Mulipihe Waataana Wanyu ni Yehova

KHULA mwaakha, atthu anceene yaahiyale omurumeela Yehova annittikixeriwa mmulokoni. Nkahaya muupuwele ‘ohakalala onikhumelela wiirimu’ vaavo atthu awo anihokolowela aya wa Yehova! (Luka 15:7, 10) Akhala wira nyuwo moottikixeriwa mmulokoni, mukupaliki wira Yesu, malaikha ni Yehova annihakalala woowehani nyuwo mutthikelaka weettela ekeekhai. Masi vaavo muniimananiha anyu olipiha waataana wanyu ni Yehova, munookhalanaka mixankiho. Mixankiho xeeni? Etthu xeeni enrowa wookhaliheryani oxintta mixankiho iyo?

MIXANKIHO SINIKHUMELELA

Nuumala ottikixeriwa mmulokoni, atthu akina nlelo anniwanana miyuupuwelelo soohiloka. Woonasa wene, moonelo anyu onoolikana ni wa mwene Davidi. Hata nuumala oleveleliwa itampi sawe, Davidi aahimmye so: “Sottheka saka sinnikiripiha murima”. (Esal. 40:13; 65:4) Nuumala ohokolowela wa Yehova, atthu akina nlelo anniivaha nthowa ni annuuliwa muru mwa iyaakha sinceene. Eyo ti etthu yaamwiiranenle murokora oniihaniwa Isabelle yoowo aavirinhe iyaakha sinivikana 20 okumihiwe ene mmulokonia. Isabelle onihimya so: “Waanikivila okupali wira Yehova ookilevelela”. Akhala wira munookhulumuwa, waataana wanyu ni Yehova pooti ovukuwa. (Mir. 24:10) Nto muheemererye eyo ewiiraneelakani.

Atthu akina, anoona wira khaniwerya opaka itthu sotheene sinireerela wira atthikele okhalana waataana wooloka ni Yehova. Nuumala ottikixeriwa mmulokoni, Antoine ohimmye so: “Kaahiliyala itthu sotheene kiixuntte aka ni kaapanke aka okathi kaari aka Namoona”. Mwaha wookhalana moonelo ntoko owo, atthu akina vannaavila ovara miteko sa Yehova.

Mwa ntakiheryo, nkahaya mmuupuwele mutthu ehononiwe empa awe ni munamukhaya. Vaavo mutthu owo oniweha awe empa awe ehononeyale ene, ni moota onrowa awe otthikela oteka, woonasa wene owo pooti oxanka mwaha wa okathi ni muteko onrowa awe ovara wira olokiherye. Etthu emosaru, enniiraneya vaavo mutthu onipaka awe etampi yuulupale ni onahonona waataana wawe ni Yehova. Woonasa wene, mutthu owo pooti oxanka vaavo onuupuwela awe itthu onireerela awe opaka wira otthikele okhalana waataana wooloka ni Yehova. Akhala wira ti siiso, khivanireerela nyuwo oxanka maana khamukhanle mekhinyu.

Yehova onninlattula oriki: “Haya, rwakani, nivaneleke”. (Yes. 1:18) Nyuwo muhiimananiha vanceene wira “mphuke myaha sanyu” ni Yehova nave owo onnoophentani vanceene mwaha woopaka eyo. Nkahaya muupuwele ela: Okhala wira moohokolowela wa Yehova, yena pooti orumeela ntakiheryo nanyu wira omwaakhule ole oninveha, Satana Diabo!—Mir. 27:11.

Okhala wira moohokolowela wa Yehova, nyuwo munnimwaattamela Yehova. Nave Yehova ooleiherya owaattamelani. (Yak. 4:8) Atthu anceene annihakalala woona wira nyuwo moohokolowela wa Yehova. Masi muhiikhuraane, maana sookhala itthu sikina munireerela anyu opaka. Nyuwo muhaana olipiha omphenta Tiithi anyu ni Mpatthani inyu Yehova. Munrowa owerya sai opaka eyo?

MUKHALANEKE SOOLUKAMA MUNIWERYA ANYU OPHWANYA

Mukhalaneke soolukama muniwerya ophwanya. Muhiliyale wira etthu yuulupale enrowa wookhaliheryani olipiha waamini wanyu, ori wuupuwela sowiixuttiha soopacerya voohimya sa Yehova ni itthu Muluku oleihenrye awe. Nave muhaana otthikela okhalana eprokrama yoovara miteko sa Muluku, ntoko olaleerya, orowela mithukumano ni oviriha okathi muri ene ni anna ni arokora a mmulokoni. Nwehe soolukama munireerela anyu okhalana.

Nvaaneleke ni Yehova ikwaha sinceene. Tiithi ihu a wiirimu, onnisuwela wira okathi mukina munniivaha nthowa ni vannoovilani onvekela. (aRom. 8:26) Hata vari siiso, muhihiyereryeke ovekela mmuleelaka Yehova wira munniphavela okhala mpatthani awe. (aRom. 12:12) Andrej onihimya so: “Miyo kaanitepa wiivaha nthowa ni kaanuuliwa muru, masi vaavo kaavekela aka muupuwelo owo waanivukuwa, kaanikhalana murettele”. Akhala wira khamunsuwela etthu ene munireerela anyu ovekela, musome Esalimo 51 ni 65 yeeyo enooniherya nivekelo mwene Davidi aapanke awe nuumala ottharuwa itampi sawe.

Mmusomeke Biibiliya khula nihiku. Omusoma Biibiliya khula nihiku, onimookhaliheryani olipiha waamini wanyu ni omphenta wanyu Yehova. (Esal. 19:8-12) Felipe ohimmye so: “Okhala wira kaahihiya okhalana eprograma ya omusoma Biibiliya khula nihiku, waamini waka waahivukuwa ni kaahimunyoonyiha Yehova. Miyo nkaaphavela otthikela opaka yoovonya emosaru. Nto kaahilakela otthikela omusoma Biibiliya”. Nyuwo pooti otthikela opaka etthu emosaru Felipe opanke awe. Akhala wira khamunsuwela oratteene itthu munireerela anyu osoma, pooti onvekela nikhaliheryo mpatthani anyu oolipa mwa omunepani.

Mulipihe waataana wanyu ni anna ni arokora. Atthu akina, nuumala ottikixeriwa mmulokoni, annoovelela okhalana waataana wooloka ni anna ni arokora maana anuupuwela wira anna ni arokora khaniwoona saana. Larissa onihimya so: “Miyo kaanuuliwa muru, kuupuwela wira kaahaanyoonyiha anna ni arokora. Nto kaahikhalana muupuwelo owo okathi munceene”. Masi mukupaliki wira axitokweene ni anna ni arokora arina waataana wooloka ni Yehova anniphavela ni murima wotheene wookhaliheryani otthikela olipiha waataana wanyu ni Yehova. (Nwehe ekaaxa eni: “Axitokweene Ahaana Opaka Exeeni?”) Axitokweene awo annihakalala woowehani muhokolowenle ene wa Yehova ni aniphavela wira muhakalaleke!—Mir. 17:17.

Munrowa owerya sai olipiha waataana wanyu ni anna ni arokora? Muroweleke mithukumano sotheene ni mulaleeryeke ni muloko. Opaka eyo, enrowa wookhaliheryani sai? Felix onihimya so: “Anna ni arokora yaaniphavela vanceene wira miyo kihokolowele mmulokoni. Miyo kaahoona wira yaanikiphenta vanceene. Otheene aya yaahikikhaliherya woona wira kootthikela wiirela mpantta emusi ela yowiiraana. Yaahikooniherya wira Yehova ookilevelela ni kaahaana ohihiya omukokhorela”.—Nwehe ekaaxa eni: “Nyuwo Muhaana Opaka Exeeni?”

MUHIKHULUMUWE!

Vaavo muniimananiha anyu olipiha waataana wanyu ni Yehova, mukupaliki wira Satana khonrowa ohiya wookumiheryani mixankiho. Owo oniphavela wira mukhulumuwe. (Luka 4:13) Nto mwiilokiherye niinaano-va ni mulipihe waamini wanyu.

Olavulaka sa ipwittipwitthi sawe, Yehova oleihenrye so: “Miyo kinophavela epwittipwitthi erimenle: kinohokoloxa sihapuwale, kinohela murette sivulanle, kinovaha ikuru sinwereiwa”. (Ezek. 34:16) Yehova ohaakhaliherya arumeyi awe anceene otthikela okhalana waataana wooloka ni yena. Nto mukupaliki ni murima wotheene wira onimookhaliheryani olipiha waataana wanyu ni yena.

Axitokweene Ahaana Opaka Exeeni?

Axitokweene anoowerya waakhaliherya vanceene ale attikiheriwe mmulokoni olipiha waataana waya ni Yehova. Nwehe moota axitokweene akhanle aya oowaakhaliherya.

Mwaakhaliherye woona wira anniphentiwa. Murummwa Paulo aanisuwela wira ale apanke etampi attharuwa ni murima wotheene, pooti ‘otepa oriipiwa murima mpakha okhulumuwa’. (2 aKor. 2:7) Tthiri awo pooti wuuliwa muru wala okhulumuwa. Tivonto Paulo aatumerenrye awe axitokweene wira yaahaana ‘omulevelela mulopwana ole ni murima wotheene ni ommaaliha’. Ale attikixeriwe mmulokoni ahaana okhaliheriwa woona wira Yehova, anna ni arokora annaaphenta vanceene. Ti vooloka axitokweene waattottopela ni waakhaliherya.

Mwaavekeleleke. “Mavekelo ooxonttela a naxariya, aakhalana owerya wuulupale”. (Yak. 5:16) Larissa nimulavunle ahu onihimya so: “Miyo kaahaaleela axitokweene itthu kahaasuwela aka ni koova aka. Awo yaahikivekelela. Nto kaahoona wira axitokweene khiyaananariwe mwaha wa itthu kaapanke aka. Awo yaaphavela okikhaliherya otthikela okhalana waataana wooloka ni Yehova”. Theo onihimya so: “Mavekelo a axitokweene yaahikikhaliherya woona wira Yehova onnikiphenta vanceene ni onniweha itthu sooloka kimpaka aka ohiya soovonya saka”.

Mukhaleke apatthani aya. Atthu ale attikiheriwe mmulokoni, ahaana okhalana waataana wooloka ni anna ni arokora. Mutokweene oniihaniwa Justin ohimmye so: “Nviriheke okathi munceene mulaleeryaka naawo ni ti vooloka waaxukurya owannyeya ikwaha sinceene. Okhala apatthani aya etthu enrowa waakhaliherya vanceene”. Mutokweene mukina oniihaniwa Henry, onihimya so: “Vaavo anna ni arokora anoona aya wira axitokweene annikhala apatthani a atthu ale attikiheriwe mmulokoni, anna ni arokora animwaatakihaka”.

Mwaakhaliheryeke omusoma Biibiliya. Mpatthani orina waataana wooloka ni Yehova pooti waakhaliherya ale attikiheriwe mmulokoni okhalana eprokrama yooloka ya omusoma Biibiliya. Mutokweene oniihaniwa Darko ohimmye so: “Onnikisivela vanceene waaleela itthu kiixuntte aka okathi kaamusoma aka Biibiliya. Nave kinnaaleela wira okisivela omusoma Biibiliya. Ohiya-vo, kinnisoma mwaha woolipiha ni atthu ale attikiheriwe mmulokoni”. Mutokweene mukina oniihaniwa Clayton ohimmye so: “Miyo kinnaatumererya waavya mBiibiliyani sowiiraneya sa atthu yaarina muxankiho ntoko muxankiho aya ni oweha itthu aniixutta aya”.

Mukhaleke makampusi ooloka. Ale attikiheriwe mmulokoni aatoko waaweha axitokweene ari ene ntoko aphuki, masi vano awo ahaana waaweha ntoko amakampusi. (Yer. 23:4) Nto mwaakuveleke waawiriyana ni mwaattottopeleke. Nave mwaalikareleke ikwaha sinceene. Nkahaya nwehe etthu ohimmye awe mutokweene oniihaniwa Marcus vaavo onirowa awe waaxukurya: “Hiyo ninniwooniherya Soolepa sa mBiibiliyani soolipiha ni ninnaattottopela. Nave ninnaaleela wira ninnihakalala mwaha wa ohokolowela wa Yehova, nave Yehova onnihakalala. Nihinatthi okhuma ninnaaleela nihiku ninrowa ahu otthikela waaxukurya”.

a Mwaha ola, masina makina aaturukiwa.