni Yesu mwa enamuna emosaru sintoko arumeyi akina a Muluku yaalavunle aya ni malaikha, sintoko sinihimya aya Soolempwa sa eHeeberi. Woonasa wene Tome aanisuwela sowiiraneya sa atthu awo, wala myaha sa alipa oomulepa Biibiliya a khalai, yaawo yaalavunle ni malaikha a Muluku vakhalaka ntoko wira yaalavula ni Yehova Muluku. (Mulikanyiherye ni Map 16:7-11, 13; 18:1-5, 22-33; 32:24-30; Mak 6:11-15; 13:20-22.) Ti maana aya waanyiheryasa Tome aamwiitthanne awe Yesu ni masu oowi “Muluku aka”, maana aahisuwela wira Yesu aari namitthaka a Muluku eekeekhai.
12-18 YA NOVEMBRO
MIHAKHU SINIKHUMA MBIIBILIYANI | MITEKO 1-3
“Muloko wa eKristau Waahaakhela Munepa Wootteela”
w86 1/12 29 itti. 4-5, 7
Soovaha Sinitteeliha Murima
Nihiku noopacerya waakhumelenle aya muloko wa eKristau, mwaakha wa 33 Nuumala Kristu Orwa, atthu oowiiraka 3.000 yaabatiziwe niinano yaahiviriha okathi ‘elyaka vamosa, ni yanithukuma wira alompe’. Exeeni yaawiiriha opaka eyo? Awo yaaphavela olipiha waamini waya ni ovikaniha ‘okhalela nthiti wiwa mixuttiho s’arummwa’.—Mit 2:41, 42.
AYuda ni atthu akina yaakenle eyuda othana-thanaru yaaronwe oYerusalemu khiyaarina palano a opisa nuumala ovira Niira na Pentekoositi. Masi atthu yaakenle eKristau, yaahuupuwela okhala okathi munceene oYerusalemu wira yiixutte itthu sinceene ni elipihe waamini waya wa niinaano. Nto eyo yaahikumiherya muxankiho wa othowa eyoolya ni opuro woorupa. Ekeekhai wira yaahikhala anamurwa yaarina musurukhu munceene, masi yaahikhala akina yahaarina. Eyo yaahiiriha otthuneyaka otakaahiwa mireerelo wala eyoolya yaakhanle ni okaweliwa ale yahaarina etthu.—Miteko 2:43-47.
Atthu awo yaanitumiha mootaphuwa mireerelo saya ni yaanikhaliheryana. Khuuvo aakhanyereriwa otumiha wala ovaha etthu, nave eyo khahiyo yaatumererya atthu okhala amasikhini. Yoolukama ya mareheryo awo khahiyo waari waatumererya athaaciri otumiha mireerelo saya sotheene wira ekhale amasikhini. Othunku ti waawiiriha athaaciri otumiha mireerelo saya ni osonkherya musurukhu ene wira ekhaliherye soophavela sa Omwene.—Mulikanyiherye ni 2 aKorinto 8:12-15.
Otokosa Itthu sa Efaita Soomunepani
it-2 543 etti. 1
Yesu Kristu
“Mwanene Ekumi”. Mwaha wa oreera murima wa Tiithi awe, Yesu Kristu oovaha ekumi awe yoomalela ya opinaatamu sintoko mukuttho. Eyo yookumiherya waataana eriyari ya Kristu ni arumeyi awe oothanliwa okathi wa olamulelo wawe wiirimu, ni yookhaliherya okhala arumeyi a Muluku valaponi okathi wa eKuvernu ya Omwene awe. (Mat 6:10; Yoh 3:16; aÉf 1:7; aHé 2:5; nwehe mpantta oni RESGATE.) Kristu oopakeya “Mwanene [“Príncipe (Mukhulupale),” KJ; JB] Ekumi” ya apinaatamu otheene. (Mit 3:15) Nuulumo nla na eGriki noowi “Mwanene Ekumi”, okhala wene nintaphulela “muhooleli oopacerya”, ninlikana ni mwiihaneliwo aitthaneliwa awe Moise sintoko “mukhulupale” a wIsarayeli.
cl 265 etti. 14
Muluku ‘Onnoolevelelani’
14 Olevelela wa Yehova onnihimmwa-tho yoolepa ya Miteko 3:19: “Murukunuxe mirima sanyu, muhokolowele wa Muluku, wira sittipihiwe itampi sanyu”. Moolumo ookiserya a efrase ela ataphuleliwe ekumihiwaka verbo a eGriki yoowo onitaphulela so: wuukuttha, . . . ottipiha, olevelela, opwetexa. Moovarihana ni asomi akina, muupuwelo oniphavela ohimmwa-va ti ottipiha etthu elempwale mmatatani. Eyo yaapakiwa sai? Etinta yaarumeeliwa okathi wa khalai, yaapakiwa ni itthu sintoko makhala, esenya ya miri, ni maasi. Moohipisa nuumala mutthu olepa, aaniwerya ottipiha orumeelaka esponja yoonaana. Ela enamuna yooloka ya olikanyiherya olevelela wa Yehova. Vaavo owo onlevelela awe itampi sahu onlikana ni ottipiha orumeelaka esponja.
19-25 YA NOVEMBRO
MIHAKHU SINIKHUMA MBIIBILIYANI | MITEKO 4-5
“Awo Yaahivikaniha Olaleya Nuulumo na Muluku Moolipa Murima”
w08 1/9 15, ekaaxa
Moota Moolumo Yalavuliwe Yaapakeyale Aya Soolempwa sa Muluku—Malepeliwo ni Makristau Oopacerya
Niireke Arummwa Yaari Atthu Oohisoma?
Makhulupale ni mahumu a oYerusalemu yaahitikinihiwa vanceene vaavo yaasuwenle aya wira nnaamwi Pedru ni Yohani yahaasomme, yaalavula ni “wilipiha n’uhovelela”. (Miteko 4:13) Niireke tthiri arummwa khiyaasomme? Olavulaka voohimya sa mwaha owo, A Nova Bíblia do Intérprete (Biibiliya musya a anamataphulela ), ohimmye so: “Vanikhala wira moolumo awo yaiwexexiwa ntoko nthoonyeryo, ohiya moophavela wooniherya wira Pedru ni Yohani khiyaasomme muxikola, ni khiyaasuwela osoma ni olepa. Moolumo a Biibiliya oowi ‘yarookhalaru atthu yahasomme’, anooniherya ovirikana waakhanle eriyari ya aphuki a milattu ni arummwa”.
w08 15/5 30 etti. 6
Iponto Suulupale sa Eliivuru ya Miteko
4:13—Niireke Tthiri Pedru ni Yohani khiyaasomme? Nnaari, awiixutti awo yaahisoma. Awo yaanithokoreriwa okhala atthu “yahasomme” mwaha woowi khiyaainihiwe nikuruta ixikola sa etiini sa marabino.
it-1 159 etti. 8
Arummwa
Muteko Woolaleerya Mmulokoni Mwa Ekristau. Mwaha wa arummwa ovahiwa munepa wootteela wa Muluku, awo yaahilipiheya. Ikapiitulu 5 soopacerya sa eliivuru ya miteko sinnilavula voohimya sa ohoova ni olipa murima wa arummwa vaavo yaalaleya aya ihapari sooreera ni ohihimuwa wa Yesu nnaamwi yaatthukweliwa mukhatteya, omaniwa ni wiiviwa ni makhulupale a elapo. Evinre ene mahiku vakhaani nuumala Pentekoositi, mwaha wa ohoolela wookhalela wa arummwa, yaawo yeettihiwa ni munepa wa Muluku, atthu yaamwaamini Yesu yaahincerereya. (Mit 2:41; 4:4) Woopaceryani wene awosa yaalaleerya vanceenexa oYerusalemu, masi nuumala-vo muteko ole waahiphiya oSamariya, ni ovinre ene okathi ihapari sa omwene saahiphiya ilapo sikina saasuweliwa okathi ole.—Mit 5:42; 6:7; 8:5-17, 25; 1:8.
Otokosa Itthu sa Efaita Soomunepani
it-3 209 etti. 1
Nluku noolipiha empa
Esalimo 118:22 enooniherya wira nluku alipa ooteka empa yaarihale aya naamukhala nluku “n’olipiha emp’eyo” (eHeberi., roʼsh pin·nahʹ). Yesu aahiromola eprofesia eyo iihimyaka mmansawe sintoko nluku ‘nolipiha empa’ (Egriki, ke·pha·leʹ go·niʹas, nluku ninrumeeliwa vanloothoni). (Mat 21:42; Mar 12:10, 11; Luk 20:17) Sintoko nluku nootepa wunnuwa na epreediu niri aya nootthuneya vanceene, Yesu Kristu nluku nootthuneyexa na muloko wa maKristau oothanliwa, maana onnilikanyihiwa ni etemplo ya omunepani. Nave aahihimya wira Esalimo 118:22 yaamuhimya Yesu, ooniheryaka wira Yesu tori “nluku” naarihiwe masi naathanliwe ni Muluku wira okhale ‘nluku n’olipiha empa’.—Mit 4:8-12; munwehe-tho 1 Pe 2:4-7.
Pedru ni Ananiya Yahootha—Etthu Xeeni Eniixutta Ahu?
Ananiya vamosa ni mwaara awe yaahitumiha epantte emosa ya ematta aya wira musurukhu ene akhaliheriwe ale yaabatiziwe niinaano. Okathi Ananiya aaruuhale awe musurukhu khwavahererya arummwa, aahimyale wira musurukhu wotheene aahiruuha. Masi amootha! Maana aahivukulanya khwiisukerya! Muluku aahimwiiriha Pedru osuwela etthu yiiranen’ye, tivonto Pedru aahimyale awe wa Ananiya: “Khanwotonthe atthu, mmotonthe Muluku”. Okathi ene yoowo Ananiya aahimora, khukhwa! Nuuvira iwoora tthaaru, aahivolowa mwaara awe. Ohisuwelaka etthu yaamwiiranenle iyawe, aahihimya itthu sowootha, khumora nto khukhwa.
26 A NOVEMBRO–2 A DEZEMBRO
MIHAKHU SINIKHUMA MBIIBILIYANI | MITEKO 6-8
“Muloko wa Niinaano wa EKristau Waheehereriwa”
“Etthu yotepa otthuneya omwiwelela Muluku”
17 Eseekulu yoopacerya, nuumala okhumelela muloko wa eKristau, waahikhumelela muxankiho muulupale mmulokoni mmo. Muxankiho xeeni? Atthareli anceene yaabatiziwa khahiyo yaari a oYerusalemu ni yaaniphavela wiixutta itthu sinceene ehinatthi ohokolowela owaani. Okhala wira atthu awo khiyaarina eyoolya yaaphiyerya vamosa ni itthu sikina, arummwa moohikhanyereriwa yaahivaha musurukhu wira yaakhaliherye atthu awo. (Miteko 2:44-46; 4:34-37) Nto eyo yaahikumiherya muxankiho muulupale. Vaavo yaakaiwa aya eyoolya khula nihiku, athiyana anaamukhweli yaalavula eGriki, “khiyàjaliwa sana”. (Miteko 6:1) Masi anaamukhweli yaalavula eHéberi yaanithokoreriwa saana. Vanikhala wira muxankiho owo waahela muhina nthalu. Hata itthu saamukhaani pooti okumiherya okawanyana.
“Etthu yotepa otthuneya omwiwelela Muluku”
18 Evaraka sintoko nikhuuru noolamulela na muloko wa eKristau, arummwa yaahiweha wira ‘khivarerela ohijalela olaleya molumo a Muluku, wira ekaweke yolya’. (Miteko 6:2) Wira ophukiwe muxankiho owo, arummwa yaahirumiha othanliwa alopwana “òsareya eroho yowarya [munepa woottela] ni ànkhili”. (Miteko 6:3) Vaatthuneya waarumeela atthu oophwanelela maana muteko ole khahiyo paahi waahela muhina okawa eyoolya, masi-tho orumeela musurukhu, othuma itthu ni olepa saana musurukhu orumeeliwe. Alopwana otheene yaathanliwe masina aya yaari a eGriki, waaniheryasa wira eyo yaakhaliherye anaamukhweli aGriki waaroromela vanceene maKristau ale. Nuumala othokoreriwa mwaha ole ni mavekelo wira osuweliwe vakhala wira tthiri alopwana awo 7 yaanipwanelela, arummwa yaahaavaha muritti wa ovara “mutek’owo wa yolya”.
Otokosa Itthu sa Efaita Soomunepani
Siteefano ‘ahisareya eparakha n’ikuru’
2 Okathi ole yookhala etthu yootikiniha yiiraneya ni ethoi ya Siteefano. Okathi aphuki yanwehexexa aya “yahona wira owitho wawe walikana n’owitho wa nlaikha”. (Miteko 6:15) Malaikha annilaleya ihapari sa Yehova Muluku, ti maana aya awo aakhalana mathowa a olipa murima, okhala a murettele, ni oomaaleleya. Etthu emosaru yahiiraneya ni Siteefano okhala wira hata aphuki anamalupattha yaahinwehana mikhalelo iyo. Moota xeeni owo aari awe oomaaleleya?
Filipe Aahilaleya “Ehapari Yorera ya Yesu”
16 Olelo-va maKristau aakhalana eparakha ya wiirela mpantta muteko sintoko ole waavariwa ni Filipe. Ikwaha sinceene awo annikhalana eparakha ya waalaleerya ihapari sa Omwene atthu yaale anaaphwanya aya mootutuxerya, sintoko okathi aneetta aya mikwaha. Ikwaha sinceene vanooneya wira ovaanela ni mutthu onisiveliwa ekeekhai khoniiraneya mekhaya. Tthiri naanilipelela eyo, maana Biibiliya onnooniherya wira malaikha annihoolela muteko woolaleerya wira ihapari saphwanye “atthu a maloko othene ni a mahimo othene ni a malavulelo othene ni a ilapo sothene”. (Wis. 14:6) Moolumo a nlaikha voohimya sa muteko woolaleerya annaakhwaniherya veekeekhai ele Yesu aaleihenrye awe. Okathi aalavula awe nlikanyiho na nthakathaka, ni etrigu, Yesu aahihimya wira okathi woohepha, wala omala wa itthu sootakhala, “Alipa-òhepha”, yaarowa okhala “malaikha òrera”. Nave aahihimya wira soopattuxiwa iyo sa omunepani sinrowa, “wathukumanya othene ale anatthekiha akhaw’aya n’ale anìra sotakhala ewomole momweneni mwawe”. (Mat. 13:37-41) Okathi omosaru yoowo malaikha animwaathukumanya atthu Yehova oniphavela awe waathanlela mmutthenkesoni mwawe, eyo piiyo, atthu anrowa waakhela etthuvo moomweneni wiirimu, ni nuuvira okathi “muttitthi mulupalexa w’atthu” a “ipwittipwitthi sikina”.—Wis. 7:9; Yoh 6:44, 65; 10:16.