Moise—Aari Mulopwana Owiiyeviha
EXEENI EKHANLE WIIYEVIHA? Wiiyeviha onihela mpuwa ohiisoona wala ohiixunnuwiha. Mutthu oowiiyeviha tuule ohinoona wira tootepexa otthuneya waavikana akina. Tthiri khuta mutthu yoole ori oohimalela ohaana osuwelaka wira sookhala itthu sikina sihiniwerya awe opaka.
MOISE OONIHENRYE SAI WIIYEVIHA? Moise khaixinnuuha okathi aweettiha awe aIsarayeli. Atthu anceene nuumala waakhela ekhulupale, vannaakuva wooneya akhala wira towiiyeviha wala owixinnuwiha. Robert G. Ingersoll, yoowo aari oosuwela olavula myaha saana, aahimyale so: “Anamunceene anniwerya ovilela mixankiho sinceene. Masi akhala wira muniphavela omusuwela saana mutthu, muhaana onvaha ekhulupale”. Mwa enamuna eyo Moise oovaha ntakiheryo nootepexa oreera. Moota xeeni?
Moise aahivahiwa ekhulupale yuulupale maana Yehova aamurumale oweettiha aIsarayeli. Hata vaari siiso, ekhulupale eyo khiyaamwiirinhe Moise okhala oowixinnuwiha. Nkawehani ntakiheryo nimosa mmoota aathokorenrya awe mwaha mmosa woovila, voohimya sa eparakha ya waakhela yoohiyeriwa. (Mothakoni 27:1-11) Moota warowa aya ophukiwa mwaha ole, waarowa okhala ti etthu yaarowa otthariwaka muhoolo.
Moise aarowa opaka exeeni? Niireke aarowa woonaka wira mwaha wookhala mahoolela a aIsarayeli, khuuvo-tho mutthu mukina aarowa ophuka saana mwaha ole? Niireke aarowa ororomela murima awe, itthu simwiiranenle iyaakha sinci, wala niireke etthu yaamusivela waari weettela miruku sa Yehova?
Woonasa wene mutthu oowiixunnuwiha aarowa otthara murima awe. Masi Moise aahikhootta opaka eyo. Ele elempwe mBiibiliyani enihimya so: ‘Moise aharoihela mwaha ola Apwiya’. (Mothakoni 27:5) Nkahaya muupuwele! Hata saavirale iyaakha 40 oweettihaka aIsarayeli, Moise khaaroromenle murima awe, masi Yehova. Vano ninniweha tthiri wira Moise aari mutthu oowiiyeviha saana.
Moise khuupuwela wira yena mekhawe paahi taphwanela okhala mukhlupale. Murima aahimutteela okathi Yehova aaweemyale awe aIsarayeli akina okhala maprofeta. (Mothakoni 11:24-29) Okathi yoole taataawe anvahale awe miruku Moise, wira miteko sikina sivariweke ni atthu akina, mowiiyeviha Moise aaheemya miruku sa taataawe. (Okhuma 18:13-24) Nto aattamelaka wanikisa wa okumi awe, nnaamwi nlelo aarina ikuru, Moise aahiveka wa Yehova wira omuthanle mutthu aarowa okhala muhooleli. Nuumala Yehova omuthanla Yoxuwa, Moise aahimukhaliherya Yoxuwa ni murima awe wotheene, nnaamwi Yoxuwa aari mmiravo, khwaatumererya atthu omutthara Yoxuwa wira evolowe Elapo Yoleiheriwa. (Mothakoni 27:15-18; Otumererya 31:3-6; 34:7) Ekeekhai wira Moise anoona okhala eparakha, waalakiherya aIsarayeli wira amukokhoreleke Muluku. Masi owo khoona wira ekhulupale awe ti yaarina efaita waavikana akina.
ITTHU XEENI SINIIXUTTA AHU? Niheemye okhala owiixinnuwiha mwaha wa owerya orina ahu, ekhulupale ahu, wala osuwela wahu itthu. Muupuweleke so: Wira Yehova oneemye ovara muteko awe, wiiyeviha wahu ohaana okhala wuulupale ovikana itthu sinisuwela ahu. (1 Samuweli 15:17) Akhala wira tthiri na atthu owiiyeviha, ninrowa omananihaka, ovarela muteko miruku iya sa Biibiliya: “Mwaroromeleke Apwiya ni murim’anyu wothene, muhiroromelé osuwela wanyu pahi!”—Miruku 3:5, 6.
Ntakiheryo na Moise nihaana oniixuttiha-tho wira nihitepeke ovahexa efaita, ovuwa wala okhulupale ahu.
Niireke nnoottottela mureerelo natakiha wiiyeviha wa Moise? Aayo! Akhala wira ninniphavela okhala tthiri mutthu oowiiyeviha, ninrowa okhweiherya okumi wa atthu akina anikumana ahu, nto awo anonoonaka okhala atthu ooloka. Etthu yootepa otthuneya ninrowa okhala atthu oophwanelela wa Yehova, yoowo ori Muluku onooniherya saana wiiyeviha. (Esalimo 18:36) “Muluku onnakhotta atthu òwisona, masi onnakhaliherya atthu òwiyeviha”. (1 Pedru 5:5) Tthiri aakhala mathowa manceene anniiriha ophavela omutakiha Moise!
[Elatarato epaaxina 5]