Tisaase

Hayqqidaageeta denttiyo wolqqay Yihoowawu deꞌii? Deꞌiyoogee qoncce. I “Ubbaappe Wolqqaama” Xoossaa. (Ajj. 1:8) Yaatiyo gishshawu, hayquwaa gujjin morkke ubbaa xayssanawu wolqqay deꞌees. (1 Qor. 15:26) Xoossay hayqqidaageeta denttana danddayiyoogaa nuuni ammanettiyo hara gaasoy I ubbabaa hassayiyoogaa. I xoolintteta ubbaa eta sunttan xeesees. (Isi. 40:26) Qassi I hayqqidaageeta hassayees. (Iyy. 14:13; Luq. 20:38) I hayquwaappe denttana asatu meraanne eeshshaa, eta deꞌuwan hanidabaanne eta qofaa hassayana danddayees. Yihoowawu ba gelido qaalaa polanawu koshshaykka wolqqaykka deꞌiyoogaa nuuni eriyo gishshawu dendduwaa hidootan ammanana danddayoos. Nuuni Xoossay qaalaa gelido dendduwaa hidootan ammaniyo hara gaasuwaa beꞌa: Yihooway hayqqidaageeta beni denttiis. Beni wode Yesuusa gujjin ammanettida amarida asati hayqqidaageeta denttanaadan Yihooway etawu wolqqaa immiis. w23.04 9-10 ¶7-9

Nuuni hiillaaninne ashkketettan yootiyaaba gidikko, asay nu yootiyoobaa siyanawunne aggennan haasayanawu eeno gaana danddayees. Issi uri nunaara palamettanawu woy nuna boranawu koyikko, nuuni aara haasayiyoogaa aggana koshshees. (Lee. 26:4) SHin daro asay hegaa mala gidennan aggana danddayees. Daroti nu yootiyoobaa siyana danddayoosona. Nuuni ashkke gidiyo wode loytti goꞌettiyoogee qoncce. Palamettanawu koyiya uri oyshaa oychchiyo wode woy boriyo wode ubbatoo ashkketettan zaaranawu koshshiya minotettaa demmanawu Yihoowa woossa. Neeni ashkke gidiyoogee qofaa dummatettay deꞌiyo wode palamay merettennaadan oottana danddayiyoogaa hassaya. Qassi neeni ashkketettaaninne bonchchuwan zaariyoogee nuuni yootiyoobaa siyiya amaridaageeti nubaanne Geeshsha Maxaafay yootiyo tumaabaa qoppiyo ogiyaa laammanaadan oottana danddayees. Ne ammanuwaabaa ‘zaaro immanawu ubba wode giiga utta’, qassi ‘hegaa ashkketettaaninne yashshatettan ootta.’ (1 Phe. 3:15) Ee, ashkke gidiyoogan minotettaa bessa! w23.09 19 ¶18-19

Nuuni danddayanchcha gidiyoogaa bessana danddayiyo oyddu ogeta ane beꞌoos. Koyruwan, danddayanchcha uri elle hanqqettenna. Harati A yiilloyiyaabaa oottiyo wode I woppu geesinne etawu etaagaadan hanenna. I unꞌꞌettiyo wodekka haratussi meqettaa iitenna. (Maz. 86:15) Naaꞌꞌanttuwan, danddayanchcha uri woppu giidi naagees. Hegaa mala uri issibaa qoppido wodiyaappe aaruwan naagana koshshiyo wode elle hanqqettenna woy yiillotenna. (Maa. 18:26, 27) Heezzanttuwan, danddayanchcha uri dirbbenna. Danddayanchcha uri oottana koshshiyo gita oosoy deꞌiyo wode, hegaa doommanawu woy wurssanawu dirbbenna. I halchchidobaa polanawu gidiya wodee deꞌiyaakkonne shaakkidi erees. Yaatidi, he oosuwaa loytti oottanawu wodiyaa bazzees. Oyddanttuwan, danddayanchcha uri paaciyaa zuuzummennan genccanawu baaxetees. Ba deꞌuwan loꞌꞌobaa qoppeesinne Yihoowawu ubbatoo ufayssan haggaazanawu bawu danddayettida ubbabaa oottees. (Qol. 1:11) Yihoowa asay ha ubba ogetun danddayanchcha gidiyoogaa bessana koshshees. w23.08 20-21 ¶3-6

Nu leemiso wozanaa naagana koshshiyo waanna gaasoy Yihooway nu wozanaa qoriyoogaa. Hegaa giyoogee harati nubaa akeekana danddayiyoogaappe aaruwan I nuna beꞌeesinne nuuni tumuppe ay mala asakko erees giyoogaa. Merinaa deꞌuwaa demmanaadan maaddana danddayiya ha zoriyaa nuuni ubbatoo loytti qoppikko, I nuna siiqana. (Yoh. 4:14) Nuuni yaatiyo wode, iita kandduwan, Seexaanay aassiyo wordduwaaninne ha alamiyan deꞌiya iita asatun mule qohettokko. (1 Yoh. 5:18, 19) Nuuni kaseegaappe aaruwan Yihoowakko shiiqiyo wode nuuni A loytti siiqananne bonchchana. Nuuni nu Aawaa azzanttanawu koyenna gishshawu, nagaraa oottanaadan denttettiya qofaa eqettoos. Pokkobaa oottanaadan paacettida Kiroweshiyan deꞌiya Martto giyo michchiyaa hagaadan gaasu: “Loytta qoppanawunne iitabaa oottanaadan denttettiya amuwaa eqettanawu metootaas. SHin Yihoowawu yayyiyoogee tana naagiis.” Xoossawu yayyiyoogee yaatanaadan waati maaddii? Martta iitabaa oottanawu kuuyiyoogee kaalettiyo qohuwaa A wotta dentta qoppidoogaa yootaasu. Nuunikka hegaadan oottana danddayoos. w23.06 20-21 ¶3-4

Yihoowa halchchoy ba sunttaa worddo ubbaappe geeshshiyogaa gidiyogaa Yesuusi erees. Nu Goday bana kaalliyageeta, “Saluwan deꞌiya nu Aawawu, asa ubbay ne sunttaa geeshsha oottidi xeello” giidi woossanaadan tamaarissidoy hegaassa. (Mat. 6:9) Ha gita allaallee meretaa ubbaara gayttidabaa gidiyogaa Yesuusi akeekiis. Yesuusaagaappe aaruwan Yihoowa sunttaa geeshsha oottidi xeelliya uri saluwaninne saꞌan baawa. Shin Yesuusi oyqettido wode, ba Aawaa mule bonchchibeenna giidi A morkketi A mootidosona. Ba Aawaa geeshsha sunttaa boriyogee woy cayiyogee gita nagaraa gidiyogaa Yesuusi eriyogee tuma! He hanttaarabaa oottiis giidi A mootidonne mooranchchadan xeellido gishshawu I keehi azzaniis. I oyqettanaappe kasetiya saatetun ba ‘wozanaa giddon mishettido’ waanna gaasoy hegaa gidana danddayees.—Luq. 22:41-44. w24.02 11 ¶11

Nuuni deꞌuwaa wottaa woxxiyo wode, Yihoowanne Yesuusa nu soo asaappe aaruwan siiqana koshshees. (Maa. 10:37) SHin hegaa giyoogee, nu son nuuyyo deꞌiya aawatettaa nuuni xaasayi xeellana danddayoos giyoogaa gidenna. Qassi Xoossaanne Kiristtoosa nuuni ufayssanawu nu son nuussi deꞌiya aawatettaa polana koshshees. (1 Xim. 5:4, 8) Yaatiyo wode nu ufayttoos. Hegaa bollikka, azinaynne machchiyaa issoy issuwaa siiqiyoonne bonchchiyo wode, yelidaageeti bantta naata siiqiyoonne loohissiyo wode, qassi naati banttana yelidaageetuyyo azazettiyo wode so asay ufayttanaagaa Yihooway erees. (Efi. 5:33; 6:1, 4) Son neeyyo deꞌiya aawatettay ayba gidinkka ne qofan, wogan woy eranchchati yootiyooban ammanettiyoogaappe Geeshsha Maxaafay yootiyo loꞌꞌo zoriyan ammanetta. Geeshsha Maxaafaa qofay deꞌiyo nu xuufeta loytta xannaꞌa. Geeshsha Maxaafay yootiyo maarata waati oosuwan peeshshanaakko ha xuufeti yootoosona. w23.08 28 ¶6-7

Kiristtaane michchiya maaddiya hiillati iyyo deꞌanaadan baaxetana koshshees. Issi naꞌiya naatettan tamaariyo amarida hiillati I deꞌo laytta ubban O maaddoosona. Leemisuwawu loytti nabbabiyogaanne xaafiyogaa tamaarite. Issi issi wogatun maccaasay nabbabiyonne xaafiyo hiillaa tamaariyogee darin koshshennabadan asay qoppees. Shin he hiillati ubba Kiristtaanetussikka keehi koshshoosona. (1 Xim. 4:13) Yaatiyo gishshawu loytti nabbabiyogaanne xaafiyogaa tamaariyogee baaxeyiyaba gidikkokka, yaatiyogaa aggoppite. Hegee inttena waati maaddanee? He hiillati oosuwa demmanaadan inttena maaddana danddayoosona. Hegeeti intte Geeshsha Maxaafaa xannaꞌanawunne harata tamaarissanawu metootennaadankka oottoosona. Ubbaappe aaruwan, intte Yihoowa Qaalaa nabbabiyonne wotti dentti qoppiyo wode kaseegaappe aaruwan aakko shiiqeeta.—1 Xim. 4:15. w23.12 20 ¶10-11

Paaciyaa eqettanawu Yihooway maaddanaadan woossa. Nuuni nagaranchcha gidiyo gishshawu, iitabaa oottanaadan nuna gakkiya paaciyaa ubbatoo eqettana koshshees. Nuussi paacee deexxanaadan Seexaanay bawu danddayettida ubbabaa oottees. I yaatiyo issi ogee pokkoban allaxxiyoogan nuuni iitabaa qoppanaadan oottiyoogaa. Hegaa malaban allaxxiyoogee nuuni pokkobaa qoppanaadan oottiyoogan Yihoowa sinttan geeshsha gidennaadan oottees, qassi gita nagaraa oottanaadan nuna denttettees. (Mar. 7:21-23; Yaaq. 1:14, 15) Balabaa oottanaadan gakkiya paaciyaa xoonanawu nuussi Yihoowa maadoy koshshees. Yesuusi tamaarissido woosan kaalliya qofay deꞌees: “Nuna iitabaappe ashshanaappe attin, paacen gelissoppa.” (Maa. 6:13) Yihooway nuna maaddanawu koyikkonne, I maaddanaadan nuuni woossana bessees. Nuuni nu woosaara maayettiyaabaakka oottana koshshees. w23.05 6-7 ¶15-17

Aqo laggeti saluwan deꞌiya bantta aawaara dabbotido dabbotaa nashshiyo wode A zoriyaa oosuwan peeshshanawu yeemottoosona, qassi hegee eta siiqiyoy irxxanaadan oottana danddayiya metuwaappe naagettanaadaaninne metuwaa genccanaadan maaddees. Yihoowaara dabbotaa minttidaageeti A milatanawu, qassi I bessido kehatettaa, danddayaanne atto giyoogaa mala eeshshaa bessanawu banttawu danddayettida ubbabaa oottoosona. (Efi. 4:32–5:1) Aqo laggeti ha eeshshata bessiyoogee eta siiqoy minnanaadan oottees. Aqo deꞌuwan 25 layttaappe daruwaa deꞌida Leeno giyo michchiyaa hagaadan gaasu: “Yihoowaara dabbotaa minttida ura siiqiyoogeenne bonchchiyoogee metennaba.” Geeshsha Maxaafay yootiyo issi taarikiyaa ane beꞌoos. Mase gidana naꞌaassi aawanne aayo gidiya aqo laggeta Yihooway doorana koshshido wode, Daawita zerettatuppe Yooseefanne Mayraamo dooriis. Aybissi? Eti Yihoowaara dabbotido gishshataassanne bantta aqo deꞌuwan A kaseyanaagaa Yihooway erido gishshataassa. w23.05 21 ¶3-4

Nuna kaalettiya Yesuusi wottiyobi baynnaagaa gidikkonne, I saꞌan aawatettaa immidoogeeti nagaranchchata. Nuuni etawu azazettanawu metootana danddayoos; ubba qassi nuuni koyennabaa oottanaadan eti oychchiyo wode azazettiyogee yaa metees. Kiitettida Pheexiroosi issi wode azazettanawu mammottiis. Muuse Higgiya maaran tuna gidida mehiya ashuwa maanaadan kiitanchchay azazin Pheexiroosi issitoo xalla gidennan, heezzutoo ixxis giis! (Oos. 10:9-16) I ixxis giidoy aybissee? Ooratta kaaletuwa akeekanawu I metootido gishshataassa. Hara baggaara, Yerusalaamen deꞌiya cimida Kiristtaaneti Phawuloosi Higgiya bonchchiyogaa bessanawu oyddu asata ekkidi beeta maqidasiya baanaadaaninne bana geeshshanaadan azazido wode azazettiis. Kiristtaaneti Muuse Higgiya kaallana koshshennaagaa Phawuloosi erees. Qassi I aybanne mooribeenna. Gidikkonne, Phawuloosi “wonttetta gallassi asata ekkidi, etaara geeyiis.” (Oos. 21:23, 24, 26) Phawuloosi azazettidoogee ishanttu giddon issippetettay deꞌanaadan maaddiis.—Roo. 14:19, 21. w23.10 10 ¶15-16

Loꞌꞌo laggetettawu yashshay keehi koshshiya eeshshaa gaada neeni waaya qoppana. SHin Yihoowaara dabbotaa minttana koyiya ubbay awu ‘yayyana’ koshshees. Nuuni Yihoowawu haggaazido wode ay keena gidikkokka, nu ubbay A wozanappe bonchchana koshshees. SHin, Xoossawu yayyiyoogaa giyoogee woygiyoogee? Xoossaa wozanappe bonchchiya uri A siiqeesinne aara dabbotido dabbotaa mooriya aybanne oottana koyenna. Yesuusi Xoossawu hegaadan ‘yayyiis.’ (Ibr. 5:7) I Yihoowawu yashshan maashibeenna. (Isi. 11:2, 3) SHin I Yihoowa wozanappe siiqiisinne awu azazettiis. (Yoh. 14:21, 31) Yihooway siiqiyaagaa, aadhdhida eranchchaa, suure pirddiyaagaanne wolqqaamaa gidiyo gishshawu, nuunikka Yesuusaagaadan A wozanappe bonchchoosinne awu bessiyaagaadan yayyoos. Nuuni Yihooway nuna siiqiyoogaanne I tamaarissidobaa nuuni waati oosuwan peeshshiyaakko I qoppiyoogaa eroos. Nuuni Yihoowa hanqqetissana woy ufayssana danddayoos.—Maz. 78:41; Lee. 27:11. w23.06 14 ¶1-2; 15 ¶5

Kawuwa Ooziyaani keehi wolqqaama gidido wode A minotettawunne duretettawu pulttoy Yihoowa gidiyoogaa dogiis. Nuuni hagaappe ay tamaariyoo? Nuuni anjjuwaanne maataa Yihoowappe demmidoogaa hassayana koshshees. Nu oottidoban otorettiyoogaappe, nuuni oottidobawu Yihoowa galatana koshshees. (1 Qor. 4:7) Nuuni nagaranchcha gidiyoogaanne nuuyyo seeray koshshiyoogaa nuna ziqqi oottidi akeekana bessees. Layttay 60 heera gidido issi ishay hagaadan giis: “Harati ta balaa akeekiyo wode taani yiillotana woy hidootaa qanxxana koshshennaagaa tamaaraas. Taani issi issitoo eeyyabaa oottin taayyo zoree imettiyo wode hegaa giigissanawu baaxetaysinne tawu danddayettida keenan Yihoowawu ubbatoo oottays.” Nuuni Yihoowawu azazettiyoonne ubbatoo nuna ziqqi oottiyo wode nu deꞌuwan tumuppe ufayttana.—Lee. 22:4. w23.09 10 ¶10-11

Beni Kiristtaaneti genccana koshshiis. He wode deꞌiya daro asaagaa mala metoy eta gakkees. SHin eti Kiristtaane gidiyo gishshawukka metoy gakkees. Etappe darota Ayhuda haymaanootiyaa kaalettiyaageetinne Rooma sunttatu xalla gidennan, eta soo asaykka yedettees. (Mat. 10:21) Qassi gubaaꞌiyan shaahotettaa medhdhanawu baaxetiya kaddidaageetu worddo timirttiyaappe eti naagettana koshshiis. (Oos. 20:29, 30) SHin, he Kiristtaaneti ammanettidi genccidosona. (Ajj. 2:3) Waatidi? Gencciyoogan leemiso gidiya Geeshsha Maxaafan etabay odettido Iyyooba mala asatubaa eti loytti qoppidosona. (Yaaq. 5:10, 11) Qassi wolqqaa demmanawu woossidosona. (Oos. 4:29-31) Eti gencciyaaba gidikko Yihooway eta woytanaagaa ubbatoo qoppoosona. (Oos. 5:41) Xoossaa Qaalaaninne nu xuufetun etabay odettido gencciyoogan leemiso gidida asatubaa nuuni ubbatoo xannaꞌiyo wodenne hegaa wotti dentti qoppiyo wode nuunikka genccana danddayoos. w23.07 3 ¶5-6

Yihoowaynne Yesuusi nunan hidootaa qanxxokkona. Kiitettida Pheexiroosi Yesuusa kaddi simmidi, I gitabaa kuuyana koshshiis. I Kiristtoosi erissiyo ashkkara gidiyoogaa agganeeyye ammanettidi deꞌanee? Pheexiroosa ammanoy xayennaadan Yesuusi Yihoowa mintti woossiis. Yesuusi Pheexiroosawu woossidoogaanne Pheexiroosi guyyeppe ba ishantta minttettanaagaa ammanettiyoogaa awu yootiis. (Luq. 22:31, 32) Pheexiroosi Yesuusi giidobaa hassayidi ay keenaa minettideeshsha! Nuuni gitabaa kuuyana koshshiyo wode, ammanettidi deꞌanaadan koshshiya minttettuwaa immanawu Yihooway siiqiya henttanchchata goꞌettana danddayees. (Efi. 4:8, 11) Yihooway Pheexiroosawunne kiitettida haratussi deꞌuwawu koshshiyaabaa kunttidoogaadan, nuuni nu deꞌuwan haggaazuwaa kaseyikko nuussi deꞌuwawu koshshiyaabaa I kunttana. w23.09 24-25 ¶14-15

Nuuni haratussi kehiyo guuttabaakka Yihooway akeekees. I hegaa alꞌꞌo yarshshodaaninne qanxxana koshshiyo acodan xeellees. Neeni kase gubaaꞌiyawu oottiyaagaa woy gubaaꞌe cima gidada oottidaba gidikko, neeni kase oottido oosuwaanne hegaa oottanaadan nena denttettida siiquwaa Yihooway hassayees. (1 Qor. 15:58) Qassi neeni ubbatoo bessiyo siiquwaa I akeekees. Yihooway nuuni ubbay kaseegaappe aaruwan anne harata siiqanaadan koyees. Nuuni Xoossaa Qaalaa nabbabiyoogan, hegaa wotti dentti qoppiyoogaaninne ubbatoo woosan A haasayissiyoogan kaseegaappe aaruwan Yihoowa siiqana danddayoos. Nu ishanttanne michchontta koshshiyaaban maaddiyoogan kaseegaappe aaruwan eta siiqana danddayoos. Nu siiqoy gujji gujji biyo wode Yihoowaara, qassi nu ishanttuuranne michchonttuura kaseegaappe aaruwan dabbotoos. Hegaa bollikka nuuni etaara dabbotidi merinawu deꞌana. w23.07 10 ¶11; 11 ¶13; 13 ¶18

Ubba Kiristtaanetikka bantta payyatettaara gayttidaagan banttawu kuuyana koshshees. Kiristtaaneti akkamuwaara gayttidabaa kuuyiyo wode eti suuttaappenne iita ayyaanaa oosuwaappe haakkanaadan Geeshsha Maxaafay yootiyo higgeta azazettana bessees. (Oos. 15:20; Gal. 5:19, 20) Hegaara gayttenna akkamota banttawu doorana danddayoosona. Issi akkamo qommoy maaddiyoogaa woy qohiyoogaa nuuni ammanana danddayoos, shin nu ishanttinne michchontti bantta payyatettaara gayttidaagan kuuyiyo maataa bonchchana koshshees. Hegaa gishshawu nuuni ha oyddubata hassayana koshshees: (1) Muleera, qassi merinawu pattana danddayiyay Xoossaa Kawotetta xalla. (Isi. 33:24) (2) Issi Kiristtaanee ba payyatettaara gayttidabaa kuuyiyo wode awu keehi loꞌꞌobay aybakko ‘loytti qoppana’ koshshees. (Roo. 14:5) (3) Nuuni haratu bolli pirddokko woy eta xubbiyaabaa oottokko. (Roo. 14:13) (4) Kiristtaaneti siiquwaa bessoosona, qassi gubaaꞌiyaa issippetettay eti dooriyoobaappe keehi aadhdhiyoogaa akeekoosona.—Roo. 14:15, 19, 20. w23.07 24 ¶15

Neeni Yihoowara dabbotido dabbotaa xoqqu ootta xeellay? Xeelliyogee qoncce! Beni wodeppe doommidi daro asay neegaadan xoqqu ootti xeellees. (Maz. 104:33, 34) Daroti Yihoowawu goynnanawu bantta goꞌꞌaa aggi bayidosona. Beni Israaꞌeelan deꞌida Naaziraaweti woy banttana geppidaageeti hegaadan oottidosona. Naaziraaweti Yihoowawu dumma ogiyan haggaazanawu bantta goꞌꞌaa aggi bayidi minni oottiya Israaꞌeelata. Attuma asi woykko macca asi amarida wodiyawu Naaziraawe gididi deꞌanawu bana Yihoowayyo dummayanawu geppanaadan Muuse Higgee paqqadees. (Qoo. 6:1, 2) Issi Israaꞌeela asi Naaziraawe gidanawu bana geppikko hara Israaꞌeelati kaallana koshshenna higgeta kaallees. Yaatin issi Israaꞌeela asi Naaziraawe gidiyoy aybissee? I Yihoowa wozanappe siiqiyo gishshawunne Yihooway A daroban anjjidoogawu A galatanawu koyiyo gishshawu gidana danddayees.—Zaa. 6:5; 16:17. w24.02 14 ¶1-2

Geeshsha Maxaafay darotoo “ammanettiyoogaa” woy “aggenna siiquwaa” xeelliyagan yootiyo wode, Xoossay ba ashkkaratussi bessidoogaa qonccissees. Qassi Geeshsha Maxaafay hegaa xeelliyagan yootiyo wode Xoossaa ashkkarati issoy issuwawu bessido siiquwaa woy kehatettaa qonccissees. (2 Sam. 9:6, 7) Nuuni loddan loddan loytti ammanettiyaageeta gidana danddayoos. Daaneeli waani loytti ammanettidaakko ane beꞌoos. Daaneeli Yihoowawu ammanettidi deꞌanaakko woy agganaakko bessana koshshido daro wodeti deꞌoosona. SHin awu layttay 90​ppe aadhdhido wode A wolqqaama paacee gakkiis. Kawo keettan oottiya asati Daaneela ixxidosona; qassi I goynniyo Xoossaa bonchchibookkona. Hegaa gishshawu, eti Daaneela woranawu maqettidosona. Daaneeli Xoossawu ammanettiyaakkonne woy kawuwawu ammanettiyaakko paacettanaadan oottiya awaajjuwaa kessidosona. Daaneeli kawuwawu ammanettiyoogaa bessanawu oottana koshshiyaabay 30 gallassawu Yihoowa woossiyoogaa aggiyoogaa. SHin, I Yihoowawu ammanettiis.—Dane. 6:12-15, 20-22. w23.08 5 ¶10-12

Yihooway nuuni nu ishanttussinne michchonttussi aggennan siiquwa bessanaadan koyees. Issi uri Kiristtaanetuppe koyettiya eeshshaa bessennan aggiyo wode, nuuni I nuna qohanawu koyennaagaanne Yihooway likke giidobaa oottanawu baaxetiyogaa ammanettana danddayoos. (Lee. 12:18) Xoossay ammanettida ba ashkkarati balishinkka eta siiqees. Nuuni balabaa oottikkokka, I nunaara dabbotiyogaa aggenna, qassi I nu bolli hanqqettenna. (Maz. 103:9) Atto giya nu Aawaa leemisuwa nuuni kaalliyogee keehi koshshiyaba! (Efi. 4:32–5:1) Nuunikka wurssettay mati mati biyo wode, nu ishanttuuranne michchonttuura dabbotaa minttidi deꞌana koshshiyogaa hassaya. Wolqqaama yedetay nuna gakkanaagaa naagana danddayoos. Nu ammanuwa gaasuwan qashettana danddayoos. Hegaa mala wodiyan nu ishanttinne nu michchontti awudeegaappenne aaruwan nuussi koshshoosona.—Lee. 17:17. w24.03 15-16 ¶6-7

Geeshsha Maxaafay Yihoowakko shiiqida, A ufayssidanne ufayssiya deꞌuwaa deꞌida yelagatubaakka yootees. Etappe issoy Daawita. I yelagatettan Xoossawu goynnanawu dooriisinne ammanettiya kawo gidiis. (1 Kaw. 3:6; 9:4, 5; 14:8) Daawitabaa xannaꞌiyoogee intte Yihoowawu ammanettidi haggaazanaadan minttettana danddayees. Qassi Marqqoosa woy Ximootiyoosa taarikiyaa loytti pilggana danddayeeta. Eti naatettaappe doommidi Yihoowawu ammanettidi haggaazidosona. Eti Yihoowawu haggaazanawu kuuyidoogan I ufayttiis. Intte haꞌꞌi oottiyoobay sinttappe intte deꞌoy ufayssiyaagaa gidanaadan woy gidennaadan oottees. Intte intte akeekan gidennan, Yihoowan ammanettiyaaba gidikko loꞌꞌobaa kuuyanaadan I inttena maaddana. Intte woppu giidi ufayssiya deꞌuwaa deꞌana danddayeeta. Yihooway intte awu oottidobaa xoqqu ootti xeelliyoogaa hassayite. Nuuni saluwan deꞌiya nu siiqo Aawawu haggaaziyoogaappe aaruwan nu deꞌuwan oottana danddayiyo loꞌꞌobi baawa. w23.09 13 ¶18-19

Kiitettida Phawuloosi ba ishanttinne michchontti nagaranchcha gidiyogaa erees. Leemisuwawu, Yerusalaame galchchan deꞌiya amaridaageeti aara gayttiyo wode I Yesuusa kaalliyagaa gidiyogaa ammanennan ixxidosona. (Oos. 9:26) Guyyeppe amaridaageeti harati an ammaniyogaa agganaadan oottanawu abaa iitabaa haasayidosona. (2 Qor. 10:10) Phawuloosi issi cimay harata xubbana danddayiya balabaa kuuyiyogaa beꞌiis. (Gal. 2:11, 12) Qassi Phawuloosa mata laggetuppe issuwa gidida Marqqoosi A keehi azzanttiis. (Oos. 15:37, 38) Phawuloosi he hanotay I bana yiilloyidaageetuura wodiya aattiyogaa digganaadan eeno gaana danddayees. Shin I ubbatoo ba ishanttanne michchontta xoqqu ootti xeelliisinne Yihoowawu ammanettidi haggaaziis. Phawuloosi ammanettidi deꞌanaadan maaddidabay aybee? Phawuloosi ba ishanttanne michchontta siiqiis. Phawuloosi harata siiqidoogee eta balan gidennan, eta loꞌꞌo eeshshan xeelaa wottanaadan maaddiis. Qassi siiqoy Phawuloosi hachchi gallassaa xiqisiyan odettidabaa oosuwan peeshshanaadankka maaddiis. w24.03 15 ¶4-5

Geeshsha Maxaafay ashkketettay keehi koshshiya eeshsha gidiyoogaa bessiya daro taarikiyaa yootees. Ane Yisaaqa taarikiyaa beꞌa. Garaara giyo Pilisxxeematu moottan I deꞌiyo wode, qanaatiya A shooroti A aawaa ashkkarati bookkido ollata biittaa zaaridi baridosona. I ba ollaa barennaadan digganawu olettiyoogaappe, ba soo asaa ekkidi haahosaa biisinne hara ollaa bookkiis. (Doo. 26:12-18) SHin Pilisxxeemati he sohuwan deꞌiya haattaa ollaakka nuugaa giidosona. Hegaa mala hanotay deꞌishinkka, Yisaaqi sarotettan deꞌanawu baaxetiis. (Doo. 26:19-25) Harati A yiilloyiyaabaa oottanawu murttidaba milatiyo wodekka, I ashkke gididi deꞌanaadan maaddidabay aybee? I ba aawaanne aayee leemisuwaa kaallidoogee tuma; qassi sarotettan deꞌida Abrahaamappenne ‘ashkkenne woppu giida ayyaanay’ deꞌiyo Saarippe darobaa tamaaridoogee qoncce.—1 PHe. 3:4-6; Doo. 21:22-34. w23.09 15 ¶4

He Kawotettaabaa asaa tamaarissanaadaaninne nagaraappenne hayquwappe nuna wozanawu ba deꞌuwa immanaadan Yihooway ba keerido wodiyan ba bayra Naꞌaa ha saꞌaa kiittiis. Yaatidi saluwan Xoossaa Kawotettawu Kawo gidanaadan Yihooway Yesuusa hayquwappe denttiis. Geeshsha Maxaafaa waanna qofay Yihooway ha saꞌawu halchchido halchchuwa Kiristtoosi haariyo Kawotettaa baggaara poliyogan ba sunttaa geeshshiyogaa. Yihoowa halchchoy laamettibeenna. I giidoogaadan ubbabay polettanaagaa qaalaa geliis. (Isi. 46:10; Ibr. 6:17, 18) Guyyeppe, saꞌay Addaamenne Hewaani zeretta gidida xillonne wottiyobi baynna asay “merinau” ufayttidi deꞌiyo gannate gidana. (Maz. 22:26) Shin Yihooway poliyobay hegaa xalaala gidenna. Qassi I saluwaninne saꞌan deꞌiya ba ashkkarati ubbay issuwa gidanaadan halchchiis. Hegaappe guyyiyan, deꞌuwan deꞌiyageeti muleera Ubba Haariya Yihoowawu ammanettidi haarettana. (Efi. 1:8-11) Yihooway ba halchchuwa poliyo maalaalissiya ogiyan neeni garamettabeykkii? w23.10 20 ¶7-8

Baabiloone aggidi biida Ayhudati Yerusalaame gakkido wode, daro takkennan bantta soo asawu koshshiyabaa kunttanawu metootidosona. Parsse Kawotettay haariyo soho ubban woppay baawa; qassi heeran deꞌiya kawotettati eta eqettoosona. Hegaa gishshawu, amaridaageeti Yihoowa beeta maqidasiya zaaretti keexxiyogaa bantta deꞌuwan aybippenne kaseyanawu metootidosona. Yaatiyo gishshawu, asay minnidi oottanaadan maaddanawu Yihooway hananabaa yootiya Hagganne Zakkaariyasa kiittiis; hegee loꞌꞌobaa demissiis. (Hag. 1:1; Zak. 1:1) Gidikkonne, 50 gidiya layttappe guyyiyankka, Ayhudatuyyo zaarettidikka minttettoy koshshiis. He wode, Higgiya loytti xaafiya Iziri Xoossaa asati bantta deꞌuwan tumu goynuwa kaseyanaadan minttettanawu Baabilooneppe Yerusalaame yiis. (Izi. 7:1, 6) Haggeenne Zakkaariyasi yootido hiraagati Xoossaa asay yedetay gakkishinkka ubbatoo Yihoowan ammanettana mala maaddidoogaadan, ha wodiyan nuna ay metoy gakkikkokka Yihooway nuna kaafanaagaa nuuni ammanettanaadan maaddoosona.—Lee. 22:19. w23.11 14-15 ¶2-3

Nuuni nu mala Kiristtaaneta siiqiyogaa waati bessana danddayiyoo? Eta minttettiyogee nuuni yaatana danddayiyo issi oge. Nuuni haratussi qarettiyaba gidikko, ‘issoy issuwa minttettana’ danddayoos. (1 Tas. 4:18) Nuuni ubbatoo issoy issuwa waati mintti siiqana danddayiyoo? Atto giyogee metiyo wodiyankka nu ishanttu mooruwa atto giyogaana. Ha wodiyan nuuni issoy issuwara siiqettiyogee keehi koshshiyoy aybissee? Pheexiroosi giidobaa akeeka: “Ubbabaukka wurssettai matattiis. Hegaa gishshau, . . . issoi issuwaara wozanappe siiqettite.” (1 Phe. 4:7, 8) Ha iita alamee xayiyo wodee keehi matattido gishshawu, nuuni ay naagana danddayiyoo? Yesuusi bana kaalliyageetussi hagaadan giis: “Ta sunttaa gishshau, dere ubbai inttena ixxana.” (Maa. 24:9) Hegaadan ixxishinkka Yihoowawu ammanettidi deꞌanawu nuuni issippetettan deꞌana koshshees. Nuuni nu ishanttanne michchontta siiqikko Seexaanay nuna mule shaakkana danddayenna; ayssi giikko, siiqoy “ubbabaa issippe shiishshi” qachchees.—Pili. 2:1, 2. w23.11 13 ¶18-19

Xoossaa Qaalawu deꞌiya tumawu zawi baynna wolqqay deꞌees. Nuuni Yihoowabaanne maalaalissiya A eeshshaabaa asaa tamaarissiyo wode anjjuwa demmoos. Asay Seexaanaa wordduwan cimettenna; qassi eti nu Aawaassi deꞌiya ufayssiya eeshshata akeekoosona. Eti awu deꞌiya zawi baynna wolqqan keehi maalaalettoosona. (Isi. 40:26) I suure pirddiyo gishshawu eti an ammanettoosona. (Zaa. 32:4) Eti A aadhdhida eratettaa loytti tamaaroosona. (Isi. 55:9; Roo. 11:33) Qassi I siiqo gidiyogaa eriyogan minettoosona. (1 Yoh. 4:8) Eti Yihoowakko loytti shiiqiyo wode A naata gididi merinawu deꞌiyo hidootay ammanttiyagaa gidees. Asay ba Aawaakko shiiqanaadan maaddiyogee nuussi gita maata! Nu yaatiyo wode, Yihooway nuuni ‘aara issippe oottiyabadan’ qoppees.—1 Qor. 3:5. w24.02 12 ¶15

Neeni Geeshsha Maxaafaa xinaate gidikko woy Yihoowa Markka gidida aawaynne aayyiyaa nena dichchikko, haattan muukettanawu qoppaydda deꞌay? Hegee keehi loꞌꞌo halchcho! Shin neeni haattan muukettanaappe kasetada nena Yihoowawu sheedhdhana koshshees. Nena Yihoowawu waata sheedhdhay? A xalaalawu goynnanawunne ne deꞌuwan I koyiyobaa kaseyanawu woosan qaalaa gelaasa. Hegaa bollikka, Yihoowa “ne kumetta wozanaaninne ne kumetta shemppuwan, qassi ne kumetta qofaaninne ne kumetta wolqqan” ubbatoo siiqanawu qaalaa gelaasa. (Mar. 12:30) Nena Yihoowawu sheedhdhiyogee hara asi baynnasan neeni awu qaalaa geliyogaa. Shin neeni haattan muukettiyogee asaa sinttan haniyaba; hegee neeni nena Yihoowawu sheedhdhidoogaa harati beꞌanaadan oottees. Nena sheedhdhiyo wode gitabaa qaalaa gelaasa; ne halchchoy neeni gelido qaalaa naagiyogaa gidana koshshees; qassi neeni yaatanaadan Yihooway koyees.—Era. 5:4. w24.03 2 ¶2; 3 ¶5

Ubba aqo deꞌuwan metiyabay deꞌees. Geeshsha Maxaafay qonccissidi yootiyogaadan aqo oyqqidaageeti “bantta bolli waayiyaa ehaana.” (1 Qor. 7:28) Aybissi? Azinaynne machchiya nagaranchcha gidiyo gishshataassanne eta eeshshay, eti dosiyobaynne ixxiyobay dumma dumma gidiyo gishshataassa. Aqo laggeti diccido wogay woy hanotay dumma dumma gidana danddayees. Eti bullachchaappe kase akeekibeenna eeshshata guyyeppe bessana danddayoosona. Ha ubbabay metoy merettanaadan oottana danddayees. Eti naaꞌꞌaykka moorikkokka he metuwa issippe giigissiyogaa aggidi aqo deꞌuwan merettida metuwawu issoy issuwa amassalana danddayoosona. Ubba eti paraman woy coo shaahettana koshshiyabadan qoppiyogaa doommana danddayoosona. Shin eti paraman woy coo shaahettikko ufayttanee? Akkay. Aqo laggee waayissiyagaa gidikkokka, azinaynne machchiya issippe deꞌanaadan Yihooway koyees. w24.03 16 ¶8; 17 ¶11

Neeni xammaqetta simmadakka Yihoowa loytta eraasanne A kaseegaappe aaruwan siiqaasa. Yaatiyo wode, Gannate saꞌan merinawu deꞌiyo ne hidootay polettanaagaa loytta ammanettana danddayaasa. (Ibr. 5:13–6:1) Roome 5:2-4n qonccidabata neeni ne deꞌuwan akeekennan aggakka. Nena daro paacee gakkikkokka, hegeeta xoonada Xoossan sabettadasa. Yihooway nena siiqiyogaanne nenan ufayttiyogaa ne eriyo gishshawu I qaalaa gelidobata ne demmanaagaa loytta ammanettaasa. Ne hidootay koyro heeraagaappe aaruwan haꞌꞌi ammanttiyagaa. Ne hidootay neeyyo qoncci beettiyo gishshawu hegaa aybippekka aaruwan xoqqu ootta xeellaasa. Yaatiyo gishshawu, hegee ne deꞌo macara ubbaara gayttees; qassi neeni so asaa oyqqiyo, issibaa kuuyiyonne ne wodiya goꞌettiyo ogiya laammees. Neeni Xoossan sabettada demmiyo hidootaara gayttidaagan, kiitettida Phawuloosi keehi koshshiya harabaakka yootiis. I ne hidootay polettanaagaa yootiis.—Roo. 15:13. w23.12 12-13 ¶16-19

Waayissiyabay nuna gakkiyo wode nuuni kaseegaadan qoppana woy oottana danddayokko. Azzanttiyabay nuna bolli bollan gakkiiddi deꞌiyabadan qoppana danddayoos. Nuuni keehi azzaniyo wode Yihooway nuna waati maaddii? I nuna minttanawu qaalaa geliis. Abban denddiya beetay markkabiya qohiya hanotan yaanne haanne sugana danddayees. Hegaadan qaaxxennaadan oottanawu daro markkabetuyyo naaꞌꞌu baggaarakka haattaa giddo yeggiyobay deꞌees. Hegee markkabee keehi qaaxxennaadan maaddana danddayees; yaatiyo wode markkabiyan deꞌiya asay qohettenna, qassi metootennan bees. Shin markkabee sinttawu biyo wode hegee loytti oottees. Hegaadankka, wayssiya wodiyan nuuni Yihoowawu ammanettidi haggaaziyo wode, I nuna minttana. w24.01 22 ¶7-8

Neeni yayyiyo wode nena hagaadan oychcha: ‘Yihooway kase oottidobay aybee?’ I medhdhidobaa loytta qoppa. Leemisuwawu, kafotinne ciishshati Yihoowa meran merettibeennabanne awu goynnana danddayennaba gidikkonne, Yihooway etawu koshshiyabaa kunttiyogaa loytta ‘xeella.’ Yihooway etaagaappe aaruwan nuussi koshshiyabaa kunttana. Hegaa loytti qoppiyogee kaseegaappe aaruwan nuuni Yihoowan ammanettanaadan oottees. (Mat. 6:25-32) Yihooway ba ashkkaratussi oottidobaakka qoppa. Etabay Geeshsha Maxaafan odettido mino ammanoy deꞌiyogeetubaa xannaꞌana danddayaasa; woy ha wodiyan Yihoowawu haggaaziyageetu deꞌuwan hanidabaa nabbabana danddayaasa. Hegaa bollikka, Yihooway neessi oottidobaa loytta qoppa. Neeni A eranaadan I nena waati maaddidee? (Yoh. 6:44) I ne woosaa waati zaaridee? (1 Yoh. 5:14) I ba alꞌꞌo Naꞌaa yarshshidoogee nena ubba galla waati maaddii?—Efi. 1:7; Ibr. 4:14-16. w24.01 4 ¶6; 7 ¶17