Waanada Haggaazuwan Genccana Danddayay?

NEENI keehippe daafuridoogaappenne hidootaa qanxxidoogaappe denddidaagan sabbakuwaa oosuwaa essanau qoppa eray? Wolqqaama yedetay, hirggay, payyatetta pacay, laggetu sugettay woy asay siyennan ixxiyoogee nuuni gencciyo hanotaa shugissiyaaba gidana danddayees. Gidikkokka, Yesuusa leemisuwaa qoppa. “Wodeppe au de7⁠iya ufaissaa gishshau,” i wolqqaama paaciyan gencciis. (Ibraawe 12:2) Xoossaa bolli denddida mootoy muleera worddo gidiyoogaa qonccissiyoogan, Yihoowa wozanaa ufayssanaagaa i eriis.—Leemiso 27:11.

Haggaazuwan gencciyoogan, neenikka Yihoowa wozanaa ufayssana danddayaasa. SHin xubbiya issi issibati sabbakanau wolqqaa wurssiyaaba milatikko shin waatuutee? Cimidanne payyatettaa pacay deꞌiyo Kiristtiina: “Taassi daafuraynne hidootaa qanxxiyoogee siyettiyoogee oorattaba gidenna. Cimatettaara gayttida metoti, giishin payyatettaa pacaynne galla galla deꞌuwau hirggiyoogee guutta wodiyaassi taani mishettada oottennaadan diggana danddayees” yaagaasu. Hegaa mala xubbiyaabati deꞌishin neeni waanada haggaazuwan genccana danddayay?

Hananabaa Yootiyaageetu Leemisuwaa Kaalla

Ammanettidi Kawotettaabaa aassiyaageeti sabbakuwaa oosuwan genccanau, beni wode hananabaa yootidaageetuugaa mala xeelay deꞌanaadan baaxetana danddayoosona. Leemisuwau, Ermmaasa qoppa. I hananabaa yootiyaagaa gididi oottanau xeegettido wode, koyro koyibeenna. Gidikkonne, Xoossan wozanappe ammanettana bessiyoogaa akeekido gishshau, Ermmaasi bau imettida metiya oosuwaa 40⁠ppe dariya layttau genccidi oottana danddayiis.—Ermmaasa 1:6; 20:7-11.

Heneriki Ermmaasa leemisuwaappe minttettuwaa demmiis. I hagaadan giis: “Taani haggaazido 70⁠ppe dariya layttatun, asay immiyo zaaruwan, giishin eta ixuwaappe woykko eti siyanau koyennaagaappe denddidaagan issi issitoo hidootaa qanxxaas. Hegaa mala wodetun, taani Ermmaasa leemisuwaa hassayaas. I Yihoowa siiqiyoogeenne an wozanappe ammanettiyoogee aggennan hananabaa yootanaadan oottiis.” (Ermmaasa 1:17) Raafaalikka Ermmaasa leemisuwan minettiis. I hagaadan giis: “Ermmaasi banaaninne bau siyettiyaaban xeelaa wottiyoogaa aggidi, Xoossan ammanettiis. Ubbasan asay a ixxishinkka, bayyo imettida oosuwaa xalatettan poliis. Taani hegaa hassayana koyays.”

A leemisoy hara daroti haggaazuwan genccanaadan oottida hananabaa yootida haray, Isiyaasa. A biittaa asay i yootiyoobaa siyennaagaa Xoossay ayyo yootiis. Yihooway: “Ha asaa wozanaa dammetta; eta haittaakka tulissa” yaagiis. Isiyaasi hidootaa qanxxidee? Xoossaa xeelan i hidootaa qanxxibeenna! I hananabaa yootiyaagaa gididi kiitettido wode, “Hekko, tana kiitta” yaagiis. (Isiyaasa 6:8-10) Isiyaasi bau imettida kiitaa minttidi gattiis. Sabbakanaadan imettida azazuwau neeyyookka hegaa mala xeelay deꞌii?

Asay siyennan ixxishinkka haggaazuwan genccanau, Isiyaasaagaadan, nuuni yootiyo kiitaa asay ekkennan ixxiyoogan xeelaa wottana koshshenna. Raafaali: “Asay zaariyo iita zaaruwaa qoppennan agganau baaxetays. Taani deꞌiyo heeran deꞌiya asati bantta koyidoogaa zaariyo maatay etau deꞌees” yaagidi hidootaa qanxxiyoogaa xooni kiyanau maaddidabaa yootiis. Aannakka: “Taani ufayssennabaa woy hidootaa qanxxissiyaabaa qoppenna mala baaxetays. Taani hegaadan oottanau maaddidabay woosaanne haggaazuwaa kiyanaappe kase gallassaa xiqisiyaa nabbabada, an wotta denttada qoppiyoogaa. Hegaadan oottiyoogee loꞌꞌo gidenna qofay sohuwaara xayanaadan oottees” yaagaasu.

Hizqqeeli hananabaa yootiyaagaa gididi oottidoy Baabiloonen omoodettidi deꞌiya makkalancha Ayhudatussa. (Hizqqeela 2:6) Hananabaa yootiya Hizqqeeli Xoossaa qaalaa asau yootennan aggin, akeekisuwaa siyennan iita asi hayqqikko, i ba huuphe oyshettees. Yihooway Hizqqeelayyo: “A suuttaa taani neeppe achchana” yaagiis.—Hizqqeela 3:17, 18.

Heneriki Hizqqeelaagaa mala xeelay bau deꞌanaadan koyidi: “Taani asa ubbaa suuttaappe geeshsha gidanau koyays. Asaa naatu alꞌꞌo deꞌoy daafa hanotan deꞌees” yaagiis. (Oosuwaa 20:26, 27) Zbiginiwassikka hegaa malabay siyettin: “Haratu qofay ayba gidikkokka, Hizqqeeli ba oosuwaa aggennan oottana koshshiis. Hagee sabbakiyo oosuwaa xeelliyaagan Medhidaagau deꞌiyaagaa mala xeelay tau deꞌanaadan maaddiis” yaagiis.

Neeni Nerkka Gidakka

Sabbakiyo wode neeni nerkka gidakka. Kiitettida PHauloosadan nuuni Xoossaara “issippe oottiya a oosanchchata” gaana danddayoos. (1 Qoronttoosa 3:9) Issi issitoo hidootaa qanxxiyoogee siyettiyo Kiristtiina: “Yihooway tana mule yeggenna gishshau, taani ubbatoo minttettuwaa demmanau woossiyoy hegaassa” yaagaasu. Ee, haggaaziyo wode nuna maaddanaadan nuussi Xoossaa ayyaanaa koshshees!—Zakkaariyaasa 4:6.

Nuuni sabbakiyo wode, geeshsha ayyaanay ‘ayyaanaa ayfe’ gidida eeshshata bessanaadankka nuna maaddees. (Galaatiyaa 5:22, 23) Hegee asaa zaaroy ay gidikkokka, nuuni sabbako oosuwan genccanaadan maaddees. Heneriki: “Sabbako oosuwaa oottiyoogee ta eeshshaa taani loyttanaadan maaddiis. Taani danddayaanne haratuyyo qoppiyoogaa tamaaraas; qassi sohuwaara hidootaa qanxxana bessennaagaakka tamaaraas” yaagiis. Daro xubbiyaabay deꞌishinkka haggaazuwan gencciyoogee, geeshshaa ayyaanaa ayfiyaa neeni dichanaadan, ubba keehippe loytta dichanaadan maaddana danddayees.

Ha dumma oosuwaa kaalettanau Yihooway ba kiitanchata goꞌettees. (Ajjuutaa 14:6) Geeshsha Maxaafay “sha7aaninne miilooniyan” paydettiya ayyaana meretati deꞌiyoogaa qonccissees. (Ajjuutaa 5:11) Yesuusi kaalettin, kiitanchati saꞌan Xoossaassi oottiyaageeta maaddoosona. Neeni haggaaziyo wode ubbatoo hegaa hassayay?

Aanna: “Nuuni haggaaziyo wode kiitanchati nunaara deꞌiyoogaa wotta denttada qoppiyoogee, tana keehippe minttettees. Yihoowaynne Yesuusi kaalettin eti immiyo maaduwaa taani xoqqu oottada xeellays” yaagaasu. Ammanettida kiitanchatuura issippe oottiyoogee ayba gita maatee!

Aassiya haratuura oottiyoogee nuuni genccanaadan waatidi maaddii? Ammanettida daro Yihoowa Markkatuura dabbotidoogan anjjettida. “Biratai birataa poshiyoogaadan, asai issoi issuwaappe tamaarees” giya Geeshsha Maxaafaa leemisoy tuma gidiyoogaa neeni akeekidoogau siree baawa.—Leemiso 27:17.

Haratuura haggaaziyoogee nuuni goꞌetti erenna haggaaziyo loꞌꞌo hiillata akeekanaadan dumma injjiyaa medhees. Eljibeeta: “Aassiya dumma dumma asatuura oottiyoogee taani ishatanne michota, qassi haggaazuwan demmiyoogeetakka siiqanaadan injjiyaa medhees” yaagaasu. Aassiya dumma dumma asatuura haggaazuwan shaahettanau baaxeta. Hegee neeni haggaazuwan ufayttanaadan oottees.

Ne Huuphiyaa Loytta Naaga

Haggaazuwan mishettidi oottiyaageeta gidanau, nuuni buzo xinaatiyau loꞌꞌo meezee deꞌiyoogeetanne gidiyaagaa keenaa shemppiyaageeta gidanau loꞌꞌo halchuwaa kessana bessees. Hara ogiyan, nuuni nu ayyaanaabaanne nu bollaa loytti naagana bessees giyoogaa.

Geeshsha Maxaafay: “Mino oosanchchaa halchchoi dureyees” yaagees. (Leemiso 21:5) Layttay haꞌꞌi 88 gidido Zigmentti: “Loꞌꞌo prograamiyaa kessada haggaaziyoogee loꞌꞌo ayfiyaa demmanaadan maaddiis. Taani tau deꞌiya wodiyaa akeekan goꞌettiyo gishshau, haggaazuwau gidiya wodiyaa demmaas” yaagiis.

Geeshsha Maxaafaa loytti eriyoogee nuna mintteesinne haggaazuwau giigidaageeta gidanaadan oottees. Nuuni deꞌanau qumaa maana koshshiyoogaadan, sabbako oosuwan ubbatoo shaahettanaukka ayyaana qumaa ubbatoo maana bessees. Xoossaa Qaalaa galla galla xannaꞌiyoogeenne “qumaa koshshiyo wodiyan” miyoogee haggaazuwau nuuni wolqqaa demmanaadan danddayissees.—Maatiyoosa 24:45-47.

Eljibeeta haggaazuwaa kaseegaappe loyttada haggaazanau, ba deꞌuwan koshshiya laamiyaa oottaasu. A: “Taani televizhiiniyaa beꞌaydda aattiyo saatiyaa keehi guuttido gishshau, haggaazuwau giigettanau daro wodiyaa demmaas. Geeshsha Maxaafaa omarssan ubbatoo nabbabiyo wode, haggaaziyo moottan taani demmido asatubaa qoppays. Taani eta maaddana danddayiya xiqisetanne xuufetun kiyida qofaa koyays” yaagaasu.

Koshshiyaagaa keenaa shemppiyoogee daafurennaadaaninne haggaazuwan kumetta hanotan shaahettanaadan oottees. Hegaappe dumma gidida ogiyan, keehippe allaxxiyoogee oottiyo oosuwaa maara oottennaadan diggana danddayees. Anjja giyo mishettidi aassiyaagee: “Gidiyaagaa keenaa shemppennaagee keehippe daafuranaadan oottees; qassi hegee amarida hanotan hidootaa qanxxanaadan oottees. Hegaa teqqanau taani oottana danddayiyo ubbabaa oottays” yaagiis.—Eranchchaa 4:6.

Nuuni wozanappe baaxetikkonne, mishiraachuwaa siyiya asay keehi guutta. Gidikkonne, Yihooway nu oosuwaa mule dogenna. (Ibraawe 6:10) Daroti nunaara haasayanau koyennaba gidikkokka, nuuni eta sooppe kiyi simmin nubaa haasayana danddayoosona. He hanotay nuuni Hizqqeela xeelliyaagan, “hananabaa yootiyaagee eta giddon de7⁠iyoogaa eti erana” yaagiyaagaa nabbabiyoogaara issi mala gidana danddayees. (Hizqqeela 2:5) Nu haggaazoy dexxiyaagaa gidiyoogee tuma; shin nuuni appe daro goꞌꞌaa demmoos; nuuna siyaageetikka goꞌettoosona.

Zigmentti: “Sabbako oosuwan shaahettiyoogee nuuni ooratta asatettaa maayanaadan maaddeesinne Xoossaanne nu shoorota siiqiyoogaa qonccissees” yaagiis. Anjjikka: “SHemppo ashshiya ha oosuwan shaahettiyoogee gita maata. Ha oosoy hagaa keena aahotettan woykko hagaa mala hanotan zaarettidi mule oosettenna” yaagiis. Neenikka ha wodiyan, haggaazuwan gencciyoogan daro anjjuwaa cakkana danddayaasa.—2 Qoronttoosa 4:1, 2.

[Sinttaa 29n deꞌiya misiliyaa]

Ayyaanaabaaninne asatettaaban nuussi koshshiyaabaa oottiyoogee haggaazuwan genccanaadan maaddees