Xoossay Nuussi Tumuppe Qoppees—Waatidi Eriyoo?
XOOSSAY nuna siiqiyaaba gidikko, tuggay hagaadan aybissi daridee? yaagiya oyshaa shaꞌan qoodettiya layttau asay oychidaba gidikkonne, ha wodiyankka oychana koshshiya oysha. Neeni issi ura siiqiyaaba gidikko, he uri tuggatanaadan koyennaagee qoncce; he uri metootiyaaba gidikko, neeni a maaddanau baaxetana. Daro asay hegaadan qoppiyoogaappe denddidaagan, alamiyan daro tuggay deꞌiyo gishshau, Xoossay nuussi qoppennabadan etau siyettees. Yaatiyo gishshau, Xoossay nuna tumuppe siiqiyoogaanne nuussi qoppiyoogaa bessiya naqaashaa koyro akeekiyoogee koshshiyaaba.
Meretay Xoossaa Siiquwaa Qonccissees
Xoossaa Yihooway “saluwaa, sa7aa, abbaanne eta giddon de7iya ubbabaa” medhidaagaa. (Oosuwaa 4:24) Yihooway medhidobaa wotti dentti qoppiyo wode, i nuussi qoppees giidi kuuyana bessiyoogee qoncce. Leemisuwau, nena ufayssiyaabata qoppa. Malꞌꞌo qumaa miyoogan ufayttikkii? Nuuni deꞌon deꞌanaadan Yihooway issi qommo quma xallaa immana danddayees. SHin, nuuni miyo wode ufayttanaadan zawi baynna qommo qumay deꞌanaadan oottiis. Hegaadankka, nuuni deꞌuwan ufayttanaadan Yihooway maalaalissiya dumma dumma qommo mittay, ciishshay, qassi deree dembbay deꞌiyoosa oottidi saꞌaa medhiis.
Nuuni merettido ogiyaakka qoppa. Nuuni naaciyoogee, muuziqan ufayttiyoogeenne xeellanau loꞌꞌiyaabaa nashshiyoogee deꞌuwan deꞌanau koshshiyaaba gidenna; ha ubbabay nuuni deꞌuwan ufayttanaadan Xoossay immidoba. Qassi haratuura deꞌiya dabbotaa qoppa. Loꞌꞌo laggetuura issippe siiquwan wodiyaa aattiyo wode woykko keehippe siiqiyo uri qoommiyo wode ufayttennay oonee? Siiqana danddayiyoogee ba huuphe siiqiya Xoossaa imota! Asay siiqanaadan oottidi Xoossay medhido gishshau, he eeshshay Xoossaa eeshsha gidana bessees.
Geeshsha Maxaafay Xoossay Nuna Siiqiyoogaa Qonccissees
Geeshsha Maxaafay Xoossay siiqo gidiyoogaa yootees. (1 Yohaannisa 4:8) A siiqoy meretaa xallan gidennan, a Qaalan, Geeshsha Maxaafaanikka qoncciis. Leemisuwau, Geeshsha Maxaafay nu payyatettau goꞌꞌiya kaaletuwaa immees; ubbaban kiphatancha gidanaadan minttettees; qassi ushshanchanne yorancha gidennaadan yootees.—1 Qoronttoosa 6:9, 10.
Geeshsha Maxaafay issoy issuwaara siiqettanaadan, qassi harata bonchuwaaninne kehatettan oyqqanaadan minttettiyoogan, haratuura waanidi siga deꞌanaakko loꞌꞌo zoriyaa immees. (Maatiyoosa 7:12) Geeshsha Maxaafay metuwau gaaso gidiya meezetanne koshshata, giishin yaaretiyoogaa, zigiriyoogaa, qanaatiyoogaa, wodiraa laammiyoogaanne woriyoogaa malabata diggees. Asay ubbay Geeshsha Maxaafay yootiyo loꞌꞌo zoriyaadan deꞌanau baaxetiyaakko, alamiyan hagaa keena metoy deꞌana danddayenna.
SHin Xoossay ba siiquwaa qonccissido oge ubbaappe aadhiyaagee asaa naata wozanau ba Naꞌaa Yesuusa immidoogaa. Yohaannisa 3:16y: “Xoossaa Na7aa ammaniya ubbai merinaa de7uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis” yaagees. Yaatiyo gishshau, Yihooway hayquwaanne meto ubbaa muleera xayssanau giigissuwaa oottiis.—1 Yohaannisa 3:8.
Yihooway nuna siiqiyoogau keehi daro naqaashay deꞌiyoogee qoncce. Hegaa gishshau, nuuni waayettiyoogaa i beꞌanau koyenna giidi qoppiyoogee bessiyaaba. I tuggaa xayssana. Nuuni hegee waani polettaneeshsha giidi qoppana koshshenna; Xoossay tuggaa waatidi xayssanaakko Geeshsha Maxaafay geeshshidi yootees.
[Sinttaa 4n deꞌiya misiliyaa]
Siiqana danddayiyoogee siiqiya Xoossaa imota