NYUWO MWAANISUWELA?

Mwiri xeeni wiitthaniwa alowé waarumeeliwa okathi wa Biibiliya?

Biibiliya onihimya wira mwiri wa alowé waanirumeeliwa ntoko eperfume ya ikuwo ni ikhaama. (Esalimo 45:9; Miruku 7:17; Nsipo n’Ophentana 4:14) Waaniheryasa, alowé oniromoliwa mBiibiliyani waari mwiri oniihaniwa Agarwood (Aquilaria agallocha). Vaavo mwiri owo onintta aya, onnikumiherya makhura oowunkhela ni epwamwasi wala epwanyasi. Nto mwiri owo nuumala oxiliwa, waanitumihiwa ntoko eperfume “alowé”.

Biibiliya onnilikanyiha itenda sa Isarayeli ntoko “miri sa alowe” Yehova ophatteyale awe. (Mothakoni 24:5, 6, Biblya Exirima) Eyo pooti otaphulela wunnuwa wa mwiri Agarwood, maana orakama waya onniphiya imeetru 30, ni iritta ni makukhu aya toowaatta vanceene. Nnaamwi mwiri ola ohikhanle wIsarayeli mahiku ala, Dicionário a Biibiliya onihimya so: “Khivanireerela okhootta wira mwiri ola ni miri sikina sihinisuweliwa [muttetthe ola] saanaaliwa okhatoni wala muttetthe wa oYordani”.

Mikuttho xeeni seemereriwa ovaha empa ya Muluku oYerusalemu?

Nlamulo na Muluku naahimya wira mikuttho sotheene saavahiwa oYerusalemu, sahaana okhala sooloka. Muluku kheemererya mukuttho woohiloka. (Okhuma 23:19; Onamukuttho 22:21-24) Moovarihana ni Filo mulipa oolepa myaha muYuda a eseekulu yoopacerya EC, alipa a mukuttho yaanitokosa saana inama iyo “okhuma vamuruni mpakha onawuni”, wira yoone akhala wira mwaamunama owo aari ooloka mwa makhalelo otheene “woohikhalana nlepa wala orakala”.

Musuweli a myaha soolempwa oniitthaniwa E. P. Sanders onihimya wira makhulupale a otemplo oYerusalemu “ yaaniweemererya ale yaatumiha inama saavahiwa mukuttho, wira atumiheke inama ni ipomba saapacenrye otokosiwa ni alipa a mukuttho. Nto, namatumiha aahaana onvaha mulipa oothuma epaphelo yooniherya wira enama ele yaari yooloka”.

Mwaakha wa 2011, alipa anitokosa mapuro yaakhaliwa khalai yaahiphwanya waattamela waari etemplo ya Muluku, edokumento ya oloko yooniherya musurukhu wa maluku wa khalai waarumeeliwa eriyari ya eseekulu yoopacerya AEC mpakha 70 EC. Edokumento eyo yaahilempwa moolumo manli mwa nttaava na aramaiko ataphuleliwe so: “Otteela ti wa Muluku”. Onikhala wira makhulupale a otemplo, yaanirumeela idokumento iyo wa itthu wala inama saarowa ovahiwa mikuttho.