OVAANELA VOOHIMYA SA BIIBILIYA

Niireke Anamoona a Yehova Annimukupali Yesu?

Moolumo anittharelana, ori ovaanela okhanle owiiraneya eriyari ya Namoona a Yehova ni mwaneene etthoko. Nilikanyihe wira Namoona mmosa oniitthaniwa Antoonio oophiya owannyawe mulopwana oniihaniwa Tomaas.

OMUKUPALI YESU TI VOOTTHUNEYA

Antoonio: Ihaali Tomaas? Kinnihakalala woophwanyani olelo.

Tomaas: Ni miyo kinnihakalala owoonani.

Antoonio: Kooruuha irevista sa niinano sa Owehaweha ni Despertai! wira koovaheeni. Kinoona wira sinimoosivelani.

Tomaas: Kooxukhuru. Moosuwela, vaareera orwa wanyu olelo-va maana yookhala etthu emphavela aka wookohani.

Antoonio: Khiva mwaha, etthu xeeni?

Tomaas: Nihiku nimosa, kaavaanela ni mpatthani aka oomutekoni sa iliivuru seiye mukivanhe anyu. Masi ohimmye wira kihisomeke, maana Anamoona a Yehova khanimukupali Yesu. Kiireke eyo ekeekhai? Kaahimuleela wira kaamookohani nihiku mwaarowa anyu okixukurya.

Antoonio: Vaareera. Muhiira saana omukoha Namoona a Yehova ohiya mutthu mukina. Tthiri wira nisuwele ele mutthu mukina onikupali awe, nihaana omukoha mutthu owo, kiira?

Tomaas: Eyo ti etthu kuupuwelaka.

Antoonio: Ekeekhai tiila: Anamoona a Yehova annimukupali vanceene Yesu. Tthiri hiyo ninnikupali wira omwaamini Yesu ti vootthuneya wira mutthu oopowe.

Tomaas: Miyo kaanuupuwela eyo, masi vaavo mpatthani aka oomutekoni aahimmye awe wira nyuwo khamunimukupali Yesu, eyo yaahikitikiniha. Kinoona wira mwaha owo khanitonko olavula saana.

Antoonio: Munniphavela wira kiwooniheryeni iveersu sinittittimiherya otthuneya waya omwaamini Yesu? Anamoona a Yehova annirumeela iveersu iyo ikwaha sinceene okathi anilaleerya aya.

Tomaas: Aayo, kinniphavela.

Antoonio: Ti vooreera wira nipacerye ni masu a mwaneene Yesu ari va Yohani 14:6. Yesu aalavunle masu awo okathi aavaanela awe ni murummwa awe mmosa. Ninsoma so: “Miyo k’ephiró. Miyo k’ekekhayí. Miyo k’ekumí. Khavo onwerya orowa w’Atithi, ahivinre mwa miyo”. Moovarihana ni eveersu ela, ephiro xeeni emosa paahi wira nimwaattamele Muluku?

Tomaas: Paahiru orweela wa Yesu.

Antoonio: Ekeekhai. Nto Anamoona annikupali vanceene masu awo. Kookoheeni so: Okathi mutthu onivekela awe onitthuneya orumeela nsina nawani wira nivekelo nlo niphiye wa Muluku?

Tomaas: Nsina na Yesu.

Antoonio: Kinnikupali. Nto ti maana aya kiniromola aka nsina na Yesu khula okathi onivekelaka. Nto, Anamoona a Yehova ti etthu enipaka aya.

Tomaas: Eyo etthu yooreera.

Antoonio: Yoolepa ekina nikhanle ahu oothokorerya ti Yohani 3:16. Anamunceene annoona eveersu ela ya Biibiliya okhala yootepa otthuneya. Tthiri, akhala wira munoosoma iversiikulu sotheene sinilavula sa okumi ni muteko wa Yesu valaponi, munimoona wira yoolepa ela ennooniherya saana otthuneya waya omwaamini Yesu. Waaniheryasa nyuwo munniphavela osoma yoolepa ela.

Tomaas: Aayo. Eni so: “Vekekhai, Muluku ohaphentexa atthu mpakha wavaha Mwan’awe mmosene, wira othene ale animwamini yowo, ehirimelé, masi ekhalane ekumi ehinimala”.

Antoonio: Kooxukhuru. Kiireke mwaanisuwela moolumo ala?

Tomaas: Aayo, miyo kinniweha elempwale ene mukerekhere mwa ikaaro ni ikartaz sinimulaleya nakoso.

Antoonio: Ela eveersu yoosuwelexiwa. Moone saana ele Yesu ohimyale awe va: Owo ohimmye wira ophenta wa Muluku tonrowa owiiriha atthu waakhela ekumi yoohimala. Masi etthu xeeni enitthuneya ahu opaka?

Tomaas: Nihaana waamini.

Antoonio: Aayo. Nihaana omwaamini Yesu Kristu, Mwaana mmoseene a Muluku. Tthiri, omwaamini Yesu toniphwanyiha ekumi yoohimala. Nto mwaha ola woolempwa epaaxina 2 ya erevista ela kiruuhale aka. Eriyari ya itthu sikina, yoolakela ya erevista ela Owehaweha ori “otumererya omwaamini Yesu Kristu, yoowo okhwiiye wira niphwanye ekumi ehinimala, yoowo vano onilamulela ntoko Mwene a Omwene wa Muluku”.

Tomaas: Kinnikupali. Maana hata erevista anyu ela ennooniherya wira Anamoona a Yehova annimukupali Yesu.

Antoonio: Ekeekhai tthiri.

Tomaas: Nto xeeni atthu anihimya aya wira nyuwosa khamunimukupali Yesu?

Antoonio: Waaniheryasa ahaavo mathowa manceene aniwiiriha atthu ohimya eyo. Ikwaha sikina, mwaha woowi atthu awo aawiiwa atthu akina ahimyaka siiso. Wala pooti yiixuttihiwe ene moohiloka ni ahooleli a ekerexa aya.

Tomaas: Miyo kinoona wira waaniheryasa mwaha woowi nyuwosa munihimya wira mwa Anamoona a Yehova ohiya a Anamoona a Yesu.

Antoonio: Nlo pooti okhala nthowa nikina-tho.

Tomaas: Xeeni nyuwosa munilavula anyu vanceene sa Yehova?

“MIYO KIHASUWELIHA NSINA NANYU”

Antoonio: Nthowa noopacerya tinla: Hiyo ninnikupali wira ti vootthuneya orumeela nsina na Muluku, Yehova, ntoko Mwanawe, Yesu, aapanke awe. Muthokorerye ele Yesu aahimmye awe vaavo anvekela awe Tiithi awe. Eri va Yohani 17:26. Xontte mookhala oosoma eveersu eyo?

Tomaas: Aayo. Eni so: “Miyo kihasuweliha nsina nanyu, nave kinotepa wasuweliha, wira ophenta onkiphentananyu okhale mwa yawo, nave miyo-tho kikhale mwa yawo”.

Antoonio: Kooxukhuru. Moone wira Yesu aahimmye wira aahisuweliha nsina na Muluku. Nyuwo moosuwela exeeni yaamwiirinhe opaka eyo?

Tomaas: Nnaari nkinsuwela.

Antoonio: Nrowe niwehe yoolepa ekina ekhanle oonikhaliherya osuwela itthu sikina mmwaha ola. Yoolepa kinuupuwelaka ti Miteko 2:21. Eni so: “Otheene aniromola nsina na Yehova animoopowa”, (Tradução do Novo Mundo). Vano kinoona wira munnikupali wira oromola nsina na Yehova ti vootthuneya wira mutthu oopowe. Moohaaniherya Yesu aanisuwela mwaha ola.

Tomaas: Eyo ekeekhai.

Antoonio: Nto, woopowa wa atthareli awe ti nthowa nuulupale naamwiirinhe Yesu ophavela wira awo asuwele ni arumeeleke nsina na Muluku. Nave, nlo ti nthowa nuulupale niniiriha olavulaka vanceene sa Yehova. Hiyo nnoona wira ti vootthuneya waasuweliha akina nsina na Muluku, ni waakhaliherya ovuwiha nsina nlo.

Tomaas: Masi hata atthu ahisuwelaka nsina na Muluku wala ahirumeelaka, awo annimusuwela ole animuhimya aya vaavo animuromola aya Muluku.

Antoonio: Eyo pooti okhala ekeekhai. Hata vari siiso, mwaha woowi Muluku onninleela nsina nawe, eyo enninikhweiherya omwaattamela.

Tomaas: Muniphavela ohimyani?

Antoonio: Muupuwele so: hiyo khinaatthuneya osuwela nsina na Moise. Hiyo naahikhala oomusuwela ntoko mulopwana aakawannye Ephareya Yooxeerya, wala ole aakhenle Sooruma Muloko. Moolikanasa ni Nowe, hiyo khinaatthuneya osuwela nsina nawe. Hiyo naahikhala oomusuwela yena ntoko mulopwana aatenke ekalawa ni ooponle emusi awe ni axinama. Nave-tho, hata Yesu Kristu aahikhala oosuweliwa ntoko ole aakhumme wiirimu ni okhwa mwaha wa itampi sahu. Kiira?

Tomaas: Woonasa wene.

Antoonio: Masi Muluku aahiphavela wira nisuwele masina a atthu awo. Tthiri osuwela masina aya, onninikhaliherya woona wira atthu awo yaahikhala. Hata nihitonko onweha Moise, Nowe, wala Yesu, masi osuwela masina aya onninivara murima.

Tomaas: Miyo nkitonko wuupuwelela mwaha owo, masi enihimya anyu ekeekhai.

Antoonio: Nto nlo ti nthowa nikina ninwiiriha Anamoona a Yehova orumeela vanceene nsina na Muluku. Nimphavela waakhaliherya atthu omwaamini Yehova Muluku ntoko mutthu eekeekhai yoowo akhanle aya oomwaattamela. Masi-tho, ninnittittimiherya saana muritti wa Yesu ntoko moopoli ahu. Nkahaya nisome-tho yoolepa emosa enooniherya eponto eyo.

Tomaas: Aayo.

Antoonio: Munnuupuwela wira wanipacerya noomusoma Yohani 14:6. Yoolepa ele ehimyale wira Yesu tokhanle ‘ephiro, ekekhai, ni ekumi’. Nrowe ntthikele ottuli vakhaani wira noone moolumo awe ari va Yohani 14:1. Munoowerya osoma ele Yesu aahimyale awe epantte yookiserya ya eveersu eyo?

Tomaas: Khiva mwaha; eniira so: “Mmwamini Muluku: mukamini miyo-tho”.

Antoonio: Kooxukhuru. Munoonela sai, niireke nihaana omwaamini Yesu paahi wala atthu awo oowanli?

Tomaas: Nnaari. Yesu ohimyale wira nihaana owaamini oowanli.

Antoonio: Eyo ekeekhai. Nto, kinoona wira munnikupali wira khivaniphiyerya paahi ohimya wira ninnimwaamini Muluku ni Yesu. Hiyo nihaana wooniherya mookumini mwahu wira ninniwaamini.

Tomaas: Ekeekhai tthiri.

Antoonio: Masi mutthu onrowa wooniherya sai wira onnimwaamini Muluku ni Yesu? Nto miyo kinootthika esumana eyo wira nithokorerye mwaha ola.a

Tomaas: Aayo, munookiphwanya.

Niireke nyuwo muhaana mwaha mukina a Biibiliya onootikinihani? Wala muniphavela osuwela sookupali ni sowiira sa Anamoona a Yehova? Akhala wira ti siiso, muhoovelele omukoha Namoona a Yehova. Owo onrowa osiveliwa othokorerya myaha iyo ni nyuwo.

[Enoota]

[Eponto yuulupale epaaxina 9]

Omwaamini Yesu ti vootthuneya wira noopowe