Uddufune

Yohaannisi saluwan deꞌiya citaa beꞌi simmidi “zawai bainna daro asaa” beꞌiis. SHin Geeshsha Maxaafay ha citan aappun asay deꞌiyaakko yootenna. Yaatin etabaa nuuni ay eriyoo? Yohaannisi hagaadan giis: “Hageeti daro waayiyaa waayidi yiidaageeta. Eti bantta maayuwaa Dorssaa suuttan meeccidi booxissidaageeta.” (Ajj. 7:14) ‘Zawi baynna daro asay’ gita waayiyaappe atti simmidi, saꞌan deꞌananne maalaalissiya anjjota demmana. (Maz. 37:9-11, 27-29; Lee. 2:21, 22; Ajj. 7:16, 17) Nuuni saluwaa baanawu doorettidaageeta woy hagan saꞌan deꞌanaageeta gidin, Ajjuutaa shemppo 7n odettidabay polettiyoogaa nuuni beꞌanaagaa ammaniyoo? Nuuni ammanana koshshees. Xoossawu haggaaziya naaꞌꞌu citatussikka hegee keehi ufayssiya wode gidana! Nuuni Yihoowa haaruwawu exatanawu doorikko, keehi ufayttana. w22.05 16 ¶6-7

Neeni kase issi gitabaa kuuya eray? Yaatikko neessi aadhdhida eratettay koshshiyoogaa neeni eriyo gishshawu hegaa demmanawu woossidoogee qoncce. (Yaaq. 1:5) Kawuwaa Solomoni hagaadan giis: ‘Aadhdhida eratettay ubbaappe aadhdhees.’ (Lee. 4:7) Solomoni haasayidoy coo aadhdhida eratettaabaa gidenna. I Xoossaa Yihoowappe yiya aadhdhida eratettaa yootiis. SHin, Xoossaappe yiya aadhdhida eratettay ha wodiyan nuna gakkiya metota nuuni genccanaadan maaddana danddayii? Ee, nuna maaddana danddayees. Keehi aadhdhida eranchcha gidida naaꞌꞌu asati tamaarissidobaa xannaꞌiyoogeenne oosuwan peeshshiyoogee nuuni tumuppe aadhdhida eranchcha gidana danddayiyo issi oge. Koyro, Solomonabaa beꞌa. Geeshsha Maxaafay ‘Xoossay Solomonayyo aadhdhida eratettaanne zawi baynna akeekaa immidoogaa’ yootees. (1 Kaw. 4:29) Naaꞌꞌantto, saꞌan deꞌida asa ubbaappe aadhdhida eratettan laggetiyaabi baynna Yesuusabaa beꞌa. (Maa. 12:42) Yesuusabay hiraagan hagaadan odettiis: “GODAA Ayyaanai, aadhdhida eratettaanne akeekaa Ayyaanai . . . a bolli shemppana.”—Isi. 11:2. w22.05 20 ¶1-2

Nuuni cimidaageeta gidikkonne, ayyaanaabaa halchchuwaa halchchidi hegaa polana danddayoos. Layttay 75 gidido Beverlo giyo michchee hanotaa qoppa. Hemettennaadan oottiya caddi oyqqiya harggee O sakkees. SHin, A Godaa Kahuwaa zamachan loytta oottanawu koyaasu. Hegaa gishshawu, A qoncce halchchota halchchaasu. Beverla zamachchan oottanawu halchchidobaa polido gishshawu keehi ufayttaasu. A oottidobay haratikka minni haggaazanaadan maaddiis. Cimida ishanttinne michchontti koyiyoogaa keenaa oottennaadan eta hanotay diggikkonne, eti oottiyoobaa Yihooway nashshees. (Maz. 71:17) Neeni polana danddayiyo halchchota halchcha. Yihoowa ufayssiya eeshshati neessi deꞌanaadan baaxeta. Xoossawunne A dirijjitiyawu loytta oottanawu maaddiya hiillata tamaara. Ne ishanttanne michchontta loytta maaddiyo ogeta koya. Ximootiyoosaagaadan, Yihooway maaddin “ne dichchai asa ubbau qonccana.”—1 Xim. 4:15. w22.04 27 ¶18-19

Intte baaxetishinkka, intte naatuppe issoy Yihoowawu haggaazanawu koyennaagaa yootikko shin? Coo daafurida giidi qoppoppite. Intte naꞌa gujjin, nu ubbawu Xoossawu haggaazanawu woy haggaazennan agganawu dooriyo maataa Yihooway immiis. Issi galla I simmana giidi hidootan naagite. Bayida naꞌaabaa yootiya leemisuwaa qoppite. (Luq. 15:11-19, 22-24) He yelagay daro iitabaa oottiis, shin wurssettan simmiis. Yelidaageetoo, Yihoowawu goynniya ooratta yeletaa dichchiyo gita maataa Yihooway intteyyo immiis. (Maz. 78:4-6) Hegee deexxiyaaba gidikkokka, intte naati Yihoowa siiqanaadan maaddanawunne eti awu azazettanaadan tamaarissanawu intte minnidi oottiyo gishshawu nuuni inttena wozanappe nashshoos! Saluwan deꞌiya nu siiqo Aaway ufayttanaagaa ammanettana danddayeeta.—Efi. 6:4. w22.05 30-31 ¶16-18

Gubaaꞌiyan sarotettaynne issippetettay deꞌana mala, nuuni ubbay nuuyyo danddayettida keenaa oottana koshshees. Koyro xeetu layttan deꞌida Kiristtaanetubaa qoppa. Etassi dumma dumma imotaynne aawatettay deꞌees. (1 Qor. 12:4, 7-11) SHin hegee eti keesettanaadaaninne shaahettanaadan oottibeenna. PHawuloosi nuuni ‘Kiristtoosa bollaa keexxanawu’ koshshiyaabaa oottanaadan nuna ubbaa zoriis. PHawuloosi Efisoonan deꞌiya Kiristtaanetuyyo hagaadan giis: “He dumma dumma shaahoti oottanau bessiyaagaa oottiyo wode, kumetta bollai siiquwan dicceesinne bana keexxees.” (Efi. 4:1-3, 11, 12) PHawuloosi yootidobaa oosuwan peeshshiyaageeti sarotettaynne issippetettay deꞌanaadan oottidosona; ha wodiyan gubaaꞌetun he eeshshata akeekoos. Nena haratuura geeddarssiyoogaappe naagettanawu murtta. Yesuusappe tamaara, qassi A eeshshata kaallanawu baaxeta. Yihooway ‘neeni oottido oosuwaa doganawu worddanchcha gidennaagaa’ ammanetta. (Ibr. 6:10) Neeni A ufayssanawu wozanappe baaxetiyo baaxiyaa I nashshees. w22.04 14 ¶15-16

Nagaraa oottida urawu Yihooway atto gaana bessiya bessennaakko nuuni kuuyana koshshennaagaa eriyoogee keehi ufayssiyaaba! Gidikkonne, nuuni kuuyana koshshiyaabay deꞌees. Hegee aybee? Issi issitoo, issi uri nuna qohikkonne, nuuni awu atto gaanaadan oychchana danddayees. Haroode, nuuni awu atto gaanaadan I oychchennan aggana danddayees. Gidikkonne, nuuni ayyo atto gaananne A bolli hanqqettennan aggana danddayoos. Ubba qassi, nuuni keehi qohettikko, yaatiyoogee wode ekkiyaabanne baaxeyiyaaba gidana danddayiyoogee qoncce. Masqqala 15, 1994, Wochchiyo Keelay (Amaarattuwaa) hagaadan gees: “Neeni nagaraa oottida urawu atto giyoogee he nagaraa maayettadasa giyoogaa gidenna. Atto giya Kiristtaanee Yihooway he allaalliyaa wottiyoobi baynna ogiyan pirddanaagaa ammanettees. I salo gufanttuwan xillo Daanna gidiyo gishshawu, suure pirddaa koshshiya wodiyan pirddana.” w22.06 9 ¶6-7

Yihooway ha wodiyan zare ubbaappe, qommo ubbaappenne qaala ubbaappe asaa ehaanaagaanne eti tumu goynuwaa awu issippetettan goynnanaadan oottanaagaa I Ajjuutaa maxaafan kasetidi yootiis. Ha wodiyan, he dumma citay “zawai bainna daro asaa” geetettees. (Ajj. 7:9, 10) He citan, wogan dumma dumma gidida attumaageeti, maccaageetinne naati deꞌiyaaba gidikkonne, eti sarotettan deꞌiya issi keetta asa. (Maz. 133:1; Yoh. 10:16) Eti hidootan naagiyo ooratta alamiyaabaa siyanawu koyiya ooyyoonne yootanawu ubbatoo giigetti uttidosona. (Maa. 28:19, 20; Ajj. 14:6, 7; 22:17) Neeni zawi baynna asaa bagga gidikko, hidootan naagiyo loꞌꞌobaa neeni xoqqu ootta xeelliyoogee qoncce. Dabloosi neeni sinttanaabaa hidootan naaganaadan koyenna. Neeni Yihooway ba gelido qaalaa naagenna gaada qoppanaadan oottanawu Seexaanay koyees. I nuuni hidootaa xayanaadan oottikko, nuuni xala gidiyoogaanne Yihoowawu haggaaziyoogaa aggana danddayoos. w22.06 20-21 ¶2-3

Nuuni sinttappe saꞌay kehanaagaa ammaniyo gishshawu, nu hidootay metoy gakkiyo wode nuuni woppu gaanaadan maaddees. Nuna yedetay gakkanaagaa Yesuusi yootidoogaa hassaya. (Yoh. 15:20) Yaatiyo gishshawu, Yihooway nuussi immanawu qaalaa gelidobaa wotti dentti qoppiyoogee nuuni aggennan awu haggaazanaadan maaddees. Yesuusi keehi barchchetidi hayqqanaagaa erikkonne, I ammanettidi deꞌanaadan hidootay waati maaddidaakko qoppa. Kiitettida PHeexiroosi PHenxxaqosxxe gallassi 33 M.Ln, Yesuusi waani woppu giidaakkonne ammanettidaakko qonccissiya, Mazamure maxaafan deꞌiya hiraagaa hagaadan giidi yootiis: “Ta bollaikka lo77o de7ana giidi, ufaissan naagees. Aissi giikko, ta shemppuwaa Si7ooliyan aggakka. Qassi ne Geeshsha Na7aa ahaakka musissakka. . . . Neeni tanaara de7iyoogan taani daro ufaittais.” (Oos. 2:25-28; Maz. 16:8-11) Yesuusi Xoossay A denttanaagaanne saluwan deꞌiya ba Aawaara zaaretti gayttiyoogan ufayttanaagaa hidootiis.—Ibr. 12:2, 3. w22.10 25 ¶4-5

Issi wode Yaaqoobinne Yohaannisi Kawotettan gita sohuwaa Yesuusi etawu immanaadan bantta aayee baggaara oychchidosona. (Maa. 20:20, 21) Yaaqoobinne Yohaannisi oottidobay eti otorettiyoogaanne haratuppe aadhdhanawu koyidoogaa bessees. (Lee. 16:18) He wode iita eeshshaa bessiday Yaaqoobanne Yohaannisa xalla gidokkona. Kiitettida harati waanidaakko akeeka: “Hankko tammu erissiyo ashkkarati hegaa siyido wode, he naa77u ishantta hanqqettidosona.” (Maa. 20:24) Yaaqoobinne Yohaannisi, qassi kiitettida harati iita palamaa palamettidoogaa qoppana danddayoos. He wode Yesuusi waanibeennee? Hanqqettibeenna. I banttana ziqqi oottiyaanne ubbatoo mintti siiqettiya kiitettida harata koyana gibeenna. Eti likke gididabaa oottanawu koyiyoogaa Yesuusi eriyo gishshawu, danddayan eta haasayissiis. (Maa. 20:25-28) Yesuusi eta ubbatoo kehatettan oyqqiis. w23.03 28-29 ¶10-13

Neeni darobata oottadasa. Neeni daro layttawu Geeshsha Maxaafaa mintta xannaꞌennan aggakka. Neeni yaatidoogee Geeshsha Maxaafay Xoossaa Qaalaa gidiyoogaa ammananaadan oottiis. SHin ubbaappe aaruwan, Geeshsha Maxaafaa xaafissidaagaa neeni eradasanne A siiqadasa. Neeni Yihoowa siiqido siiqoy keehi minnidi nena awu sheedhdhada xammaqettanaadan oottiis. Neeni keehi ufayssiyaaba kuuyadasa. Neeni xammaqettanaappe kase Yihoowan ammanettiyoogee metanaadan oottiya paacee nena gakkiis. SHin neeni ayyaanaaban dicciyo wode hara paaceti nena gakkana. Seexaanay neeni Yihoowa siiqiyoogaanne awu haggaaziyoogaa agganaadan oottanawu malees. (Efi. 4:14) Hegee ne bolli gakkanaadan neeni paqqadana koshshenna. Neeni Yihoowawu ammanettada deꞌanaadaaninne awu haggaazanawu gelido qaalaa naagada deꞌanaadan aybi maaddana danddayii? Kayma Kiristtaane gidanawu neeni ubbatoo baaxetana koshshees.—Ibr. 6:1. w22.08 2 ¶1-2

So asa yara ubbay bantta soo asaa xeelliyaagan xuura gididabaa naagana koshshees. Leemisuwawu, issi Kiristtaane maccaaseessi I keettaaway eriyo loꞌꞌo gidenna meezee iyyo deꞌana danddayees. I hegaabaa haratuyyo yootiyoogan A yeellatanaadan oottii? I hegaadan mule oottennaagee qoncce! I ba machchiyo siiqiyo gishshawu, O azzanttiya aybanne oottanawu koyenna. (Efi. 5:33) Naati harati banttana bonchchanaadan koyoosona. Yelidaageeti hegaa hassayiyoogee keehi koshshiyaaba. Yelidaageeti bantta naatu balaa haratussi yootiyoogan eti yeellatanaadan oottana koshshenna. (Qol. 3:21) Naati ammanettiyaageeta gidananne so asaa yarata yeellayana danddayiyaabaa haratussi yootana koshshennaagaa erana bessees. So asaa yara gidida ubbay bantta soo asaa xuuraa naagikko, eta dabbotay minnees. w22.09 10 ¶9

Yihooway Iyyooba haasayissiis; he wode Yihooway zawi baynna Ba aadhdhida eratettaanne Ba meretatussi koshshiyaabaa kunttiyoogaa Iyyoobi hassayanaadan oottiis. I maalaalissiya daro doꞌatubaa Iyyoobawu yootiis. (Iyy. 38:1, 2; 39:9, 13, 19, 27; 40:15; 41:1, 2) Eelihu giyo ammanettida yelagaa baggaara Yihooway Iyyooba minttettiisinne maaddiis. Yihooway ba ashkkarati gencciyo gishshawu ubbatoo eta woytanaagaa Eelihu Iyyoobawu yootiis. SHin Eelihu Iyyooba siiquwan zoranaadankka Yihooway A denttettiis. Saluwaanne saꞌaa Medhdhida Yihoowaara nuna geeddarssiyo wode nuuni keehi guutta gidiyoogaa Iyyooba hassayissiyoogan I babaa xallaa qoppiyoogaa agganaadan Eelihu A maaddiis. Yihooway Iyyoobi issibaa oottanaadankka yootiis. I bana naaqqida ba heezzu laggetussi woossanaadan yootiis. (Iyy. 42:8-10) Wolqqaama metoy nuna gakkiyo wode Yihooway ha wodiyan nuna waati maaddii? Iyyoobaagaadan, Yihooway nuna sittan haasayissana xayikkonne, Ba Qaalaa, Geeshsha Maxaafaa baggaara I nuna haasayissees.—Roo. 15:4. w22.08 11 ¶10-11

Roome gubaaꞌiyan Ayhudatinne Ayhuda gidenna Kiristtaaneti deꞌoosona. Muuse Higgee shaaretti simmin, Yihoowawu goynniyaageeti issi issi qumaa meennan aggiyoogaara gayttida higgiyaa kaallana koshshenna. (Mar. 7:19) He wodeppe simmin, amarida Ayhuda Kiristtaaneti ubba qommo qumaa maana koshshiyaabadan etawu siyettees. SHin, hara Ayhuda Kiristtaanetussi yaatana koshshiyaabadan siyettenna. Hegaa gaasuwan gubaaꞌee shaahettiis. Ubbatoo sarotettaa naagiyoogee keehi koshshiyoogaa kiitettida PHawuloosi qonccissiis. Hegaa gishshawu, PHawuloosi ooshshay issi ura gidin, kumetta gubaaꞌiyaakka ay keena qohiyaakko ba mala Kiristtaaneti akeekanaadan maaddiis. (Roo. 14:19, 20) I harata xubbiyoogaappe naagettanawu ba eeshshaa laammanawukka eeno giis. (1 Qor. 9:19-22) Hegaadankka, nuuni harati dooriyo issi allaalliyaabaa palamettennan aggiyoogan, harata minttettananne sarotettay deꞌanaadan oottana danddayoos. w22.08 22 ¶7

Nuuni Yihoowawu haggaazanawu halchchuwaa kessidi baaxetiiddi deꞌikko, hegaa polanawu ubbatoo minnidi oottana koshshees. Xillotettaa kaalliyoogeekka hegaara issi mala. Qassi, nuuni ubbatoo diccanaadan Yihooway danddayan maaddana. (Maz. 84:5, 7) Xillotettaa kaalliyoogee deexo gidennaagaa Yihooway nuna siiquwan hassayissees. (1 Yoh. 5:3) Hegee nuna naagees, qassi nuussi naagoy koshshees. Kiitettida PHawuloosi yootido olaa miishsha ubbaa hassaya. (Efi. 6:14-18) Issi Kiristtaaniyaa wozanaa naagiya olaa miishshay awugee? Hegee Yihooway kessido xillotettaa maaraa qonccissiya, ‘tiran wottiyo olaa miishshan leemisettida xillotettaa.’ Tiran wottiyo ola miishshay ne wozanaa naagiyoogaadan, Yihooway kessido xillotettaa maaray ne leemiso wozanaa, hegeekka ne koshshaa, neessi siyettiyaabaanne ne qofaa naagana danddayees. Ne olaa miishshaa giddon, tiran wottiyo olaa miishshay deꞌiyaakkonne ubbatoo akeeka.—Lee. 4:23. w22.08 29 ¶13-14

Daro shaꞌu layttawu Xoossaa Qaalay ammanettida asawu loꞌꞌo zoriyaa zoriiddi takkiis. Waatidi? Yihooway Geeshsha Maxaafaa asay duuqqidi xaafanaadan oottiis. He asati nagaranchcha gidikkokka, akeekan xaafidosona. Leemisuwawu, Ibraawetto Geeshsha Maxaafaa xeelliyaagan issi eranchchay hagaadan giis: “Beni xaafettida maxaafatuppe qofay laamettennan duuqetti xaafettida hara ay maxaafaykka baynnaagaa nuuni ammanoos.” Yaatiyo gishshawu, Geeshsha Maxaafaappe nabbabiyoobay, A xaafissida Yihoowa qofaa gidiyoogaa ammanettana danddayoos. Yihooway ‘loꞌꞌo imo ubbaanne kumetta woyto ubbaa’ nuussi immees. (Yaaq. 1:17) Geeshsha Maxaafay Yihooway nuussi immido alꞌꞌo imotatuppe issuwaa. Issi uri nuussi imotaa immiyoogee I nunanne nuussi koshshiyaabaa loytti eriyoogaa bessees. Geeshsha Maxaafaara gayttidaagankka hanotay hegaa mala. Nuuni he imotaa pilggiyo wode Yihoowaabaa darobaa tamaaroos. I nunanne nuussi koshshiyaabaa loytti erees. w23.02 2-3 ¶3-4

Asay Kiristtoosa SHaꞌu Layttaa Haaruwaa wode ha saꞌan hayquwaappe denddanaagee ayba ufayssiyaaba gidanee! Siiqiyo uri hayqqidoogeeti etaara zaarettidi gayttanawu yeemuwan naagoosona. Yihoowaykka yeemuwan naagees. (Iyy. 14:15) Saꞌan deꞌiya ubbay eti siiqiyo hayqqidaageeti denddiyo wode ay keena ufayttanaakko qoppa. Eta sunttay deꞌo maxaafan xaafettido ‘xilloti’ “de7anau denddana.” (Oos. 24:15; Yoh. 5:29) Nuuni siiqiyo hayqqidaageetuppe daroti Armmageedoonappe simmin sohuwaara denddennan waayi aggana. Hegaa bollikka, hayqqanaappe kase Yihoowaabaa tamaaribeenna woy awu haggaazibeenna ‘worddota’ geetettidaageeti “pirddettanau denddana.” Hayquwaappe denddiya ubbay tamaarana koshshees. (Isi. 26:9; 61:11) Yaatiyo gishshawu, hanno gakkanawu oosettibeenna awudeegaappenne aadhdhiya tamaarissiyo oosoy oosettana.—Isi. 11:10. w22.09 20 ¶1-2

Yihooway issippetettan shiiqida kawotettatu ubbaappe xoqqiyaagaa gidiyoogaa bessiis. I Israaꞌeelatussi olettidi Hidootaa Biittaappe daro sohota oyqqanaadan eta maaddiis. (Yaas. 11:4-6, 20; 12:1, 7, 24) Yihooway Ubbaappe Xoqqiya Xoossaa gidiyoogaa darotoo bessiis! Baabiloone Kawoy Naabukadanaxoori sabay bessiyoy Yihoowa gidiyoogaa yootiyoogaa aggidi, ba gita wolqqaaninne ba gitatettaa bonchchuwan ceeqettido wode, Xoossay I gooyanaadan oottiis. Naabukadanaxoori paxi simmidi “Ubbaappe Xoqqiya Xoossaa” sabbiis, qassi “[Yihoowa] maatai merinaa maataa” gidiyoogaa ammaniis. I gujjidi hagaadan giis: “A kushiyaa teqqanau danddayiyaabi baawa.” (Dane. 4:30, 33-35) Mazamuraawee hagaadan giis: “Xoossai GODAA gidido kawotettai, i baassa oottidi doorido asai anjjettidaagaa.” (Maz. 33:12) Nuuni Yihoowawu ammanettidi deꞌanawu hagee keehi loꞌꞌo gaaso! w22.10 15-16 ¶13-15

Daro Geeshsha Maxaafaa hiraagati polettidoogee Xoossay sinttappe oottanawu qaalaa gelidobata nuuni mintti ammanettanaadan oottees. Yihoowa hagaadan giidi woossida mazamuraawiyaagaadan nuunikka gaana danddayoos: “Neeni tana ashshana mala, taani naagaidda daafurais; taani ne qaalan ufaissaa oottais.” (Maz. 119:81) Geeshsha Maxaafay Yihooway nuussi ‘loꞌꞌo deꞌuwaanne ufayssaa’ immanaagaa yootees. (Erm. 29:11) Nu sinttanaa hidootay polettiyoy asa wolqqaana gidennan, Yihooway gelido qaalaa maaraana. Geeshsha Maxaafaa hiraagaa loytti xannaꞌiyoogan, ubbatoo Xoossaa Qaalaa mintti ammaniyaageeta gidoos. Nuuni Geeshsha Maxaafay yootiyooban ammanettana danddayiyo gaasoy, asay A zoriya oosuwan peeshshiyo wode goꞌettiyoogaa. (Maz. 119:66, 138) Leemisuwawu, issi wode shaahettanawu matida aqo laggeti Geeshsha Maxaafaa zoriya oosuwan peeshshido gishshawu haꞌꞌi issuwaa gididosona. Eta naati eta siiqiyaanne etawu qoppiya Kiristtaane aawaynne aayyiyaa dichchidoogan ufayttoosona.—Efi. 5:22-29. w23.01 5 ¶12-13

Geeshsha Maxaafan Xoossay qaalaa gelidobati polettidoogan neeni ay keena goꞌettidaakko qoppa. Leemisuwawu, Yesuusi ba Aaway neessi deꞌuwawu koshshiyaabaa kunttanaagaa yootiis. (Maa. 6:32, 33) Qassi I, neeni geeshsha ayyaanaa demmanawu woossikko Yihooway neessi immanaagaakka yootiis. (Luq. 11:13) Yihooway ba gelido qaalaa ubbatoo naagees. I neeyyo gelido qaalaa polido hara hanotata qoppana danddayaasa. Leemisuwawu, I neeyyo atto gaanawu, nena minttettanawunne ayyaanaaban neessi koshshiyaabaa kunttanawu qaalaa geliis. (Maa. 6:14; 24:45; 2 Qor. 1:3) Xoossay neeyyo oottidobaa wotta dentta qoppiyo wode, I neessi sinttappe oottanaban ne hidootay minnana. Yihooway ba gelido qaalaa polanaagaa ammanettoos. Mazamuraawee hagaadan giis: “GODAA ba Xoossaa baayyo ufaissa oottiya urai anjjettidaagaa. Xoossai . . . merinaukka ammanettiyaagaa.”—Maz. 146:5, 6. w22.10 27 ¶15; 28 ¶17

Geeshsha goynoy zaarettidi eqqidoogaabaa yootiya hiraagay nu wodiyan polettidee? Ee! Ayba ogiyan? Worddo haymaanoote ubbaa xaaxa waaxiya Gita Baabilooni omooduwaappe daro miiloone asati 1919 M.Lppe, doommidi laꞌa kiyidosona. Israaꞌeelati gelido Hidootaa Biittaappe keehi aadhdhiya sohuwaa eti gelidosona. Eti ayyaana gannatiyaa gelidosona. (Isi. 51:3; 66:8) Tiyettidaageeti 1919 M.Lppe doommidi ayyaanaa gannatiyan deꞌoosona. Qassi, saꞌan deꞌanawu hidootiya ‘hara dorssati’ ha ayyaanaa gannatiyaa gelidi Yihoowa anjjuwaa demmidosona. (Yoh. 10:16; Isi. 25:6; 65:13) Ayyaanaa gannatee kumetta saꞌan deꞌees. Hegaa gishshawu, nuuni ha wodiyan saꞌan awa heeran deꞌikkokka, tumu goynuwaa minnidi kaafiyo wode ubban, ayyaanaa gannatiyan deꞌoos. w22.11 11-12 ¶12-15

Yihooway “merinaa Xoossaa” giya qofaa neeni akeekanawu metootadii? (Isi. 40:28) Hara daro asaykka hegaa akeekanawu metootees. Eelihu Xoossaabaa hagaadan giis: “A laittaa coratettaikka qoodin gakettenna.” (Iyy. 36:26) Issibaa nuuni akeekibeenna gishsha xallawu hegee worddo giyoogaa gidenna. Leemisuwawu, pooꞌoy waani pooꞌiyaakko nuuni loytti akeekibeennaagee pooꞌoy baawa giyoogee? Hegaadan giyoogaa gidenna! Hegaadankka nuuni Yihooway ubbatoo deꞌees, qassi ubbatoo deꞌana giya qofaa loytti akeekennan aggana danddayoos. SHin hegaa giyoogee Xoossay merinawu deꞌenna giyoogaa gidenna. Medhidaagee deꞌiyoogee nuuni akeekana woy akeekennan aggana danddayiyoobaara gayttidaba gidenna. (Roo. 11:33-36) Qassi awa ayfiyaanne xoolintteta gujjin saluwaaninne saꞌan deꞌiyaabati merettanaappe kase I deꞌees. I ‘salota miccanaappe’ kasekka deꞌees.—Erm. 51:15. w22.12 2-3 ¶3-4

Issi isstoo nuuni haratu sinttan woossanaadan shoobettana danddayoos. Leemisuwawu, Geeshsha Maxaafaa xannaꞌissiya issi michchiyaa, banaara xannaꞌissiya hara michchiyaa woossanaadan shoobbana danddayawusu. SHoobettida michchiyaa xinaatee hanotaa loytta erenna gishshawu, xinaatiyaa wurssiyo wode woossanawu koyana danddayawusu. Yaatiyoogee he michchiyaa xinaateessi woossiyo wode woyganaakko loytta eranawu maaddees. Issi ishay haggaazo shiiquwan woy gubaaꞌe shiiquwan woossanaadan shoobettana danddayees. Woossiyo maatay deꞌiyo ishantti he shiiquwaa halchchoy aybakko hassayana koshshees. Woosaa nuuni gubaaꞌiyan deꞌiyaageeta zoranawu woy etawu erissuwaa yootanawu goꞌettana koshshenna. Gubaaꞌe shiiqotun darotoo mazamuriyawunne woosawu ichchashu daqiiqay imettiyo gishshawu, woossiya ishay ‘adussidi’ woossana bessenna; ubba qassi shiiquwaa doomettan hegaadan oottana koshshenna.—Maa. 6:7. w22.07 24 ¶17-18

Wurssettaa gallassatun “daro sohuwan” ubbasaa gakkiya harggee deꞌanaagaa Yesuusi kasetidi yootiis. (Luq. 21:11) Hegaa eriyoogee nuuni sarotettan deꞌanawu waati maaddii? Ubbasaa gakkiya harggee denddiyo wode nuuni maalaalettokko. Yesuusi hanana giidi yootidobay polettiyoogaa nuuni eroos. Yaatiyo gishshawu, Yesuusi “naagettite; hirggoppite” giidi wurssettaa wodiyan deꞌiyaageetussi zoridobaa nuuni kaalloos. Ubbasaa gakkiya harggee denddiyo wode, nuuni kase oottiyo ubbabata ubbatoo oottana danddayokko; shin hegee neeni xannaꞌiyoogaanne shiiqota shiiqiyoogaa agganaadan oottoppo. Nu xuufetuuninne biidotun kiyiya deꞌuwan hanidabati, ne ishanttinne michchontti neegaa mala metoy gakkishinkka Yihoowayyo ammanettidi haggaaziyoogaa nena hassayissana. w22.12 17 ¶4, 6

Yaaqoobi ba naꞌaa Yooseefa keehi siiqiyoogaa qoncciyan bessiis. (Doo. 37:3, 4) Hegaappe denddidaagan, Yaaqooba bayra naati bantta ishaa qanaatidosona. Eti banttawu hanotay injjetidoogaa akeekido wode, Yooseefa Midiyaama biittaa zalꞌꞌanchchatussi bayzzidosona. He zalꞌꞌanchchati daro xeetu kilo meetiriyaa haakkidi deꞌiya Gibxxe Yooseefa efiidi Paaroona naagiyaageetu halaqaa PHoxiifaarawu bayzzidosona. Yooseefa deꞌoy sohuwaara laamettiis. I ba aawawu siiqo naꞌa gididi takkikkonne, Gibxxen aylle gidiis! (Doo. 39:1) Issi issitoo ‘hara asaagaappe aynne dummatenna’ metoy nuna gakkees; hegaa giyoogee asa ubbaa gakkiya metuwaa malay nuna gakkees giyoogaa. (1 Qor. 10:13) Woy nuuni Yesuusi erissiyo ashkkara gidiyo gishsha xallawu nuna metoy gakkana danddayees. Leemisuwawu, nu ammanuwaa gaasuwan asay nuna qilliiccana, ixxana, ubba qassi yedettana danddayees. (2 Xim. 3:12) Nena gakkiya metoy ayba gidikkonne, hegaa neeni genccanaadan Yihooway maaddana. w23.01 14-15 ¶3-4

Issi issitoo nuna yiilloyida nu mala Kiristtaaniyaara haasayiyoogee koshshiyoogaa akeekana danddayoos. SHin koyro, hagaa mala oyshata nuna oychchana koshshees: ‘Aybi hanidaakko taani loytta akeekidanaa?’ (Lee. 18:13) ‘I tana erennan hanqqetissidee?’ (Era. 7:20) ‘Taani hegaadan moora erikkinaa?’ (Era. 7:21, 22) ‘Hegaabaa taani he uraara haasayikko, hanotay yaa iitanee?’ (Lee. 26:20) Nuuni ha oyshata takki giidi qoppikko, nu ishaa siiqiyoogee nuna yiilloyidabaa coo agganaadan oottiyoogaa akeekana danddayoos. Nu ishanttinne michchontti moorishinkka nuuni nu goꞌꞌaa aggibayidi eta siiqiyo wode, tumuppe Yesuusa kaalliyaageeta gidiyoogaa bessoos. Nuuni nu goꞌꞌaa aggi bayidi harata siiqiyo wode, haratikka tumu haymaanootiyaa shaakki erananne Yihoowawu nunaara issippe goynnana danddayoosona. Simmi yaakko, tumu Kiristtaaneta shaakki erissiya siiquwaa ubbatoo bessanawu murttidaageeta gidoos. w23.03 31 ¶18-19

Geeshsha Maxaafay Yihoowawu deꞌiya waanna eeshshay siiquwaa gidiyoogaa nuuni akeekanaadan maaddees. Yihooway nuna siiqiyo gishshawu, nuuni danddayiyoogaappe aaruwan darobata nuussi yootibeenna. (Yoh. 21:25) Yihooway nuna bonchchuwan haasayissiyoogankka siiqiyoogaa bessiis. Nuuni nu deꞌo ubban oottana bessiya woy bessenna daro higgeta I Geeshsha Maxaafan nuussi yootibeenna. Ubba I nuuni loꞌꞌobaa kuuyanaadan maaddanawu tumu taariketa, ufayssiya hiraagatanne maaddiya zoreta goꞌettees. Ha ogetun nuuni wozanappe A siiqanaadaaninne awu azazettanaadan Xoossaa Qaalay nuna maaddees. Geeshsha Maxaafay Yihooway nuussi keehi qoppiyoogaa yootees. Waatidi? A Qaalan asaabaa yootiya daro taarikee deꞌees. Geeshsha Maxaafan etabay odettidoogeeti “nu mala asa” gidiyo gishshawu, eta hanotaa akeekana danddayoos. (Yaaq. 5:17) Ubbaappe aaruwan, Yihooway nu mala asaa waati oyqqidaakko akeekiyoogan, Yihooway “maarotainne qaretai kumidoogaa” gidiyoogaa loytti akeekana danddayoos.—Yaaq. 5:11. w23.02 6 ¶13-15

Geeshsha Maxaafan wurssetta maxaafay hagaadan giidi doommees: “Eesuwan hananau bessiyaabaa ba ashkkarata bessana mala, Xoossai Yesuus Kiristtoosayyo immido ajjuutai hagaa.” (Ajj. 1:1) Yaatiyo gishshawu, haꞌꞌi alamiyan haniiddi deꞌiyaabati, Geeshsha Maxaafaa hiraagay polettanaadan waati oottiyaakko eriyoogan keehi ufayttoos. Qassi he hanotata issoy issuwaara haasayanawu koyana danddayoos. SHin, nuuni Geeshsha Maxaafaa hiraagaa pilggiyo wode aybi hananaakko malana koshshenna. Aybissi? Gubaaꞌiyan issippetettay xayanaadan oottiya aybanne nuuni haasayanawu koyenna gishshataassa. Leemisuwawu, alamiyaa kawotettati waatidi olaa xayssana, qassi sarotettaanne woppaa ehaana danddayiyaakko haasayishin siyana danddayoos. He hanotay 1 Tasalonqqe 5:3n deꞌiya hiraagay polettanaadan oottees giidi maliyoogaappe, hegaa xeelliyaagan mata wode kiyida timirtteta nuuni akeekana koshshees. Nuuni nu xuufetun kiyida qofaa haasayiyo wode, gubaaꞌee ‘issi qofan issuwaa gididi’ deꞌanaadan maaddoos.—1 Qor. 1:10; 4:6. w23.02 16 ¶4-5

Neeni Yesuus Kiristtoosa siiqiyoy aybissee? Yesuusi tumatettaa, ashkketettaanne xillotettaa dosees. Neeni tumatettaanne xillotettaa dosikko, Yesuus Kiristtoosakka dosiyoogee qoncce. Yesuusi tumawunne likke gididabawu xalatettan waani exatidaakko qoppa. (Yoh. 18:37) SHin nuuni ashkke gidanaadan Yesuusi waati tamaarissidee? Yesuusi ba oottiyooban ashkketettaa tamaarissiis. Leemisuwawu, I bonchcho ubbay bawu gidennan, ba Aawawu imettanaadan oottiis. (Mar. 10:17, 18; Yoh. 5:19) Yesuusa ashkketettay neeni waananaadan oottii? Hegee neeni Xoossaa Naꞌaa siiqanaadaaninne A kaallanaadan oottennee? Oottiyoogee qoncce. Yesuusi ashkke gididoy aybissee? Ashkke gidida ba Aawaa siiqiyo gishshataassanne A milatiyo gishshataassa. (Maz. 18:35, NW; Ibr. 1:3) Yihoowa eeshshaa loytti qonccissiya Yesuusakko shiiqanawu koyikkii? w23.03 3-4 ¶6-7

Saꞌan merinawu deꞌanawu hidootay deꞌiyo hayquwaappe denddiya naaꞌꞌu citatubaa, hegeetikka ‘xillotubaanne’ ‘worddotubaa’ Geeshsha Maxaafay yootees. ‘Xillota’ geetettidaageeti paxa deꞌiyo wode ammanettidi Yihoowawu haggaazidaageeta. SHin, ‘worddota’ geetettidaageeti hayqqanaappe kase Yihoowawu haggaazibeennaageeta. Naaꞌꞌu citatikka hayquwaappe denddiyo gishshawu, eta sunttay deꞌo maxaafan xaafetti uttiis gaana danddayiyoo? “Xilloti” hayqqanaappe kase, deꞌo maxaafan eta sunttay xaafetti uttiis. Eti hayqqiyo wode he maxaafaappe eta sunttay qucettii? CHii, Yihooway eta haꞌꞌikka paxa deꞌiya asadan xeellees. Yihooway “merinau de7iyaageetu Xoossaa gidiyoogaappe attin, haiqqidaageetu Xoossaa gidenna.” (Luq. 20:38) Hegaa giyoogee, xilloti saꞌan hayquwaappe denddiyo wode eta sunttay xayenna hanotan xaafettibeennaba gidikkonne, deꞌo maxaafan eta sunttay xaafetti uttiis giyoogaa.—Luq. 14:14. w22.09 16 ¶9-10

Yihooway koyro bitanee I medhdhidoban ufayttanaadan koyiis. Xoossay Addaama medhdhido wode, yan deꞌanaadan oottanaadaaninne aassanaadan loꞌꞌiya gannatiyaa ayyo immiis. (Doo. 2:8, 9) Addaamee zeridobay caariyoogaanne ciiyyiyoogaa beꞌidi ay keena ufayttidaakko qoppa. Edene ataakiltte sohuwaa naagiyoogee Addaameyyo gita maata! Yihooway dumma dumma mehiyawunne doꞌawu sunttaa kessanaadankka Addaamessi yootiis. (Doo. 2:19, 20) Yihooway ba huuphen mehiyawu doꞌawu sunttaa kessana danddayiiddi hegaa oottiyo maataa Addaamessi immiis. Addaamee etawu sunttaa kessanaappe kase he mehetu eeshshaanne hanotaa loytti xannaꞌidoogee aynne sirissenna. Addaamee hegaa oottidoogan keehi ufayttidoogee qoncce. Hegee Yihooway keehi eranchcha gidiyoogaanne I medhdhidobati ufayssiyaanne keehi loꞌꞌiyaageeta gidiyoogaa Addaamee akeekanaadan maaddidoogee qoncce. w23.03 15 ¶3

Gita misiliyaa tohuwaa yachchan leemisettida Inggilizenne Amarkkaa Waatta Kawotettay wurssetta alamiyaa kawotetta gidiyoogaa Geeshsha Maxaafay kasetidi yootiis. (Dane. 2:31-33) Appe simmin hara asa kawotettay deꞌenna. Anne asa kawotetta ubbaa Xoossaa Kawotettay Armmageedoona olan xayssana. (Ajj. 16:13, 14, 16; 19:19, 20) Ha hiraagay nuna waati maaddii? Daaneela hiraagay nuuni wurssettaa wodiyan deꞌiyoogaa bessiya hara naqaashaa yootees. Qassi 2,500 layttappe kase, Baabiloone haaruwaappe simmin hara oyddu alamiyaa wolqqaama kawotettati Xoossaa asaa haaranaagaa woy qohanaagaa Daaneeli yootiis. Hegaa bollikka, hegeetuppe wurssettay, Alamiyan Wolqqaama Gidida Inggilizenne Amarkkaa Waatta Kawotettaa gidiyoogaa I yootiis. Mata wode Xoossaa Kawotettay asaa kawotettaa ubbaa xayssidi kumetta saꞌaa haaranaagaa eriyoogee nuna minttetteesinne nuussi hidootay deꞌanaadan oottees. w22.07 4 ¶9; 5 ¶11-12