Neeni Ubba Wode Ammanettana Koshshii?

ISSI issitoo ubba asay ammanettees; daro asay darotoo ammanettiyaaba milatees. SHin ubbatoo ammanettiyaageeta gidanau baaxetiya aappun asaa eray?

Ha wodiyan, ammanettenna hanotay deꞌuwan dumma dumma macaran keehi dariis. Gidoppe attin, Xoossay ammanettiyoogaa xeelliyo hanotay keehi erettidaagaa. Leemisuwau, Tammu Azazotuppe, “wuuqqoppa” yaagiya hosppuntta azazuwaa daro asay erees. (Kessaabaa 20:15) Gidikkokka, issi issi hanotatun issi uri wuuqqikko woykko ammanettennan aggikko aykko baawa giidi daro asay qoppees. Darotoo asay wuuqqikkokka aykko baawa giyo heezzu ogeta ane beꞌoos.

Hiyyeesatettay Wuuqqanau Gaaso Gidii?

Rooma biittan polotika asa gidida issi bitanee issi wode: “Hiyyeesatettay higgiyaa kanttanaadan oottiya waannaba” yaagiis. Hiyyeesa uri wuuqqikkokka aykko baawa giidi qoppana danddayees. Haratikka hegaa maayana danddayoosona. Yesuusi hegaa malabaa waati xeellidee? I hiyyeesatuyyo keehippe azzaniisinne “qarettiis.” (Maatiyoosa 9:36) Gidikkokka, ay hanotankka gidin, wuuqqiyoogaa mule xaasayi xeellibeenna. Yaatin, hiyyeesa uri ay oottana koshshii?

Wozanappe ayyo azazettanau koyiyaageetuyyo Xoossay qarettees; eti banttau koshshiyaabau baaxetiyo wode eta baaxiyaa anjjees. (Mazamure 37:25) Geeshsha Maxaafay: “GODAI xillota namisissenna; shin nagaranchchatu amuwaa polissenna” yaagees. (Leemiso 10:3) Hiyyeesa uri he qaalan ammanettana danddayii? Vikttorina hegan ammanettausu.

Vikttorina ichashu naata dichiya amꞌꞌe gidiyo gishshau, iyyo deꞌoy deexxiis. A deꞌiyoy kawotettay asau koshshiyaabaa darin maaddenna, dicciiddi deꞌiya biittaana. A darotoo peꞌiyoy son gidennan, wuuqqanau daro injjee deꞌiyo sohuwaana. Gidikkokka, Vikttorina wuuqqanau koyabuukku. A wuuqqiyoogaappe, goꞌꞌi he keesa gidido, oge doona zalꞌꞌiyaa, ammanettiyaaro gidada zalꞌꞌausu. A ammanettiyaaro gidada deꞌiyoy aybissee?

“Koyruwan, Xoossay ammanettiyaagaa gidiyoogaa, qassi taani a leemisuwaa kaalliyaaba gidikko, i taayyo ammanettiyaagaa gidanaagaa ammanays. Naaꞌꞌanttuwan, ta naati ammanettiyoogaa tamaarana danddayiyoy, taani hegaadan oottiyoogaa beꞌiyoogaa xallaana” yaagaasu.

Yaanin i deꞌuwaa hanotay ay malee? Hagaadan gaasu: “Nuuyyo miyoobi, maayiyoobinne keetti deꞌees. Gidikkokka, leemisuwau xale shammanaadan oottiyaabay qoppennan merettiyo wode, laggetu maaduwaa oychiyo wodeti deꞌoosona. Ta oychiyoobaa ubba wode demmays. Aybissi? Taani ta hanotaabaa tumaa yootiyoogaanne tau koshshiyaabaappe daruwaa demmanau koyennaagaa ta laggeti eroosona.

“Naati ammanettiyaageeta gididi diccoosona. Mata wode issi shooriyaa nu xarapheezaa bolli amarida santtimiyaa beꞌada, naati hegaa ekkanaakkonne gaada taani hirggiyaakkonne eranau koyaasu. Ta naati mule hegaadan oottokkona yaagin, hegaa ammananau metootaasu. Taani erennan, eta paaccanau qoppaasu. A asi beꞌennan 100-frankke santtimeta naaꞌꞌata naati beꞌana danddayiyo sohuwan nu son wottaasu. A wonttetta galla yiyo wode, santtimeti he sohuwan deꞌiyaageeta beꞌada garamettaasu. Ammanettiya naati deꞌiyoogee, daro aquwaappekka aadhiyaaba.”

“Hegee Asi Ubbi Oottiyooba”

Ooso sohuwan wuuqqiyoogee ubbasan deꞌiyaaba. Hegaappe denddidaagan daro asay, “Hegee asi ubbi oottiyooba; yaatin taani wuuqqennay aybissee” giidi qoppees. SHin Geeshsha Maxaafay: “Iitabaa oottanau daro asaa kaalloppa” yaagees. (Kessaabaa 23:2) Vikttoora ha zoriyaa oosuwan peeshshaasu. A hegan goꞌettadee?

Vikttoorissi layttay 19 gidido wode, zambbaa ayfiyaappe zaytiyaa kessiyo paabirkkan oosuwaa demmaasu. Yan oottiya 40 maccaasati paabirkkaappe zambbaa ayfiyaa wuuqqidi bantta zambbiliyan ekkidi biyoogaa takkennan akeekaasu. Ubbatoo saaminttaa wurssettan hegaa bayzzidi, heezzu woy oyddu gallassa damoozaa keena miishshaa demmoosona. Vikttoora hagaadan gaasu: “Ubba asay hegaadan oottees. Eti taanikka etaagaadan oottanaadan koyoosona, shin ammanettiyoogee ta deꞌo oge gidiyoogaa yootada ixxis gaas. Loꞌꞌobay taappe haliiddi deꞌiyoogaa yootidi, tana baceessidosona.

“Issi gallassi nuuni ubbay paabirkkaappe kiyiyo wode, ootissiyaagee qoppennan puttu giis. I ubbaa zambbiliyaa gidduwaa koyidi, taagaappe attin haratu ubbaagan zambbaa ayfiyaa demmiis. Eti ubbay oosuwaappe kiyanaadan woykko miishshi qanxxettennan naaꞌꞌu saaminttau oottanaadan yootiis. Loꞌꞌobay taappe halibeennaagaa he maccaasati he naaꞌꞌu saaminttan eridosona.”

“Demmidobaa Neeyyo Ekka”

Issi urappe bayida alꞌꞌobaa demmiyo wode neeyyo aybi siyettii? Daroti hegaa malabaa demmiyo wode sohuwaara etau siyettiyaabay, banttassi ekkanaagaa gidiyo gishshau, keettawau zaaranau qoppokkona. Eti “demmidobaa neeyyo ekka” giya qofaa kaalloosona. Issoti issoti hegan ayba balinne baynnabadan qoppana danddayoosona. Qassikka keettaaway bayidabaa zaaretti demmanau qoppenna giidi qoppoosona. Harati qassi, keettaawaa koyiyoogee keehi dafurssiyaaba gidiyo gishshau, a koyanau bessennabadan qoppoosona.

Hegaa Xoossay waatidi xeellii? Zaarettido Wogaa 22:1-3y issi uri demmidobaa baayyo ekkanaadan gidennan ‘a goday koyiiddi yaana gakkanaashin, ba son ekki efiidi, i yiidi demmiyo wode, au immanaadan’ yootees. Issi uri demmidobaa yootana xayikko, wuuqqidabadan asay a mootana danddayees. (Kessaabaa 22:9) Hegee ha wodiyaukka haniyaabee? Hegee haniyaaba gidiyoogaa Kiristtiina akeekaasu.

Kiristtiina issi gille timirtte keettan direkttere. Issitoo Oruwaa gallassi ba damoozaa ekkaasu. Arggo bagga Afirkkan daroti oottiyoogaadan, ba miishshaa qachada borssan yeggaasu. Yaatada motoriyan eesuwan gubaaꞌiyaa shiiquwau baasu. Gakka simmada, shufeeriyau immanau ba borssaa giddon santtimiyaa koyaasu. Qashetti uttida miishshay a erennan xuman saꞌan wodhiis.

Amarida daqiiqappe guyyiyan, heerau imatta gidida, layttay 19 gidido Bileezi he ogiyaara aadhiis. I Kiristtiina biyo shiiquwan issi laggiyaara gayttanau bees. I qashetti uttida miishshaa demmidi, kiisiyan yeggiis. SHiiqoy wuri simmin, kareppe issibaa demmidoogaanne hegaa goday bayidabi aybakko qonccissidi, silkkiyan bana oychana danddayiyoogaa ba laggiyau yootiis.

Kiristtiina he galla qammi so gakkada ba miishshay bayidoogaa akeekada dagammaasu. Saaminttappe guyyiyan, miishshay bayidoogaa ba laggee Joosefiiniyyo yootido wode, Joosefiina he shiiquwaa yiida issi imattay issibaa demmidoogaa iyyo yootaasu. Kiristtiina Bileezayyo silkkiyaa dawalada bayidabaa qonccissada yootaasu. Bileezi miishshaa iyyo immido wode a keehippe ufayttaasu. Bileezi shin? I miishshaa issi saaminttau ba matan wottiis; shin, “Taani miishshaa tau ekkiyaakko ufayttiyoogaappe aaruwan zaaridoogan ufayttaas” yaagiis.

Eti Ubba Wode Ammanettiyaageeta Gidanau Baaxetiyoy Aybissee?

Vikttorina, Vikttooranne Bileezi dumma dummasan deꞌiya, issoy issuwaara erettenna asata. SHin eta issi mala oottiyaabay deꞌees. Eti ammanettiyoogaa xeelliyaagan Geeshsha Maxaafay yootiyoobaa xoqqu ootti xeelliya, Yihoowa Markkata. Eti ooratta alamiyaa xeelliyaagan Xoossay qaalaa gelidobay polettanaagaa naagoosona. “Xoossai immana giido ooratta saluwaanne ooratta sa7aa xilloi de7anasaa” naagoosona. He wode deꞌiya asa ubbay xillonne ammanettiyaagaa gidana.—2 PHeexiroosa 3:13.

Vikttorina Xoossay laamiyaa ehaana gakkanaashin, deꞌuwan o miishshi metiyoogee attees gaada qoppukku. Gidikkokka, a ayyaanaaban dure; hegee miishshan shamettennaba. I naati ammanettiyaageetanne loꞌꞌo kanddoy deꞌiyoogeeta. Eti Woggaa galla ubbatoo, Xoossaa loꞌꞌotettaa bantta shoorotuyyo yootiyo wodenne “tuman bana xeesiya ubbau” i koshshiyaabaa kunttiyoogaa, qassi “bana siiqiyaageeta ubbaa” naagiyoogaa yootiyo wode keehippe ufayttoosona.—Mazamure 145:7, 18, 20.

Vikttoora zambbaa ayfiyaappe zaytiyaa kessiyo paabirkkan oottiyoogaa guyyeppe aggaasu. A gaari geetettiyaabaa (mitta boyyiyaa xiilliyaa) zalꞌꞌiyoogaa doommaasu. A ammanettiyaaro gidiyo gishshau, daroti ippe shammoosona. A sohuwaara, zalꞌꞌiyau goꞌettiyo wodiyaappe poxxada, ammanettenna asi baynna alamiyan deꞌiyo hidootaabaa asau yootanau daro wodiyaa goꞌettana danddayaasu. Guyyeppe azinaa gelaasu; haꞌꞌi anne i azinay kumetta wodiyaa haggaazoosona.

Kiristtiini miishshay bayidoy Yihoowa Markkatu Kawotettaa Addaraashaa mataana. Bileezi shiiquwan beettida asatuppe amaridaageeta erees; shin yan deꞌiya ubbay ubbatoo ammanettanau baaxetiya Kiristtaane ishatanne michota gidiyoogaa erees.

Ubba wode ammanettidaageeta gidanau wozanappe baaxetiya aappun asaa eray? Hegaa mala 50, 100 woykko 200 asaara neeni deꞌiyaabadan qoppa. Yihoowa Markkati bantta Kawotettaa Addaraashatun hegaadan keehi ufayssiya hanotaa beꞌoosona. Neeni yaa baada etaara ayssi erettikkii?

[Sinttaa 12n deꞌiya misiliyaa qonccissuwaa]

“Ammanettiya naati deꞌiyoogee, daro aquwaappekka aadhiyaaba.”—VIKTTORINO

[Sinttaa 14n deꞌiya saaxiniyaa]

Leemiso 6:30y Wuuqqanau Gaaso Gidiyaabaa Yootii?

Leemiso 6:30y: “Kaisoi namisettidi, baayyo maanau wuuqqikko, asai a karenna” yaagees. Ha xiqisee wuussau gaaso gidiyaabaa yootii? Mule yootenna. Xiqisiyaa yuushuwan deꞌiya qofay, kaysoy wuuqqidoban Xoossan oyshettiyoogaa yootees. Kaalliya xiqisee: “SHin i oiqettidabaa gidikko, laappun kushe qanxxana; ba son de7⁠iya miishsha ubbaakka immana” yaagees. (Leemiso 6:31) Namisettidi wuuqqiya ura yaaretidi woy issi ura qohanau wuuqqiya uradan asay borennaba gidikkonne, i ba wuuqqidobaa “qanxxana” koshshees. Xoossan nashettana koyiyaageeti ayba hanotankka wuuqqana koshshenna.