Nlipelelo Xeeni Arina Aya Amuhavinre Aka?
IYAAKHA vakhaani sivinre, ejornaale emosa ya oCoréia do sul The Chosun Ilbo yaahipaka nikoho nootikiniha epaaxina yoopacerya naahimya so: “‘Niireke mwaaruusi Shim Cheong’, Yoowo Ohaasuwela Etthu Voohimya sa Yesu, Oronwe Omooroni?”
Muru wa ejornaale eyo waari woonyoholela maana Shim Cheong, ti mwaaruusi oophentiwa oniromoliwa ehantisi ya oCoréia do sul, yoowo aalenve okumi awe wira aakhaliherye apapawe yahoona. Okhuma khalai, atthu annittottopela ehantisi eyo. Tthiri, oCoréia do sul, Shim Cheong onnirumeeliwa ntoko ntakiheryo na mwaana mwaamuthiyana oororomeleya.
Wa anamunceene, muupuwelo woowi mutthu ntoko owo aarowa ohaaxiwa omooroni mwaha woohibatiziwa, onikhala woohixariya ni wooveeha. Ohiya-vo, vanuupuweliwa wira ehantisi eyo ekhumelenle khalai ohinatthi Kristu olaleiwa mmuttettheni mwa Shim Cheong.
Mwaha wa ejornaale ele waahela muhina epantte ya okoha ni waakhuliwa wa muhooleli a etiini. Owo aakohiwe so: ‘Niireke otheene yaale akhwiiye ahirina eparakha yowiixuttihiwa voohimya sa Yesu anrowa ohukhummwa omooroni?’ Owo aakhunle so: “Hiyo khannisuwela. Masi nnuupuwela wira ehaavo etthu Muluku onirowa awe owiiriha [atthu awo]”.
NIIREKE OBATIZIWA ONNITTHUNEYA WIRA MUTTHU OOPOWE?
The New Catholic Encyclopedia enihimya so: “Obatizo etthu yootthuneya wira mutthu oopowe. Ntoko Kristu aahimmye awe, wira mutthu okele momweneni mwa Muluku ohaana oyariwa vasya ni maasi vamosa ni Erooho Yowaarya (Jn 3.5)”. Mwaha wa mwiixuttiho owo, akina anikupali wira ale anikhwa ahibatiziwe anrowa omooroni, aahiiso ohaaxiwa.
Masi aakhala atthu anceene akina anikupali wira muupuwelo owo ti woohiloka. Atthu anceene ahookhwa voohimusuwela Biibiliya. Niireke awo aniphwanelela ohaaxiwa voohimala? Biibiliya onihimyani mmwaha ola?
YOOLIPELELA ELEIHERIWE MBIIBILIYANI
Biibiliya onnooniherya saana wira Muluku khonihiya waathokorerya atthu yaale akhwiiye ahisuwenle malamulo awe. Yoolepa ya Miteko 17:30 enninlipiherya yiiraka: “Muluku khaniweha-tho okathi atthu yetta aya vohisuwela”. Nto, nlipelelo xeeni Biibiliya onaavaha awe ale anikhwa ahirina eparakha yowiixutta masu Muluku?
Waakhuliwa wa nikoho nlo oniphwanyaneya mmasu a Yesu aamulenle awe mutakhali ole mmosa aakhwiiye waattamela opuro aakhomeliwe Yesu. Mulopwana owo aahinvekela Yesu wira: “Mukùpuwele miyo, mwaphiyá momweneni mwanyu!” Yesu aamwaakhunle so: “Veekeekhai, kinnoohimeeryani olelo-va wira: Munookhala ni miyo oParayiisu”, Tradução do Novo Mundo.—Luka 23:39-43.
Niireke Yesu aamuleiherya mulopwana ole wira aamurowa wiirimu? Nnaari. Mulopwana ole nlelo ‘khaayariwe vasya’ ni maasi vamosa ni munepa, itthu soopacerya saatthuneya wira mutthu okele mOmweneni wa wiirimu. (Yohani 3:3-6) Masi, Yesu aamuleiherya mutakhali ole wira aarowa okhala oParayiisu. Mwaha wookhala muYuda, mulopwana ole aanisuwela yoohimmwa ya eParayiisu ya valaponi, ejardim ya wEdeni yeeyo eniromoliwa eliivuru yoopacerya ya mBiibiliyani. (Maphattuwelo 2:8) Yooleiherya ya Yesu yaahimulipiherya mulopwana ole wira okathi waarowa aya ottikiheriwa eParayiisu valaponi aamuhihimuxiwa wira akhale-mo.
Biibiliya onileiherya so: “Atthu othene, ale òrera murima n’ale òtakhala murima, anohihimuwa mokhwani”. (Miteko 24:15) Ale “òtakhala murima”, atthu yaale yahiiwelela malamulo a xariya a Muluku maana khiyaasuwela yootthuna ya Muluku. Yesu onoomuhihimuxa mulopwana ole “òtakhala murima”, waahela muhina atthu imilyau, aahiiso ibilyau sene yaawo akhwiiye moohimusuwela Muluku. Nto, mParayiisu valaponi, atthu awo anrowa wiixuttihiwa malamulo a Muluku, ni okhalana eparakha yowooniherya omphenta Muluku yeettelaka sooruma sawe.
VAAVO ALE OOTAKHALA MURIMA ANIROWA AYA OHIHIMUXIWA
Vaavo ale ootakhala murima anrowa aya ohihimuxiwa, niireke anrowa ophukeliwa moovarihana ni miteko saya sa khalai? Nnaari. ARoma 6:7 onihimya so: “Vekekhai, ole okhwiye ohàkiheriwa etampi” awe. Ale ootakhala murima anniliverya soottheka saya vaavo anikhwa aya. Tthiri awo anrowa ophukeliwa moovarinaha ni ele anrowa aya opaka nuumala ohihimuxiwa, ohiya ele epanke aya moohisuwela ahinatthi okhwa. Eparakha xeeni enrowa aya ophwanya?
Nuumala ohihimuxiwa, ale ootakhala murima anookhalana eparakha yowiixutta malamulo a Muluku, yaawo anrowa okumiheriwa vaavo iroolu sa nthoonyeryo sinrowa aya otthukuliwa. Vanonto awo anrowa ophukeliwa “sitthariheliwaka miteko savanryaya”, eyo piiyo, miteko sinrowa aya ovara okathi owo. (Wisupulula 20:12, 13) Wa anamunceene, ela enrowa okhala eparakha yoopacerya, ohiya ya nenli, wira aphwanye ekumi yoohimala valaponi yiixuttaka ni opaka yootthuna ya Muluku.
Yowiixuttiha ela ya Biibiliya ehaakhaliherya anamunceene otthikela omwaamini Muluku. Mwali mmosa Yeong Sug, ori eriyari ya atthu awo. Owo ohuuwale ntoko muKatoolika. Amusi awe akina yaari maPaadri. Ophavelaka okhala freira, owo aahirowa okhala empa ya mafreira. Muhoolo mwaya owo aahikhuma opuro ole mwaha woowi aahinyoonyiheya ni itthu oona awe opuro ole. Etthu ekina yaamuxankiha tiila: Owo khaawerya okupali yowiixuttiha ya omooroni, maana owo uupuwela wira ohaaxiwa wa atthu khahiyo wa xariya wala woophenta.
Nuumala-vo, Namoona a Yehova muthiyana aahimooniherya Yeong Sug moolumo ari mBiibiliyani ani: “Atthu akumi annisuwela wira anrowa okhwa, masi alipa-òkhwa khansuwela-tho etthu. Awo khanwerya olipelela etthu”. (Musuweli 9:5) Namoona ole, aahimukhaliherya Yeong Sug osuwela wira amuhavinre awe khahiyo yaamuhaaxiwa omooroni. Masi, awo yaamurupa mookhwaani alipelelaka ohihimuxiwa.
Osuwelaka wira anamunceene khiyaiwale ekeekhai eyo ya Biibiliya, Yeong Sug aahoona otthuneya waya wiiwelela masu a Yesu aniphwanyaneya yoolepa ya Matheyo 24:14 yaawo ani: “Ehapar’ila Yorera y’omwene wa wirimu enolaleiwa mulaponi mothene, wira maloko othene esuwele, yamini. Vano-nto, olumwenk’ula omaleke”. Vano Yeong Sug, onnilaleya ihapari sooreera aaleelaka atthu akina nlipelelo noohakalaliha niri mBiibiliyani.
“MULUKU KHANATHANLA ATTHU”
Biibiliya onninleela iiraka: “Muluku khanathanla atthu. Tthiri Muluku onnaphenta atthu a nloko ti nloko, yale animuttittimiha enettela exariya”. (Miteko 10:34, 35) Ela ti exariya yoomalela yeeyo otheene ahu ninlipelela ahu wa Muluku yoowo oniphenta “exariya”.—Esalimo 33:5.