Xoossay Oonee?

HA OYSHAU ne zaaroy aybee? Issoti issoti Xoossaa loyttidi eriyaabadan qoppoosona—eti Xoossaa banttau mata dabbodan xeelloosona. Harati Xoossaa haaho dabbodan xeelloosona. Eti Xoossay deꞌiyoogaa ammanoosona; shin abaa erokkona gaana danddayettees. Neeni Xoossan ammaniyaaba gidikko, kaallidi deꞌiya oyshatuyyo ne zaaroy aybee?

1. Xoossay deꞌiyoy ubbasaanee?

2. Xoossaayyo suntti deꞌii?

3. Yesuusi Ubbaa Danddayiya Xoossay?

4. Xoossay taayyo qoppii?

5. Xoossay ubba qommo goynuwan ufayttii?

Neeni ha oyshata hara asata oychiyaaba gidikko, eti immiyo zaaroy dumma dumma gidana danddayees. Yaatiyo gishshau, Xoossaa xeelliyaagan bala ammanoynne qofay daridoogee garamissiyaaba gidenna.

Zaaroy Koshshido Gaasuwaa

Yesuus Kiristtoosi Xoossan ammaniya maccaasiyo haattaa ollaa matan demmidi haasayissido wode, Xoossaa xeelliyaagan tumaa eriyoogee keehippe koshshiyoogaa qonccissiis. Samaariyaa asa gidida ha maccaasiyaa Yesuusi hananabaa yootiyaagaa gidiyoogaa akeekaasu. SHin issibay o hirggissiis. I ammanuwaappe Yesuusaagee dumma. A hegaa xeelliyaagan bana qofissidabaa qonccissa simmin, Yesuusi: “Intte erennabau goinneeta” yaagidi iyyo qoncciyan yootiis. (Yohaannisa 4:19-22) Ammanoy deꞌiyo ubba asay Xoossaa tumuppe erennaagaa Yesuusi tamaarissidoogaa erana danddayoos.

Yesuusi yootidobay ooninne Xoossaa tumuppe erana danddayennaagaa malaatii? CHii. Hegaappe Yesuusi he maccaaseessi: “Tumaappe goinniyaageeti ayyaanaaninne tumatettan goinniyo wodee matattiis; ha77⁠ikka gakkiichchiis. Aissi giikko, asi baayyo goinnana mala, Aawai koyiyoogeeti hageetu malaa” yaagiis. (Yohaannisa 4:23) Neeni Xoossaassi “ayyaanaaninne tumatettan” goynnay?

Neeni ha oyshaa zaaruwaa akeekiyoogee keehippe koshshiyaaba. Aybissi? Tumu eray keehippe koshshiyoogaa Yesuusi woosan qonccissiiddi: “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7⁠o” yaagiis. (Yohaannisa 17:3) Ee, neeni sinttappe merinaa deꞌuwaa demmiyoogee Xoossaa xeelliyaagan tumaa eriyoogaara gayttidaagaa!

Xoossaa xeelliyaagan tumaa eriyoogee danddayettiyaabee? Ee, danddayettiyaaba! Yaatin neeni hegaa waatada erana danddayay? Yesuusi bana xeelliyaagan: “Ogee, tumainne de7⁠oi tana; ta baggaarappe attin, ooninne ta Aawaakko baanau danddayenna” yaagiis. (Yohaannisa 14:6) I gujjidikka: “Na7aappenne Na7ai Aawaa bessanau koyiyo asatuppe attin, harai ooninne Aawai oonakko erenna” yaagiis.—Luqaasa 10:22.

Yaatiyo gishshau, Xoossaa Naꞌaa, Yesuus Kiristtoosi tamaarissidobay Xoossaa eriyo waanna ogee. Yesuusi: “Intte taani tamaarissiyoogau azazettikko, tumu tana kaalliyaageeta. Intte tumatettaakka erana; qassi tumatettai inttena ailletettaappe kessana” yaagidi qaalaa geliis.—Yohaannisa 8:31, 32.

Yaatin kaseti denttido ichashu oyshatuyyo Yesuusa zaaroy aybee?

[Sinttaa 4n deꞌiya misiliyaa]

Neeni erenna Xoossau goynnay?