Koyro Bitaniyaanne Maccaasiyo

HA MISILIYAN deꞌiya dummatiyaabi aybee? Ee, ha misiliyaa dummayiyaabay asay deꞌiyoogaa. Hageeti koyro bitaniyaanne koyro maccaasiyo. Eta medhdhiday oonee? Xoossaa. A sunttaa eray? A sunttay Yihoowa. Bitaneenne maccaasiyaa qassi Addaamanne Hewaano geetettoosona.

Xoossaa Yihooway Addaama hagaadan medhdhiis. I biittaappe amarida baanaa ekkidi, aybiininne paci baynna issi bitaniyaa bollaa medhdhiis. Hegaappe simmidi, bitaniyaa siiriyan shemppin Addaamee deꞌuwaa demmiis.

Xoossaa Yihooway Addaameyyo immana oosoy deꞌees. Addaamee dumma dumma qommo mehetanne doꞌata ubbaa sunttanaadan Xoossay yootiis. Addaamee geella mehetanne doꞌata daro wodiyaassi beꞌennan aggenna gishshau, eta ubbaayyo giiga sunttaa sunttana danddayees. Addaamee mehetuyyonne doꞌatuyyo sunttaa kessiyo wode issibaa akeekiis. Hegee aybakko eray?

Mehetinne doꞌati ubbay attumanne macca. Attumanne macca danggarssatinne attumanne macca gaammoti deꞌoosona. SHin Addaameyyo maccaasi baawa. Yaatiyo gishshau, Yihooway Addaama xiskkuwan kayirissidi, a miyyiyaappe issi gaylle meqettaa ekkiis. Yihooway he gaylliyaa goꞌettidi maccaasa medhdhin, a assi machcho gidaasu.

Addaamee he wode ayba ufayttideeshsha! Hewaanakka hegaa mala loꞌꞌiya ataakiltte sohuwan deꞌanaadan Yihooway wotto gishshau, ay keena ufayttidaakko qoppa! Haꞌꞌi eti naata yelanaunne ufayssan issippe deꞌanau danddayoosona.

Yihooway Addaameenne Hewaana merinau deꞌanaadan koyiis. Eti kumetta saꞌaa Edene ataakiltte sohuwaadan loꞌꞌiyaasa oottanaadan i koyiis. Addaameenne Hewaana he oosuwaabaa qoppiyo wode ay keena ufayttidonaashsha! Neenikka saꞌaa loꞌꞌiya ataakiltte soho oottiyoogan maaddiyoogaa dosuuteeshsha? SHin Addaamenne Hewaani ufayssay gamꞌꞌibeenna. Hegee aybissakko ane beꞌoos.