Koyro Zuullaa

NOHEE ba soo asaara markkabiyaappe kiyido wode, koyro oottidobay aybakko eray? I Xoossaayyo yarshshuwaa woykko imotaa shiishshiis. Hagaappe garssan deꞌiya misiliyan, i hegaa oottiyogaa beꞌana danddayaasa. Xoossay a soo asaa bashsha haattaappe ashshido gishshau, Nohee a galatanau mehetuppe he imotaa shiishshiis.

Yihooway he imotan ufayttidaba neeyyo milatii? Ee, ufayttiis. Hegaa gishshau, Yihooway saꞌaa bashsha haattan naaꞌꞌantto mule xayssennaagau Nohessi qaalaa geliis.

Gamꞌꞌennan biitta ubbay xiꞌꞌiis; qassi Noheenne a soo asay markkabiyaappe kiyidi ooratta duussaa doommidosona. Xoossay eta: ‘Yelettite corattite saꞌa ubaa kumite’ giidi anjjiis.

SHin guyyeppe, asay bashsha haattaabaa siyiyo wode, geella hegaa mala bashsha haattay haranttuwaakka gakkana giidi yayyana danddayoosona. Yaatiyo gishshau, Xoossay kumetta saꞌaa zaaridi bashsha haattan xayssennaagau gelido qaalaa asaa hassayssiya malaataa wottiis. Eta hassayissanau i wottido malaatay aybakko eray? He malaatay zuullaa.

Zuullay darotoo iray bukki simmin away kiyiyo wode saluwan beettees. Zuullau loꞌꞌiya daro dumma dumma meray deꞌees. Zuullaa beꞌa eray? Ha misiliyan deꞌiya zuullaa beꞌay?

Xoossay hagaadan giis: ‘Naaꞌꞌantto mulekka asay, meheenne doꞌay ubbay bashsha haattan xayennaagaassi taani qaalaa gelayiis. Taani ta zuullaa shaaraa giddon wottayiis. Zuullay kiyiyo wode beꞌada, ta gelido qaalaa hassayana’ yaagiis.

Yaatiyo gishshau, neeni zuullaa beꞌiyo wode, nena i ay hassayissana bessii? Ee, Xoossay zaarettidi kumetta saꞌaa bashsha haattan xayssennaagau gelido qaalaa hassayissana bessees.