Maphukelo a Muluku—Yaari Ootakhala?

WIRA NIIWEXEXE nikoho nla, nrowe niwehe mowaakuveya matakiheryo manli a ophukela wa Muluku ari mBiibiliyani: Mutaaseke a mahiku a Nowe ni opwetexiwa wa atthu ooKanani.

MUTAASEKE A MAHIKU A NOWE

ELE ATTHU AKINA ANIHIMYA AYA: “Muluku aahitakhala vaavo aamukumihenrye awe mutaaseke aawiivale atthu otheene omuhiya paahi Nowe ni emusi awe”.

ELE BIIBILIYA ONIHIMYA AWE: Muluku oni: “Miyo nkinsiveliwa n’ukhwa w’alipa-òttheka. Kinniphavelexa wira anatampi erukunuxe mukhalelo aya, ekhalane ekumi”. (Ezekiyeli 33:11) Tivonto opwetexiwa wa atakhali wa mahiku a Nowe khiwaamusivenle Muluku. Nto xeeni owo ohalaka opaka eyo?

Biibiliya onaakhula wira vaavo Muluku aaruuhale awe maphukelo awo voohimya sa atthu ootakhala okathi wa khalai, owo aavaha ‘ethonyeryo [wa] alipa-òttheka itthu sarowaya wirihiwa’. (2 Pedru 2:5, 6) Nthoonyeryo xeeni Muluku ovanhe awe?

Wanipacerya, Muluku ohooniherya wira hata ohimusivelaka waapwetexa atthu, owo onnaaweha atthu ootakhala yaawo anikumiherya ohaawa ni onnihimya wira anooliva mwaha wa sowiira saya. Okathi wooreerela, Muluku onoomaliha ohixariya ni ohaawa wotheene.

Wanenli, nthoonyeryo na Muluku na miteko sawe sa khalai noovaha ntakiheryo wira mwa niphento owo onnaalopola atthu ohinatthi waapwetexa. Nowe aari namalaleya a exariya, masi atthu anceene khiyaamucalela. Biibiliya onihimya wira: “Awo khiyànyiherya etthu, mpakha ophiya epula ya mutáseke, khuwivakasa atthu othene”.​—Matheyo 24:39.

Niireke Muluku aahipaka etthu? Aayo. Mwa ntakiheryo, aahaalopola anaIsarayeli wira akhala wira yanvara itthu sootakhala ntoko maloko makina, owo aamweemererya wira awanani aya atuphele elapo aya, anyaanye epooma aya ni waavara ntoko ipottha. AnaIsarayeli yaahithipelela opaka itthu sootakhala, mpakha waavaha anaaya ntoko mukuttho. Niireke Yehova aahipaka etthu? Aayo, masi nuumala waaruma maprofeta awe wira yaalopole arumeyi awe imaara sinci, wira arukunuxe mirima saya ohinatthi Muluku oviruwa. Owo aahimyale so: “Apwiya Muluku khanìra etthu, ehipajenrye owùpululela esiri aya maprofeta, arumeyi aya”.​—Amosi 3:7.

NYUWO MUNIHELIWA SAI MUHINA: Matakiheryo a maphukelo a khalai a Yehova anninivaha nlipelelo. Hiyo pooti ororomela wira Muluku onimwaaphukela atthu ootakhala anikumiherya ohaawa. Biibiliya onihimya wira: “Vekekhai, atthu òtakhala anrowa opweteya . . . Vano atthu òmàla anoreriwa vathí-va: anokhala-mu ni murettele womalela”. (Esalimo 37:9-11) Exeeni munuupuwela anyu voohimya sa ophukela onirowa omaliha ohaawa wa apinaatamu? Niireke eyo etthu yootakhala wala enooniherya omoriwa ikharari wa Muluku?

OPWETEXIWA WA ATTHU OOKANANI

ELE ATTHU AKINA ANIHIMYA AYA: “Opwetexiwa wa atthu ooKanani waari ekrime ya ekhotto yootakhala enlikanyihiwa ni genocídio”.

ELE BIIBILIYA ONIHIMYA AWE: ‘Iphiro sothene [sa Muluku] ti sa xariya. [Owo] Muluku òroromeleya: owo khonòtha’. (Otumererya 32:4) Ophukela wa xariya wa Muluku khonilikanyihiwa ni ekhotto ya apinaatamu. Mwaha aya? Mwaha woowi Muluku onniwerya otokosa mirima wala miyuupuwelo sa atthu.

Mwa ntakiheryo, okathi Muluku aaphukenle awe ipooma sa oSodoma ni oGomora, ni khuhimya wira aarowa opwetexa, mulopwana owaamini Abrahamu aahixanka voohimya sa exariya ya Muluku mmwaha owo. Owo aahisuwela wira Muluku awe axariya khaarowa “owiva atthu òrera murima vamosá n’ale òtakhala”. Moopixa murima, Muluku aahimulipiherya wira yaakhanle muttetthe ole anaxariya 10, Owo aarowa olevelela muttetthe ole mwaha wa yaawo. (Maphattuwelo 18:20-33) Veekeekhai, Muluku aahitokosa mirima sotheene sa atthu ale ni oweha wunnuwa wa otakhala waya.​—1 Wahala 28:9.

Moolikanasa, Muluku aahaaphukela atthu ooKanani nto khoruma opwetexiwa wa atthu ale. Atthu ooKanani yaanisuweliwa okhala ootakhala vanceene, ohela muhina waapaha anamwane aryeene akumi mwa mukuttho wa mooro.a (2 Mamwene 16:3) Atthu ooKanani yaahisuwela wira Yehova aahaaruma aIsarayeli okuxa elapo yotheene ya okanani. Nto ale yaathanlale ovikaniha okhala mulaponi mmo ni owana ekhotto, moolakelela yaalupattha ohiya paahi anaIsarayeli masi-tho Yehova, yoowo oonihenrye owerya wawe wuulupale wa owoopola atthu awe.

Masi, Muluku aahaamorela ikharari atthu ooKanani yaale yaahiyale mweettelo aya wootakhala ni yeemererya malamulo a Yehova. Mwa ntakiheryo, muthiyana mmosa ookanani aari namuttompe Rahabi aahoopoliwa, hoothe ni emusi awe. Nave-tho, vaavo atthu a oKanani epooma ya oGabawoni (Gibeoni) yaavekenle aya omoreliwa ikharari, awosa ni anaaya yaahileveleliwa nto khuhiiviwa.​—Yoxuwa 6:25; 9:3, 24-26.

NYUWO MUNIHELIWA SAI MUHINA: Hiyo nnoowerya wiixutta etthu yootthuneya orweela wa ophukeliwa wa atthu ooKanani. Hiyo ninnaattamela mowaakuveya “nihiku ninrowaya ophukiwa n’upwetexiwa atthu òtakhala murima”. (2 Pedru 3:7) Akhala wira ninnimphenta Yehova, nnoophwanya mureerelo okathi onirowa awe omaliha ohaawa wa apinaatamu orweela mwa waapwetexa ale anikhootta wiiwelela olamulelo awe wa xariya.

Moophenta Yehova onninuupuxerya wira soothanla sa anamuyari sinnaahela muhina anaaya. Nuulumo na Muluku nni: “Muthanleke ekumi, wira mukhaleke nyuwo n’an’inyu n’osulu anyu. Mwaphenteke Apwiya Muluku anyu, mwiweleleke molumo aya, mutthareke”. (Otumererya 30:19, 20) Niireke moolumo awo ta Muluku ootakhala wala oophenta, yoowo oniphavela wira atthu epakeke soothanla sooloka?

[Enoota]

[Elatarato epaaxina 5]

Muluku ohinatthi waapwetexa atakhali okathi wa epula ya Mutaaseke, aahimuruma Nowe olaleya mihupi sa Muluku soolopola

[Eponto yuulupale ya epaaxina 6]

Atthu ooKanani yaanisuweliwa okhala ootakhala vanceene, nto moolakela yaanimulupattha Muluku ni atthu awe