MWAHA WOOPACERYA: NIIREKE MULUKU TOOTAKHALA?
Xeeni Atthu Anihimya Aya Wira Muluku Tootakhala?
NIIREKE nyuwo munoona wira nikoho niri epaaxina yoopacerya ya erevista ela ti nootikiniha? Akina annitikinihiwa, masi atthu anceene olelo-va anniikoha akhala wira Muluku tootakhala, wala anuupuwela wira owo tootakhala tthiri. Nthowa xeeni?
Atthu akina anoopowa okathi wa ihasara sa ephattu, annikoha wira: “Xeeni Muluku onihiya awe itthu iya siiraneyaka? Niireke onnoona othunku? Wala owo tootakhala?”
Akina annipaka makoho awo okathi animusoma aya Biibiliya. Awo anniphwanya myaha ntoko ole wa Mutaaseke a mahiku a Nowe, nto khiyakoha so: ‘Xeeni Muluku oophenta aapwetenxe awe atthu awo otheene? Niireke owo tootakhala?’
Niireke okathi mukina nyuwo munnipaka makoho ntoko awo? Wala nyuwo khamuniwerya waakhula okathi atthu anikoha aya akhala wira Muluku tootakhala? Waari ti siiso, muthokorerye nikoho nikina ninrowa wookhaliheryani.
XEENI HIYO NINNYOKHA AHU OTAKHALA?
Mmasu vakhaani, hiyo ninninyokha otakhala mwaha woowi nookhalana owerya wa ohiyaniha yooloka ni yootakhala. Eyo tenniiriha ovirikana vanceene ni inama. Mpattuxa ahu onipanke “aìlattanihaka mwanene”. (Maphattuwelo 1:27) Eyo enitaphulela exeeni? Owo oonivaha owerya wowooniherya mikhalelo sawe ni okhalana mweettelo wooloka, eyo piiyo, osuwela ohiyaniha ele eri yooloka ni yoohiloka. Nkahaya muupuwele: Akhala wira Muluku oonivaha owerya woohiyaniha ele eri yooloka ni yoohiloka, nto hiyo ninninyokha otakhala, eyo enooniherya wira owo onninyokha itthu sootakhala.
Biibiliya onnilipiherya muupuwelo owo. Olavulaka sa Muluku, Biibiliya oni: “Iphiro saka sorakamelana n’iphiro sanyu, miruku saka sorakamelana ni sawinyu”. (Yesaya 55:9) Vaakhanle wira hiyo ninhimya wira Muluku tootakhala, nto khinaarowa ovaanyiha ekeekhai ela, nihimyaka wira iphiro sahu ti sooloka ovikana iphiro sawe? Vaarowa okhala vamiruku otthokelela saana nihinatthi wuupuwela wira Muluku tootakhala. Waaniheryasa hiyo nahaana okoha, ohiya wira Muluku tootakhala, masi xeeni miteko sawe sikina sinikhala aya ntoko ti sootakhala. Wira nikhaliheriwe, nrowe niwehe ele onitaphulela aya okhala “ootakhala”.
Vaavo nimmuhimya ahu mutthu okhala ootakhala, hiyo nimphukela mweettelo awe. Mutthu ootakhala ti yoole onimusivela waaweha akina ehaawaka wala ohiniwoonela othunku ale anihaawa. Tivonto, tiithi onimulaka mwanawe mwaha woowi onisiveliwa omuhaaxa mwanawe, owo tiithi ootakhala. Masi paapa onimulaka mwana awe wira omwiixuttihe wala omukhapelela owo tori ooloka. Nto ohisuwela ele enimwiiriha mutthu opaka etthu, vannikhweya ophukela mweettelo wa mutthu owo.
Nrowe niwehe mathowa manli aniwiiriha akina wuupuwela wira Muluku tootakhala: ihasara sa ephattu sinikhumelela olelo-va ni maphukelo a Muluku ninsoma ahu mBiibiliyani. Niireke ikeekhai sinooniherya wira Muluku tootakhala tthiri?
[Elatarato epaaxina 3]
Okhala wene hiyo ninniwoonela othunku akina, nto khiyanyokha itthu sootakhala