MWAHA WA VAKAAPANI | NIIREKE WANIKISA ONNAATTAMELA?

Niireke Wanikisa Onnnaattamela?

Niireke Muluku onimwaahiya apinaatamu evikanihaka olamulela elapo? Nnaari. Ntoko noonale ahu, Muluku onoopwetexa iguvernu sotheene sinaahaaxa ni waapuherya atthu. Ole opattunxe elapo ni atthu, oniphavela wira musuwele wira okathi ene onnaattamela. Nto Muluku onnisuweliha sai ihapari iya sootthuneya?

Mwa ntakiheryo, ale aneettiha ekaaro wira aphiye saana opuro onirowa aya, waaniheryasa annirumeela ithoonyeryo sinoona aya mphironi, ntoko maapha, ni itthu sikina. Ithoonyeryo iyo sinnaakhaliherya osuwela akhala wira ahaattamela wala khiyaattamenle opuro onirowa aya. Moolikanasa, Muluku oonivaha Nuulumo nawe, Biibiliya. Owo onnihimya ithoonyeryo saarowa okhumela ohinatthi ophiya wanikisa. Iyo sinninikhaliherya osuwela wira wanikisa ohaattamela.

Biibiliya aahihimya wira ohinatthi ophiya wanikisa, saamukhumela itthu soothikila muthana molumwenkuni. Okathi owo, saamukhumela itthu ni mikhalelo soovirikana seiyo sahaatonko owiiraneela apinaatamu. Muthokorerye sowiiraneya sikina siromoliwe mBiibiliyani.

1. MIXANKIHO SA OLUMWENKU WOTHEENE Eprofesia ya evangelyo ya Matheyo ekapiitulu 24 ennihimya itthu saarowa okhala ethoonyeryo ya wanikisa. Ethoonyeryo eyo yaarowa okhala okathi woomala wa itthu, nuumala-vo orweeke ‘wanikisa’. (Iversu 3, 14) Ithoonyeryo iyo sinihela muhina ikhotto, etala, itetere ilapo sinceene, wuncerereya wa sootakhala, ohiphentana wa atthu anceene, ni okhumela wa ahooleli a itiini aniwoototha atthu. (Iversu 6-26) Ekeekhai wira itthu iyo sinnikhumelela okhuma khalai. Masi, vaavo wanikisa onaattamela aya, itthu iyo sinnikhumela okathi omosaru wooxankiha. Itthu iyo sinnivarihana ni wiiraneya wa iprofesia tthaaru sinttharelana.

2. MUKHALELO WA ATTHU Biibiliya aahihimya wira “okathi wokiserya”, eyo piiyo, wanikisa, atthu anceene khiyaarowa okhalana mweettelo wooloka. Ninsoma so: “Atthu anrowa wisupuwelaka mmansaya pahi, anrowa okhala anamilili, anrowa wittottopaka ni wisona. Awo anonveha Muluku, anokhala òhiwìwelela anamuyari aya, òhixukhuru, òhittittimiha itthu sowarya, òhiphenta, òhimoriwa ikharari, òwòtherya akhw’aya, òhisumaliha, òwali, òvirikanya sorera sothene, anamalupattha, òwakuva onanariwa, òsareya wisona, òphavela sopuha, òmuhiya Muluku”. (2 Timótheyo 3:1-4) Ekeekhai wira mweettelo owo khahiyo wa niinano, masi paahi “okathi wokiserya”, tonitepa aya. Biibiliya onniromola okhala “mahiku òxanka”. Niireke munnoona mikhalelo iyo eriyari ya atthu olelo-va?

3. OHONONIWA WA ELAPO Biibiliya onihimya wira Muluku ‘onimwapwetexa ale anihonona elapo’. (Wisupulula 11:18) Mwa inamuna xeeni atthu anihonona aya elapo? Biibiliya onnilavula sa okathi wa Nowe, oriki: “Atthu akina othene yari òtakhala vamaithoni va Muluku: elapo yahisareya owali. Muluku ahiweha elapo, khona wira yohononeya”. Nto Muluku aahaaleela atthu ale wira: “Kinimwamaliha atthu [awo]”. (Maphattuwelo 6:11-13) Niireke munnoona itthu sinooniherya wira elapo yoosareya otakhala? Olelo-va sinnikhumela itthu sihitonko wooniwa molumwenkuni, eyo piiyo: ikaruma soowerya seiyo sinipakiwa ni apinaatamu siniwerya ohonona elapo, ni omala-maliha okumi wa apinaatamu. Nave, elapo ennihononiwa mwa mukhalelo mukina. Itthu sinikhaliherya okumi valaponi, ntoko: epheyo enimumula ahu, inama, miri, ni iphareya, sinnihononiwa mwaha wa ohirumeeliwa saana ni apinaatamu.

Mwiikoheke so: ‘Mwa eseekulu evinre, kiireke apinaatamu yaahikhalana owerya wa waapwetexa atthu olumwenku wotheene?’ Masi olelo-va, atthu aakhalana owerya iwo. Awo annithukumanya ikaruma soorowa vahoolo siniwerya ohonona makhalelo a valaponi. Vanikhala wira pinaatamu khoniwerya owehaweha saana sookhumelela sa orowa vahoolo vowaakuveya wa etekonologia. Masi ti voohakalaliha osuwela wira elapo khenrowa ohononiwa moomalela. Muluku ooleiherya wira onrowa waapwetexa apinaatamu ahinatthi ohonona elapo moomalela!

4. EKAMPAANYA YA OLALEERYA MOLUMWENKUNI Ethoonyeryo ekina enooniherya wira niri wanikisa ti ovariwa wa muteko ohitonko okhumela: “Ehapar’ila yorera y’omwene wa wirimu enolaleiwa mulaponi mothene, wira maloko othene esuwele, yamini. Vano-nto, olumwenk’ula omaleke”. (Matheyo 24:14) Ekampaanya ela yoolaleerya ennivirikana vanceene ni ele enipakiwa ni itiini sikina okhuma khalai. Mahiku ala ookiserya, ‘ihapari sorera sa Omwene wa wirimu’ sinnilaleiwa vanceene. Niireke ehaavo etiini enilaleya ihapari iyo, ohiya paahi elapo emosa masi mulaponi motheene, wira maloko otheene esuwele?

Yoolakela yuulupale ya Web saite ahu www.jw.org,ori olaleya ‘ihapari soreera sa Omwene wa wirimu’. Esaite ela ennikumiherya iliivuru sinilaleya ihapari iyo mwa mattaava anivikana 700. Niireke ohaavo mutthenkeso mukina onluttuweliwa olaleya ihapari sa omwene olumwenku wotheene? Hata okathi yiira aya ehikhumenle Interneti, Anamoona yaanisuweliwa mwaha wa wiimananiha waya olaleya ihapari sooreera sa Omwene wa Muluku. Okhuma eyaakha ya 1939, ekaapa ya erevista Owehaweha ennikhalana moolumo anihimya so: “Elaleyaka Omwene wa Yehova”. Eliivuru emosa enilavula myaha sa itiini, ehimmye wira muteko wa Anamoona “onnivikaniha orowa vahoolo ni khonilikana ni muteko mukina”. Ihapari iyo sinnittittimiherya wira moohipisa ‘wanikisa onoophiya’ orweela wa Omwene wa Muluku.

OKATHI MUULUPALE WA SOWIIRANEYA SA ATTHU

Niireke mooweha mookumini mwanyu wiiraneya wa iprofesia xexe sa Biibiliya sihimmwale ni mwaha ola? Mwa iyaakha sinivikana 100, erevista ela ennilaleya itthu sekeekhai voohimya sa olumwenku, ni ennaakhaliherya ale anisoma osuwela wira wanikisa ohaattamela. Masi, ahaavo atthu ahinikupali, ni anihimya wira ele Biibiliya enihimya awe sa wanikisa ti etthu yowoothiwa ni yoopakeleliwa. Awo anihimya wira mwaha wa orowa vahoolo wa ikaruma sinlaleya masu, vanikhala ntoko wira itthu sa mulaponi sinootepa otakhala. Masi, ale arina muupuwelo wooloka, annoona wira ninkhala okathi wookiserya.

Asomi akina annoona wira moohipisa anookhumela marukunuxo valaponi. Mwa ntakiheryo, mwaakha wa 2014, egrupu emosa ya masientista yaahilepa erevista Bulletin of the Atomic Scientists Science and Security Board yeeyo yaalopola Nikhuuru na Segurança na ONU voohimya sa sowoopiha sinrowa wiireya valaponi. Awo ahimyale so: “Nuumala otokosa saana, nihoona wira tthiri ehaavo yowoopiha yuulupale ya ehasara ya etekonologia ekhanle oowaaphwanya apinaatamu”. Tthiri, anamunceene annikupali wira ninkhala okathi muulupale wa sowiiraneya sa atthu. Nave-tho ale alempe erevista ela vamosa ni ale anisoma annikupali wira ninkhala mahiku ookiserya ni wanikisa onnaattamela. Nto ohiya woova sa ele enrowa wiireya muhoolo, nyuwo pooti ohakalala mwaha wa ele enrowa okhumelela. Mwaha aya? Mwaha woowi nyuwo pooti woopowa!

[Ekaaxa epaaxina 7]

NIIREKE ANAMOONA A YEHOVA TI MAPROFETA ANILALEYA OMALA WA OLUMWENKU?

Nnaari. Mwa iyaakha sinivikana 100, awo anilaleya ihapari sooreera voohimya sa muhoolo. Mwa ntakiheryo, kongresu aapakiwe mwaakha wa 1958, waahilavuliwa mwaha waahimya so: “Omwene wa Muluku Onnilamulela: Niireke Wanikisa wa Olumwenku Ohaattamela?” Owo waahitthokiherya wira “omwene wa Muluku khonrowa opwetexa elapo, masi olumwenku wa Satana. Omwene owo Khonrowa opaha elapo ela, masi onrowa wiiriha yootthuna ya Muluku wiiraneya valaponi ntoko wiirimu. Nto elapo ennireerela osukiwa ntoko etthu epattuxiwe ni Muluku; nave Owo khonrowa opwetexa elapo mwa mahiku otheene”.