Ihasara sa Ephattu—Sinooniherya Wira Muluku Tootakhala?

ELE ATTHU AKINA ANIHIMYA AYA: “Muluku tonilamulela olumwenku, nto onnikumiherya ihasara sa ephattu; tivonto owo tootakhala”.

ELE BIIBILIYA ONIHIMYA AWE: “Elapo yothene enniweriwa ni mutakhali”. (1 Yohani 5:19) Ti pani ori “mutakhali”? Biibiliya onimusuwanyeiha okhala Satana. (Matheyo 13:19; Marko 4:15) Niireke eyo ekeekhai? Muupuwele ela: Okhala wira Satana tonilamulela olumwenku, nto onniwiiriha apinaatamu okhala owiitthuna, anrima, ni oohikhalana othunku, ntoko owo siryaawe. Nto eyo enninikhaliherya osuwela nthowa naya pinaatamu ohinikhapelela awe saana elapo. Anamunceene annikupali wira ohikhapeleliwa saana wa elapo onnikumiherya ni wuncererya ihasara sa ephattu, wala wiiriha ihasara iyo waaphwanya atthu anceene.

Nto xeeni Muluku onimuhiya awe Satana olamulelaka elapo? Waakhuliwa waya onikhuma wanipacerya wa sowiiraneya sa apinaatamu, okathi axitiithi ahu oopacerya yahaamwiiwelenle aya Muluku. Okhuma vaavo, apinaatamu anceene anitthara ntakiheryo nenno. Mwaha woothanla ohiiwelela olamulelo wa Muluku, ohiiriha elapo ya vathi okhala mmatatani mwa nwanani a Muluku, Satana. Tthiri Yesu aahimuhimya Satana okhala “mulupale a òlumwenk’ula”. (Yohani 14:30) Masi niireke Satana onirowa olamulela okathi wotheene? Nnaari!

Yehovaa onnoona othunku mwaha wa ohaawa onikumiheriwa ni Satana. Tthiri, Yehova onnixanka mwaha wa ohaawa wa apinaatamu. Mwa ntakiheryo, olavulaka sa okathi wooxankiha waakumana aya anaIsarayeli, Biibiliya onnihimya sa Muluku iiraka: “Movelavelani mwaya mothene, [Muluku aanixankiheya, Tradução do Novo Mundo]”. (Yesaya 63:9) Moomoriwa ikharari, Muluku oopaka marehereryo wira moohipisa, omalihe olamulelo wootakhala wa Satana! Owo oomuthanla Mwanawe, Yesu Kristu, wira okhale mwene axariya a mahiku otheene.

XEENI WAAKHULIWA ORYAAYA WOOTTHUNEYA: Nnaamwi olamulela wa Satana ohiweryaka waakhapelela atthu wa ihasara sa ephattu, masi olamulelo wa Yesu onoopaka eyo. Mukwaha mmosa, Yesu ahaakhapelela awiixutti awe okathi wa epheyo yuulupale. Biibiliya oni: “Yesu . . . ahipwapwela epheyo, khwirela mawimpi wira: ‘Mmàle! Mwikhalele’! Nananoru epheyo yahimàla, mawimpi yahikhalela”. Awiixutti awe yaahihimya wira: “Mutth’ula tani? Hatá epheyo n’iphareya ennimwiwelela”! (Marko 4:37-41) Yowiiraneya eyo enniniroromeliha wira Yesu onirowa waakhapelela apinaatamu otheene oowiiwelela okathi wa olamulelo awe ntoko Mwene.​—Daniyeli 7:13, 14.

[Enoota]

[Elatarato epaaxina 4]

Muluku onvaha Mwanawe owerya wira omalihe ihasara sa ephattu