Metiya Deꞌoy Doommiis

EDENE ataakiltte sohuwaappe kiyidi, Addaameenne Hewaana daro metuwaa beꞌidosona. Miyo qumaa demmanau eti minnidi oottiyoogaa koshshiis. Loꞌꞌiya mittaa teeraa gishshaa, bantta heeran daro agunttaynne ohay mokkiyoogaa beꞌidosona. Addaameenne Hewaana Xoossaayyo azazettiyoogaa ixxidi, Aara deꞌiya dabbotaa aggin hanidabay hegaa.

SHin hegaappekka aadhdhida iitabay, Addaameenne Hewaana hayqqiyoogaa doommidoogaa. Issi mittaa teeraappe miikko hayqqeeta giidi, Xoossay eta seeridoogaa hassaya. Eti miido gallassaappe doommidi hayqqiyoogaa doommidosona. Eti Xoossaassi azazettennan ixxidoogan ay keena eeyyidonaa!

Addaamenne Hewaani naati ubbay yelettidoy, Xoossay Addaamanne Hewaano Edene ataakiltte sohuwaappe kessi simmiina. Hagee, eta naatikka ceeggi ceeggi biidi hayqqana deꞌoosona yaagiyoogaa.

Addaameenne Hewaana Yihoowassi azazettidaba gidiyaakko, deꞌoy etassinne eta naatussi ufayssiyaagaa gidana shin. Eti ubbay saꞌan merinau ufayssan deꞌana danddayiyoogaashin attiis. Ooninne ceeggenna, harggennanne hayqqenna shin.

Asay merinau ufayssan deꞌana mala Xoossay koyeesinne issi gallassi hegaadan oottanau qaalaa geliis. Kumetta saꞌay loꞌꞌiyoogaa xalla gidennan, ubba asay payyatettan deꞌana. Qassi, saꞌan deꞌiya ubba asay issoy issuwaara gidin Xoossaara gidin loꞌꞌo dabbo gidana.

SHin Hewaana Xoossaayyo dabbo gidada deꞌaggabuukku. Hegaa gishshau, naata yeliyo wode yeloy iyyo metiyaagaa gidiis. A waayettaasu. Yihoowassi azazettabeennaagee o daro metuwan yeggiis; hegee tuma gidennee?

Addaameenne Hewaana daro attumanne macca naata yelidosona. Bayra naꞌay yelettido wode, a Qaayeela giidi sunttidosona. Naaꞌꞌantto naꞌaa sunttaa qassi Aabeela giidosona. He naati waanidaakko neeni eray?