Bantta Deꞌiyoosaappe Kiyido Gaasuwaa

HAꞌꞌI aybi haniiddi deꞌiyaakko beꞌa. Addaameenne Hewaana loꞌꞌiya Edene ataakiltte sohuwaappe yedetettiiddi deꞌoosona. Aybissakko eray?

Issi keehi iitabaa oottido gishshataassa. Yaatiyo gishshau, Yihooway eta qaxxayiiddi deꞌees. Addaameenne Hewaana oottido iitabay aybakko eray?

Xoossay oottoppite giido issibaa oottidosona. Xoossay ataakiltte sohuwan mokkiyaabaappe qumaa maana danddayiyoogaa etassi yootiis. SHin Xoossay, issi mittaa teeraappe meennaadan yootiis; miyaba gidikko hayqqoosona. He mittay assi buzo. Asaba gididabaa ekkiyoogee bala gidiyoogaa eroos; erokkonii? Yaatin hanidabay aybee?

Issi gallassi Hewaana ataakiltte sohuwan barkka deꞌishin, issi shooshshay o haasayissiis. Ane hegaa qoppa! I, Xoossay mooppite giido mittaa teeraappe maanaadan Hewaanissi yootiis. Yihooway shooshshata medhdhido wode haasayanaadan ootti medhdhiibeenna. Yaatiyo gishshau, hagee hanana danddayidoy, issi uri shooshshay haasayanaadan oottiina xalaala. I oonee?

Addaama gidenna. Hegaa gishshau, Yihooway saꞌaa medhdhanaappe daro wodiyaa kasetidi medhdhido ayyaana meretatuppe issuwaa gidana bessees. He meretati kiitanchchata; nuuni eta beꞌana danddayokko. Issi kiitanchchay keehi otorettiyaagaa gidiis. I Xoossaagaadan haariyaagaa gidanau taassi bessees giidi qoppiyoogaa doommiis. Asay Yihoowayyo azazettiyoogaappe baassi azazettanaadan koyiis. Shooshshay haasayanaadan oottida kiitanchchay a.

He kiitanchchay Hewaano cimmana danddayiis. He mittaa teeraappe miyaba gidikko, a Xoossaadan hanana danddayiyoogaa yootido wode hegaa ammanaagaasu. Yaatiyo gishshau, mabeyaasu; Addaameekka miis. Addaameenne Hewaana Xoossaassi azazettibookkona; bantta deꞌiyo loꞌꞌiya ataakiltte sohuwaappe eti kiyidoogeekka hegaassa.

Gidikkonne, sinttappe issi wode Xoossay kumetta saꞌaa, Edene ataakiltte sohuwaadan loꞌꞌiyasa oottana. Neenikka saꞌaa hegaadan oottiyo oosuwan waata maaddanaakko, deꞌishshiiddi tamaarana. SHin haꞌꞌi, Addaameenne Hewaana waanidaakko ane beꞌoos.