YOOSOMA 26
Xeeni Ohaawa ni Itthu Sootakhala Siniiraneya Aya?
Vaavo enikhumelela aya ehasara, atthu anniikoha wira: “Xeeni etthu ela ehalaka okhumelela?” Ti voohakalaliha osuwela wira Biibiliya onnaakhula nikoho nla!
1. Ohaawa opacenrye sai valaponi?
Satana Diabo, khaamwiiwelenle Muluku. Owo aaphavela wira aalamuleleke atthu akina. Nto aahiwiiriha apinaatamu oopacerya Adamu ni Eva ohimwiiwelela Muluku. Satana aawenrye sai opaka eyo? Owo aahinwoka Eva. (Maphattuwelo 3:1-5) Satana aahimwiiriha Eva wuupuwelaka wira Yehova aamukhoottiherya itthu sooloka. Nave aaphavela wooniherya wira apinaatamu yaamuhakalalaka ahimwiiwelelaka Muluku. Nuumala-vo, Satana aahihimya wootha woopacerya. Owo aahimuleela Eva wira khaarowa okhwa. Tivonto Biibiliya onimuhimya awe Satana okhala “nawoothe ni topacenrye wootha”.—Yohani 8:44.
2. Adamu ni Eva yaathanlale opaka exeeni?
Yehova ahaavaha itthu sinceene Adamu ni Eva. Maana owo aahaleela wira alyeeke mihokorokho sa miri sotheene saakhanle exardim ele ya wEdeni. Masi aakhoottihenrye muhokorokho wa mwiri mmosa paahi. (Maphattuwelo 2:15-17) Masi Eva ‘aahirukula muhokorokho mmosá, khulya’. Muhoolo mwaya Adamu yaahilya-tho. (Maphattuwelo 3:6) Tthiri oowanli aya khiyaamwiiwelenle Yehova. Adamu ni Eva yaari atthu oomalela, nto awo yaahaana opaka itthu sooloka okathi wotheene. Masi awo yaahithanla ohimwiiwelela Muluku. Nto mwaha wa opaka eyo, awo yaahittheka ni yaahikhootta olamuleliwa ni Muluku. Yoothanla yaapanke aya yaahikumiherya mixankiho sinceene.—Maphattuwelo 3:16-19.
3. Yoothanla ya Adamu ni Eva enikumihenrye exeeni?
Nuumala Adamu ni Eva ottheka, awo yaahikhalana etampi, nto ahaaraviha etampi eyo anaaya ni osuulu aya wotheene. Omuhimyaka Adamu, Biibiliya onihimya so: “Etampi yookela moolumwenkuni mwaha wa mulopwana mmosa, nto etampi eyo yooruuha okhwa. Siiso, okhwa ohaaphwanya atthu otheene”.—aRoma 5:12.
Etampi enninikumiherya mixankiho mwa inamuna soovirikana. Okathi mukina, hiyo ninnihaawa mwaha wa soothanla soohiloka. Okathi mukina ninnihaawa mwaha wa soothanla soohiloka sa atthu akina, nave ninnihaawa mwaha wa okhala okathi ni opuro woohiloka.—Mmusome Musuweli 9:11.
MWIIXUTTE ITTHU SIKINA
Nwehe itthu sinooniherya wira Muluku khahiyo tonikumiherya ohaawa ni mixankiho siniiraneya olelo-va, nave nwehe moota Muluku onoonela awe vaavo onniweha awe nihaawaka.
4. Tani onikumiherya ohaawa wahu?
Atthu anceene anuupuwela wira Muluku tonilamulela olumwenku. Niireke eyo ekeekhai? Nwehe EVIIDIYU.
Yakobo 1:13 ni 1 Yohani 5:19, nuumala-vo mwaakhule nikoho ninttharelana:
Niireke Muluku tonikumiherya ohaawa ni itthu sootakhala?
5. Itthu xeeni sikhumelenle mwaha wa olamulelo wa Satana?
Musome Maphattuwelo 3:1-6, nuumala-vo mwaakhule makoho anittharelana:
Wootha xeeni Satana aahimmye awe?—Nwehe eversiikulu 4 ni 5.
Satana oonihenrye sai wira Yehova khoniphavela mureerelo wa apinaatamu?
Moovarihana ni Satana, niireke apinaatamu ahaana olamuleliwa ni Muluku wira ahakalaleke?
Mmusome Musuweli 8:9, nuumala-vo mwaakhule nikoho ninttharelana:
Nooweha wira khahiyo Yehova tonilamulela olumwenku. Nto okhala wira khahiyo tonilamulela, itthu xeeni sikhumelenle?
Adamu ni Eva yaari atthu oomalela ni yaakhala mparayiisu. Masi hata vari siiso, awo yaahinwiriyana Satana khuhimwiiwelela Yehova
Nuumala ohiiwelela wa Adamu, etampi, ohaawa ni okhwa woomwareela mulaponi motheene
Yehova onoomaliha etampi, ohaawa ni okhwa. Nto apinaatamu anootthikela okhala oomalela ni anrowa okhalaka mparayiisu
6. Yehova onnoona ohaawa wahu
Niireke Yehova onniweha ohaawa wahu? Nrowe niwehe ele mwene Davidi ni murummwa Pedru yaalempe aya. Musome Esalimo 31:8 ni 1 Pedru 5:7, nuumala-vo mwaakhule nikoho ninttharelana:
Soolepa iya, sinnooniherya wira Yehova onniweha ohaawa wahu ni oniphavela onikhaliherya. Nyuwo munoonela sai osuwela eyo?
7. Muluku onoomaliha ohaawa wotheene
Mmusome Yesaya 65:17 ni Wiisuupulula 21:3, 4, nuumala-vo mwaakhule nikoho ninttharelana:
Xeeni vari aya voomaaliha osuwela wira Yehova onoomaliha mixankiho sotheene sa apinaatamu?
Nyuwo mwaanisuwela?
Okathi Satana oothale awe ekwaha yoopacerya, owo aahihonona nsina na Yehova. Aahipaka eyo wira owiiriheke atthu wuupuwela wira Yehova Namalamulela oohixariya ni oohiphenta. Moohipisa, Yehova onoomaliha ohaawa wotheene. Nuumala opaka eyo, owo onootteeliha nsina nawe ni onimooniherya wira tori namalamulela oolokexa. Otteelihiwa nsina na Yehova mwaha wa itthu onootheriwa awe, etthu yootepexa otthuneya olumwenku wotheene.—Matheyo 6:9, 10.
ATTHU AKINA ANIHIMYA WIRA: “Muluku tonikumiherya ohaawa wahu”.
Nyuwo mwaarowa owaakhula sai?
IPONTO SUULUPALE
Satana Diabo ni Adamu ni Eva tarina nthowa mwaha wa ohaawa wotheene onikhumelela moolumwenkuni. Yehova onninivaha efaita ni moohipisa onoomaliha ohaawa wotheene.
Wuuluula
Satana Diabo anwonke sai Eva?
Mixankiho xeeni sikhumelenle mwaha wa yoothanla ya Adamu ni Eva?
Etthu xeeni ennikupaliha wira Yehova onniweha ohaawa wahu?
NWEHE ITTHU SIKINA
Nwehe moota Biibiliya onitthokiherya awe etampi.
Musome itthu sikina voohimya sa mwaha Satana Diabo aakumihenrye awe exardim ya wEdeni.
“Xeeni Muluku Onaahiya awe Atthu Ehaawaka?” (Owehaweha, 1 a Janero, 2014)
Nwehe waakhuliwa wa nikoho nnaaxankiha atthu anceene.
“Xeeni Muluku Ahaakhottihenrye Awe Okhumelela Holocausto?” (Mmwaha ori va jw.org)
Nwehe etthu iixuntte awe mulopwana mmosa voohimya sa mixankiho aarina awe.