Wiiwelela Soolopola Pooti Woopola Ekumi!

MAHIKU yeettaka 26 a Dezembro 2004, yaahikhumela etetere ya munnuwelo 9.1 muttetthe wa oSimeulue, esisiro eri mpantta wa okuusini wa oSumatra, wIndonesia. Atthu yaattamenle ephareya yaanoona wira eyo yaaniwelela mowaakuveya ovikana mahiku makina. Moohipisa atthu otheene yaahipacerya otthyawela omwaako ekhuwelaka so: “Smong! Smong!”, (wala tsunami, moovarihana ni nttaava na elapo ele). Muhina mwa minutu 30, yaahikhumela mawimpi ootupa yaawo yaapwenxe inupa sinceene sa muttetthe ole.

Esisiro ya oSimeulue ti yaapacenrye ophwanyiwa ni tsunami wala maasi ootupa a mphareya. Esisiro ele yaahikhala atthu oowiiraka 78.000, masi 7 paahi ti yaakhwiiye. Mwaha aya?a Atthu a esisiro ele aakhalana muhapo oni: ‘Akhala wira ennikhumela etetere, nave ephareya enawelela mowaakuveya, mutthyaweleke mapuro ootthukuwa maana ephareya eyo enootthika voohipisa’. Nto atthu ale aahiixutta wira owelela wowaakuveya wa ephareya onithoonyerya wira tsunami onnaattamela. Tthiri wiiwelela soolopola ohoopola ikumi saya.

Biibiliya onihimya wira ennaattamela ehasara ya “maxakha malupale, ehinákhumelele okhuma wopajeryani w’olumwenku mpakha vano, nnákhala ahinrowa-tho okhumelela”. (Matheyo 24:21) Eyo khentaphulela wira miteko soohiloka sa apinaatamu wala ehasara ya ephattu tenrowa opwetexa elapo ahu. Maana Muluku oohimya wira elapo enookhala mahiku otheene. (Musuweli 1:4) Masi orumeelaka “maxakha malupale”, Muluku ‘onimwapwetexa ale anihonona elapo’ ni omaliha ohaawa ni otakhala wotheene. (Wisupulula 11:18; Miruku 2:22) Tthiri owo onrowa okhala okathi woohakalaliha!

Moovirikana ni tsunami, etetere, wala ophuleya wa mwaako, ehasara eyo khenrowa owiiva atthu ahitthenke. Biibiliya onihimya wira “Muluku ophentá”; nto owo onileiherya wira “anaxariya animwakhela elapo yohiyeriw’aya: anrowa okhalaka-mo mahiku othene”. (1 Yohani 4:8; Esalimo 37:29) Nto, exeeni ekhanle anyu oopaka wira moopowe ni mwaakhele mareeliho awo? Mwiiweleleke soolopola!

MUKHALEKE OOWEHAWEHA

Hiyo khaninwerya ohimya nihiku ninrowa aya omala otakhala, maana Yesu aahimyale so: “Nihiku walá okathi sinrowaya okhumelela itthu iya, khavo onsuwela: nnákhala malaikha a wirimu, nnákhala Mwana. Atithi pahi t’asuwenle”. Masi owo aahihimya-tho so: “Nwehereryeke”. (Matheyo 24:36; 25:13) Owehererya exeeni? Biibiliya onnihimya itthu saarowa okhumelela ohinatthi ophiya wanikisa. Ntoko atthu a esisiro ya oSimeulue yaasuwenle aya wira aanaattamela tsunami mwaha wa owelela mowaakuveya wa ephareya, vamosaru, oturukeya mowaakuveya wa makhalelo a olumwenku onooniherya wira wanikisa ori vakhiviru. Ekaaxa enittharelana ennooniherya itthu sootikiniha Biibiliya onilavula awe.

Ekeekhai wira itthu siromoliwe ekaaxa eyo saanikhumela khalai mapuro makina. Masi Yesu aahimyale wira ‘nònakaru sikhumelelaka itthu iya’, nisuweleke wira wanikisa ori vakhiviru. (Matheyo 24:33) Mwiikoheke so: ‘Silini itthu iya saahimmwale ni Yesu (1) saatonko aya wiiraneya olumwenku wotheene, (2) okathi omosaru, ni (3) mootepa otakhala?’ Tthiri ninkhala okathi yoowo.

ETTHU ENOONIHERYA OPHENTA WA MULUKU

Presidente a khalai a wEstados Unidos aahimyale so: “Soolopola sinivahiwa vahinatthi ni guvernu . . . sinnoopola ikumi”. Nuuvira tsunami a 2004, guvernu aahimulokiherya alarme khompweha muttetthe yoole waaphwanyiwe ni ehasara wira muhoolo atthu ehikhwe moota yoole. Vamosaru, Muluku ookumiherya etthu enaalopola atthu wira ehikhwe. Biibiliya oni: “Ehapar’ila yorera y’Omwene wa wirimu enolaleiwa mulaponi mothene, wira atthu othene esuwele, yamini. Vano-nto, olumwenk’ula omaleke”.​—Matheyo 24:14.

Mwaisana, Anamoona a Yehova yaahiviriha iwoora 1.9 ibilyau sene alaleyaka ihapari sooreera ilapo 240 ni mattaava anivikana 700. Olelo-va, orowa vahoolo wa muteko ola onnooniherya wira wanikisa ori vakhiviru. Mwaha wowaaphenta akhwaaya, Anamoona a Yehova anniimananiha waalopola atthu sa nihiku noophukela na Muluku nnaattamela. (Matheyo 22:39) Tthiri mwaha woowi nyuwo munniwerya wiiwa yoolopola ela, onooniherya wira Yehova onnoophentani. Muupuweleke wira “[Muluku] khantthuna wira mutthu apweteye, nnákhala mmosá. Ontthunexawe wira atthu othene erukunuxe murima”. (2 Pedru 3:9) Niireke munimwiiwelela yoolopola ela enooniherya ophenta wa Yehova?

MUTTHYAWELE OPURO WOOLOKA

Muupuweleke wira atthu a esisiro ya oSimeulue yaahitthyawela mapuro oottukhuwa wira yoopowe okathi yoonale aya ephareya ewelelaka vowaakuveya. Khiyaalipelenle ephareya eyo otthika. Otthyawa mowaakuveya waahoopola ikumi saya. Vamosaru, wira nihikhwe okathi wa maxakha anaattamela, nihaana otthyawela mapuro oottukhuwa. Moota xeeni? Profeta Yesaya aahuupuxeriwa ni Muluku olepa sa nlattulo nla noovara murima nniireya mahiku ala ookiserya oriki: “Rwani, niwelé mwako w’Apwiya . . . Owo ononixuttiha iphiro sawe”.​—Yesaya 2:2, 3.

Ole ori vamwaako onniwerya woona saana itthu ni ori opuro wooloka. Vamosaru, omusoma Biibiliya ohaakhaliherya anamunceene osuwela iphiro sa Muluku ni opaka marukunuxo mookumini mwaya. (2 Timótheyo 3:16, 17) Eyo enniwiiriha ‘otthara miphito sa Muluku’ ni ottottela mureerelo nikhaliheryo nawe.

Niireke munimweemya nlattulo na Muluku nenno owo onivaha awe mahiku ala ookiserya? Ninnootumereryani wira musome ekaaxa enittharelana enooniherya wira ninkhala “okathi wokiserya” moovarihana ni Biibiliya. Anamoona a Yehova a muttetthe anyu anoosiveliwa wookhaliheryani wira mwiiwexexe ni weettela ele Biibiliya oniixuttiha awe. Aahiiso, pooti oweha esaite ahu www.jw.org, opuro oni: SOWIIXUTTIHA SA BIIBILIYA > WAAKHULIWA WA MAKOHO A MBIIBILIYANI.