MAKOHO ANIKOHIWA NI ALE ANISOMA IREVISTA SAHU

Anithanliwa sai axitokweene ni arummwa oorumeela a khula muloko?

▪ Eseekulu yoopacerya EC, murummwa Paulo aahimeeryale so axitokweene yaarumeela muloko wa wEfeso: ‘Mwikasopeke mmansinyu, mwakhapeleleke aKristu othene munepa wotteela wovahalyayani wasuka ntoko amakampusi, wira mwettiheke sana muloko wa Muluku, yowo oithukumanyenryawe n’ukhwa wa Mwan’awe mmosene’. (Mit. 20:28) Muteko xeeni munepa wootteela orina aya voohimya sa othanliwa wa axitokweene ni arummwa oorumeela olelo-va?

Yoopacerya, munepa wootteela waahaakhaliherya alipa oomulepa Biibiliya olepa makhalelo anireerela aya okhalana axitokweene ni arummwa oorumeela. Makhalelo 16 oovirikana anireerela aya okhalana axitokwene ahaalikeleliwa va 1 Timótheyo 3:1-7. Makhalelo makina anniphwanyaneya soolepa ntoko Tito 1:5-9 ni Yakobo 3:17, 18. Mikhalelo sa arummwa oorumeela sinaalikeleliwa va 1 Timótheyo 3:8-10, 12, 13. Yanenli, anna anaavarerya ni waathanla anna awo annipaka nivekelo nooluluwanya wa Yehova avekelaka wira munepa wootteela waakhaliherye woona vakhala wira anna awo anniphwanelela moovarihana ni ele enihimmwa mBiibiliyani. Yaneeraru, atthu ale anivareriwa wira athanliwe ahaana wooniherya muhokorokho wa munepa wootteela wa Muluku mweekumini mwaya. (aGal. 5:22, 23) Tthiri munepa wa Muluku onniheliwa muhina okathi wotheene onithanliwa awe mutthu.

Masi ti pani onaathanla tthiri anna awo? Khalai ipaphelo sotheene saatumererya othanliwa wa mutokweene wala murummwa oorumeela saaroihiwa oFiliyaali ya elapo yeeyo. Vano anna ooweemereriwa ni Nikhuuru Noolamulela yaanivarerya ipaphelo iyo ni waathanla ale yaawoona aya oreerela. Nuumala-vo efiliyaali yaanaaroihela epaphelo axitokweene a muloko owo. Nto axitokweene yaanimuleela munna owo wira oothanliwa ni yaanimukoha vakhala wira onneemererya ni onniphavela ovara muteko owo. Wanikisa waya aanilaleiwa mmulokoni.

Masi anna awo yaathanliwa sai eseekulu yoopacerya? Ikwaha sikina arummwa a eseekulu yoopacerya yaanathanla atthu wira akhaliherye muteko, ntoko okathi ole waathanliwe alopwana ale 7 wira akhapelele mwaha wa waakawela yoolya anaamukhweli khula nihiku. (Mit. 6:1-6) Woonasa wene, alopwana ale yiira arumeelaka ntoko axitokweene ahinatthi ovahiwa muteko ole mukina.

Nnaamwi soolempwa sihitthokiheryaka moota yaathanliwa aya, hiyo nnoowerya woona moota eyo yiiranenye aya. Biibiliya onnihimya wira okathi yoole Paulo ni Baarnaba waatthikela aya owaani nuumala mukwaha aya woopacerya wa omisionaario, ‘Khula muloko wa aKristu yahathanlela mahumu [axitokweene], numalá olompa ni otthukwa, yahavelela Apwiya [Yehova], atthu yawo yawaminnyaya’. (Mit. 14:23) Iyaakha vakhaani muhoolo mwaya, Paulo aahimulepela mutokweene oweettetta mukina Tito oriki: ‘Miyo kihohiyani o Kereta wira mmalelihe sipajenryaka ovara, ni wira mwathanle alipa-òwettiha aKristu [axitokweene] mwa khula muttetthe, muttharaka solénlyakani’. (Tito 1:5) Vamosaru, Timootheyo yoowo aamakela weetteetta ni murummwa Paulo, aahivahiwa owerya wa waathanla axitokweene mmulokoni. (1 Tim. 5:22) Tthiri vanniiwanyeya saana wira axitokweene oweetteetta tiyaathanla axitokweene mmulokoni, ohiya arummwa ni mahumu yaari oYerusalemu.

Mwaha wa malakiheryo awo, a mBiibiliyani, Nikhuuru Noolamulela na Anamoona a Yehova noopaka marukunuxo a inamuna sinthanliwa aya axitokweene ni arummwa oorumeela. Nto okhuma 1 a Setembro 2014, anna awo anrowa othanliwaka mwa enamuna ela enittharelana: Khula mutokweene a sirkwitu tonirowa ovareryaka mikhalelo sa anna otheene anooniwa oreerela wira akhale axitokweene wala arummwa oorumeela. Okathi mutokweene a esirkwitu onirowa awe oxekuryaka muloko, onrowa omananihaka waasuwela anna otheene anireerela othanliwa, ovaraka muteko vamosa ni anna awo otheene. Nuumala othokorerya makhalelo a anna awo ni axitokweene a muloko owo, mutokweene a esirkwitu torina muritti wa waathanla axitokweene ni arummwa oorumeela a miloko sa esirkwitu awe. Mwa enamuna eyo marehereryo awo annikhuveela ni ele yaapakiwa eseekulu yoopacerya.

Ti pani onikhapelela mpantta muulupale wa muteko owo? Ntoko siniiraneya aya okhuma khalai, “murumeyi òroromeleya ni ànkhili” torina muritti muulupale wa waalyiha atthu a Muluku. (Math. 24:45-47) Eyo enihela muhina otokosa Soolempwa, akhaliheriwaka ni munepa wootteela wa Muluku annivaha miruku soovareleya muteko sinikhuma mBiibiliyani, seiyo sinooniherya moota sinitthokihiwa awe muloko wa olumwenku wotheene. Murumeyi oororomeleya tonaathanla axitokweene a esirkwitu ni anna a Ekomisau ya eFiliyaali. Khula efiliyaali, ennikhaliherya wira atthariheliweke malakiheryo otheene anivahiwa aya. Khula nikhuuru na axitokweene, nookhalana muritti wa otokosa oratteene Soolepa, wira yoone akhala wira anna anaathanla aya anniphwanelela tthiri ohoolela muloko wa Muluku. Khula mutokweene a esirkwitu, ookhalana muritti muulupale wa otokosa oratteene ni opaka mavekelo wira oone akhala wira anna athanliwe ni axitokweene a khula muloko, anniphwanelela.

Vaavo vaniiwexexa ahu oratteene moota anithanliwa aya anna awo, hiyo ninrowa otepa oxukhurela muteko onivara awe munepa wootteela. Tthiri hiyo ninnaaroromela ni waattittimiha anna otheene athanliwe ni munepa wootteela anirumeela muloko wa eKristau.​—aHéb. 13:7, 17.

Ti pani akhanle anamoona anli aniromoliwa ekapitulu 11 ya eliivuru ya Wisupulula?

▪ Eliivuru ya Wisupulula 11:3 enilavula sa anamoona anli yaawo yaarowa olaleerya mwa mahiku 1.260. Biibiliya onihimya wira enama yoowali yaarowa “wawerya n’uwiva”. Masi “n’uvira mahiku mararu ala nnusu” anamoona awo anli yaamutthikela okhala akumi, nto eyo yaamwatutuxa ale yaarowa waawehaka.​—Wis. 11:7, 11.

Vano ti pani ari anamoona awo anli? Soohimmwa kamosa-kamosa sa yoolepa ela sinoonikhaliherya waasuwela awo. Etthu yoopacerya, hiyo ninnileeliwa wira awo “ti miri mili s’olivera ni ti mithuko mili”. (Wis. 11:4) Eyo enninuupuxerya mithuko miili ni miri miili sa olivera siromoliwe ni eprofesia ya Zakariya. Miri iye sa olivera sinihimmwa wira saathoonyerya “alopwana anli Muluku àthanlalyawe”, eyo piiyo, Guvernatoro Zorobabeli ni Namukuttho Muulupale Yoxuwa, yaawo yeemenle ohoolo wa “Mwene a elapo yothene”. (Zak. 4:1-3, 14) Etthu ya nenli, anamoona awo anli annihimmwa wira annipaka miiriirya ntoko iye saapakiwe ni Moise ni Eliya.​—Mulikanihe Wisupulula 11:5, 6 ni Mothakoni 16:1-7, 28-35 ni 1 Mamwene 17:1; 18:41-45.

Etthu xeeni eniiriha soolepa iya olikanaka? Khula yoolepa enilavula sa atthu oowoottihiwa a Muluku yaawo anihoolela muteko awe okathi wooxankiha ni wa sooweeha. Tivonto okathi yaakhwanenle aya yoolepa ya Wisupulula ekapitulu 11, anna oowoottihiwa yaawo yaahoolela muteko okathi yoole otikitheriwe awe Omwene wa Muluku wiirimu mwaakha wa 1914 yaalaleerya awanre ene “isakho” mwa iyaakha tthaaru nnuusu.

Nuumala okathi ole yaalaleerya aya awanre ene isaakho, alipa oowoottihiwa ale yaahiiviwa mwa nthoonyeryo, vaavo yaariheliwe aya mukhatteya mwa okathi vakhaani onilikanyihiwa okhala mahiku mararu nnuusu. Mmoonelo wa awanani a Muluku, muteko aya waahimalamala ni eyo yaahikumiherya ohakalala wunceene wa awanani ale.​—Wis. 11:8-10.

Hata vari siiso, moovarihana ni eprofesia ele, wuukiseryani wa mahiku mararu nnuusu, anamoona ale anli yaarowa otthikela okhala akumi. Ohiya okumihiwa mukhatteya paahi alipa-oowoottihiwa ale yaavikaninhe okhala oororomeleya, yaahaakhela muteko wa vameekhaaya waavahiwe aya ni Mwene aya Yesu Kristu. Mwakha wa 1919, awo yaahiirela mpantta nikhuuru nle naathanliwe khukhala “epottha yoororomeleya ni ya ankhili” yeeyo yaarowa okhapelelaka sootthuneya sa omunepani sa atthu a Muluku mahiku ala ookiserya.​—Math. 24:45-47; Wis. 11:11, 12.

Etthu yoorerela osuwela, okhala wira Wisupulula 11:1, 2, onilavula sa okathi empa ya Muluku ya omunepani yaarowa aya ophimmwa wala olokiheriwa. Malakhiya ekapitulu 3 onnilavula nave sa okathi omosaru yaarowa aya olokiheriwa empa ya Muluku ya omunepani nuumala-vo yaarowa oreerihiwa. (Mal. 3:1-4) Muteko ola wa olokiheriwa ni oreerihiwa waarowa oviriha mahiku makavi ovariwaka? Muteko owo waavariwe okhuma mwaakha wa 1914 mpakha mpantta woopacerya wa mwaakha wa 1919. Okathi owo onihela muhina mahiku ale 1.260 (myeeri 42) ni mahiku ale mararu nnuusu a nthoonyeryo aniromoliwa eliivuru ya Wisupulula ekapitulu 11.

Tthiri ti voohakalaliha osuwela wira Yehova aahipaka marehereryo awo wira waalokiherye atthu awe omunepani wira ‘akhale nloko norerihiwa, akhalé awawe, aphavelexaka ovara miteko sorera’! (Tito 2:14) Ohiya-vo, hiyo ninnixukhurela ntakiheryo nooloka nivahiwe ahu ni alipa-oowoottihiwa oororomeleya yaawo yaahoolela muteko wa Muluku okathi wa mixankiho ni sooweeha ni yaawo yaarumenle ntoko anamoona anli.a

[Enoota]

[Ekaaxa epaaxina 29]

MITEKO SA ALE ARINA MURITTI WA WAATHANLELA MITEKO ANNA

NIKHUURU NOOLAMULELA:

Ninnivaha malakiheryo oovareleya muteko anikhuma mBiibiliyani a moota sinrowa aya ovaraka muteko muloko wotheene ori valaponi. Ninnaathanla axitokwene a esirkwitu ni anna a Ekomisau ya eFiliyaali.

EFILIYAALI:

Tenivaha malakiheryo a moota woottharihela malakiheryo otheene anivahiwa ni Nikhuuru Noolamulela.

NIKHUURU NA AXITOKWEENE:

Ninnitokosa Soolepa sinilavula sa moota wowaathanla anna aniphavela aya wira akhale axitokweene wala arummwa oorumeela.

MUTOKWEENE A ESIRKWITU:

Onnaatokosa ni ephoole ni mavekelo anna anivahereriwa awe ni axitokweene anooniwa oreerela miritti mmulokoni.

ANNA ANIREERELA OTHANLIWA:

Ahaana wooniherya muhokorokho wa munepa ni waakhwaniherya itthu sotheene sinivekeliwa mBiibiliyani wira aphwanelele.