QOFA 4

Laggeta Eratettan Doora

GEESHSHA MAXAAFAY TAMAARISSIYOY AYBEE? “Aadhdhida eranchcha asatuura hemettiya asi aadhdhida eranchcha gidees.”—Lee. 13:20.

XUBE GIDIYAABI AYBEE? Nu laggeti oottiyoobay nuuyyo deꞌiyaaban nuuni ufayttanaadan woy ufayttennaadan oottana danddayees. Eta qofaynne haasayay deꞌuwaa nuuni xeelliyo hanotaa laammiyoogee attenna.—1 Qor. 15:33.

Leemisuwau, Kanaane biittaa wochi simmida 12 asatubaa Geeshsha Maxaafay yootiyoobaa qoppa. Etappe daroti “yuuyi wochchido biittaabaa Israa7⁠eela asaayyo . . . iita oduwaa odidosona.” Gidikkokka, he asatuppe naaꞌꞌati Kanaane biittay “keehi daro lo77⁠o” giidi kehabaa yootidosona. SHin biittaa wochidaageetuppe tammu asati yootido iita qofay asaa ubbaa gakkiis. He taarikee, ‘maabaray ubbay bantta qaalaa xoqqu oottidoogaanne Israaꞌeela asay ubbay zuuzummidoogaa’ yootees.—Qoo. 13:30–14:9.

Hegaadankka ha wodiyan daro asati “zuuzummoosonanne harata amassaloosona.” (Yih. 16) Banttau deꞌiyaaban mule ufayttenna asatuura laggetidi, deꞌiyaaban ufayttidi deꞌiyoogee metiyaaba.

AY OOTTANA DANDDAYAY? Neeni ne laggetuura haasayiyoobaa yuushsha qoppa. Ne laggeti darotoo banttau deꞌiyaaban ceeqettiyoonaa, woy banttau baynnaban zuuzummiyoonaa? Neeni shin etau ay mala laggee? Ne laggeti nebaa qaaqqatanaadan denttettayiyye, eti banttau deꞌiyaaban ufayttanaadan minttettay?

Kawo gidanau deꞌiya Daawitanne Kawuwaa Saaꞌoola naꞌaa Yonaataana leemisuwaa qoppa. Daawiti bete gididi bazzuwan deꞌiis. Kawuwaa Saaꞌooli ba kawotettaassi hirggissiyaabadan qoppidi, Daawita woranau koyiis. Kaallidi kawotanau maatay deꞌiyoy Yonaataana gidikkokka, i Daawitayyo mata laggetuppe issuwaa gidiis. Kawotettaa laattanaadan Xoossay sunttidoy Daawita gidiyoogaa Yonaataani ammanidi, bau deꞌiyaaban ufayttidi ba laggiyaa kaafiis.—1 Sam. 19:1, 2; 20:30-33; 23:14-18.

Bau deꞌiyaaban ufayttiyaanne neessi loꞌꞌobaa amottiya hegaa mala laggee neeyyo koshshees. (Lee. 17:17) Hegaa mala laggeta demmanau neeni ne huuphe he eeshshaa bessana koshshees.—Pili. 2:3, 4.

[Sinttaa 7n deꞌiya misiliyaa]

Ne laggeti neeyyo deꞌiyaaban neeni ufayttanaadan oottiyoonaayye ufayttennaadan oottiyoonaa?