Tisaase

Kiristtaaneti Seexaanay bantta bolli ehiyo daro paaciyan genccanaadan minttettanawu kiitettida PHeexiroosi ha qaalaa xaafiis. ‘Danddayidi genccidaageetu’ leemisoy nuuni waani minni eqqanaakko tamaarissees; xoonana danddayiyoogaa ammanettanaadan maaddees; qassi ammanettidi deꞌikko woytuwaa demmanaagaa hassayissees. (Yaaq. 5:11) Tumu goynuwaa morkketi nena keehi ixxiyoonaa, ubba qassi yedettiyoonaa? Neeni ne gita aawatettay deexxiyo gubaaꞌe cimee woy woradaa xomoosiya ishee? Yaanikko, PHawuloosabaa wotta denttada qoppa. A keehi ixxiya, Kiristtaane gidenna asati a bolli ‘hara’ darobaa gattidosona; qassi i gubaaꞌetuyyo hirggiyo gishshawu, galla galla keehi unꞌꞌettiis. (2 Qor. 11:23-29) Gidikkokka, i hidootaa qanxxibeenna; qassi a hanotay harata minttettiis. (2 Qor. 1:6) Neeni metuwan gencciyo wode, ne leemisoy harati genccanaadan minttettana danddayiyoogaa hassaya. w16.04 2:11, 14

Asay nuuni yootiyoobaa maayiyaaba gidin woy keehi eqettiyaaba gidinkka, Yihoowa Markkati sabbakiyoogan erettidaageeta gidiyoogaa kashi giya uri baawa. Neeni haggaaziyo wode, nuuni ammaniyoobaa maayana xayikkonne nu oottiyo oosuwaa gaasuwan nuna bonchiyoogaa yootiya asatuura gayttennan aggakka. Nuuni eriyoogaadan, Kawotettaabaa mishiraachoy saꞌa ubban odettanaagaa Yesuusi kasetidi yootiis. (Maa. 24:14) Daro haymaanooteti Wonggeliyaa woykko mishiraachuwaa yootiyaabadan qoppoosona. Gidoppe attin, eti banttabaa markkattiyoogaappe, woosa keettan oottiyoogaappe, woy televizhiiniyaa woy Intternneetiyaa malaban yootiyoogaappe harabaa oottokkona. Harati qassi eti asaa maaddiyoogaa woy akkamuwaaranne timirttiyaara gayttidaban oottiyoobaa yootoosona. Ha asati yootiyoobay Yesuusi bana kaalliyaageeti oottanaadan yootidobaara gayttiyaabee? w16.05 2:1, 2

Qassi, asa kawotettati 1914n eqqida Xoossaa Kawotettaa eqettoosona. He Kawotettay mata wode eta ubbaa xayssana. (Maz. 2:2, 7-9) Asa kawotettay amarida sarotettaynne maaray asawu deꞌanaadan oottiyo gishshawu, eti haaranaadan Xoossay paqqadiis. Hegee nuuni Xoossaa Kawotettaa mishiraachuwaa sabbakanaadan maaddees. (Roo. 13:3, 4) Xoossay nuuni sunttatuyyo woossanaadan, ubba qassi eti kuuyiyoobay nu goynuwaara gayttidaba gidiyo wode etawu woossanaadan azaziis. (1 Xim. 2:1, 2) Kiitettida PHawuloosaagaadan, nuna naaqqiyo wode kawotettaa sunttata yigibaa oychoos. Geeshsha Maxaafay Xoossaa morkkee Seexaanay kawotettata haariyoogaa yootikkonne, kawotettan ayssanaadan woy kaalettanaadan sunttettida ubbaa i kaalettiyoogaa yootenna. (Luq. 4:5, 6) Yaatiyo gishshawu, nuuni kawotettan sunttettida uraa Dabloosi kaalettees gaana koshshenna. Nuuni ‘deriyaa haariyaageetuuranne godatettay deꞌiyoogeetuura’ haasayiyo wode ‘oonanne cayokko.’—Tii. 3:1, 2. w16.04 4:5, 6

‘Issi allaalliyaa xeelliyaagan qoncce higgee a Qaalan baynnaba gidikko, Yihoowa ufayssiyaabaa waata erana danddayiyaanaa?’ gaada qoppana danddayaasa. Issibaa xeelliyaagan Geeshsha Maxaafan qoncce higgiyaa demmenna wode, Xoossay koyiyoobaa waati akeekana danddayiyoo? A woossiyoogaaninne i ba geeshsha ayyaanan kaalettiyo wode eeno giidi kaalliyoogan akeekana danddayoos. Yesuusi oottanaadan a Aaway koyiyoobaa i waati akeekidaakko beꞌa. Yesuusi naaꞌꞌu wodetun, daro asaa mizanaappe kase woossidi, maalaalissiyaabaa oottiis. (Maa. 14:17-20; 15:34-37) SHin i namisettido wode, shuchaa oytta oottanaadan Dabloosi a bazzon paaccin eqettiis. (Maa. 4:2-4.) Yesuusi ba Aawaa qofaa loytti eriyo gishshawu, he shuchaa oytta oottana bessennaagaa eriis. Ee, Yesuusi maalaalissiyaabaa oottiyo wolqqan bana goꞌꞌiyaabaa oottiyoogee Xoossay koyiyooba gidennaagaa akeekiis. I Dabloosi giidobaa oottennan aggiyoogan, kaaletuwaanne baassi koshshiyaabaa demmanawu Yihoowan ammanettiyoogaa bessiis. w16.05 3:7, 8

Geeshsha Maxaafan deꞌiya issi issi qofay koyro issi urawu woy issi citawu xaafettidoogee tuma. Nuuni Xoossaa Qaalaa nabbabanaappe kase, Yihooway nuna tamaarissanawu koyidobaa nuuni loytti akeekanaadan maaddana mala woossana koshshiyoy hegaassa. (Izi. 7:10; Yaaq. 1:5) Geeshsha Maxaafaa nabbabiyo wode, kaallidi deꞌiyaageetu mala oyshaa nena oycha: ‘Hagee Yihoowabaa ay qonccissii? Ha zoriyaa waatada kaallana danddayiyaanaa? Harata maaddanawu ha qofaa waata goꞌettana danddayiyaanaa?’ Nuuni hegaa mala oyshaa wotti dentti qoppiyo wode, Geeshsha Maxaafaa nabbabiyoogan keehi goꞌettanaagee qoncce. Leemisuwawu, gubaaꞌe cimatuppe koyettiyaabaa Geeshsha Maxaafay woygiyaakko qoppa. (1 Xim. 3:2-7) Nuuppe daroti gubaaꞌe cima gidenna gishshawu, he qofay nuna daro maaddenna giidi koyro qoppana danddayoos. SHin, he qofay nuna ubbaa daro ginan maaddana danddayiyoogaa akeekoos. w16.05 5:7, 8

Omoodettida Ayhudati Baabiloone katamaa geliyo wode, yan eeqay kumidoogaanne asay iita ayyaanatussi haarettiyoogaa beꞌidosona. Gidikkokka, Daaneelanne a heezzu laggetu mala ammanettida Ayhudati Baabiloonetuugaa mala deꞌuwaa deꞌanawu koyibookkona. (Dane. 1:6, 8, 12; 3:16-18) Daaneelinne a laggeti banttana urqqa miishshadan Medhiya Yihoowawu muleera aqanawu murttidosona. Qassi eti hegaadan oottidosona! Daaneeli Baabiloonen daro layttaa deꞌidaba gidikkokka, Xoossaa kiitanchay a, “Xoossai keehi siiqido bitaniyau” yaagiis. (Dane. 10:11, 19.) Beni wode, urqqaa medhiya uri urqqa miishshay i giigissi wottidobaa malatanaadan a bolli naaqqees. Yihooway asaakka kawotettatakka laammanawu maatay deꞌiyo, Ubbabaa Haariyaagaa gidiyoogaa ha wodiyan tumu Kiristtaaneti akeekoosona. (Erm. 18:6) Nunakka laammanawu Xoossawu maatay deꞌees. Gidikkokka, nuuni koyidobaa dooriyoogaa i akeekiyo gishshawu, nu dosan ayyo azazettanaadan koyees. w16.06 2:1, 2

Nuuni nu deꞌuwan keehi ufayttidi deꞌanawu miishshay nuussi keehi koshshiyaabadan qoppanaadan oottanawu Seexaanay ha alamiyaa zalꞌꞌe dirijjiteta goꞌettees. I ‘ayfen xeellin qaaqqayiyaabaa’ oottiyoogan qara. (1 Yoh. 2:15-17; Doo. 3:6; Lee. 27:20) Ooratti merettidabaa shammanaadan nuna ammanttanawu erissiyoobaa darotoo ha alamiyan beꞌoos woy siyoos. Issibay neessi keehi koshshana xayikkonne, erissuwan woy suuqiyan beꞌada keehi dosido gishshawu shamma eray? Hegaa shamma simmada i baynnan deꞌana danddayiyoogaa guyyeeppe akeekadii? Aynne koshshenna hegaa malabay nuuni deꞌuwan unꞌꞌettanaadan oottees. Hegee Geeshshaa Maxaafaa xannaꞌiyoogaa, shiiquwawu giigettidi biyoogaanne ubbatoo haggaaziyoogaa mala ayyaanaabaa oosuwaappe nu qofaa wora zaaridi nuuyyo pire gidana danddayees. Yohaannisi, “Ha sa7ainne ha sa7an asi amottiyo ubbabai aadhdhana” yaagidi zoridoogaa hassaya. w16.07 1:3, 4

Koyro xeetu layttan, Kiristtaane gubaaꞌiyan Ayhudati, Giriiketi, Roomatinne hara dumma dumma biittaa asati deꞌoosona. Eta haymaanootee, wogaynne qofay Kiristtaanetuugaappe kase dumma. Hegaappe denddidaagan, issoti issoti he ooratta haymaanootiyaa kaallanawu woy bantta beni meeziyaa muleera aggibayanawu metootidosona. Kiitettida PHawuloosi Kiristtaanetu Xoossay issuwaa, hegeekka Yihoowa gidiyoogaa eta hassayissana koshshiyoogaa akeekiis. Ha wodiyan deꞌiya Kiristtaane gubaaꞌee shin? Hananabaa yootiya Isiyaasi “wurssetta gallassatun” ubba biittaa asay keehi xoqqa sohuwan leemisettida tumu goynuwawu yaanaagaa kasetidi yootiis. Eti, “[Yihooway] koyiyoogaadan nuuni baana mala, i nuna ba ogiyaa tamaarissana” yaagoosona. (Isi. 2:2, 3) Nuuni ha hiraagay polettishin beꞌiyoogee ayba ufayssiyaabee! Hegaappe denddidaagan, daro gubaaꞌiyan deꞌiya Yihoowa sabbiya asaa zaree, wogaynne qaalay dumma dumma. w16.06 3:15, 16

Yihooway ayyaanan tiyettida Kiristtaaneti Kiristtoosaara haariyo wode etawu immanawu giigissido gita woytoy aybakko qoppanawukka metiyaaba. (Luq. 22:28-30; Pili. 3:20, 21; 1 Yoh. 3:2) Eti “ooratta Yerusalaame” woykko Kiristtoosawu bullashettiyaaro gidana. (Ajj. 3:12; 17:14; 21:2, 9, 10) Eti Yesuusaara ‘zare ubbaa harggiyaappe pattana,’ hegeekka, azazettiya asaa nagaraanne hayquwaa aylletettaappe kessidi wottiyoobi baynna asa oottana. (Ajj. 22:1, 2, 17) Yihooway ba aaro kehatettan ha saꞌan oottana maalaalissiyaabatuppe issoy “duufo giddon” deꞌiyaageeta denttiyoogaa. (Iyy. 14:13-15; Yoh. 5:28, 29) Kiristtoosi yarshsho gididi hayqqanaappe kase hayqqida ammanettida asatinne ha wurssetta gallassatun ammanettidi hayqqiya ‘hara dorssati’ ubbay Yihoowayyo haggaazanawu hayquwaappe denddana.—Yoh. 10:16. w16.07 4:13-15

Loꞌꞌobaa amottiyoogaa xallay ayyaanaaban ‘mino’ gidiyoogaa woy beegottiyoogaa bessenna. Geetesemaane ataakiltte sohuwan hanidabaappe amarida gallassaa kasetidi, Yesuusi he erissiyo ashkkarati Yihoowa mintti woossanaadan yootiis. (Luq. 21:36) Yaatiyo gishshawu, nuunikka ayyaanaaban beegottidi deꞌanawu ubbatoo woossana koshshees. (1 PHe. 4:7) Yesuusi wurssettay nuuni “qoppenna saatiyan” yaanaagaa yootido gishshawu, ha wodee ayyaanaaban azalliyo wode, woy qassi Seexaanaynne a alamee giigissiyoonne nu ashoy amottiyo aymo malabawu bichaariyo wode gidenna. (Maa. 24:44) Xoossaynne Kiristtoosi eti nuuyyo matan immanabaa, qassi nuuni waanidi naagi uttana danddayiyaakko Geeshsha Maxaafaa baggaara yootoosona. Yaatiyo gishshawu, Geeshsha Maxaafaa hiraagaa, qassi hegee waani polettiyaakko loytti akeekiyaageeta gidoos. Hegaa bollikka, Yihoowakko kaseegaappe aaruwan shiiqanawunne nu deꞌuwan a Kawotettaa kaseyanawu amottoos. Yaatikko, wurssettay yiyo wode nuuni giigettidaageeta gidana. (Ajj. 22:20) Nuuni attanay yaatiyoogaa xallaana! w16.07 2:15-17

Aqo laggeti ‘issoy issuwaabaa danddayikkonne issoy issuwawu atto yaagikko’ aqo deꞌoy minnana danddayees. Eti nagarancha gidiyo gishshawu mooranaagee qoncce. SHin, mooriyo wode, eti balaappe tamaarana, atto giyoogaa tamaarana, qassi Geeshsha Maxaafaa maaraadan siiqettana danddayoosona. He siiqoy “issippe shiishshi qachchiya” siiquwaa. (Qol. 3:14) Hegaa bollikka, “siiqoi danddayanchcha. Siiqoi kehees. . . . Naaqettidobaakka paidenna.” (1 Qor. 13:4, 5) Walaqettidobaa sohuwaara giigissana koshshees. Yaatiyo gishshawu, Kiristtaane azinaynne machiyaa merettida metuwaa away wullennan giigissanawu baaxetana bessees. (Efi. 4:26, 27) “Nena naaqqido gishshawu tawu atto ga” yaagidi wozanappe oychanawu ashkkenne xala gidana koshshikkokka, hegee aqo laggeti maayettanawunne kaseegaappe aaruwan siiqettanawu keehi maaddees. w16.08 2:6

Yesuusi oottido waanna oosoy Kawotettaa mishiraachuwaa yootiyoogaa. SHin, i wodiyaa bazzidi harati heemmiyaageetanne tamaarissiyaageeta gidanaadan loohissiis. (Maa. 10:5-7) Piliphoosi mishiraachuwaa minnidi yootikkonne, ba oyddu macca naati Geeshsha Maxaafaa tumaa yootiyoogan qara gidanaadan maaddidoogee qoncce. (Oos. 21:8, 9) Hegaadan loohissiyoogee ha wodiyan ay keena koshshii? Kumetta saꞌan, mishiraachuwaa siyiya asaa qooday gujji gujji bees. Geeshsha Maxaafaa buzo xannaꞌiyoogee keehi koshshiyoogaa biron xammaqettibeennaageeti akeekana bessees. Eti haratuyyo mishiraachuwaa yootanaadaaninne eta tumaa tamaarissanaadankka loohissana bessees. Nu gubaaꞌiyan, ishantti gubaaꞌiyawu oottiyaageetanne cimata gididi sunttettanawu etappe koyettiyaabaa kunttanawu minni oottanaadan minttettana koshshees. Kayma Kiristtaaneti “lo77o timirttiyaa” tamaarissiyoogan, oorattati ayyaanaaban diccanaadan maaddana danddayoosona. w16.08 4:1, 2

Nu ishanttuuranne michonttuura issippe haggaaziyoogee issippetettay minnanaadan maaddees. Hegee nuuni merinawu dabbo gididi deꞌanaadaaninne mata wode Xoossaa Kawotettay ehaana anjjuwaa demmanaagaa mintti ammanettanaadankka maaddees. Nuuni haratu kushiyaa minttiyo wode, eti metiya hanotan genccanaadaaninne keha wodee yaana giidi hidootan naaganaadan maaddoos. (Isi. 35:4) Qassi hegaa nuuni haratuyyo oottiyoogee nuuni ayyaanaabaa qoppanaadaaninne Xoossay gelido qaalay tuma gidiyoogaa ammanettanaadan maaddees. Ee, hagee nu kushiyaakka minttees. Yihooway ammanettida ba ashkkarata beni wode waati maaddidaakkonne naagidaakko akeekiyoogee ha wodiyan nuuni an mintti ammanettanaadan oottana koshshees. Hegaa gishshawu, unꞌꞌissiyaabaynne metiyaabay gakkiyo wode, ‘ne kusheti arggaacanaadan’ oottoppa! (Sof. 3:16) Yihooway maaddanaadan woossa; qassi a wolqqaama kushee nena minttanaadaaninne Kawotettay ehiyo anjjuwaa neeni demmanaadan kaalettana mala eeno ga.—Maz. 73:23, 24. w16.09 1:16-18

Xoossaa ashkkarati ay maayanaakko kuuyiyo wode, qommoora odettidabaa qoppana bessees. Nuuni maayiyoy carkkuwaa, wodiyaanne nu deꞌuwaa hanotaadaana gidana danddayees. SHin, Yihooway kessido maaray carkkuwaa hanotay laamettiyo wode laamettenna. (Mil. 3:6) Boniyan, nuuni suure qoppiyoogaa bessiya, bonchissiyaanne giiga maayuwaa maayiyoogee metiyaaba gidana danddayees. Yaatiyo gishshawu, nu ishanttinne michontti nuuni keehi baqqi oyqqiya woy bollaa bessiya shori baynna maayuwaa maayennan aggiyo wode nashshoosona. (Iyy. 31:1) Qassi, nuuni abbaa doonan woy haattaa wadhiyo sohuwan allaxxiyo wode maara maayuwaa maayana koshshees. (Lee. 11:2, 20) Alamiyan daro asay haattaa wadhiyo wode maayiyo maayoy bollaa bessiyaagaa gidikkonne, Yihoowawu haggaaziya nuna qofissiyaabay nu siiqiyo geeshsha Xoossaa bonchissiyoogaa. w16.09 3:11, 12

Yesuusi darotoo bana kaalliyaageeti woygi ammaniyaakko oychees. A leemisuwaa kaalla. Neeni ne naatuura haasayiyo woy issibaa oottiyo wode, eti ay qoppiyaakko oycha; qassi eti banttawu siyettiyaabaa neeyyo yootanaadan ootta. Ne naati Geeshsha Maxaafay tamaarissiyo issibaa sohuwaara ammanana xayikko, danddaya. Eti bantta oyshawu zaaruwaa demmanaadan maadda. Ne naꞌay wozanappe oychiyo oyshaa i qoppiyoogaanne akeekanawu koyiyoogaa bessiyaabadan xeelliyoogee maaddiyaaba. Yesuusi baayyo layttay 12 gidido wodekka deexo oyshaa oychiis. (Luq. 2:46) Ne naata loytta era; yaatanawu eti qoppiyoobaa etawu siyettiyaabaanne eta qofissiyaabaa erana koshshees. Eti gubaaꞌiyaa shiiquwaa shiiqiyo gishshawunne haggaaziyo gishshawu ammanoosona gaada mule qoppoppa. Galla galla etaara ayyaanaabaa tobba. Ne naatuura issippe, qassi nerkka etawu woossa. Eta ammanuwaa paacciyaabaa akeekada eti hegaa xoonanaadan maadda. w16.09 5:3-5

Asa ubbaayyo, zare ubbaayyo, qommo ubbaayyo, dumma dumma biittaa qaala ubbaayyoonne yara ubbaayyo” mishiraachoy awaajjettanaagee odettido hiraagay polettana mala shaꞌan qoodettiya Yihoowa Markkati ha wodiyan minnidi oottoosona. (Ajj. 14:6) Neeni hara qaalaa tamaaraydda deꞌay? Neeni geella misoonaawe gidada woy hara biittan aassiyaageeti keehi koshshiyoosan haggaazaydda deꞌay, woy ne biittan kare biittaa qaalaa goꞌettiya gubaaꞌiyan shiiqiyoogaa doommadii? Nuuni Xoossaa ashkkarata gidiyo gishshawu, nuunikka nu soo asaykka ayyaanaaban minnidi deꞌanawu maaddiyaabaa kaseyana koshshees. Gidikkonne issi issitoo, nuuyyo oosoy dariyo gishshawu buzo xinaatiyaa minnidi xannaꞌiyoogee metiyaaba gidana danddayees. SHin hara biittaa qaalaa goꞌettiya gubaaꞌiyan haggaaziyaageeta harabaykka metees. Hara biittaa qaalaa goꞌettiya gubaaꞌiyan haggaaziyaageeti ooratta qaalaa tamaariyoogaa bolli, eti ubbatoo ayyaanaaban mino qumaa maana koshshees.—1 Qor. 2:10. w16.10 2:1-3

Wolqqaama yedetay ubbatoo gakkishinkka Yihoowa Markkati bantta hidootan ufayttoosona. Leemisuwawu, Erttiran, Singgapooreninne Tohossa Kooriyan nu ishanttinne michontti daroti qashettidosona; etappe daroti Yesuusi bisuwaa oyqqennaadan yootidobaara maayettiyaabaa oottiyo gishshawu qashettidosona. Yihoowa asaappe daroti qommoora denttido ishanttudan qashettibookkona woy naaqettibookkona. SHin hiyyeesatettay, olay woy meretay gayttiyo daafabay darota qohiis. Harati Abrahaama, Yisaaqa, Yaaqoobanne Muuse leemisuwaa kaalliyoogan Yihoowawu haggaazanawu hayttaanne duretettaa aggidosona. Eti miishshaa siiqanaadaaninne bantta xallaa siiqanaadan paacciyaabaa eqettoosona. Eti hegaadan oottanaadan maaddiyaabay aybee? Eti Yihoowa siiqiyoogaanne i naaqo ubbaa xayssidi baayyo ammanettiya ashkkaratussi xillotettay deꞌiyo ooratta alamiyan merinaa deꞌuwaa immanawu gelido qaalaa mintti ammaniyoogaa.—Maz. 37:5, 7, 9, 29. w16.10 3:15, 16

Ermmaasi yayyidonne hidootaa qanxxido wode, hananabaa yootiya ammanettidaagaa Yihooway minttettiis. (Erm. 1:6-10) Hananabaa yootiya cimida Daaneeli Xoossay a minttettanawu issi kiitanchaa kiittido wode ay keena minettidaakko qoppa. He kiitanchay Daaneela ‘Xoossay keehi siiqiyoogoo’ yaagiis. (Dane. 10:8, 11, 18, 19) Neeni daafurida aassiyaageeta, aqinyeta, qassi cimida ishanttanne michontta hegaadan minttettana danddayay? Xoossay banaara ba alꞌꞌo Naaꞌꞌay Yesuusi daro layttaa oottido gishshawu, i saꞌan deꞌiyo wode a galatananne minttettana koshshennabadan qoppibeenna. “Taani siiqiyo ta Na7ai, tana ufaissiyaagee hagaa” yaagidi ba Aaway saluwaappe haasayido cenggurssaa Yesuusi naaꞌꞌu wodetun siyiis. (Maa. 3:17; 17:5) Xoossay Yesuusa hegaadan giidi galatiisinne i oottido loꞌꞌobaa nashshiis. Yesuusi hayqqanaappe kase qammi metootido wode kiitanchay a minttettanaadankka Yihooway kiittiis.—Luq. 22:43. w16.11 1:7, 8

Nuna asi karidobadan woy naaqqidobadan qoppiyo wode, yiillotennan aggiyoogee metiyaaba. Nu zariyaa, nu meraa woy nuuni dummatiyo harabaa gaasuwan nuna asi naaqqikko, hegee keehi qohana danddayees. Qohidaagee nu mala Kiristtaane gidikko, keehi azzananaadan oottees! Geeshsha Maxaafay nuuni elle hanqqettennaadan zoriyoogaa oosuwan peeshshiyoogee keehi loꞌꞌo! (Lee. 16:32) Nuuni ubbay eesuwan hanqqettennaageetanne atto giyaageeta gidanawu baaxetana koshshiyoogee qoncce. Yihoowaykka Yesuusikka nuuni atto gaanaadan mintti yootoosona. (Maa. 6:14, 15) Neeni kaseegaappe aaruwan atto gaana woy ne huuphiyaa naagana koshshanddeeshsha? Bantta huuphiyaa naagenna asati darotoo yiillotoosona. Hegaappe denddidaagan, harati etakko shiiqanawu waayi koyana. Yiillotiya uri gubaaꞌiyan deꞌiya issoti issoti baagaadan yiillotanaadan oottana danddayees.—Wog. 19:17, 18. w16.11 3:4-6

Geeshsha Maxaafaa tumaa eranawu keehi koyida CHarles Tez Raasilinne amarida a laggeti 1870 heeran Geeshsha Maxaafaa loytti xannaꞌiyoogaa doommidosona. Ishaa Raasili waannatiya haymaanootetuppe awugee tumaa tamaarissiyaakko eranawu koyro halchiis. I haray atto Kiristtaane gidenna haymaanootetuugaa gujjin, dumma dumma haymaanootetu timirttiyaa Geeshsha Maxaafay yootiyoobaara akeekan geeddarssiis. He ubba haymaanooteekka Xoossaa Qaalay yootiyoobaa wurssi kaallennaagaa i sohuwaara akeekiis. Issi wode, Raasili inne a laggeti Geeshsha Maxaafaappe akeekido tumaa heeran deꞌiya daro qeeseti ekkoosonanne hegaa bantta gubaaꞌiyaa yameta tamaarissoosona gi qoppidi etaara gayttiis. He qeeseti koyibookkona. Geeshsha Maxaafaa Tamaareti worddo haymaanootiyaa yametuura issippe Xoossawu goynnana danddayennaagaa sohuwaara akeekidosona. w16.11 4:14

Nuuni Xoossaa aaro kehatettaa nashshikko shaaramuxiyoogaa, mattottiyoogaa woy Qoronttoosan deꞌida issoti issoti oottidoogaa mala gita nagara xallaappe gidennan harabaappekka haakkoos. (1 Qor. 6:9-11) Xoossaa aaro kehatettaa ekkikko, shaaramuxiyoogaa xallaappe gidennan, shori baynnaban allaxxiyoogaappekka haakkoos. Nu kumetta asatettaa xillotettawu aylle oottidi immiyoogee mattottiyoogaappe haakkiyoogaa xalla gidennan, mattottanawu qiisay attanaashin uyiyoogaappekka haakkanaadan oottees. Hegaa mala iitabaa eqettiyoogee nuna baaxeyana danddayees; gidikkokka he baaxiyaa xoonana danddayoos. Nuuni gita nagaraa xallaappe gidennan, asay xaasayi xeelliyo nagaraappekka haakkana bessees. Nuuni polo hanotan hegaadan oottana danddayennaagee qoncce. Gidikkokka, nuuni PHawuloosaagaadan baaxetana koshshees. I ba ishantta, “Intte intte asatettaa amuwau azazettana mala, nagarai haiqqiya intte asatettaa haaroppo” yaagidi minttettiis.—Roo. 6:12; 7:18-20. w16.12 1:16, 19-21

Yesuusi saluwan deꞌiya nu Aaway Bana oychiyaageetussi geeshsha ayyaanaa immanaagaa yootiis. (Luq. 11:10-13) Geeshsha Ayyaanaa ayfeti Xoossaa wolqqa gidida geeshsha ayyaanaa maaduwan bessiyo loꞌꞌo eeshshati ubbaa danddayiya Xoossaa eeshshata. (Qol. 3:10) He ayyaanaa ayfiyaa ayfiyoogee haratuura deꞌiya dabbotaa neeni kaseegaappe minttanaadan oottees. Yaatikko, neeni unꞌꞌettanaadan oottana danddayiya darobay merettenna. Neeni “wolqqaama Xoossaa kushiyaappe” garssaara nena toochanawu, qassi ‘nena hirggissiya ubbabaa a bolli olanawu’ ne huuphiyaa kawushshana bessees. (1 PHe. 5:6, 7) Ne huuphiyaa kawushshiyoogan, Xoossay nashshiyoogaanne maaddiyoogaa gidaasa. (Mik. 6:8) Hegee neeni ne huuphiyan ammanettiyoogaappe Xoossan ammanettanaadan maaddees. Xoossaa siiquwaanne a maaduwaa akeekiyo wode, qofissiyaaban darin unꞌꞌettennan aggana danddayaasa. w16.12 3:7, 12

“Xillotettaabaa yootida” Nohee Xoossay yoota giidobaa ammanettidi awaajjiis. Yaatidoogee Nohe ammanoy minnanaadan maaddidoogee qoncce. I sabbakiyoogaa bolli, ba wolqqaanne eraa goꞌettidi Xoossay keexxa giido markkabiyaa keexxiis. (Ibr. 11:7) Noheegaadan nuunikka ‘Godaa oosuwaara’ gayttida darobaa oottanawu baaxetoos. (1 Qor. 15:58) Goyno sohuwaa keexxiyoogeenne loyttiyoogee, gita shiiquwan nu dosan oottiyoogee, macara biiruwan woy xuufiyaa birshshiyo biiruwan oottiyoogee he oosuwaappe amaridaagaa. SHin ubbaappe aaruwan sabbakiyoogee nuuni sinttappe demmana giidi hidootiyoobaa mintti ammanaadan oottiyoogaa eridi, hegaa aggennan oottoos. Mishiraachuwaa yootiyoogee deꞌuwawu woxxiyo wottan genccanaadan maaddees.—1 Qor. 9:24. w17.01 1:8, 9

Nuuni laꞌa gidennabaappe issoy, harati bantta deꞌuwan kuuyanawu etawu deꞌiya maataa bonchana koshshiyoogaa. Aybissi? Nuuyyo ubbawu koyidobaa dooriyo imotay deꞌiyo gishshawu, naaꞌꞌu Kiristtaaneti kuuyiyoobay ubbatoo issi mala gidenna. Kandduwaaranne goynuwaara gayttidabankka hegee tuma. Ubba Kiristtaaneti bantta kuuyiyooban oyshettiyoogaa nuuni akeekiyo wode, guuttabankka kuuyanawu nu ishanttussi deꞌiya bantta koyidobaa dooriyo imotaa goꞌettiyo laꞌatettaa maataa nuuni bonchana bessees. (1 Qor. 10:32, 33) Yihooway nuussi koyidobaa dooriyo imotaa imiis; hegee tumu laꞌatettaa demissees. (2 Qor. 3:17) Nuuni kuuyiyooban Yihoowa ay keena siiqiyaakko bessanaadan oottiyo gishshawu, ha imotaa nashshoos. Ha alꞌꞌo imotaa Yihoowa bonchissiya ogiyan goꞌettiyoogaaninne harati bantta imotaa goꞌettiyo ogiyaa bonchiyoogan, ane ubbatoo ha imotaa nashshiyaageeta gidoos. w17.01 2:15, 17, 18

Nuuni ayyiyoogan woy asay bessenna ogiyan nuna xeellanaadan oottiyoogan gidennan, ‘ashkkenne woppu giida ayyaanaa’ bessiyoogan asaa wozanaa omooddanaagaa eroos. (1 PHe. 3:3, 4; Erm. 9:23, 24) Nu wozanan deꞌiya hada amoy nuuni oottiyooban wurssettan qonccees. Leemisuwawu, dumma maatay nuuyyo deꞌiyoogaa, nuuni xuurabaa eriyoogaa woy maatay deꞌiyo ishanttuura nuuyyo dumma dabbotay deꞌiyoogaa bessiyaabaa yootana danddayoos. Woy qassi haratikka oottidoban woy yootido qofan nu xallay xeesettanaadan oottiya hanotan issi issibaa qonccissana danddayoos. Yesuusi keehi loꞌꞌo leemiso. I yootido darobay Ibraawetto Geeshsha Maxaafan deꞌiya qofa woy hegaara gayttidaba. Siyiyaageeti i yootiyoobay a eraa woy aadhida eratettaa bessiyaaba gidennan, Yihoowappe yiidaba gidiyoogaa eranaadan i ashkketettan hegaadan haasayiis. w17.01 4:12

He higgee Addaameenne Hewaana akeekanawukka azazettanawukka metiyaaba gidenna. Qassi eti maana danddayiyo keehi darobay deꞌees. Seexaanaa Dabloosi shooshshan eqqidi Hewaana ba Aawaa Yihoowawu azazettennaadan cimmiis. (Doo. 3:1-5; Ajj. 12:9) Seexaanay saꞌan deꞌiya Xoossaa naati ‘Gannatiyan deꞌiya mitta teeraappe’ meennaadan digettidoogaa xeelliyaagan oyshaa denttiis. I giidobay, “Intte koyiyoobaa oottana danddayekketii?” giyoogaa mala. Kaallidi i, “Intte ainnekka haiqqekketa” yaagidi worddotiis. Yaatidi, Hewaana Xoossay yootiyoobaa siyennaadan ammanttanawu, ‘He mittaa teeraa intte miikko, intte ayfee dooyettanaagaa Xoossay erees’ yaagiis. Seexaanay eti he mittaa teeraappe miikko dummabaa eranaagaa Yihooway eriyo gishshawu meennaadan diggidoogaa yootiis. Qassi Seexaanay, ‘Loꞌꞌuwaanne iitaa Xoossaadan intte erana’ giidi wordduwaa yootiis. w17.02 1:8, 9

He uri “kaalettiyaagaanne halaqa” gidanaagaa Isiyaasi kasetidi yootiis. (Isi. 55:4) Qassi ‘Halaqaa Masiyaabaa’ Daaneeli ayyaanaa kaaletuwan xaafiis. (Dane. 9:25) Wurssettan, Yesuus Kiristtoosi i Xoossaa asawu ‘Goda’ woy kaalettiyaagaa gidiyoogaa yootiis. (Maa. 23:10) Yesuusi erissiyo ashkkarati bantta dosan a kaallidosona, qassi Yihooway dooridoy a gidiyoogaa markkattidosona. (Yoh. 6:68, 69) Eta ammanttidabay aybee? Yesuusi xammaqettiyo wode xammaqiya Yohaannisi “saloi dooyettishiininne Geeshsha Ayyaanai [a] bolli haraphphedan wodhdhishin” beꞌiis. (Mar. 1:10-12) Yesuusi saꞌan haggaazido wode ubban, maalaalissiyaabaa oottanaadaaninne Xoossaappe demmido maatan haasayanaadan Xoossaa ayyaanay Yesuusayyo wolqqaa immiis. (Oos. 10:38) Qassi, geeshsha ayyaanay siiquwaa, ufayssaanne mino ammanuwaa gujjin, kumetta ayfiyaa Yesuusan ayfiis. (Yoh. 15:9; Ibr. 12:2) Hegaa mala ammanttiyaabaa oottida kaalettiya uri baawa. Yesuusi Yihooway dooridoogaa. w17.02 3:15, 16

Kiitettidaageeti 33 M.Ln, PHenxxaqosxxe gallassi Kiristtaane gubaaꞌiyaa kaalettiyoogaa doommidosona. He gallassi, “PHeexiroosi, Yesuusi kiittido hara tammanne isiinetuura denddi eqqidi,” Ayhudatussinne Ayhuda ammanuwawu laamettida darotussi shemppo ashshiya tumaa yootiis. (Oos. 2:14, 15) He asatuppe daroti ammanidosona. Hegaappe guyyiyan, ha ooratta Kiristtaaneti “Yesuusi kiittidoogeetu timirttiyan” genccidosona. (Oos. 2:42) Kiitettidaageeti gubaaꞌiyaa miishshaa maara oyqqidosona. (Oos. 4:34, 35) Eti ayyaanaaban Xoossaa asawu koshshiyaabaa giigissidosona. Eti, “Nuuni Xoossaa woosaaninne qaalaa yootuwan minnana” yaagidosona. (Oos. 6:4) Qassi eti kayma Kiristtaaneti ooratta moottan mishiraachuwaa yootanaadan maddabidosona. (Oos. 8:14, 15) Guyyeppe, ayyaanan tiyettida hara cimati kiitettidaageetuura hashetidi gubaaꞌiyaa oosuwaa oottidosona. Eti bolla gididi heemmiyoogan, gubaaꞌeta ubbaa kaalettidosona.—Oos. 15:2. w17.02 4:4

Seexaanay haariyo ha alamiyaa ayyaanay nagarancha gidida daro asaa qofaa mooriiddi deꞌees. Asay issi issi asaa bessiyaagaadan bonchiyoogaappe aattidi etawu goynniyoogaa keenaa eta xoqqu oottidi xeelliyoy hegaassa. Eti haymaanootiyaa kaalettiya, deriyaa haariya, ispporttiyan, pilmiyaaninne haraban erettida asaa likkiyaappe aattidi sabboosona. Hegaa gishshawu, yelagatikka gasttatikka etaagaadan maayanawu, etaagaa mala eeshshaa bessanawunne harabankka he asata milatanawu koyoosona. Tumu Kiristtaaneti asaa hegaadan bessenna ogiyan bonchokkona. Saꞌan deꞌida ay asaappekka nuuyyo kumetta hanotan leemiso gidana danddayiyay Kiristtoosa xalla. (1 PHe. 2:21) Nuuni bessiyaagaappe aattidi asaa bonchikko, Xoossay hegan ufayttenna. Nuuni, “Asai ubbai nagaraa oottiis; ashshiya Xoossaappe haakkidosona” giidi Geeshsha Maxaafay yootiyoobaa ubbatoo hassayana koshshees. (Roo. 3:23) Ay asanne goynnana bessennaagee qoncce. w17.03 1:6-8

Nuuni ubbay nu kumetta wozanaappe Xoossawu ammanettiyaakkonne nu wozanaa qorana danddayoos. ‘Taani Yihoowa ufayssanawu, tumu goynuwawu exatanawunne Yihoowa asaa qohiyaabaappe naaganawu murttidanaa?’ gaada nena oycha. Leemisuwawu, ne mata dabboy bohettikko shin? Neeni he uraara gayttennan agganawu murttanee? Ne wozanay neeni ay oottanaadan denttettanee? Asaagaadan, issi issitoo asay ubbay nuna eqettiyaabadan qoppana danddayoos. Nenaara tamaariyaageetinne asttamaareti neeni Yihoowa Markka gidiyo gishshawu ne bolli qilliiccana danddayoosona. Woy qassi neeni ayyaanaabaa oosuwaa oottanawu gaada oosuwaappe shemppiyo gishshawu woy daro miishshaa demmanawu gaada gujo saatiyaa oottenna gishshawu nenaara oottiyaageeti nena qilliiccana danddayoosona. Hegaa mala hanotan, Asaagaadan Xoossaa woossa. (2 Odi. 14:11) Suure gididaba oottiyoogan xala gida. Xoossay Asa minttettidoogaadaaninne maaddidoogaadan nenakka minttanaagaa hassaya. w17.03 3:6-8

Nuuni gitabaa kuuyanawu eesotana bessennaagaa Xoossaa Qaalay zorees. Nuuni eratettan kuuyanawu, he yohuwaara gayttidabaa wodiyaa bazzidi loytti qoppana bessees. (1 Tas. 5:21) So asawu huuphe gidida uri issibaa kuuyanaappe kase Geeshsha Maxaafaanne nu xuufeta pilgganawu wodiyaa bazzana, qassi he yohuwaara gayttidaagan ba soo asaa yaratu qofay aybakko akeekana koshshees. Abrahaami ba keettayiyaa giyoobaa siyanaadan Xoossay a zoridoogaa hassaya. (Doo. 21:9-12) Cimatikka pilgganawu wodiyaa bazzana koshshees. Qassi eti ashkkenne bantta huuphiyaa kawushshiyaageeta gidikko, keehi koshshiya oorattabaa erido gishshawu eti kuuyidobaa zaarettidi qoppanaadan oottiyaabay merettiyo wode, asay eta kaseegaadan bonchennan aggana giidi yayyokkona. Koshshiyaaba gidikko eti bantta qofaanne kuuyidobaa laammanawu eeno gaana bessees; qassi nuuni ubbay eta leemisuwaa kaallana bessees. Yaatiyoogee gubaaꞌiyan sarotettaynne maaray deꞌanaadan oottees.—Oos. 6:1-4. w17.03 2:16