ALE ANISOMA ILIIVURU SAHU ANNIKOHA . . .

Xeeni Muluku onaahiya awe atthu oowerya yaahaaxaka ale ahirina owerya?

Biibiliya onniromola matakiheryo ooriipiha murima a atthu oowerya yaahaaxaka ale ahirina owerya. Ninnuupuwela mwaha wa Nabothi.a Akhabi aari mwene a wIsarayeli eseekulu 10 AEC. Owo aahimweemererya mwaarawe omwiiva Nabothi ni anaawe, ophavelaka okuxa ematta ya uva ya mulopwana owo. (1 Mamwene 21:1-16; 2 Mamwene 9:26) Xeeni Muluku aahiyale awe wira atthu awo apuheriweke?

Noone etthu emosa: Muluku khanootha. (Tito 1:2) Nto exeeni eniiriha okhumelela itthu sootakhala ni opuheryana? Wanipacerya, Muluku aahaalopola atthu wira ohimwiiwelela, wamwaaruuhela etthu yootakhala: okhwa. Okhala wira masu a Muluku khanootha, apinaatamu annookhwa okhuma okathi yoole Adamu ni Eva yahaamwiiwelenle aya Muluku ojardim wa wEedeni. Tthiri, naakhwa oopacerya, okhumenle mwaha wa otakhala wa Kayini vaavo ammanne awe munnawe Abeli, mpakha omwiiva.​—Maphattuwelo 2:16, 17; 4:8.

Voohimya sa apinaatamu, Biibiliya onihimya so: ‘Atthu annihawa mwaha wopuheriwa ni akina’. (Musuweli 8:9) Niireke moolumo awo anniireya tthiri? Yehova aahaalopola aIsarayeli, wira mamwene aya yaarowa waahaaxaka. Eyo yanwiiriha omukhuwelela Muluku wira aakhaliherye. (1 Samuweli 8:11-18) Hata Mwene a miruku Salomoni, aaniliviha mpoosito mootepana. (1 Mamwene 11:43; 12:3, 4) Mamwene ootakhala, ntoko Akhabi, yaahitepa waahaaxa atthu. Muthokorerye ela: Vaakhanle wira Muluku aahikhoottiherya ohaaxana iwo, niireke owo khaarowa okhala nawoothe?

Nave, muupuweleke wira Satana onihimya wira atthu animurumeela Muluku moophavela mireerelo saya paahi. (Yobi 1:9, 10; 2:4) Vaakhanle wira Muluku onniwaakiherya arumeyi awe okathi wotheene aniireliwa aya itthu sootakhala, niireke eyo khiyaarowa wooniherya wira ele Satana aahimyale awe yaari ekeekhai? Nave vaakhanle wira Muluku onniwaakiherya atthu wira okathi wotheene ahihaaxiweke, niireke owo khaarowa okhala nawoothe? Niireke atthu khiyaarowa wuupuwelaka wira anoowerya okhumela saana ahilamuleliwaka ni Muluku? Masi Biibiliya onihimya wira pinaatamu khoniwerya wiilamulela mmansawe mookhumela saana. (Yeremiya 10:23) Hiyo ninniphavela orwa wa Omwene wa Muluku onrowa omaliha ohixariya wotheene.

Nto niireke Muluku khonipaka etthu wira omalihe ohaaxana? Nnaari. Muthokorerye itthu piili owo onipaka awe: Yoopacerya, owo onnooniherya itthu sinipakiwa ni ale anaahaaxa akhwaaya. Mwa ntakiheryo, Biibiliya onnimuhimya palano oohiloka a mutakhali Yezabeli wira omwiive Nabothi. Nave, Biibiliya onnihimya wira otakhala onikumiheriwa ni namalamulela oowerya a olumwenku ola yoowo oniipithiha omutthu awe. (Yohani 14:30; 2 aKorinto 11:14) Biibiliya onnimuhimya namalamulela owo okhala Satana Diabo. Mwaha womooniherya ole onikumiherya otakhala ni ohaaxana, Muluku onninikhaliherya ohikhala atthu ootakhala. Nave, onninikhapelela wira nikhalane okumi woohimala muhoolo.

Yanenli, Muluku onninlipiherya wira onoomaliha ohaaxana. Moota Muluku amphukenle awe ni omuhukhumu Akhabi, Yezabeli, ni atthu akina ootakhala, enninroromeliha wira nnoophiya nihiku onirowa awe waahukhumu atthu ootakhala. (Esalimo 52:3-7) Nave-tho Muluku onninlipiherya wira moohipisa, onoomaliha otakhala wotheene onaaphwanya arumeyi awe.b Nto, Nabothi yoowo aari mutthu owaamini onrowa ohihimuxiwa vamosa ni anaawe wira akhale oparayiisu ya valaponi mahiku otheene, weiwo ohinrowa aya okhala-tho itthu sootakhala.​—Esalimo 37:34.

[Inoota]

[Iponto Suulupale epaaxina 11]

‘Atthu annihawa mwaha wopuheriwa ni akina’.​—Musuweli 8:9

‘Muluku khonotha’.​—Tito 1:2