Isiine

“Imatta mokkiyoogaa” giya qofay “erenna urawu kehiyoogaa” giyoogaa. Ha qofay Abraaminne Looxee oottidobaa nuna hassayissees. Eti banttakko yiida, eti erenna asatuyyo kehatetta bessidosona. He imattati kiitanchata gidiyoogaa eti guyyeppe akeekidosona. (Doo. 18:2-5; 19:1-3) Nuunikka harati qumaa maanaadan woy nunaara issippe wodiyaa aattanaadan, qassi issoy issuwaa minttettanawu nu soo shoobbiyoo? Nuuni imattaa mokkanawu darobaa woy alꞌꞌobaa giigissana koshshenna; qassi nuna hara wode shoobbana danddayiyaageetu xallaa shoobbana bessenna. (Luq. 10:42; 14:12-14) Nuuni hegaadan oottiyoy, issoy issuwaa minttettanaassappe attin, nashettanaassa gidenna! Woradaa xomoosiya ishaaranne a macheera nuuni loytti erettennaba gidikkokka, eta shoobbanawu yeemottiyoo? (3 Yoh. 5-8) Nuussi oosoy dariyaaba, qassi galla galla deꞌuwawu woxxiyaaba gidikkokka, ‘imattaa mokkiyoogaa dogennaage⁠e’ keehi koshshiyaaba! w16.01 1:11, 12

Yihooway he Kiristtaaneti saluwaa baanawu doorettidoogaa loytti akeekanaadan ba geeshsha ayyaanaa baggaara erissees. Yaatiyoogan, geeshsha ayyaanay eti Yihoowaaba gidiyoogaa erissees woykko eti sinttappe saꞌan gidennan saluwan merinawu deꞌanaagaa qonccissees. (2 Qor. 1:21, 22; 5:5) He uri saluwaa baanawu xeegettidoogaa ammanettana danddayees. SHin i wurssettan ba woytuwaa saluwan demmana danddayiyoy ubba wode ammanettidi deꞌiyoogaana. Hegaa xeelliyaagan PHeexiroosi hagaadan giis: “Hegaa gishshau, ta ishatoo, inttena Xoossai xeesidoogaanne dooridoogaa minttanau, kaseegaappe aadhdhi minnite; aissi giikko, intte hegaa oottiyaabaa gidikko, xubettekketa. Hegaadan qassi nu Godaanne nuna ashshiya Yesuus Kiristtoosa merinaa kawotettaa geliyo kumetta shenee intteyyo imettana.” (2 PHe. 1:10, 11) Yaatiyo gishshawu, tiyettida Kiristtaaneti ubbay ammanettidi deꞌanawu baaxetana koshshees; hinna xayikko, saluwaa deꞌuwawu xeegettidoogee woy doorettidoogee aynne maaddenna.​—Ibr. 3:1; Ajj. 2:10. w16.01 3:6, 7

Issi uri tumuppe tiyettida Kiristtaane gidikkokka, a xoqqu oottidi xeelliyoogee bala. Gubaaꞌe cimata xeelliyaagan, Geeshsha Maxaafay nuuni etaagaadan ammananaadan minttettees; shin nuuni ay assanne nuna kaalettiyaagaa ootti xeellennaadan zorees. (Ibr. 13:7) Geeshshaa Maxaafay “naa77u kushe bonchchuwaa ekkanau” bessiya asatubaa yootiyoogee tuma. SHin hegeeta bonchana bessiyoy eti tiyettidaageeta gidiyo gishshataassa gidennan, eti “loitti heemmiya,” qassi “qaalaa yootiyoogaaninne tamaarissiyoogan” daafuriyaageeta gidiyo gishshataassa. (1 Xim. 5:17) Hegaa gishshawu, saluwaa hidootay deꞌiyoogeeta harati xoqqu ootti xeelliyoogee eti yeellatanaadan oottiyaaba. Qassi ayyaanan tiyettida Kiristtaaneti he bonchuwaa koyiyaaba gidikko, ashkke gididi deꞌanawu metootana danddayoosona. (Roo. 12:3) Nuuni Kiristtoosaa ishatuppe issuwaanne xubbana koyokko!​—w16.01 4:9

Dabbotettay alꞌꞌobaa mala gidana danddayees. SHin dabbotettay alꞌꞌuwan shammidi son wotti bayiyooba mala gidennan, diccanaadan haattaa ushshananne bulꞌꞌana koshshiyo ataakiltte mala. Abrahaami Yihoowaara deꞌiya dabbotaa xoqqu ootti xeelliis; qassi minttidi deꞌiis. I hegaadan waati oottidee? Abrahaami kase Xoossaayyo yayyidoogeenne azazettidoogee gidees giidi mule qoppibeenna. I cora gidida ba soo asaara Kanaane biyo wode, gitabaakka guuttabaakka kuuyanawu Yihoowa kaaletuwaa kaalliis. Yisaaqi yelettanaappe issi laytta kasetidi, a son deꞌiya attumaageeti ubbay qaxxarettanaadan Yihooway azaziis; he wode Abrahaamayyo layttay 99. Abrahaami he azazuwaa bessennabadan xeellidee woy azazettennan agganawu gaaso shiishshidee? CHii, i Xoossan ammanettidi “he gallassankka” ba azazettidobaa poli aggiis.​—Doo. 17:10, 23. w16.02 1:9, 10

Yelaga naꞌikka suurebaa oottanawu, qassi bana Medhidaagawu ba huuphiyaa geppiya urappe koyettiyaabay aybakko akeekanawu danddayees. Hegaa gishshawu, wozannaama gididanne ba huuphiyaa Yihoowawu geppida naꞌi xammaqettiyoogee bessiyaaba; qassi hegee keehippe koshshiyaaba. (Lee. 20:7) Issi uri wozannaama gidiyoogee aybin erettii? Dicciyoogaa xallay wozannaama gidiyoogaa bessenna. Wozannaama uri ba akeekaa abbiyaa loohissiyoogan ‘iitaa kehaa shaakkida asaass⁠a’ gidiyoogaa Geeshsha Maxaafay yootees. (Ibr. 5:14) Hegaa gishshawu, wozannaama uri Yihoowa sinttan likke gididabay aybakko erees; qassi ubbatoo hegaadan oottanawu ba wozanan qofaa qachees. Yaatiyo gishshawu, he uri iitabaa oottanaadan issibi a denttettenna; woy ubbatoo asi denttettin loꞌꞌobaa oottenna. Xammaqettiya yelaga naꞌi a yelidaageeti woy hara gastta asi beꞌenna wodekka Xoossay kessido maaraa naagana giidi qoppiyoogee bessiyaaba.​—Pili. 2:12. w16.03 1:4, 5

Yonaataani yelaga Daawiti wogga Gooliyaadaara olettidoogan garamettennan aggenna. Daawiti ‘muucido Pilisxxeemiyaa huuphiyaa oyqqidi,’ Yonaataana aawaa, Israaꞌeela Kawuwaa Saaꞌoola sinttan eqqiis. (1 Sam. 17:57) Yonaataani Daawita nashshidoy, i xala gidiyo gishshataassa gidennan aggenna. Xoossay Daawitaara deꞌiyoogee qoncce; qassi “Yonaataani Daawitaara daro mata dabbotettaa medhdhiis.” Qassi, “Yonaataani Daawita ba huuphedan siiqiyo gishshau, aara maachchaa maacettiis.” (1 Sam. 18:​1-3) Hegaappe simmidi, Daawitayyo ammanettiyaagaa gidiis. Kaallidi Israaꞌeela kawo gidanaadan Xoossay Daawita doorikkokka, Yonaataani Daawitayyo mata dabbo gididi deꞌiis. Saaꞌooli a woranawu koyido wode, Daawitabay Yonaataana qofissiis. Yonaataani ba dabbuwaa Daawita minttettanawu, Horeesha bazzuwaa biis. Yan, Yonaataani Daawita ‘GODAN wolqqaa demmanaadan minttettanawu’ hachi gallassa xiqisiyan deꞌiyaagaa yootiis.​—1 Sam. 23:16. w16.02 3:1, 2

Meretay koyro merettoosappe doommidi, issi mala halchuwan oottiyoogee qoncciis. Aawaynne Naꞌay ha wodiyan nuuni beꞌiyo, deꞌuwan deꞌiya dumma dummabaa issippetettan oottidosona. Xoossaa oosuwan issippetettay ubbatoo qoncciis. Nohe wode markkabiyaa keexxiyoode, Xoossaa asay bazzuwan hemettiyo wode gayttiyo dunkkaaniyaa essiyoode, shoddiyoodenne harasaa efiyoode, qassi beeta maqidasiyan Yihoowa sabbanawu muuziqaa miishshaa goꞌettidi mazamuriyaa yexxiyoode issippetettan oottiyoogee qoncciis. Hegee ubbay issippetettan oottido ooso. (Doo. 6:14-16, 22; Qoo. 4:4-32; 1 Odi. 25:1-8) Beni wode Kiristtaane gubaaꞌee Yesuus Kiristtoosawu haarettidi hegaadan issippetettan oottiyoogan erettees. Kiitettida PHawuloosi tiyettida Kiristtaanetu “imoi dumma dumma,” eti oottiyo “oosoi dumma dumma,” qassi eti “oosuwaa oottanau dumma dumma” ogiyaa goꞌettidaba gidikkonne, eti “issi bolla” shaaho gidiyoogaa qonccissiis.​—1 Qor. 12:4-6, 12. w16.03 3:1, 2

Yesuusi bana kaalliyaageetussi yootido mishiraachuwaa sabbakiyo oosuwaabaa qoppa. Eti sabbakiyo hiillay ooratta, qassi sabbakanasay aaho. Hegaappe kasetiya daro layttan, hara dere asay Yihoowawu goynnanawu Israaꞌeela biitti biyo wode Israaꞌeelati ufayttoosona. (1 Kaw. 8:​41-43) Hegaadan hanidoy Yesuusi hachi gallassa xiqisiyan deꞌiya kaaletuwaa yootanaappe kase. Yesuusi ba erissiyo ashkkarati asa ubbaakko ‘baanaadan’ yootiis. PHenxxaqosxxe gallassi 33 M.Ln, Yihooway kumetta saꞌan mishiraachoy odettanaadan koyiyoogee qoncciis. I 120 gidiya ooratta gubaaꞌiyaa yameti Ayhudatuyyoonne Ayhudatettawu laamettida asatuyyo maalaalissiya ogiyan dumma dumma qaalan haasayanaadan ba ayyaanaa immiis. (Oos. 2:4-11) Hegaappe simmin, Samaariyaa asawu sabbakidosona. Guuttaa takkidi, 36 M.Ln, Ayhuda gidenna, qaxxarettibeennaageetuyyo sabbakiyoogaa doommidosona. Yaatanawu, Kiristtaaneti kumetta saꞌan deꞌiya asawu sabbakanawu baana koshshees. w16.03 4:12

Loohiyoogee oosuwan muruta gidanawu maaddiyoogaa Xoossaa ashkkarati awudekka eroosona. Looxee omoodettidaagaa wotti ekkanawu Abraami ‘olaa eriya ba asaa denttiis’; qassi eti wotti ekkidosona. (Doo. 14:14-16) Kawuwaa Daawita wodiyan, Xoossaa keettan yexxiyaageeti Yihoowayyo yexxanawu “loohidaageeta” gidiyo gishshawu, Xoossay sabettanaadan oottidosona. (1 Odi. 25:7) Ha wodiyan, nuuni Seexaanaaraanne a alamiyaara ayyaanaaban olettiiddi deꞌoos. (Efi. 6:11-13) Nuuni Yihoowa sabissanawukka keehi baaxetoos. (Ibr. 13:15, 16) Hegaa gishshawu, beni wode Xoossawu haggaazidaageetuugaadan, nuuni oosuwan murutanawu loohana koshshees. Gubaaꞌiyan harata loohissiyo oosuwaa Yihooway cimatussi immiis. Issi cimay tamaariyaa ooratta hiillaa tamaarissanaappe kase, tamaaree tamaariyoobaa oosuwan peeshshanaadan maaddanawu Geeshsha Maxaafaa maaraappe amaridaagaa yootanawu koyana danddayees.​—1 Xim. 4:6. w15 4/15 2:1, 2

Hegee xalahe halaqay asaa ubbaa worees giyoogaa gidenna. SHin asaa woriya a ayyaanay saꞌaa kumiis. Hegaa bollikka, Hewaana Seexaanaa wordduwaa ammanido gishshawunne Addaamee Xoossaayyo azazettibeenna gishshawu, nagaraynne hayqoy asa ubbaa gakkiis. (Roo. 5:12) Hegaa gishshawu, Dabloosi asay ‘hayqqanaadan gaaso gidiis⁠.’ Yesuusi giidoogaadan i ‘shemppo woriyaagaa.’ (Yoh. 8:44) Seexaanay nuussi wolqqaama morkke! Nuuni Seexaanaa eqettiyo wode, ubbabaa haariyo maataara gayttidaagan a xallaa gidennan aara exatiya ubbaa eqettoos. Daydanttati woykko makkalida daro ayyaana meretati aara exatiyaageetuppe amaridaageeta. (Ajj. 12:3, 4) Daydanttati bantta wolqqay asaagaappe aadhiyoogaa, eti oyqqidoogeeti keehi waayettanaadan oottiyoogan darotoo bessidosona. (Maa. 8:28-32; Mar. 5:1-5) He iita kiitanchatu wolqqaa woy “xalahetu halaqaa” wolqqaa xaasayada xeelloppa. (Maa. 9:34) Yihooway maaddana xayikko, Seexaanaara olettidi xoonana danddayokko. w15 5/15 1:6, 7

Neeni shori baynnabaa oottanaadan paacettikko, ay oottana danddayay? Neeni daafurancha gidiyoogaa akeeka. (Roo. 7:22, 23) Xoossay minttettanaadan woossa. (Pili. 4:6, 7, 13) SHori baynnabaa oottanaadan denttettiyaabaappe naagetta. (Lee. 22:3) Qassi paacettiyo wode, sohuwaara eqetta. (Doo. 39:12) Paaciyaa eqettiyoogan Yesuusi nuuyyo keehi loꞌꞌo leemiso. I Seexaanay yootidoban cimettibeenna. I hegaabaa qoppiyoogaappe sohuwaara Seexaanawu, “Xoossaa maxaafai . . . yaagees” yaagiis. (Maa. 4:​4-10) Yesuusi Xoossaa Qaalaa erees; qassi hegee paacee gakkiyo wode, i sohuwaara xiqisiyaa yootanaadan maaddiis. Nuuni Seexaanaara olettidi xoonanawu, shori baynnabaa oottanaadan paacciyaaban eriiddi gelana bessenna. w15 5/15 2:15, 16

Nuna kase gakkibeennabaa akeekana danddayiyoogee nuuni Yihoowagaadan aadhida erancha gididi nuuni oottiyoobay kaalettana danddayiyoobaa kaseti eranaadan maaddees. Yihoowa koyikko, issi issibaa oottiyoogee kaalettiyo ubbabaa kasetidi erana danddayees. Nuuni hegaa keena kasetidi erana xayikkonne, nuuni oottanawu qoppidobay ay kaalettanaakko qoppana koshshees. Xoossaadan aadhida erancha gidanawu, nuuni oottiyoobay ay kaalettanaakko loytti qoppana koshshees. Leemisuwawu, nuuni ekkanaappe woy gelanaappe kase issippe wodiyaa aattikko, asho gaytotettaa qaaqqay wolqqaama gidiyoogaa erana koshshees. Yihoowaara nu dabbotay moorettanaadan oottiya aybanne halchana woy oottana koshshenna! “Cincca asi iitaa be7idi, qosetti aattees; shin akeeki paccido asi metuwan gelidi qohettees” giya, geeshsha ayyaanay kaalettin xaafettida qofaara maayettiyaabaa oottoos.​—Lee. 22:3. w15 5/15 4:10, 11

Kawuwaa Daawiti waanidaakko hassayoos. ‘Daawiti keettaa bollan dembbayidi oottidosan hemettiiddi bollaa meecettiya issi mishiriyo beꞌiis.’ (2 Sam. 11:2) I maccaaseeppe harasaa xeellennaaninne ba qofaa laammennan aggiis. Hegee i hara ura machiyo amottanaadan oottiis; amottidi iira wodiraa laamiis. SHori baynnabaa amottenna mala, nuuni ammanettida Iyyoobaagaadan nu ‘ayfiyaara maachaa maacettana’ koshshees. (Iyy. 31:1, 7, 9) Nu ayfiyaa naaganawunne shori baynnabaa qaaqqatidi issi ura xeellenna mala murttana bessees. Hegaadankka kompputeriyan, kaqettida erissuwan, maxeetiyaa koohuwan, woy awaaninne pokkobaa bessiya misiliyaappe sohuwaara nu ayfiyaa wora zaarana koshshees. Iita amuwaa loytta eqettana koshshiyoobaa akeekikko, bessiyaabaa sohuwaara ootta. Neeni iitabaa oottennaadaaninne geeshsha gidada deꞌanaadan maaddiya Xoossaa Qaalaa zoriyaa eeno gaada azazetta.​—Yaaq. 1:21-25. w15 6/15 3:12-14

Yesuusi xammaqetti simmin takkennan a gakkidabaa qoppiyoogee, nuna “paacen gelissoppa” giidi nuuni woossana koshshiyoogaa akeekanaadan maaddana danddayees. Dabloosi a “paaccana mala,” Xoossaa ayyaanay Yesuusi bazzo baanaadan oottiis. (Maa. 4:1) Hegan nuuni garamettana koshshii? Xoossay ba Naꞌaa saꞌaa kiittido waanna gaasuwaa akeekikko garamettokko. I kiitettidoy Addaameenne Hewaana Xoossaa haaruwaa koyennan ixxido wode denddidabaa giigissanaassa. Denddida oyshata zaaranawu wodiyaa koshshiis. Leemisuwawu, Xoossay asaa medhido ogiyan bali deꞌii? Wottiyoobi baynna asi Seexaanay paaccikkokka Xoossaa haaruwawu exatana danddayii? Asay bana barkka haariyaakko etawu injjetanee? (Doo. 3:4, 5) He oyshata zaaranawu wodiyaa koshshiyaaba gidikkonne, hegee Yihooway haariyoy maaddiya ogiyaana gidiyoogaa yuushshi qoppiya meretati beꞌanaadan oottees. w15 6/15 5:12

Iita waayee waani doommanee? Ajjuutaa maxaafay ‘Gita Baabilooni’ xayuwaabaa yootiyoogan he oyshaa zaarees. (Ajj. 17:5-7) Worddo haymaanootee ubbay shaaramuxen leemisettidoogee bessiyaaba! Haymaanootiyaa kaalettiyaageeti ha iita alamiyaa ayssiyaageetuura shaaramuxidosona. Eti Yesuusanne a Kawotettaa ammanettidi maaddiyoogaa aggidi, biittaa haariya asata maaddidosonanne polotikan sunttettanawu Xoossay kessido maaraa kaallennan ixxidosona. Xoossay tiyido geelaꞌo mala geeshshatuppe eti keehi dumma. (2 Qor. 11:2; Yaaq. 1:27; Ajj. 14:4) Gidoppe attin, shaaramuxee mala dirijjitiyaa ooni xayssanee? “Zo7o do7aa” ‘tammu kacetu’ wozanan Xoossaa Yihooway ‘ba qoppidoogaa’ wottana. ‘Zoꞌo doꞌan’ leemisettida Kawotettatu Issippetettaa maaddiya, ha wodiyan deꞌiya kawotettati ubbay he kacetun leemisettidosona.​—Ajj. 17:3, 16-18. w15 7/15 2:3, 4

SHaahettanaadan oottiya ha qofaa agganaadan maaddiyaabay aybee? PHawuloosi eta, “Ta ishatoo, issi wozanaaninne issi qofan issippe gidanaappe attin, shaahotettai intte giddon de7enna mala, intte ubbai issi haasayaa haasayanaadan, . . . taani inttena woossais” yaagidi zoriis. (1 Qor. 1:10, 11, 13) Ha wodiyankka Kiristtaane gubaaꞌee shaahettanaadan oottiya aybinne deꞌana koshshenna. (Roo. 16:17, 18) Ayyaanan tiyettida Kiristtaaneti saꞌan deꞌiyaabaa qoppiyoogaappe saluwaa deꞌuwaabaa qoppanaadan PHawuloosi eta zoriis. (Pili. 3:17-20) Eti Kiristtoosa gishshaa haasayiya i kiittidoogeeta gidana bessees. Kare biittan uttidi bantta biittaa gishshaa oottiyaageeti bantta deꞌiyo biittaa allaalliyan gelokkona. Eti bantta biittawu ammanettoosona. (2 Qor. 5:20) Saꞌan deꞌanawu hidootiya Kiristtaanetikka Xoossaa Kawotettawu haarettiyo gishshawu, alamiyaaban eti oossinne exatokkona. w15 7/15 3:9, 10

He xiqisiyaa wotta dentta qoppiyoogee neeni Yihooway nena siiqiyoogaanne neessi koshshiyaabaa kunttiyoogaa akeekanaadan maaddana danddayees. Yihooway neessi qoppiyoogaa ammanetta. (1 PHe. 5:6, 7) Xoossay nuna ba Qaalaa baggaara haasayissiyo gishshawu, nuuni Geeshsha Maxaafaa xoqqu oottidi xeellana bessees. Issoy issuwan ammanettanawunne issoy issuwaara siiqettiyoogaa akeekanawu aawaynne aayyiyaa bantta naatuura qaretan loꞌꞌobaa haasayana koshshees. Yihooway shin waatees giidi qoppana danddayiyoo? Nuuni a beꞌibeennaba woy a cenggurssaa siyibeennaba gidikkokka, i ba Qaalaa baggaara nuuyyo “yootees”; qassi nuuni hegaa siyana koshshees. (Isi. 30:20, 21) Yihooway baassi aqida nuna kaalettanawunne qohiyaabaappe naaganawu koyees. Nuuni a eranaadaaninne an ammanettanaadankka koyees.​— Maz. 19:7-11; Lee. 1:33. w15 8/15 1:6, 7

Nuuni sinttappe demmana Gannatiyaa naagikkokka, ooratta alamiyan demmana waanna anjjoy ayyaanaabaa. Yihoowa sunttay geeyidoogaanne a haaroy suure gidiyoogee qonccidoogaa eriyoogee ay keena ufayssanddeeshsha! (Maa. 6:9, 10) Yihooway asaassinne saꞌaassi halchido koyro halchoy polettiyoogaa beꞌiyo wode, nuuni keehi ufayttana. Qassi nuuni wottiyoobi baynna asa gidiyo wode, metootennan Yihoowakko shiiqana danddayiyoogaa qoppa. (Maz. 73:28) Yesuusi, “Xoossau ubbabai danddayettees” giido gishshawu, ha anjjoti nubaa gidana danddayoosona. (Maa. 19:25, 26) SHin nuuni ooratta alamiyan, Kiristtoosa SHaꞌu Layttaa Haaruwaappe simminkka deꞌanawu qoppikko, merinaa deꞌuwaa haꞌꞌi mintti “oiqqana” bessees. (1 Xim. 6:19) Nuuni ha iita alamee xayiyo wodiyaa naagiiddi deꞌana bessees; qassi ooratta alamiyaa deꞌuwawu giigettanawu maaddiyaabaa ha wodiyan oottana koshshees. w15 8/15 3:2, 3

Ha alamiyan televizhiiniyaanne gaazeexaa malaban odettiyaabaappe dariya baggay Kiristtaaneta ayyaanaaban qohana danddayees. Hegaa malabay Yihoowaaninne i qaalaa gelidoban ammananaadan maaddanawu giigidaba gidenna. Hegee Seexaanaa iita alamiyaanne ha alamiyaa qofaa qonccissees. Hegaa gishshawu, “ha sa7aa amuwaa” denttettana danddayiyaabaa nuuni doorenna mala keehi naagettana bessees. (Tii. 2:12) Ha alamee giigissiyoobaappe dumma ogiyan, ha wurssetta gallassan Yihoowa dirijjitee giigissiyoobay merinaa deꞌuwaa demissiya eeshshaa minttettees. Tumu goynuwaabaa yootiya maxeeteti, brooshureti, maxaafati, biidotinne Weyb sayttiyan kiyiyaabay deꞌiyo gishshawu nuuni keehi anjjettida! Xoossaa dirijjitee kumetta saꞌan 110,000ppe dariya gubaaꞌetun ubbatoo shiiquwaa shiiqanaadankka giigissees. Ha shiiqotuuninne gita shiiqotun Xoossaaninne i qaalaa gelidoban ammananaadan maaddiyaabaa Geeshsha Maxaafaappe tamaaroos.​—Ibr. 10:24, 25. w15 8/15 4:9, 11

Yihoowa ashkkarati bantta kahaa loohissanawu koyoosona. Eti likkebaanne likke gidennabaa, loꞌꞌobaanne iitabaa xeelliyaagan bantta kahay yootiyoobay Xoossa Qaalay yootiyoobaara maayettanaadan koyoosona. Maara loohida kahay Kiristtaane gubaaꞌiyan keehi maaddees. SHin, Kiristtaaneti bantta kahaa loohissanawunne goꞌettanawu Geeshsha Maxaafay yootiyoobaa eriyoogaa xallay gidenna. Geeshsha Maxaafay loꞌꞌo kahay ammanuwaaranne siiquwaara gayttidaba gidiyoogaa yootees. PHawuloosi, “Ha azazuwau waanna qofai geeshsha wozanaappe, lo77o zoriya wozanaappe, asi be7o giyoobi bainna ammanuwaappe beettiya siiquwaa denttettanaassa” yaagiis. (1 Xim. 1:5) Nu kahaa loohissidi i yootiyoobaa siyiyo wode, Yihoowa wozanappe siiqoos; qassi mino ammanoy deꞌiyoogeeta gidoos. Nuuni nu kahaa goꞌettiyo ogee Yihoowaara dabbotaa ay keena minttidaakkonne a ufayssanawu ay keena koyiyaakko qonccissees. Nu kahay nuuni ay mala asakko bessees. w15 9/15 2:2, 3

Yihooway ubba asaa Medhidaagaa. (Maz. 100:3-5) Hegaa gishshawu, Geeshsha Maxaafay Addaama “Xoossaa na7aa” gees; qassi Yesuusi bana kaalliyaageeti Xoossaa “saluwan de7iya nu Aawau” gaanaadan tamaarissiis. (Luq. 3:38; Maa. 6:9) Deꞌuwaa Immiyaagaa gidiyoogan Yihooway nu Aawaa gidiyo gishshawu, loꞌꞌo aaway ba naata siiqiyoogaadan i nuna siiqees. Bali baynna aawa gidana danddayiya asi baynnaagee qoncce. Eti daro baaxetikkokka, Yihoowadan loytti siiqana danddayokkona. Eta aaway etawu meqettaa iitido gishshawu, eti naatettan unꞌꞌettidoogaa hassayana danddayoosona. SHin Yihooway hegaa mala aawa gidenna. (Maz. 27:10) Yihooway nuna ay keena siiqiyaakkonne nuuyyo ay keena qoppiyaakko eriyoogee akko shiiqanaadan maaddees.​—Yaaq. 4:8. w15 9/15 4:3, 4

Yihoowa shenee aybakko yuushshi qoppennan kuuyiyoogee nuuni a siiqennaagaanne an ammanettennaagaa bessees. Sameela wode issitoo, Pilisxxeemati Israaꞌeelata olan xoonidosona. Xoossaa asatussi maadoynne naagoy keeh koshshiis. Eti waatidonaa? Eti, “Nunaara baanaadaaninne nuna nu morkketu kushiyaappe ashshanaadan GODAA Maachchaa Taabootaa Seeloppe ane ehoos” yaagidi kuuyidosona. Hanidabay aybee? “He olan daro asai goora7ettiis; Israa7eela olanchchatuppe hasttamu sha7ai haiqqiis. Xoossaa Taabootai omoodettiis.” (1 Sam. 4:2-4, 10, 11) Israaꞌeelati taabootaa ekki biidoogee Yihooway banttana maaddanaadan koyidoba milatana danddayees. SHin eti bantta qofan zemppidi, Yihoowa kaaletuwaa tumuppe koyibookkona; qassi hegee bashshaa kaalettiis.​— Lee. 14:12. w15 9/15 5:16, 17

Ammanuwan minnada deꞌanawu neeni waatana danddayay? Neeni xammaqettana gakkanaashin tamaaridobaa xallay gidana gaada aggaagoppa. (Ibr. 6:1, 2) Geeshsha Maxaafan deꞌiya polettida hiraagati neeni ammanuwan minnanaadan keehi maaddana danddayiyo gishshawu, hegeeta wozanan wotta. Qassi ne ammanoy minokkonne shaakka eranawu Xoossaa Qaalaa goꞌettana danddayaasa. (Yaaq. 1:25; 2:24,26) Kiitettida PHawuloosi ba mala Kiristtaaneti issoy issuwaa ammanuwan “minettana” danddayiyoogaa yootiis. (Roo. 1:12) Nu mala Kiristtaanetuura, ubba qassi ‘paaciyaa’ xoonida ammanoy deꞌiyoogeetuura issippe shiiqiyo wode, issoy issuwaa ammanoy minnanaadan oottana danddayoos. (Yaaq. 1:3) Iita laggetettay ammanuwan shugganaadan oottees; shin loꞌꞌo laggetettay ammanuwan minnanaadan oottees. (1 Qor. 15:33)Nuuni “issippe shiiqiyoogaa” aggennaadan zoree imettidoy hegaassa.​—Ibr. 10:24, 25. w15 10/15 2:2, 8, 9

Nuuni Geeshsha Maxaafaa xannaꞌissanawu giigettiyo wode wotti denttidi qoppanawu wodiyaa bazzana koshshees. Xannaꞌissiyo ura qoppidi, i diccanaadan maaddanawu oychana oyshaa woy goꞌettana leemisuwaa qoppana danddayoos. Hegaa qoppiyoogee nu ammanoy minnanaadan oottiyo gishshawunne mishettidi loytti xannaꞌissanawu maaddiyo gishshawu, hegawu goꞌettiyo wodee nuna keehi minttettana danddayees. Nuuni haggaazuwawu nu wozanaa giigissiyo wodeekka hegaa mala. (Izi. 7:10) Oosuwaa maxaafaappe issi shemppuwaa nabbabiyoogee haggaazuwan keehi mishettanaadan maaddees. He gallassi goꞌettanawu qoppido Geeshsha Maxaafaa xiqisiyaanne nuuni asawu immanawu qoppido xuufeta wotti dentti qoppiyoogee nu haggaazo maataa maara goꞌettanaadan maaddees. (2 Xim. 1:6) Moottan deꞌiya asaabaanne eti siyanawu koyanaadan denttettana danddayiyaabaa qoppa. Hegaadan giigettiyoogee nuuni “Xoossaa Ayyaanaaninne wolqqan” Xoossaa Qaalaappe loyttidi qonccissanaadan denttettees.​—1 Qor. 2:4. w15 10/15 4:9

Inttena hagaadan oychite: ‘Pokkobaa bessiyaabaa ta naꞌay beꞌanaadan paaccana danddayiyaabay aybee? Hegee keehi qohiyoy aybissakko i erii? I pokkobaa beꞌanaadan paacettikko tana maaduwaa oychana mala, pashkki gaada haasayissiyaanaa?’ Intte naati keehi guutta gidikkokka, etawu hagaadan gaana danddayeeta: “Neeni pokkobaa bessiya weyb sayttiyaa beꞌanawu paacettikko, hayyanaa tawu yoota. Neeni yeellatana koshshenna. Taani nena maaddanawu koyays.” Intte akeekancha gidiyoogee intte allaxxiyoobaakka akeekan dooranaadan maaddees. Pranasi giyo aaway, “Dumma dummabaa xeelliyaagan darobaa yootana danddayaasa; shin ne naati neeni oottiyoobaa beꞌidi ne leemisuwaa kaalloosona” yaagiis. Intte loꞌꞌoban wodiyaa aattiyo muuziqaa, pilimiyaa woy maxaafaa ubbatoo akeekan doorikko, intte naatikka hegaadan oottanaadan maaddana danddayeeta.​—Roo. 2:21-24. w15 11/15 1:12-14

Dabaaban markkattiyoogee mishiraachuwaa asawu gattiyo hara loꞌꞌo hiilla. Otobisee, baabureenne kaamee eqqiyoosan, qassi dabaabaaninne giyan asawu mishiraachuwaa yootanawu daro baaxetoos. Hageetuppe amaridaageetun markkattanawu yayyikko, maaduwaa demmanawu woossiyoogeenne daro layttawu yuuyidi xomoosida ishaa Anjelo Maneri yootidobaa qoppiyoogee loꞌꞌo. I hagaadan giis: “Haggaazo gina ubbaa Yihoowayyo haggaaziyoonne ayyo ammanettiyoogaa bessiyo hara ogedan, qassi nuuni ammanettiyoogaa paacciya harabadan xeellida; hegaa bollikka, i aybanne oychikko haggaazanawu eeno giyoogaa bessanawu keehi koyida.” Nuna geelladan ufayssenna ooratta ogiyan haggaaziyoogee nuuni Yihoowan ammanettanaadaaninne a ammananaadan maaddees; hegee nuuni ayyaanaaban minnanaadan oottees. (2 Qor. 12:9, 10) Daro aassiyaageeti jw.org saytiyaa asawu bessiyoogan loꞌꞌo ayfiyaa demmidosona. He weyb saytte mishiraachoy ubbaa Yihoowa Markkati baynnasan deꞌiya asawu gakkanaadan maaddees. w15 11/15 5:​12, 13, 15

Kase Inggilizetto Ooratta Alamiyaa Birshshettay amarida Inggilizetto Geeshsha Maxaafaa birshshettatuugaadan, Eranchchaa 9:10 mala xiqisetun “SHiꞌol” giyo Ibraawetto qaalaa goꞌettiis. Kase he xiqisee, “Neeni baanasan SHiꞌoliyan oosoy, woykko halchoy, woykko eri, woykko aadhida eratetti baawa” yaagees. Inggilizetto gidenna daro qaalatun birshshiyaageeta metidabay “SHiꞌol” giyo qaalaa daro asay erennaagaa, eta qaalaa kochan hegee baynnaagaanne heera sunttaa milatiyoogaa. Yaatiyo gishshawu, 2013 zaarettidi giigissidoogan, “SHiꞌol” giyo qaalaanne aara issi mala gidida “Heydis” giyo Giriiketto qaalaa “Duufuwaa” giidi geliya ogiyan suure birshshanaadan paqqadettiis. Ha wodiyan goꞌettenna Inggilizetto qaalaykka laamettiis; qassi qofaa laammennan, akeekanawu metenna ogiyan birshshanawu daro baaxetida. Hara qaalaagaadan oottiyoogee Inggilizetto Geeshsha Maxaafaa poshanaadan maaddiis. w15 12/15 2:10, 12

Nuuni sahettikko, Xoossay beni wode baayyo tumuppe goynniyaageetussi oottidoogaadan minttettanaadan, eratettaa immanaadaaninne maaddanaadan akko xeellana danddayoos. Daawita wode hiyyeesaassi qoppida uri merinawu deꞌibeennaagaa nuuni eroos. Hegaa gishshawu, Daawiti qommora deꞌiya qofaa xaafido wode i hegaadan qoppiya uri maalaalissiya hanotan merinawu paxa deꞌana danddayees gibeennaagee qoncce. Asawu qoppiya ammanettida ura Xoossay maaddanaagaa i geeshsha ayyaanaa kaaletuwan hegaadan yootiis gaana danddayoos. Xoossay waatidi maaddanee? Daawiti, “GODAI a harggiyaa hiittan de7ishinkka maaddees; i sahettinkka, a pattees” yaagiis. (Maz. 41:3) Ee, hiyyeesaayyo qoppiya uri Xoossay anne i ammanettidi oottiyoobaa akeekiyoogaa ammanettana danddayees. Qassi Xoossay gazddanaadan ootti medhido a bollay i paxanaadan maaddana danddayees. w15 12/15 4:7

PHawuloosi ha sohuwan bantta ammanuwaa gaasuwan qashettida ishanttubaa yootiis. PHawuloosi Ibraawe Kiristtaanetuyyo hegaadan giidi xaafiyo wode, ikka qashettoosappe oyddu laytta gidana hanees. (Pili. 1:12-14) ‘Qashuwan deꞌiya asatuyyo qarettido’ gishshawu PHawuloosi ishantta galatiis. (Ibr. 10:34) Ibraawe Kiristtaaneti PHawuloosi qashettido wode haratuugaadan akko biidi maaddibookkona. Yaatin, eti abaa qoppiyoogaa waati bessanee? Eti a gishshaa aggennan Xoossaa woossiyoogan abaa qoppiyoogaa bessana danddayoosona. (Ibr. 13:​18, 19) Nuunikka ha wodiyan haahosan qashuwan deꞌiya nu ishantta biidi maaddennan aggana danddayoos. Nuuni qashuwan deꞌiyaageeta, eta heeran deꞌiya Yihoowa Markkatuugaadan koshshiyaaban maaddennan aggana danddayoos. SHin he ammanettida ishata ubbatoo hassayiyoogaaninne eta gishshaa Yihoowa wozanappe woossiyoogan, qarettiyoogaanne eta ishanttudan siiqiyoogaa bessana danddayoos. w16.01 1:​13, 14

Xoossay koyro halchidobay asay saꞌan merinawu deꞌanaadaana. (Doo. 1:28; Maz. 37:29) Saluwaa biidi kawonne qeese gidanaadan amarida asaa dooriyoogee meeze gididaba gidenna. Hegee Xoossay koyro halchidoba gidenna. Xoossay eta ayyaanan tiyiyo wode, eti saluwaa deꞌuwaa laamotana mala hidootan naagiyoobay, eti qoppiyoobaynne eta xeelay laamettees. (Efi. 1:18) SHin issi uri saluwaa baanawu doorettidoogaa waati erana danddayii? Hegaa zaaroy, Xoossay “geeshsha oottanau xeesido,” Roomen deꞌiya ayyaanan tiyettida ishatuyyo PHawuloosi yootidoban qoncciis. I hagaadan giis: “Nuuni nu qaalaa xoqqu oottidi, ‘Abbaa! Ta Aawau’ yaagidi xeesiyo nuna Xoossaa naata kessiya Geeshsha Ayyaanaa Xoossaappe ekkidoogaappe attin, naa77anttuwaa yayyanau aille kessiya ayyaanaa ekkibookko.” (Roo. 1:7; 8:15) Saluwan Yesuusaara kawo gididi haaranaadan, Xoossay ba geeshsha ayyaanaa baggaara issi uri doorettidoogaa awu qonccissees.​—1 Tas. 2:12. w16.01 3:8, 9

Yihooway tiyidoogeeta maara bonchiyoogaa waati bessana danddayiyoo? Tiyettidoogaa xeelliyaagan eta oychokko. Qassi nuna gattenna yohuwan gelokko. (2 Tas. 3:11) Ayyaanan tiyettida uraa aaway woy aayyiyaa, aqo laggee woy dabboykka ayyaanan tiyettees giidi nuuni qoppana bessenna. Hegee dabbo woy aqo lagge gidiyoogaara gayttidabaa gidenna. (1 Tas. 2:12) Ayyaanan tiyettidaagaa aqo laggiyaa, i woy a baynnan sinttappe Gannate saꞌan deꞌanaagaa qoppiyo wode awu woy iyyo aybi siyettiyaakko nuuni oychana koshshenna. Eta qohana danddayiya hegaa mala oysha oychiyoogaappe, Yihooway ba kushiyaappe yeggidi, ‘paxa deꞌiyaageetu ubbaa amuwaa alanaagaa’ nuuni ubbay ammanettana danddayoos.” (Maz. 145:16) Tiyettidaagaadan banttana yootiya ‘wordduwaa ishantta’ gidennan, tiyettida Kiristtaaneta maaddiyaageeti bashshaappe banttana ashshoosona.​—Gal. 2:4, 5; 1 Yoh. 2:19. w16.01 4:10, 11