Yooseefa A Ishantti Ixxidosona

HA NAꞌAY ay keena azzanidaakkonne hidoota xayidaakko xeella. I Yooseefa. A ishantti a Gibxxe biiddi deꞌiya asatussi bayzzi simmoosona. Yan Yooseefi aylle gidanau deꞌees. A aawaa naati ha iitabaa ayssi oottidonaa? Hegaa eti oottidoy Yooseefa qanaatiyo gishshataassa.

Eta aaway Yaaqoobi Yooseefa keehippe dosees. Yaaqoobi, a aatti siiqiyoogaa bessanau, alleeqettida adussa kootiyaa ayyo giigissiis. Yooseefa 10⁠u bayra ishantti, Yaaqoobi ay keena a dosiyaakko beꞌidi, Yooseefa qanaatiyoogaanne ixxiyoogaa doommidosona. SHin eti a ixxido hara gaasoykka deꞌees.

Yooseefi naaꞌꞌu aymuwaa aymottiis. Yooseefi aymottido he naaꞌꞌu aymuwankka a ishantti assi ziggidosona. He aymota Yooseefi etayyo odin, ubba kaseegaappe aattidi a ixxidosona.

Issi gallassi, Yaaqoobi Yooseefa bayra ishantti bantta aawaa dorssata heemmiyaageeta, eti waani deꞌiyaakko biidi beꞌanaadan Yooseefa kiittiis. Yooseefi etakko yiyaagaa beꞌidi etappe issoti issoti: ‘Haayite a woroos!’ yaagidosona. SHin ubbaappe bayratiya Roobeeli: ‘CHii, hegaadan oottoppite!’ yaagiis. Woriyoogaa aggidi Yooseefa oyqqi efiidi haattay toꞌido ollan olidosona. Hegaappe guyyiyan, a waatanaakko zorettanau uttidosona.

Hegaadan hanidaashin, amarida Isimaaꞌeela asati hiniira puttu giidosona. Yihuday ba ishanttussi: ‘Isimaaꞌeeletussi a bayzzoos’ yaagiis. Eti oottidoykka hegaadaana. Eti Yooseefa 20⁠u xaqara biran bayzzidosona. Hegee ayba qareti baynna iita oosoo!

A ishantti bantta aawaassi woygi odanau deꞌiyoonaa? Issi deeshshaa shukkidi, alleeqettida Yooseefa kootiyaa he deeshshaa suuttan zaari zaaridi naaqqidosona. Hegaappe he kootiyaa Yaaqoobakko soo efiidi: ‘Nuuni hagaa demmida; hagee Yooseefa maayuwaakkonne ane xeella’ yaagidosona.

Yaaqoobi hegee abaa gidiyoogaa eriis. I: ‘Iita doꞌi Yooseefa mirggiis’ yaagidi yeekkiis. Yooseefa ishanttikka bantta aaway qoppanaadan koyidoy hegaadaana. Yaaqoobi keehippe azzaniis. Daro gallassaa yeekkiis. SHin Yooseefi hayqqibeenna. I biidosan waanidaakko ane beꞌoos.