Okhwa Khahiyo Omala wa Itthu Sotheene!

Ikiloomo sowiiraka 3 waattamela oYerusalemu, waahikhala muttetthe mwaamukhaani aitthaniwa oBethania. (Yohani 11:18) Masi, sihalaka isumana 3 wira Yesu iiviwe, ennikhumelela ehasara muttetthe ole. Laazaro, yoowo aari mpatthani a Yesu, mootutuxerya onniwereiwa vanceene ni khiyakhwa.

Okathi Yesu oniiwa awe wira mpatthani awe ohookhwa, onnaaleela awiixutti awe wira Laazaro aamurupa ni aamurowa onvenxa. (Yohani 11:11) Masi awiixutti a Yesu, khayiiwexenxe moolumo awo. Tivonto, Yesu onnaaleela so: “Lázaro ohòkhwa”.​—Yohani 11:14.

Nuuvira mahiku 4 ovithiwe ene Laazaro, Yesu onniphiya oBethania wira omulipihe Martha, murokorawe Laazaro. Martha onnihimya so: “Nyuwo mwàri vava, murokor’aka khakhwá”. (Yohani 11:17, 21) Yesu onnimwaakhula so: “Miyo ki ohihimuwa n’ikumi. Ole onikamini, hatá anakhwaru, onokhala-tho mukumi”.​—Yohani 11:25.

Yesu, ophavelaka wooniherya wira eyo yaari ekeekhai, aahirowa omahiye ni aahikhuwela oriki: “Lázaro, mukhumele otá nno!” (Yohani 11:43) Mowaakuveya, mulopwana ole aakhwiiye aahikhumela ota; nto eyo yaahaatikiniha ale yaaweha!

Yesu ohinatthi omuhihimuxa Laazaro, iira aahihimuxale ene atthu anli. Mwa mukwaha mmosa, owo aahimuhihimuxa mwali aari mwaana a Jairo. Ahinatthi omuhihimuxa, Yesu aahilavula wira mwali owo aamurupa.​—Luka 8:52.

Moone wira Yesu olavulaka sa okhwa wa Laazaro ni okhwa wa mwaana mwaamuthiyana a Jairo, aahimyale wira awosa ‘yamurupa’ mmahiye. Nlikanyiho nlo ti nooreerela. Mwaha wa xeeni? Wookhwaani mutthu khonsuwela etthu; eyo ennooniherya saana muupuwelo woowi ole okhwiiye onoomumula, nto khonoona owereya wala ohaaxiwa. (Musuweli 9:5; Moone ekaaxa eni: “Okhwa Onilikana ni Ikhove Suulupale”.) Awiixutti oopacerya a Yesu, yaanisuwela saana mukhalelo wa alipa okhwa. Encyclopedia of Religion and Ethics enihimya so: “Wa atthareli a Yesu, okhwa waalikanasa ni orupa. Mahiye yaari ntoko opuro woomumula . . . wa ale yaakhwiiye yaaminiki”.a

Osuwela wira alipa-ookhwa anoorupa mmahiye ni khanihaaxiwa onninlipiha. Ninnisuwela ele enniiraneela wookhwaani, nto khanintthuneya woova okhwa.

“MASI MUTTHU OKHWIYE ONOWERYA OKHALA-THO MUKUMI?”

Nnaamwi onisivelaka orupa saana ohiyu, khuuvo oniphavela orupa okathi wotheene. Exeeni ennikupaliha wira ale anrupa mmahiye anirowa otthikela okhala akumi, ntoko Laazaro ni mwaana mwaamuthiyana a Jairo?

Muhavinre Yobi aahipaka nikoho noolikanasa, vaavo uupuwela awe wira aarowa okhwa. Owo aakonhe so: “Masi mutthu okhwiye onowerya okhala-tho mukumi?”​—Yobi 14:14.

Omuhimyaka Muluku Oowerya-Sotheene, Yobi aahaakhula nikoho nenno aapanke awe, oriki: “Vano nyuwo mwamukìhana, miyo kiwakhuleni: mwamusiveliwa ni miyo, kipattuxiwe ni nyuwo”. (Yobi 14:15) Yobi aanikupali wira Yehova aamusiveliwa nihiku nenlo aarowa awe omuhihimuxa murumeyi awe oororomeleya. Niireke Yobi aalipelela etthu yahaarowa wiiraneya? Nnaari.

Yesu ahaahihimuxa atthu ooniheryaka wira aahivahiwa owerya ni Muluku woomaliha okhwa. Tthiri, Biibiliya onihimya wira vano Yesu ookhalana “owerya w’oruma okhwa”. (Wisupulula 1:18) Tivonto, Yesu onrowa ohula mikhora sa mahiye, ntoko aarumme awe wira nluku naawala mahiye a Laazaro nikumihiwe.

Ikwaha sinceene, Biibiliya onnilavula sa yooleiherya ya ohihimuxiwa. Nlaikha nimosa naahimulipiherya profeta Daniyeli wira: “Nyuwo munimokhwa, masi munohihimuwa mokhwani mahiku òkiserya, wira mwakhele otthuveliwa wanyu”. (Daniyeli 12:13) Yesu aahaaleela aSaduki yaawo yaari ahooleli a aYuda yaakhootta yooleiherya ya ohihimuxiwa oriki: “Nyuwo movonya, mana khamunsuwela solempwa sa Muluku, nnákhala owerya wawe”. (Matheyo 22:23, 29) Murummwa Paulo aahihimya so: “Miyo kinniroromela oholo wa Muluku . . . wira atthu othene, ale òrera murima n’ale òtakhala murima, anohihimuwa mokhwani”.​—Miteko 24:15.

SILINI ATTHU OKHWA ANIROWA AYA OHIHIMUWA?

Silini anrowa aya ohihimuxiwa atthu ooreera murima ni ootakhala murima? Nlaikha naahimuhimeerya Daniyeli, yoowo aari mutthu ooreera murima wira owo aarowa ohihimuxiwa “mahiku òkiserya”. Moolikanasa, Martha aanikupali wira munna awe Laazaro aarowa ‘ohihimuwa nihiku nokiserya’.​—Yohani 11:24.

Biibiliya onnilikanyiha ‘nihiku nla nokiserya’ ntoko olamulelo wa Omwene wa Kristu. Paulo aalempe so: “Vekekhai Kristu ohana okhala mwené, mpakha Muluku wapweha awanani othene vathí va inawu sawe. Nwanani onrowa okiserya opwetexiwa, okhwá”. (1 aKorinto 15:25, 26) Nla ti nthowa nuulupale ninniiriha ovekelaka wira Omwene wa Muluku orwe ni wira yootthuna ya Muluku yiiraneye valaponi.b

Ntoko Yobi aasuwela awe saana, Muluku onniphavela waahihimuxa alipa ookhwa. Nto naphiya nihiku nlo, okhwa onoomala. Okathi owo, khuuvo mutthu onrowa okohaka wiira: ‘Okhwa omala wa itthu sotheene?’