Xoossaayyo Azazettida Aylliyaa

Yooseefi Yaaqoobassi kaalo attuma naatuppe issuwaa. A bayra ishantti bantta aaway a siiqiyoogaa akeekidosona. Hegaa gaasuwan etawu aybi siyettidaakko neeni eray? Eti Yooseefa qanaatidi a ixxidosona. Yooseefi dumma aymota aymottidi, i he aymotubaa ba ishanttussi yootiis. Eti he aymoti eti issi galla ayyo goynnanaagaa qonccissiyaabadan qoppidosona. Qoppidi, eti a kaseegaappe yaa ixxidosona!

Issi gallassi Yooseefa ishantti Sekeema giyo katamaa matan dorssaa heemmoosona. Eta beꞌanaadan Yaaqoobi Yooseefa kiittiis. Yooseefi yiyaagaa eti haahuwan beꞌidi issoy issuwawu, ‘Aymuwaaway yees. Nuuni a worana!’ yaagidosona. Eti a oyqqidi ciimma ollan yeggidosona. SHin a ishanttuppe issoy Yihuday, ‘A woroppite! Woriyoogaappe aylledan a bayzzana’ yaagiis. Hegaa gishshawu, eti Gibxxe biya Midiyaama biittaa zalꞌꞌanchatuyyo Yooseefa 20 xaqara biran bayzzidosona.

Hegaappe simmidi Yooseefa ishantti a maayuwaa deeshshaa suuttan yeggidi bantta aawaayyo efiidi, ‘Hagee ne naꞌaa maayoo?’ yaagidosona. Yaagin, Yaaqoobi Yooseefa iita doꞌay woriis giidi qoppiis. I keehi azzaniis. A ooninne minttettana danddayibeenna.

Yooseefi Gibxxen gita maatay deꞌiyo PHoxiifaarayyo aylle gidanaadan bayzettiis. SHin Yihoowi Yooseefaara deꞌees. PHoxiifaari Yooseefi oosuwan minonne ammanettiya asa gidiyoogaa akeekiis. Yooseefawu PHoxiifaara son deꞌiya ubbaban aawatettay sohuwaara imettiis.

PHoxiifaara machiyaa Yooseefi meraa loꞌꞌonne mino asa gidiyoogaa akeekaasu. Yooseefi iira zinꞌꞌanaadan a ubba galla oychaasu. Yooseefi waatidee? I siyennan ixxidi hagaadan giis: ‘CHii! Hegee iitaba. Ta goday tanan ammanettees; qassi neeni a macho. Taani nenaara zinꞌꞌikko, Xoossaa bolli nagaraa oottays!’

PHoxiifaara machiyaa Yooseefi iira zinꞌꞌanaadan issi gallassi giddanawu malaasu. A Yooseefa afalaa oyqqin, i baqatanawu woxxiis. PHoxiifaari soo simmin, a Yooseefi tana qohiis gaada yootaasu. A wordduwaa yootaasu. PHoxiifaari keehi yiillotidi, Yooseefa qasho keetti gelissiis. SHin Yihoowi Yooseefabaa dogibeenna.