BIIBILIYA ONNIRUKUNUXA MIRIMA SA ATTHU
“Nto Vano Koophwanya Otaphuwa Wekeekhai”
Yowiiraneya elavuliwe ni Brian Hewitt
MWAAKHA OYARIWA AWE: 1981
ELAPO OYARIWA AWE: ESTADOS UNIDOS
KHALAI AARI: MWAANA AAKHUMME VATE
MWEETTELO AKA WA KHALAI: Kiyariwe Mundsville, esidade yoomaaleleya onivira muro oniihaniwa Ohio mpantta onikela nsuwa wa Virginia. Kaari mwaana a nenli wa anamwane axexe; nto okhala wira yaari anamwane axilopwana araru, vaanivila omaaleleya owaani. Anamuyari aka yaari oowiilipiha ovara muteko, oororomeleya omutekoni ni owaaphenta atthu akina. Khinnakhalane musurukhu munceene, masi okathi wotheene naanikhalana yoolya ni yoowara. Nto Anamoona a Yehova, anamuyari aka yahiimananiha vanceene oniixuttiha sooruma sa Biibiliya okhuma onamwane ahu.
Okathi waarina ahu iyaakha 13 mpakha 19, murima aka waahipacerya owokeya, kihiyakupali ele yaaxuttihiwe aka. Kinapacerya ohoverya akhala wira weettela sooruma sa Biibiliya onnikumiherya tthiri ohakalala. Kuupuwela wira otthara murima aka paahi ti yaari enamuna yaarowa okiphwanyiha otaphuwa wekeekhai. Moohipisa kaahihiya orowa omithukumanoni sa eKristau. Muulupale aka ni muhima aka yaanitthara mweettelo aka. Anamuyari ahu yahiimananiha onikhaliherya, masi hiyo khinaaphavenle wiiwa.
Okathi ole nkaasuwela wira etthu yaphavela aka, ele enihimmwa okhala otaphuwa, yaarowa okiphwanyiha maxakha manceene. Nihiku nimosa kikhumaka oxikola, mpatthani ooxikola aahikivaha sigaro. Kimwaakhela. Nto okhuma nihiku nle, kaneemya opaka khuta etthu yoohiloka. Nuuvira okathi, kipacerya opaha mirette sinlikana ni esuruma, ohapaliwa, ni oraruwasa. Mwa iyaakha soottharelana, kaanilya mirette sootepa ohapala, sikipahula kihinawerya-tho ohiya. Mwaha wa maxakha awo yaakiphwanya, kaahipacerya otumihaka mirette soohapala wira kithumeke itthu sikina soohiloka.
Nnaamwi kaamananiha ohiiwelela muupuwelo aka waakipwapwela, masi khula okathi kaanoona wira mweettelo aka waari woohiloka. Masi miyo kuupuwela wira ekinre yokiira-tu, itthu sohononeya nto khivanreerela otthikela ottuli. Nto kaakhala wira kiri mekhaka ooriipiwa murima, nnaamwi keetta ni atthu anceene ofestani, ni opuro oniiniwa. Ikwaha sikina kaaniwuupuwela anamuyari aka okhala atthu ooloka ni oophenta, ni moota waatepaka ohiya ephiro yooloka.
MOOTA BIIBILIYA ORUKUNUNXE AWE OKUMI AKA: Nnaamwi kahaaphavela-tho otthikela mweettelo wooloka, akina yaaniphavela okikhaliherya. Mwaakha wa 2.000, anamuyari aka yaahikilattula orowa okongreso a edistritu wa Anamoona a Yehova. Kaahirowa masi koovelelaka. Kaahitikiniheya waaweha orye ene okongresuni, axinna aka a werutthuni yaale-tho yaahiyale weettela sooruma sa Biibiliya.
Kiryeene opuro ole, kahuupuwela wira mwaakha mmosa ovinre kaahitoko ophiya opuro ole wira kimoone konsertu a masipo a rock. Ovirikana konne aka waahivara murima aka ni muupuwelo. Okathi waaryaka okonsertu, opuro ole waahisareya ikokhola ni mwiixi wa sigaro. Anamunceene mwa yaale yamoona konsertu yaari oohipatthaneya, nto isipo saari sooriipiha murima. Masi kongresu ole aari oovirikana, kaarukureriwe ni atthu oohakalala tthiri, atthu yooniherya wira miyo kanaakheliwa, nnaamwi kahaawonale iyaakha sinceene. Opuro ole waari woratteleya saana, nto myaha saalavuliwa saari soolipiha ni soovaha nlipelelo. Oweha moota ikeekhai sa Biibiliya sinikhaliherya aya, waanikiiriha wiikoha wira nto xeeni okhoottaka?—Yesaya 48:17, 18.
Omalakaru kongresu ole, kaahilakela otthikela mmulokoni wa eKristau. Nave-tho axinnaka awerutthuni mwaha wa ele yaawehale aya okongresu, yaahitthikela mmulokoni. Ooraaru ahu naaheemererya osomihiwa Biibiliya.
Eveersu ya Biibiliya yaakivanre murima ti Yakobo 4:8 enihimya so: ‘Mmwattameleke Muluku, owo onowattamelani’. Kaahisuwela wira kaphavela omwaattamela Muluku, kahaana olokiherya mweettelo aka. Mwa itthu sikina saatthuneya olokiherya waari ohiya omulya soona, olya mirette soohapala, ni ohapaliwa.—2 aKorinto 7:1.
Kaahihiya weetta ni apatthani a mulaponi, nto kineetta ni Anamoona a Yehova. MuKristau mmosa aakisomiha Biibiliya aari mutokweene a mmulokoni, aahikikhaliherya vanceene. Ikwaha sinceene aanitelefonari ni okeemexa keettaka wira asuweleke ehaali aka. Nenna-va, munna owo ori muhina mwa apatthani aka ekeekhai.
Mwaakha wa 2001 kaahiivelela wa Muluku kibatiziwa, nave-tho axinnaka ale aweerutthuni aabatiziwa. Nyuwo pooti wuupuwela ohakalala orina aya anamuyari aka, axihima aka yaahanle aryeene oororomeleya, woona wira vano emusi ahu ehiiraana emukokhorelaka Yehova.
MOOTA OTTOTTENLE AKA MUREERELO: Koona wira malakiheryo a Biibiliya anikhoottiherya ohakalala, masi kooweha wira awo anoonikhapelela. Biibiliya ookivaha ikuru sa ohiya olya mirette soohapala wala otumiha; vano kamutthu onivara miteko sooloka onikupaliwa ni atthu otheene.
Kihaana eparakha ya wiirela mpantta emusi ya olumwenku wotheene ya Anamoona a Yehova. Tthiri atthu awo anniphentana, ni towiiraana emurumeelaka Muluku. (Yohani 13:34, 35) Wuncererya omusi wa oKristau orina aka, koophwanya-tho mareeliho maalupale, kihimye so, murokora onitepa aka omphenta ni onvaha efaita—mwaaraka Adriana. Vannitepa ohakalaliha omurumeela Mpattuxa ahu hoothe.
Ohiya ophavela itthu sa elapo ela sinooniherya nrima, vano kihiivahererya okela muteko wa okathi wotheene, wira kiwiixuttiheke atthu osuwela ni ottottela mureerelo Nuulumo na Muluku. Muteko ola onnikikumiherya ohakalala wuulupale. Miyo kinnilavula ni ikuru sotheene wira Biibiliya oorukunuxa murima aka. Nto vano koophwanya otaphuwa wekeekhai.
[Elatarato epaaxina 10]
[Elatarato epaaxina 10]
[Eponto yuulupale ya epaaxina 11]
“Biibiliya ookivaha ikuru sa ohiya olya mirette soohapala wala otumiha; vano kamutthu onivara miteko sooloka onikupaliwa ni atthu otheene”
[Elatarato epaaxina 11]