MWAHA WOOPACERYA | MULUKU ONOONELA SAI OMPAHA SOONA

Muluku Onoonela Sai Ompaha Soona?

Naoko, oromoliwe muru woopacerya onnihimya sa ele emukhalihenrye omuhiya ompaha soona: “Miyo kaahiwerya orukunuxa okumi aka mwaha wa wiixutta ekeekhai voohimya sa Muluku ni yoolakela awe”. Ele yiixuttale awe eri mBiibiliyani. Nnaamwi Biibiliya ohimuromolaka soona, owo onninikhaliherya osuwela moonelo wa Muluku voohimya sa ompaha soona.a Biibiliya ohaakhaliherya anamunceene okhoottela wala ohiya yoolema ela. (2 Timótheyo 3:16, 17) Nrowe niwehe itthu 3 soohaaxa sinikumiheriwa ni ompaha soona, ni ele Biibiliya onihimya awe mmwaha owo.

SOONA ONNIPAHULA

Soona ookhalana murette onipahula oniitthaniwa nikotina. Owo onnimwiiriha mutthu osiveliwa ompaha soona. Ole onimpaha soona onniroiha moottoopareni nikotina mowaakuveya ni moohihiyererya. Okhala wira khula okathi mutthu onimunuula awe cigarro onnihela mwerutthuni murette onipahula wa nikotina, nto mutthu onaapaha acigarro 20 vanihikuni onnihela mwerutthuni mwawe nikotina ikwaha soowiiraka 200. Owo mwaattelo wootepexa wunnuwa ovikana etthu yotheene yoopahula enilyiwa. Nto omakela onuula mwiixi wa cigarro onniiriha nikotina okhala ootepa opahula. Nto vaavo mutthu onipahuwa awe mwaha wa soona, owo khoniwerya olya etthu ohimpanhe soona.

Biibiliya onninikhaliherya okhalana moonelo wooloka mmwaha ola, oriki: “Khamunsuwela wira, mwanvarelaka muteko mutthu ntoko ipottha, muhana omwìwelela, khukhala ipottha sawe?”. (aRoma 6:16) Vaavo muupuwelo ni sowiira sa mutthu sinixinttiwa aya ni yoolema ela, mowaakuveya owo onnikhala epottha. Masi, Muluku, yoowo nsina nawe niri Yehova, oniphavela wira nitaphuwe voohimya sa ele enipahula erutthu ni muupuwelo ahu. (Esalimo 83:19; 2 aKorinto 7:1) Tthiri, vaavo mutthu onitepa awe onvaha efaita ni omuttittimiha Yehova, onnoona wira Yehova onnireerela ovahiwa itthu sooloka, nto khivaniweryaneya opaka eyo mutthu oryeene epottha ya yoolema ela eniiva. Tivonto onihiya awe okhala epottha ya yoolema eyo yootakhala. Opaka eyo onnimukhaliherya mutthu okhoottela soophavela soohiloka.

Olaf, yoowo onikhala wAlemanha, aahipacerya ompaha cigarro orina ene iyaakha 12, khuviriha iyaakha 16 ohiweryaka omuhiya. Wanipacerya aanimoona cigarro okhala ntoko etthu yooreera. Owo onihimya so: “Masi nuuvira iyaakha, kaahipacerya ompaha soona mootakhala. Okathi mukina kaaphavela aka omuhiya, kaahixankiheya vanceene nto kirowa ottotta ihala-hala sa acigarro, ni kimpaka soona vapapheloni. Kinnisuwela wira eyo yaari etthu yoowuuliha muru”. Nto Olaf owenrye sai ohiya yoolema ela yoopahula? Owo onihimya so: “Etthu yuulupale ekikhalihenrye waari ophavela omuhakalaliha Yehova. Waaphenta wawe apinaatamu ni nlipelelo onivaha awe, wookivaha ikuru wira kihiye yoolema ela”.

SOONA ONNIHONONA ERUTTHU

Ejornale The Tobacco Atlas, enihimya so: “Ompaha cigarro . . . onnikupaleeliwa ni siensia wira onnihonona ipantte sotheene sa erutthu ni onnincererya iretta ni okhwa”. Ti voosuwelexiwa wira ompaha soona onikumiherya iretta sihinivoniwa ntoko: kanser, iretta sa murima, ni eretta ya masasu. Nave, moovariha ni Mutthenkeso wa Ekumi wa Elapo Yotheene, ompaha soona onniwiiva atthu anceene mwaha wa iretta siniravihaniwa, ntoko elapaha.

Orweela wa Nuulumo nawe, Yehova Muluku onniniixuttiha moota woothokorerya saana ekumi, erutthu, ni muupuwelo ahu. Mwanawe, Yesu, aahooniherya eyo oriki: “Mwaphenteke Apwiya [Yehova] Muluku anyu ni murim’anyu wothene n’iroho anyu yothene n’usuwela wanyu wothene”. (Matheyo 22:37) Tthiri, Muluku oniphavela wira nirumeeleke saana okumi ni erutthu ahu ni okhapelela mwa nttittimiho. Vaavo nniixutta ahu voohimya sa Yehova ni sooleiherya sawe, hiyo ninnipacerya ophenta ni ovaha efaita itthu sotheene opanke awe. Eyo enniniiriha osyaka khula etthu ennanariha erutthu ahu.

Meedico Jayavanth a wIndia, aanimpaha soona iyaakha sowiiraka 38. Owo onihimya so: “Miyo kaahiixutta wira ompaha soona onnikumiherya maxakha orweela wa ijornale sa medicina. Kaanisuwela wira yaari etthu yoohiloka ni kaanalopola aretta aka ohiya yoolema eyo. Masi miyo mekhaka nkaawerya ohiya nnaamwi kaimananinhe imaara 5 wala 6”. Exeeni emukhalihenrye? Owo onihimya so: “Miyo koohiya ompaha soona mwaha woomusoma Biibiliya. Ophavela omuhakalaliha Yehova wookiiriha ohiya yoolema eyo”.

SOONA ONNAAHAAXA AKINA

Mwiixi onimumuliwa okathi mutthu onimpaha awe soona tootakhala. Olya mwiixi wa soona onipahiwa ni atthu akina, pooti okumiherya kanser ni iretta sikina. Khula eyaakha annookhwa atthu 600.000 anilya mwiixi moohiphavela, vanceenexa athiyana ni anamwane. Erelatoorio ya OMS enihimya so: “Tthiri ale aniphwanyiwa ni mwiixi owo anniphwanya maxakha manceene”.

Moovarihana ni Yesu, omphenta mukhwiihu, eyo piiyo, amusi, apatthani, ni ale anaattamenle, nlamulo na nenli na omphenta Muluku. Yesu aahimmye so: “Mumphenteke mukhw’inyu ntoko sinìphentanyu”. (Matheyo 22:39) Akhala wira nookhalana yoolema ya waahaaxa amusi ahu, hiyo khannimphenta mukhwiihu. Ophenta wekeekhai onooniiriha otthara yoolopola ya Biibiliya eni: “Ahikhale omphavela oreriwa wawe, nto aphaveleke sinaphwanyiha oreriwa akhw’awe”.​—1 aKorinto 10:24.

Mulopwana oniitthaniwa Armen yoowo onikhala wArmenia, onnuupuwela oriki: “Okhala wira atthu a etthoko aka yaanihaawa, yaahikixonttela wira kihiye ompaha soona. Masi miyo nkaaphavela weemererya wira kaanaahaxa tthiri”. Armen onnitthokiherya ele emukhalihenrye, oriki: “Wiixutta ele Biibiliya onihimya awe ni omphenta Yehova wookikhaliherya omuhiya ompaha soona, ni okupali wira owo onnikihaaxa vamosa ni amusi aka”.

OMUHIYA SOONA ONNIKUMIHERYA MIREERELO!

Biibiliya oomukhaliherya Olaf, Jayavanth ni Armen omuhiya ompaha soona yoowo waahaaxa awosa ni atthu akina. Awo aaxintta yoolema eyo, ohiya paahi mwaha woosuwela wira soona etthu yootakhala, masi mwaha womphenta Yehova ni ophavela omuhakalaliha. Ophenta iwo onnooniheriwa mwa 1 Yohani 5:3, yoowo oni: “Nnimphenta sai Muluku? Nnimphenta nettelaka soruma sawe. Vano, soruma sa Muluku khasinnirikela wettela”. Ekeekhai wira otthara malamulo a Muluku khahiyo ti vookhweya okathi wotheene, masi vaavo mutthu onimphenta awe vanceene Muluku, wiiwelela khonrowa okhala etthu yoorika.

Orweela wa ekampanya yowiixuttihiwa ya olumwenku wotheene, Yehova Muluku onnikhaliherya vano imilyau sa atthu otaphuwa okhala ipottha sa soona. (1 Timótheyo 2:3, 4) Moohipisa, Omwene wa Muluku, eyo piiyo, eguvernu ya wiirimu enilamuleliwa ni Mwanawe, Yesu Kristu, Yehova onirowa ommaliha nakoso otheene oohiloka yoowo onaakhaliha ipottha imilyau sa atthu animpaha soona. Owo onrowa omaliha muxankiho wa soona mmureerelo wa apinaatamu oowiiwelela aavahaka erutthu ni muupuwelo woomalela.​—Yesaya 33:24; Wisupulula 19:11, 15.

Akhala wira muniimananiha omuhiya ompaha soona, muhikhumuwe. Wiixutta omphenta Yehova ni ovaha efaita moonelo awe voohimya sa ompaha soona, onoowiirihani ohiya yoolema ela. Anamoona a Yehova anoohakalala wookhaliheryani wira mwiixutte ni mweettele malakiheryo a Biibiliya. Nto Yehova onimookhaliheryani akhala wira munniphavela omuhiya ompaha soona. Muluku onimoovahani owerya ni ikuru muniphavela anyu.​—aFilipi 4:13.

[Enoota]

[Iponto Suulupale epaaxina 4]

Nyuwo mwa ‘ipottha sawe ole onimwiwelela anyu’.​—aRoma 6:16

Niireke tthiri munoowerya omwiiwelela Muluku musiveliwaka ompaha soona?

[Iponto Suulupale 5]

“Mwaphenteke Apwiya [Yehova] Muluku anyu ni murim’anyu wothene n’iroho anyu yothene n’usuwela wanyu wothene”.​—Matheyo 22:37

Niireke munnooniherya omphenta ni omuttittimiha Muluku vaavo munipuherya anyu erutthu evahiwe anyu ni Muluku mpakaka yoolema yoohiirya?

[Iponto Suulupale 6]

“Mumphenteke mukhw’inyu ntoko sinìphentanyu”.​—Matheyo 22:39

Niireke tthiri munnimphenta mukhwiinyu ni amusi anyu vaavo muniwiiriha anyu onuula mwiixi wa soona munimpaha anyu?