Haasayiyoogee intte intte naatuura gayttiyo zarphphe mala
YELIDAAGEETA MAADDIYAABAA
5 Haasayiyoogaa
HEGEE AYBEE?
Inttenne intte naati intte qofaanne intteyyo siyettiyaabaa issoy issuwawu qonccissiyoogee wozanappe haasayiyo oge.
HAASAYIYOOGEE KOSHSHIYO GAASUWAA
Yelagatuura haasayiyoogee metana danddayees. Intte naati naatettan deꞌiyo wode ubbabaa intteyyo yootoosona. SHin eti yelaga gidi simmin haꞌꞌi kaseegaadan haasayenna gishshawu, eta qofaanne etawu siyettiyaabaa erekketa. Hanotay intte gita shaafaappe hafinttaaninne hefinttan eqqidoogaa mala. Naati haasayana koyennaba intteyyo milatikkokka, hegee etaara haasayana koshshiyo wode!
AY OOTTANA DANDDAYAY?
Intte naꞌay haasayana koyiyo wode haasayissite. I qamma bilahe haasayana koyikkokka haasayissite.
“Intte, ‘Kumetta gallassaa issippe peꞌin, biron haasayana koyay?’ gaanawu koyana danddayeeta. SHin nu naati nunaara haasayana koyiyaabaa gidikko, nuuni hegaa aybissi ixxiyoo? Yelidaageeti ubbay koyiyoobay hegaa gidennee?”—Liiso.
“Taani qamissennan xiskkana koyays; shin ta yelaga naatuura issi issitoo loytta haasayidoy qamma bilaheppe simmiina.”—Herberta.
GEESHSHA MAXAAFAY YOOTIYO MAARAA: “Ooninne hara asa go77iyaabaa qoppoppe attin, harai atto issoinne bana go77iyaabaa qoppoppo.”—1 Qoronttoosa 10:24.
Intte qofay shaahettanaadan oottoppite. Issi aaway hagaadan giis: “Issi issitoo ta naati tana haasayissiyo wode taani harabaa qoppays. SHin taani eti yootiyoobaa ezggaydda deꞌennaagaa akeekoosona!”
Televizhiinenne moobayle malabay intte qofay shaahettanaadan oottikko, hegaa gorddiichchite. Intte naati yootiyoobay darin koshshennaba milatikkokka, eta qofissidabaa akeekanawu baaxetite; qassi eti yootiyoobaa loytti ezggite.
“Nu naata qofissiyaabay nunakka qofissiyoogaa eti akeekanaadan oottana bessees. Hegaadan gidana xayikko, banttana qofissidabaa yootokkona woy hara urappe maaduwaa koyana.”—Marando.
“Intte naꞌaa qofay bala gidikkokka, keehi dagammoppite.”—Antoona.
GEESHSHA MAXAAFAY YOOTIYO MAARAA: “Intte siyiyo yohuwaa ezggidi siyite.”—Luqaasa 8:18.
Issippe wodiyaa aattiyo wodiyan haasayite. Issi issitoo naati aawaara woy aayeera uttidi issoy issuwaa xeelliiddi haasayiyo wode banttawu siyettiyaabaa loytti yootokkona.
“Nuuni kaamiyan issisaa biiddi haasayoos. Nuuni issoy issuwaa xeelliiddi gidennan, issoy haraa miyyiyan uttiyoogee loytti haasayanawu maaddiis.”—Nikolo.
Qumaa miyo wodekka loytti haasayana danddayettees.
“Kahuwaa miyo wode, nuuni ubbay he galla nuna keehi azzanttidabaanne keehi ufayssidabaa haasayoos. Yaatiyoogee nu issippetettaa mintteesinne nuna gakkiya metuwaa xoonanawu nu xallay baaxetennaagaa akeekanaadan maaddiis.”—Roobina.
GEESHSHA MAXAAFAY YOOTIYO MAARAA: ‘Siyanawu eesotite; shin haasayanawu eesotoppite.’—Yaaqooba 1:19.