Yooseefi Ba Ishantta Paacciis

YOOSEEFI 10⁠u ba bayra ishantti haꞌꞌikka qareti baynna iita asakkonne erana koyiis. Hegaa gishshau, i eta: ‘Intte wochchi xeelliya asa. Intte nu biittan naagoy leppiyo baggay augaakko beꞌanau yiideta’ yaagiis.

Eti: ‘CHii, gidokko’ yaagidosona. ‘Nuuni ammanettiya asa. Nuuni ubbaykka ishantta. Nuuni 12⁠u ishantta shin issoy xayiis; wurssetta kaaloy haꞌꞌi nu aawaara son deꞌees’ yaagidosona.

Yooseefi eta ammanibeennaba milatiis. Simoona giyo ishaa qashissidi, harati kaattaa ekkidi soo baanaadan oottiis. SHin eta: ‘Intte simmidi yiyo wode, intte wurssetta kaalo ishaa inttenaara ehaana koshshees’ yaagiis.

Eti Kanaane bantta soo simmido wode, bantta aawaa Yaaqoobassi hanettida ubbabaa odidosona. Yaaqoobi keehippe azzaniis. ‘Yooseefi baawa; Simoonikka baawa’ yaagidi yeekkiiddi: ‘Ta wurssetta naꞌaa Biniyaama inttenaara yeddikke’ yaagiis. SHin etau deꞌiya kattay wurana hanin, Yaaqoobi eti Gibxxeppe kattaa gujjidi ehaanaadan Biniyaama etaara yeddiis.

Haꞌꞌi Yooseefi ba ishantti yiyaageeta beꞌiis. I ba kaalo ishaa Biniyaama beꞌidi keehi ufayttiis. Ha xoqqa sohoy deꞌiyo bitanee Yooseefa gidiyoogaa, etappe issoynne eribeenna. Yooseefi haꞌꞌi ba aawaa naata 10⁠ta paaccanau issibaa oottiis.

I ba ashkkarati eta ubbaa ogoruwan kattaa kunttanaadan oottiis. SHin eti erennan, ba dumma bira wanccaa Biniyaama ogoro giddon yegissiis. Eti ubbay kiyidi guutta ogiyaa boogaappe guyyiyan, Yooseefi ba ashkkarata eta geeduwaa kiittiis. Ashkkarati etakko gakkidi: ‘Nu godaa bira wanccaa ayssi wuuqqidetii?’ yaagidosona.

Ishantti ubbaykka: ‘Nuuni a wanccaa wuuqqibookko’ yaagidosona. ‘Intte he wanccaa nu giddon ooppenne demmikko, he asi hayqqo’ yaagidosona.

Yaatin, ashkkarati ubbaa ogoruwaa giddon koyidi, Biniyaama ogoruwaa giddoppe, ha misiliyan neeni beꞌiyoogaadan, he wanccaa demmidosona. Ashkkarati: ‘Biniyaami attin intte ubbay baana danddayeeta shin, i nunaara baana koshshees’ yaagidosona. Haꞌꞌi a aawaa naati 10y waanana deꞌiyoonaa?

Eti ubbay Biniyaamaara Yooseefa so simmidosona. Yooseefi ba ishantta: ‘Intte ubbay soo baana danddayeeta shin, Biniyaami hagan attidi taassi aylle gidana bessees’ yaagiis.

Yihuday hagaadan giis: ‘Taani naꞌaa ekkennan soo simmikko, ta aaway naꞌaa keehi siiqiyo gishshau hayqqana. Hegaa gishshau, hayyana tana ne aylle oottada naꞌaa soo yedda’ yaagiis.

Yooseefi ba ishantti laamettidoogaa erana danddayiis. Eti haꞌꞌi kaseegaadan qareti baynna iita asa gidokkona. Haꞌꞌi Yooseefi ay oottidaakko ane beꞌoos.