Laappune

Sinttanaabaa qoppiya cimati ammanettidi haggaazido layttan eridobaa yelaga ishanttussi bessiya wodiyan yootoosona. (Maz. 71:17, 18) Harata loohissiya cimati wudiyawu anjjo. Hegee gubaaꞌee minnanaadan maaddees. Hegaadan giyoy aybissee? Cimati hara ishantta loohissanawu baaxetiyoogee ha wode xalla gidennan, iita waayiya wodekka gubaaꞌe minnidi issippetettan deꞌanaadan maaddiya ishantti giigi uttanaadan oottees. (Hiz. 38:10-12; Mik. 5:5, 6) Yaatiyo gishshawu, alꞌꞌo cimatoo, ha wodiyan harata ubbatoo loohissanaadan inttena minttettoos. Intte gubaaꞌiyaa oosuwaa oottanawu daro wodiyawu keehi baaxetiyaageeta gidiyoogaa nuuni eroos. Hegaa gishshawu, intte he wodiyaappe guutta wodiyaa bazzidi harata loohissiyoogee koshshennan aggenna. (Era. 3:1) Yaatiyoogee keehi loꞌꞌoba. w15 4/15 1:8-10

Xoossay asa ubbawu yootidobay Geeshsha Maxaafan deꞌiyoogaa maayennan aggakka. SHin Geeshsha Maxaafay neeni Yihoowayyo waanada mata dabbo gidana danddayiyaakkokka qonccissii? Ee, qonccissees. Neeni ubbatoo Geeshsha Maxaafaa nabbabiyo wodenne xannaꞌiyo wode, hegaa xeelliyaagan neeyyo aybi siyettiyaakko qoppa. Qassi neeni tamaaridobaa waata oosuwan peeshshana danddayiyaakko wotta denttada qoppa. Yaatiyo wode, Yihooway nena haasayissanaadan eeno gaasa. Hegee neeni aara dabbotaa minttanaadan maaddees. (Ibr. 4:12; Yaaq. 1:23-25) Leemisuwawu, Yesuusi, “Sa7an intte huuphessi miishsha dagayoppite” yaagidoogaa nabbabada wotta dentta qoppa. Kawotettaabaa ne deꞌuwan kaseyiyaabadan qoppikko, Yihooway nena nashshiyoogaa akeekaasa. Hara baggaara qassi, ne deꞌuwan issi issibaa agga bayada Kawotettaabaa kaseyana koshshiyoogaa akeekikko, Yihooway neeni aara dabbotaa minttanawu oottana koshshiyaabaa akeekissees.—Maa. 6:19, 20. w15 4/15 3:3-5

Nuuni PHawuloosaagaadan minnidi sabbakiyo wode, nuussi koshshiya hara ubbabaa Yihooway ‘immanaagaa’ ammanettoos. (Maa. 6:33) Nuuni Kawotettaabaa sabbakiyaageeta gidiyo gishshawu, ‘wonggeliyaa hadaraa ekkida’; qassi Yihooway nuna banaara “issippe oottiya” oosanchadan xeellees. (1 Tas. 2:4; 1 Qor. 3:9) Xoossaa oosuwaa danddayettida ubban nuuni minni oottiyoogee maaduwaa demmana gakkanaashin naaganaadan maaddees. Yaatiyo gishshawu, Xoossaara dabbotaa minttanawu ha wodiyaa goꞌettiyaageeta gidoos. Metoy gakkin neeni hirggikko, he hanotaa Yihoowaara dabbotaa minttanawu goꞌetta. Geeshsha Maxaafaa nabbaba, xannaꞌa, qassi wotta dentta qoppa. Ubba wode Yihoowakko woossa, qassi minnada ayyo haggaaza. Yaatikko, nena gakkiyaanne sinttaappe gakkana danddayiya meto ubban genccanaadan Yihooway maaddanaagaa ammanettana danddayaasa. w15 4/15 4:17, 18

Otoroy gubaaꞌiyaa sarotettaa moorana danddayees. Nu wozanan deꞌiya ixoynne otoroy nuuni harata keehi qohiyaabaa haasayanaadaaninne oottanaadan denttettana danddayees. (Lee. 12:18) Nuuni haratuppe gitatiyaabadan qoppikko, Yihooway ‘otorettiya ubbaa shenetiyoogaa’ hassayana koshshees. (Lee. 16:5) Zaree, biittay, woy wogay nuugaappe dummatiyo asaa nuuni waati xeelliyaakkokka qoppana koshshees. Nu zariyan woy nu biittan ceeqettikko, “Xoossai asa zare ubbaa issi uraappe” medhidoogaa dogoos. (Oos. 17:26) SHin, asa ubbawu mayzza aaway Addaama gidiyo gishshawu issi zare. Hegaa gishshawu, issi issi zaree gitatees woy guuxxees giidi qoppiyoogee eeyyatetta. Hegaa mala qofay Seexaanay Kiristtaanetu siiquwaanne issippetettaa mooranawu goꞌettiyooba. (Yoh. 13:35) Nuuni Seexaanaara olettidi xoonanawu, coo mela otoro ubbaappe naagettana koshshees.—Lee. 16:18. w15 5/15 2:8, 9

Tiyettida ammanettidaageeti saluwan hayqqennan deꞌanaadaaninne Yesuusawu ammanettida ‘hara dorssati’ saꞌan merinawu deꞌanaadan Xoossay qaalaa gelido gishshawu, nuuni ufayttiyoogee qoncce. (Yoh. 10:16; 17:3; 1 Qor. 15:53) Saluwan hayqqennan deꞌanaageetikka saꞌan merinawu deꞌanaageetikka ha wodiyaagaadan metootokkona. Yihooway Israaꞌeelati Gibxxen aylletettan ay keena metootidaakko eridoogaadan, nuna gakkiya metuwaakka akeekees. “Eta waayee ubban i waayettiis.” (Isi. 63:9) Daro layttappe guyyiyan, Ayhudati beeta maqidasiyaa zaarettidi keexxiyoogaa morkketi eqettin yayyidosona; shin Xoossay, “Inttena bochchiyaagee ta aifiyaa buluwaa bochchees” yaagiis. (Zak. 2:8) Aayyiyaa ba guutta naꞌaa siiqiyoogaadan, Yihooway ba ashkkarata siiqeesinne eta maaddanawu koyees. (Isi. 49:15) Haratu hanotaa qoppidi etawu siyettiyaabaa akeekanawu maliyo wode, nuunikka Yihoowagaadan siiqoos.—Maz. 103:13, 14. w15 5/15 4:2

Yesuusi saꞌan awudenne hiyyeesati xayennaagaa yootidee? Akkay, i ha iita alamee xayana gakkanaashin hiyyeesa asay deꞌanaagaa yootiis. Asa haaroy suure gidenna gishshawu, ha wodiyan miilooniyan qoodettiya asay baassi koshshiyaabaa demmanawu waayettees. Ee, asay woppu giidi deꞌiyo wodee matiis! (Maz. 72:16) Yesuusi oottido maalaaliyaabay i ba maatan mata wode nuna maaddanawu ayyo wolqqaynne koshshay deꞌiyoogaa nuuni ammanettanaadan oottees. (Maa. 14:14-21) Nuuni maalaalissiyaabaa oottana danddayennaba gidikkonne, geeshsha ayyaana kaaletuwan xaafettida Xoossaa Qaalaa asay eranaadan mishettidi maaddana danddayoos. Geeshsha Maxaafaa hiraagay sinttappe loꞌꞌo wodee yaanaagaa yootees. Nuuni Yihoowawu aqida, ufayssiya sinttanaabaa eriya a Markkata gidiyo gishshawu, haratussi immana acoy deꞌiyoogaa akeekokkonii? (Roo. 1:14, 15) Hegaa wotti denttidi qoppiyoogee Xoossaa Kawotettaabaa mishiraachuwaa nuuni haratussi yootanaadan denttettana mala amottoos.—Maz. 45:1; 49:3. w15 6/15 1:7, 10, 11

Yihoowaara nu dabbotaa minttiyo wode, nu qoppiyoobaa gujjin, nu deꞌo macara ubban a ufayssanawu baaxetoos. Nuuni geeshshabaa, loꞌꞌobaanne galatissiyaabaa qoppiyoogan “wozanai geeshsha” gididoogeeta gidanawu amottoos. (Maz. 24:3, 4; 51:6; Pili. 4:8) Yihooway nuuni nagarancha gidiyoogaa akeekiyoogee qoncce. Nuuni iitabaa qoppana danddayiyoogaa i erees. SHin, nuuni danddayettida ubban iita qofaa eqettiyoogaa aggidi ubbatoo hegaa qoppikko Yihooway azzananaagaa eroos. (Doo. 6:5, 6) Hagaa wotti dentti qoppiyoogee nuuni qofan ubbatoo geeshsha gidanawu keehi murttanaadan oottees. Nuuni Yihoowan wozanappe ammanettiyoogaa bessiyo issi ogee iita qofaa eqettanawu woossiyoogaa. Nuuni woosan Yihoowakko shiiqiyo wode, i nuukko shiiqees. I nuussi ba geeshsha ayyaana kehatettan immees; hegee nuuni iitabaa qoppiyoogaa aggidi, geeshsha gididi deꞌanaadan maaddees. w15 6/15 3:4, 5

He woosaa “taayyo” hachi koshshiya qumaa giidi gidennan, “nuussi” hachi koshshiya qumaa giidi woossiyoogaa akeeka. Afirkkan woradaa xomoosiya Vikteri hagaadan giis: “Nuuni maana qumaa awuppe demmanee, woykko keettaa keraa nuussi ooni qanxxanee giidi taaninne ta machiyaa hirggenna gishshawu, ubbatoo Yihoowa wozanappe galatays. Nu ishantti nuussi koshshiyaabaa ubba gallassi kehatettan kunttoosona. SHin nuna maaddiyaageeti miishshaara gayttidaagan banttana gakkiya metuwan genccanaadan woossays.” Nuussi daro gallassawu gidiya qumay deꞌikko, hiyyeesatettan deꞌiya woykko daafaban qohettida ishanttubaa qoppana danddayoos. Nuuni etawu woossiyoogaa xalla gidennan, nu woosaadan oottana bessees. Leemisuwawu, maaddana koshshiyo nu mala Kiristtaanetussi nuussi deꞌiyaabaappe shaakki immana danddayoos. Kumetta saꞌan oosettiya oosuwawu nuuni immiyo miishshaa maara goꞌettiyoogaa eriyo gishshawu, hegawukka ubbatoo miishshaa immana danddayoos.—1 Yoh. 3:17. w15 6/15 5:4-6

Yihoowa dirijjitiyawu saꞌaa baggaara gayttidaagan laamettiya maalaalissiyaabay Isiyaasa 60:17n kasetidi odettiis. Yelagati woy tumaa mati siyidaageeti he laamettidabaa qonccissiyaabaa nabbabidosona woy haratuppe siyidosona. SHin hegaa beꞌida ishanttinne michontti gita maataa demmidosona! Yihooway ba kawoyido Kawuwaa bagaara Ba dirijjitiyaa kaalettiyoogaa eti ammaniyoogee garamissiyaaba gidenna. Eti naqaashi deꞌiyooban ammaniyoogaa eroosona; nuuni ubbaykka etaagaadan ammanoos. Eti wozanappe yootiyoobaa siyiyoogee ne ammanuwaa minttana; qassi neeni Yihoowan keehi ammanettanaadan oottana. Tumu Kiristtaaneti ubbay Yihoowa dirijjitiyaabaa haratussi yootana koshshees. Iita, shori baynnanne siiqoy baynna alamiyan ayyaanaa gannatee ha wodiyan deꞌiyoogee maalaalissiyaaba! w15 7/15 1:12, 13

Armmageedoona olay Yihoowa geeshsha sunttaa bonchettanaadan oottana. He wode deeshsha mala asati “merinaa qaxxayuwau baana.” (Maa. 25:31-33, 46) Wurssettan saꞌay iitaba ubbaappe geeyana; qassi zaway baynna daro asay iita waayiyaa wurssettan attana. Ha ufayssiyaabay matido wodiyan, nuuni ubbay haꞌꞌi ay oottana koshshii? Geeshsha ayyaanay denttettin kiitettida PHeexiroosi hagaadan giis: “Ubbabaikka hegaadan xayiyaabaa gidikko, intte ai mala asa gidanau bessii? Intte de7oi geeshshanne Xoossaa milatiyaagaa gidanau koshshees. Intte Xoossaa gallassaa naagishin, he gallassai eesuwan gakkanaadan, intteyyo danddayettiyaabaa oottite. . . . Hegaa gishshau, ta siiqotoo, he gallassaa naagiiddi, pokkoinne boree bainnaageeta gididi, aara sarotettan de7ana mala minnite.” (2 PHe. 3:11, 12, 14) Yaatiyo gishshawu, Sarotettaa Kawuwawu exatidi, ayyaanaaban geeshsha gididi deꞌanawu murttoos. w15 7/15 2:17, 18

Yihoowa asay kumetta saꞌan Kawotettaa Addaraashaa keexxanawu minnidi oottees. Miishshi qanxxettennan bantta dosan oottiyaageeti Kawotettaa Addaraashaa pilaaniyaa giigissoosona, keexxoosonanne bottokonoosona. Hidaare 1, 1999⁠ppe doommidi, geeshsha goynuwawu goꞌettiyo 28,000⁠ppe dariya loꞌꞌiya ooratta sohoti kumetta saꞌan deꞌiya gubaaꞌetussi giigidosona. Hegaa giyoogee 15 layttan, amakaayiyan galla galla ichashu Kawotettaa Addaraashay oorattay keexettiis giyoogaa. Koshshiyo ubbasan Kawotettaa Addaraashaa keexxanawu maaddiiddi doos. Ubbasan “giiga” woy issi likke gidana mala issotu issotu palahay haratu pacaa kunttanaadan Geeshsha Maxaafay yootiyo maaraadan he imoy siiquwan imettees. (2 Qor. 8:13-15) Hegaappe denddidaagan, banttawu Kawotettaa Addaraashaa keexxana danddayenna gubaaꞌetussi geeshsha goyno sohoy loꞌꞌiyaagee keexettiis. w15 7/15 4:9-11

Yesuusi bana kaalliyaageetussi eti deꞌana wodiyaa qonccissiya malaataa yootiis. Yesuusa kaalliyaageeti ‘naagi uttidosona.’ (Maa. 24:27, 42) Dumma dumma macaray deꞌiyo Yesuusi yootido malaatay 1914⁠ppe doommidi polettiis. Nuuni ‘wodiyaa wurssettan’ deꞌiyoogaa ammanoos. Seexaanaa alamiyaa xayssiyo wodiyaa Yihooway keeri uttiis. (Maa. 24:3) Yaatin, Kiristtaaneti ha wodiyan naagi uttana koshshiyoy aybissee? Nuuni Yesuus Kiristtoosawu azazettiyo gishshawu, naagi uttoos. I yiidi takkiyo wodiyaa malaataakka akeekoos. Nuuni wurssettay matidoogaa ammaniyoy siyiyo ubbabaa ammaniyo gishshataassa gidennan, Geeshsha Maxaafaa hiraagay polettiyoogaa ammaniyo gishshataassa. Wurssettay yaanaagaa nuuni naagi uttananne he wodiyawu giigetti uttana bessees. w15 8/15 2:8, 9

Gannatiyan, nuuni dosiyoobaaninne allaxxiyooban ufayttiyo wodee deꞌana. Woni oottiyoobaaninne ufayssiyaaban nuuni ufayttanaadan Yihooway koyennaakko, nuna aybissi hegaadan medhidee? (Era. 2:24) I ‘paxa deꞌiyaageetu ubbaa amuwaa alanawu’ qaalaa geliis. Amaridaagaa allaxxana koshshikkokka, nuuni Yihoowa dabbo gidiyoogaa kaseyiyo wode hegaappe demmiyo ufayssay gujjees. Saꞌay Gannate gidiyo wodekka hegaadaana. Nuuni Xoossaa Kawotettaa kaseti koyiyoogeenne ha wodiyan Yihoowa asay demmiyo ayyaanaabaa anjjuwaa wozanan wottiyoogee, qassi nu koshshaa bessiyaagaadan xeelliyoogee keehi loꞌꞌo! (Maa. 6:33) Saꞌay Gannate gidiyo wode, nuuni awudeegaappenne aaruwan ufayttana. Tumu deꞌuwawu haꞌꞌi giigettiyoogan he deꞌuwaa keehi koyiyoogaa bessiyaageeta gidoos. w15 8/15 3:17, 18

Yesuusi wottiyoobi baynna asa gididi saꞌan deꞌiyo wode, nagarancha asay a yuushuwan kumiis. A dichida aawaynne aayyiyaa, qassi daro layttaa i etaara issippe deꞌido dabboti nagarancha. Yesuusa kaalliyaageetikka otorettidosonanne yaaretidosona. Leemisuwawu, Yesuusi hayqqanaappe kase qammi eti “bantta ubbaappe ooni gitakko bantta giddon palamettidosona.” (Luq. 22:24) SHin, Yesuusi nagarancha gidida ba erissiyo ashkkarati ayyaanaaban diccananne issippetettay deꞌiyoogeeta gidana danddayiyoogaa ammanettiis. He wode, Yesuusi kiittidoogeeti siiquwan issuwaa gidana mala, i saluwan deꞌiya ba aawaa hagaadan woossiis: “Eti ubbai issuwaa gidana mala, taani woossais. Aawau, neeni ta giddon de7iyoogaadan, qassi taanikka ne giddon de7iyoogaadan, eti nu giddon de7ona. . . . Neeninne taani issuwaa gidiyoogaadan, eti issuwaa [gidona].”—Yoh. 17:21, 22. w15 9/15 1:10, 11

PHeexiroosi haattaa bollaara hemettiyo wode denddida carkkuwaanne beetaa, nuna Xoossawu geppidi deꞌiyo wode gakkiya metuwaaranne paaciyaara geeddarssana danddayoos. Hegaa malabay keehi wolqqaamiyo wodekka Yihooway maaddin minnidi deꞌana danddayoos. PHeexiroosi muuhettidoy carkkoy woy beetay wolqqaamido gishshataassa gidennaagaa hassaya. Geeshsha Maxaafay, “Wolqqaama carkkuwaa be7idi yayyiis” yaagees. (Maa. 14:24-32) PHeexiroosi Yesuusa xeelliyoogaa aggido gishshawu, a ammanoy shuggiis. Nuuni ‘wolqqaama carkkuwaa xeelliyoogan’ a wolqqaa qoppidi, Yihooway nuna maaddanaagaa sirikko, muukettiyoogaa doommana danddayoos. Ammanoy shuggiyoogaa woy xayiyoogaa Geeshsha Maxaafay “baqqi oiqqiya nagaraa” giyo gishshawu, nu ammanoy laafana danddayiyoogaa nuuni akeekana koshshees. (Ibr. 12:1) PHeexiroosa hanotaappe akeekiyoogaadan, harabaa wozanan wottikko, nu ammanoy sohuwaara shuggana danddayees. w15 9/15 3:1, 6, 7

Neeni issi imota ekkiyo wode waatay? Neeni hegaa nashshiyoogaa bessennan waaya aggana. Hegaa bollikka, he imotaa xoqqu oottada xeelliyo gishshawu, loyttada goꞌettennan aggakka. Yihooway nuuni deꞌanawunne ufayttanawu koshshiyaabaa nuussi ubbatoo immees. Hegee nuuni a siiqanaadan denttettennee? Yihooway Israaꞌeelatuyyo loꞌꞌobaa darissidi immiis. I daro layttawu ba higgiyan eta kaalettiis; qassi deꞌuwawu koshshiya ubbabaa etawu immiis. (Zaa. 4:7, 8) SHin, eti hegaa mala anjjuwaa ubba wode demmanawu Xoossaa higgiyawu azazettana bessees. Azazettiyo issi ogee eti bantta gaden “baira kaxxida kattaappe ubbaappe lo77iyaagaa” ubba wode Yihoowayyo immiyoogaa. (Kes. 23:19) Israaꞌeelati hegaadan oottiyoogan, Yihooway eta siiqiyoogaanne anjjiyoogaa xoqqu oottidi xeelliyoogaa bessoosona.— Zaa. 8:7-11. w15 9/15 5:5, 6

Nuuni Yihoowa kushiyaa waati nu deꞌuwan beꞌana danddayiyoo? Ane qoppa: Neeni tumaa siyidoy Xoossay tumuppe maaddido gishshaassa gaada qoppana danddayaasa. Neeni gubaaꞌe shiiquwan issibaa siyada, “Hagee tawu koshshiyaaba” ga eray? Woy qassi Yihooway ne woosaa zaarin beꞌennan aggakka. Neeni kaseegaappe aaruwan haggaazanawu qofaa qachada, Yihooway neeyyo ubbabay giiganaadan waati maaddidaakko beꞌada maalaalettennan aggakka. Woy qassi ayyaanaabaa kaseyanawu oosuwaa aggada, “Taani nena mulekka yeggikke” yaagidi Xoossay yootidoogee tuma gidiyoogaa akeekadii? (Ibr. 13:5) Ayyaanaaban beegottidinne ‘wozanaa geeshsha’ giididi deꞌiyoogan, Yihooway nuna daro ogiyan waati maaddidaakko akeekana danddayoos. Nuuni waanidi ‘wozanaa geeshsha’ gidana danddayiyoo? Ubbatoo geeshshabaa qoppananne likke gidennabaa aybanne oottennan aggana koshshees. (2 Qor. 4:2) Nuuni ayyaanaaban minniyo wodenne suurebaa oottiyo wode, Xoossaa beꞌana danddayiyaageeta gidoos. w15 10/15 1:17, 19

Paasikaa Baalaa bonchanawu Yerusalaame biida amarida Giriiketi Yesuusi oottidobaa beꞌidi garamettidoosona. Yaatiyo gishshawu, eti Yesuusaara gayttana danddayiyaakkonne kiitettida Piliphoosa oychidosona. SHin Yesuusi sinttappe oottana keehi koshshiyaabaappe ba qofay shaahettanaadan oottibeenna. I bana Xoossaa morkketi worennaadan giidi daro asay dosiyo ura gidanawu koyibeennaagee qoncce. Hegaa gishshawu, i mata wode hayqqanaagaa yooti simmidi, Inddiraasayyoonne Piliphoosayyo hagaadan giis: “Ba shemppuwaa siiqiya ooninne bashshees; qassi ba shemppuwaa ha sa7an ixxiya ooninne merinaa de7uwau ashshees.” I Giriiketi eranawu koyidobaa zaaribeenna; shin, ba erissiyo ashkkarati baagaadan bantta goꞌꞌaa yarshshanaadan zoriddi, hachi gallassa xiqisiyan deꞌiyaagaa yootiis. Piliphoosi bana oychidaageetuyyo ha minttettiyaabaa yootidoogee erettidaagaa. (Yoh. 12:20-25) Yesuusi mishiraachuwaa yootiyo ba waanna oosuwaappe ba qofay shaahettanaadan oottana xayikkonne, ubbatoo oosuwaabaa xallaa qoppibeenna. w15 10/15 3:13, 14

Yesuusi erissiyo ashkkarati bantta giddon ubbaappe aadhiyay oonakko zaaretti zaarettidi palamettikkonne, i etan hidootaa qanxxibeenna. Eti i zoridobaa siyennan ixxido wodekka zorennan aggibeenna. Injjetiya wodiyaaninne sohuwan, Yesuusi eta siiquwaaninne ashkketettan seeriis. (Mar. 9:33-37) Intte naata seeriyoogan intte eta siiqiyoogaa bessite. Issi issitoo issibay likke gidiyoy woy likke gidennay aybissakko yootiyoogaa xallay gidana danddayees. Hara wodiyan qassi issi naꞌay intte yootidobaa oosuwan peeshshennan aggana danddayees. (Lee. 22:15) Hegaa malabay merettiyo wode, Yesuusa leemisuwaa kaallite. Injjetiya wodiyaaninne sohuwan, danddayan kaalettiyoogan, loohissiyoogaaninne zoriyoogan intte naꞌaa siiquwaaninne ashkketettan seerite. Tohossa Afirkkan deꞌiya Eleno giyo michiyaa hagaadan gaasu: “Ta aawaynne aayyiyaa tana hanqquwan woy ayssi seeriyaakko yootennan mule seeri erokkona. Hegaa gishshawu, taani hirggikke. Taani oottana bessennabaa erays; qassi taappe aybi koyettiyaakko akeekays.” w15 11/15 1:5, 6

Xoossay asaa siiqennaba gidiyaakko, deꞌoy ay mala gidanaakko qoppa. Siiqenna iita xoossaa, Seexaanaa Dabloosa haaruwan asay bana ayssiiddi hanno gakkanawu deꞌido iita deꞌuwaa qoppiyoogee hegawu gidees. (2 Qor. 4:4; 1 Yoh. 5:19; Ajj. 12:9, 12) Xoossay siiquwan kaalettennan aggiyaakko, sinttappe ubbabay ay keena iita gidanaakko hegee bessees. Dabloosi Yihoowa haaruwaa bolli makkalido wode, i Xoossay ubbabaa haariyoy suurenne xillo ogiyaana gidiyoogaa eqettiis. Hegee Seexaanay Medhidaagaa haaruwaappe ba haaroy loꞌꞌo giis giyoogaa mala. (Doo. 3:1-5) Seexaanay ba mootoy tumakkonne bessanaadan Yihooway paqqadikkonne, hegee paqqadettidoy guutta wodiyaassa. Yihooway ba haaruwaappe hara ay haaroynne hada gidiyoogee qonccanaadan ba aadhida eratettan gidiya wodiyaa paqqadiis. Asay deꞌido azzanttiya deꞌoy nuussi koshshiya loꞌꞌo haaruwaa asaykka Seexaanaykka ehaana danddayennaagaa bessees. w15 11/15 3:3, 4

Yihoowa asay ubbatoo bana kawushshiyoogan, Yesuusi yootido keehi koshshiya maaraa kaallees. I deriyaa bolli tamaarissido wode hagaadan giis: “ ‘Ne shooruwaa siiqa; ne morkkiyaa morkka’ giidoogaa siyideta. SHin taani intteyyo odais; saluwan de7iya intte Aawau naata gidana mala, intte morkketa siiqite; inttena qanggiyaageetakka anjjite; inttena ixxiyaageetuyyo lo77obaa oottite; inttena waissiyaageetuyyookka Xoossaa woossite; aissi giikko, iita asaukka lo77o asaukka Xoossai ba awaa awaxxissees; qassi xillotuyyookka nagaranchchatuyyookka ba iraa bukissees.” (Maa. 5:43-45) Ee, nuuni Xoossaa ashkkara gidiyo gishshawu, eta hanotaa qoppennan, ‘nu morkketa siiqana’ bessees. Yihoowa asay ba qofaaninne oottiyooban Yihoowanne ba shooruwaa siiqiyoogaa ba deꞌo ubban bessana koshshees. Leemisuwawu, issi issi asay Kawotettaa mishiraachuwaa siyennan ixxikkokka, etawu koshshiyo wode maaddiyoogan nu shooruwaa siiqiyoogaa bessoos. w15 11/15 4:17, 19, 20

Xoossaa asay ubbato Yihoowa sabbanawunne i koyiyoobaa haratussi yootanawu qaalaa woy haasayiyo imotaa goꞌettiiddi takkiis. Mata wodeppe doommidi tumu goynoy aakkanaadan keehi maaddidabay qaalaa goꞌettidi Geeshsha Maxaafaa birshshiyoogaa. SHaꞌan qoodettiya Geeshsha Maxaafaa birshshettati deꞌikkokka, issoti issoti haratuppe aaruwan suure qofaa yootoosona. Ooratta Alamiyaa Birshshettaa Konttee, 130⁠ppe dariya qaalan goꞌettido birshshettaa maaraa 1940 heeran kessiis. Hegeeti: (1) Xoossaa sunttaa Geeshsha Maxaafan kase deꞌiyoosan zaarettidi xaafiyoogan a sunttay geeyanaadan oottiyoogaa. (Maa. 6:9) (2) Danddayettiyaaba gidikko, ayyaanaa kaaletuwan koyro xaafettida qaala ubbaa hara qaalan birshshikkonne, hegee danddayettennaba gidikko, qofaa suure birshshiyoogaa. (3) Ufayttidi nabbabana mala akeekanawu wayssenna qaalaa goꞌettiyoogaa.—Nah. 8:8. w15 12/15 2:1, 2

Malkkataa waasoy geeyidi erettana xayikko, olettanawu giigettida olanchata keehi qohana danddayees. Hegaadan nu haasayay qoncce gidana xayikko, kirqqi gaana woy balettana danddayees. (1 Qor. 14:9) SHin nu haasayay qoncce gidanaadan giidi, qoppennan coo haasayanawu koyokko. Haasayana bessiya qaalaa dooriyoogan Yesuusi keehi loꞌꞌo leemiso. Qantta gidikkonne keehi maaddiya qofaa i yootidoogee Maatiyoosa 5⁠ppe 7 gakkanaashin xaafettidaagaa qoppa. Yesuusi asawu kirqqi giyaabaakka yootibeenna; qassi yiilloyiyaabaa woy qohiyaabaakka haasayibeenna. SHin, asay wozanappe ufayttidi siyanaadan geliya qoncce qaalata dooriis. Leemisuwawu, asay galla galla banttassi koshshiya qumawu hirggennaadan minttettanawu, saluwaa kafotussi miyoobaa Yihooway waati immiyaakko yootiis. Hegaappe simmin i, “Intte etappe keehi aadhdhekketii?” yaagidi eta oychiis. (Maa. 6:26) Keehi koshshiyaabaa akeekanaadaaninne minettanaadan Yesuusi ha qoncce qaalan eta maaddiis. w15 12/15 3:13, 14

Ishanttudan siiqettiyoogaa giyoogee woygiyoogee? PHawuloosi goꞌettido, filaadelfiyaa giyo Giriiketto qaalay “ishaa siiqiyoogaa” giyoogaa. Hegee so asaa woy mata laggiyaa keehi woy mintti siiqiyo siiqo. (Yoh. 11:36) Nuuni ishanttanne michonttappe attin, hegaa mala milati beettana koyiyaageeta gidokko. (Maa. 23:8) Nu giddon deꞌiya mino dabbotaa, “Issoi issuwaara ishanttudan siiqettite; issoi issuwaa bonchchiyoogan ufaittite” yaagiya qofay loytti qonccissees. (Roo. 12:10) He siiqoynne Yihoowa maaraa kaallidi siiqiyo, agaappe giyo siiqoy Xoossaa asaa giddon issippetettay deꞌanaadan oottees. Tumu Kiristtaane gidida uri ay zare gidikkokka a nu ishadan xeelloos. (Roo. 10:12) Hegaa gishshawu, nuuni issoy issuwaara ishanttudan siiqettanaadan Yihooway tamaarissees.—1 Tas. 4:9. w16.01 1:5, 6

Nuuni Yesuusa siiqiyoogee mishettidi sabbakanaadaaninne erissiyo ashkkara oottanaadan denttettees. (Maa. 28:19, 20; Luq. 4:43) Godaa Kahuwaa bonchiyo wode, nuuni kaafiya aqinye gididi 30u woy 50u saatiyaa haggaazana danddayoos. Hegaadan oottanawu ne hanotaa giigissana danddayay? Machiyaa hayqqido, layttay 84 gidido ishay cimido gishshawunne sahettiyo gishshawu, kaafiya aqinye gidana danddayennabadan qoppiis. SHin a heeran deꞌiya aqinyeti hashetidi a maaddidosona. I 30u saatiyaa haggaazanawu halchidoogaa polonaadan, eti i biyo kaamiyaa giigissidosonanne i oottanawu danddayiyo moottaa akeekan dooridosona. Issi uri Godaa Kahuwaa bonchiyo wode kaafiya aqinye gidiyoogan ufayttanaadan maaddanawu baaxetana danddayay? Kaafiya aqinye gidana danddayiyay ubba asaa gidenna. Gidikkokka, nuuni Yihoowayyo kaseegaappe aaruwan haggaazanawu nu wodiyaanne nu wolqqaa ubbaa goꞌettana danddayoos. w16.01 2:7, 11

Ha wodiyan saꞌan deꞌiya, ayyaana Israaꞌeelatu ubbaa sunttaa eriyoogee danddayettennaba gidikko, hara dorssati waanidi ‘etaara baana’ danddayiyoonaa? Leemisuwan odettida tammu asata xeelliyaagan Zakkaariyaasa hiraagan qonccidabaa akeeka. Eti “issi Ayhuda bitaniyaa maayuwaa macaraa oyqqidi, ‘Xoossay inttenaara deꞌiyoogaa nuuni siyido gishshawu, nuuni inttenaara baana’ yaagana.” (Zak. 8:23, NW) Ha sohuwan odettida Ayhuda bitanee issuwaa gidikkokka, naaꞌꞌusankka “inttenaara” geetettida qaalay issuwaappe daro asaa bessees. Hegaa gishshawu, Ayhuda bitaniyan leemisettidaagee issi ura gidennan, issi citan deꞌiya asata bessiyaaba! Hegaa gishshawu, Ayhuda bitaniyan leemisettida ubbata huuphiyan huuphiyan shaakki eriyoogeenne kaalliyoogee bessiyaaba gidenna. SHin nuuni eta citaa shaakki eridi eta maaddana bessees. Geeshsha Maxaafay nuuni asa kaallennaadan mintti zorees. Yesuusi nu Godaa woykko nuna Kaalettiyaagaa.—Maa. 23:10. w16.01 4:4

Nuuni yelettoosappe doommidi hayqqana gakkanaassi hara uri nuna siiqanaadan koyoos. Asay siiqettana koyees; shin hegee attuma asinne macca asi issoy issuwawu bessiyo siiqo gidenna. Nuuni haratuura laggetananne dabbotana koyoos. SHin nuuni o siiquwaappenne aaruwan Yihoowa siiquwaa koyoos. Daroti Ubbaa Danddayiya Xoossaara asi mata dabbotaa medhana danddayennabadan qoppoosona. Nuunikka hegaadan qoppiyoo? Mule qoppokko! Geeshsha Maxaafay asay Xoossaa dabbo gididoogaa yootees. Nuuni eta leemisuwaappe tamaarana koshshees; ayssi giikko, Xoossaara dabbotiyoogee nuuni nu deꞌuwan halchana bessiyo waannaba. Abrahaami Xoossaara dabbotiyoogan nuussi gita leemiso. (Yaaq. 2:23) Abrahaami waanidi Yihoowayyo mata dabbo gididee? I Xoossaassi mata dabbo gidanaadan maaddiday ammanuwaa. Ubba, Geeshsha Maxaafay Abrahaami ‘ammaniya ubbawu aawa’ gidiyoogaa yootees.—Roo. 4:11. w16.02 1:1, 2

Hizqqiyaasi Yihudaa iita kawotuppe issuwaa naꞌaa gidikkokka, i keehi suure naꞌa gididi dicciis. (2 Kaw. 18:6) Hizqqiyaasi ba aaway oottido keehi iitabaa xayssiis. I beeta maqidasiyaa geeshshiis, asaa nagaray atto geetettanaadan oottiis, qassi biitta ubbaappe eeqa goynuwaa xayssiis. (2 Odi. 29:1-11, 18-24; 31:1) Guyyeppe, Asoore kawuwaa Sanaakireebi Yerusalaame xayssanawu yiido wode, Hizqqiyaasi xala gidiyoogaanne mino ammanoy deꞌiyoogaa bessiis. I Xoossay ashshanaagaa ammanettiis; qassi haasayiyoobaaninne oottiyooban ba asaa minttettiis. (2 Odi. 32:7, 8) Takkidi, Hizqqiyaasi otorettido wode zoree imettin, ba huuphiyaa kawushshidi ba nagaraappe simmiis. (2 Odi. 32:24-26) Hizqqiyaasi diccido hanotay iita gidiyo gishshawu, iita asa gidibeenna. Ubba, i Yihoowa dabbo gidiis; qassi nuuni kaalliyo leemiso gidiis. w16.02 2:11

Kehatettay neeni ooyyo ammanettana bessiyaakko akeekanaadan maaddana danddayees. Leemisuwawu, neeni ne mala Kiristtaanee gita nagaraa oottidoogaa geeshshada erana danddayaasa. Ubba qassi i mata lagge woy so asa gidikko, ayyo ammanettana bessiyaabadan neeyyo siyettana danddayees. SHin neeni i oottido nagaraa qosikko, Xoossaayyo ammanettakka. Ubbaappe aaruwan Yihoowayyo ammanettana bessiyoogee qoncce. Ne ishaayyo keha gida. Ne laggee woy so asay gubaaꞌe cimatu maaduwaa oychanaadan yoota. A woy i amarida wodiyan yootana xayikko, Xoossaayyo ammanettiyoogee neeni gubaaꞌe cimatussi he yohuwaa yootanaadan denttettees. Hegaadan oottiyoogan, neeni Yihoowayyo ammanettaasanne ne laggiyawu woy so asassi keha gidaasa; nagaraa oottidaagaa gubaaꞌe cimati ashkketettan suurissanawu baaxetoosona.—Wog. 5:1. w16.02 4:14

SHiiquwaa shiiqiyoogaanne haggaaziyoogaa mala, neeni gubaaꞌiyan oottiyoobay ‘Xoossaa milatiyoogaa’ bessiya oosotuppe amaridaageeta. Woossiyoogaanne Geeshsha Maxaafaa nerkka xannaꞌiyoogaa mala, asi beꞌennabaykka hegaara issi mala. Ba deꞌuwaa Yihoowayyo geppida uri he oosoti deexxiyaabadan qoppenna. SHin, i Kawuwaa Daawitaagaadan, “Abeet ta Xoossau, taani neeni koyiyoogaa oottanau dosais; ne higgee ta wozanaa giddon de7ees” yaagana. (Maz. 40:8) Neeni ne huuphiyaa Yihoowawu geppada xammaqettikko, aara dabbotaa medhaasa. Neeni ayyo haggaaziyoogee haratu hanotaara, ubba qassi nena yelidaageetu hanotaarakka gayttidaba gidenna. Ne geeshsha deꞌuwaa bessiya oosoynne neeni Xoossaa milatiyoogee tumaa wozanappe ammaniyoogaanne xammaqettanawu ayyaanaaban dicciyoogaa bessees. w16.03 2:10, 12, 15

Muuse Higgee hara deretu sheneyiya kandduwaappenne haymaanoote wogaappe Israaꞌeelata naagiis. Israaꞌeelati Xoossawu azazettiyo wode, i eta anjjiis. Eti awu azazettennan ixxiyo wode, keehi qohettidosona. (Zaa. 28:1, 2, 15) Kaaletoy koshshiyo hara gaasoykka deꞌees. Higgee Yihoowa sheniyaara gayttidaagan hanana gitabaa qonccissees; hegeekka Masee, Yesuus Kiristtoosi yaanaagaa. Higgee Israaꞌeelati nagarancha gidiyoogaa awudeegaappenne aaruwan qonccissiis. Qassi nagaraa muleera kammiya, wotoy baynna kumetta yarshshoy, wozoy koshshiyoogaa bessiis. (Gal. 3:19; Ibr. 10:1-10) Hegaa bollikka, Higgee Masee yelettana zaree naagetti deꞌanaadaaninne i yiyo wode a eranaadan maaddiis. Ee, Higgee Kiristtoosi yaana gakkanaassi “naagiyaagaa” gidiis. w16.03 4:6, 7