Wolqqaama Hiyyeesatettay Keehi Deexiyaaba!
WOLQQAAMA hiyyeesatettay keehi unꞌꞌissiyaaba. Hegaa giyoogee, gidiya qumaa, haattaa, eettiyoobaanne injje keettaa demmennaagaa, qassi akkamettanaunne tamaaranau danddayennaagaa giyoogaa. Issi biiloone gidiya asay hiyyeesatettan deꞌees; hegee Amarkka biittaa asaa keenaa. Arggo Awurooppaaninne Huuphessa Amarkkan deꞌiya daroti wolqqaama hiyyeesatettay aybakko erokkona. Wolqqaama hiyyeesatettay ay keena deexxiyaabakko ane amaridaagaa beꞌoos.
Mabarushimana geetettiya bitanee Afirkkan Ruwandda giyo biittan ba keettaayeeranne ba ichashu naatuura deꞌees. Usuppuntto naꞌay shekkeeriyan hayqqiis. I hagaadan giis: “Ta aaway ba gadiyaa tana gujjin ba usuppun naatuyyo shaakki immiis. Ta gishshay keehi guutta gidiyo gishshau ta soo asaa ekkada kataman deꞌanau baas. Taaninne ta keettayiyaa shuchaanne shafiyaa tookkoos. Nu keettau maskkootee baawa. Nuuni haattaa tikkiyoy polise xaabiyan deꞌiya ollaappe. Darotoo nuuni qumaa miyoy gallassan issitoo xalla; shin oosoy xayikko, mela peꞌidi aqoos. Naati namisettidi waassiyoogaanne yeekkiyoogaa beꞌennaadan aggada bays.”
Bekttorinne Karmena caammaa sikkoosona. Eti Boliviyaa biittan, haakkidi deꞌiya issi kataman bantta ichashu naatuura deꞌoosona. Ceeggida issi keettan, korintte baynna, aattiya kifiliyaa keraa oyqqidi deꞌoosona. Timirtte keettan keehi daro naati deꞌiyoogaappe denddidaagan oydee baynna gishshau, Bekttori ba naꞌiyaa tamaaranaadan iyyo oydiyaa giigissiis. He azinaynne machiyaa qumaa kattiyoonne uyiyo haattaa penttissiyo mittaa 10 kilo meetiriyaa haakki biidi mixoosona. Karmeena hagaadan gaasu: “Nuuyyo sheeshsha keetti baynna gishshau, asay bollaa meecettiyoonne pituwaa olyo shaafaa biidi sheeshshau uttoos. Nu naati darotoo sakettoosona.”
Franssiskoynne Eledaya Moozambbiken gaxare heeran deꞌoosona. Eta ichashu naatuppe issoy shekkeeriyaa sahettidi, haakimeti maaddennan ixxin hayqqiis. Eti banttau deꞌiya guutta gadiyan ruuziyaa zeroosonanne shukkaariyaa tokkoosona; hegaa eti heezzu aginau goꞌettoosona. Franssiskoy hagaadan giis: “He kattay issi issitoo iray xayin moorettees woykko wuuqettiichees; hegaa gishshau, woyshshaa bayzzada guutta miishshaa demmays. Naaꞌꞌu saate ogiyaa biidi woraappe mittaa mixoos. Taaninne ta keettaayiyaa, issuwaa issi saaminttau nuuyyo qumaa kattanau, haraa qassi bayzzanau naaꞌꞌu tooho mittaa ehoos.”
Biilooniyan qoodettiya asay wogi baynna duretettan deꞌiyo wode, alamiyan deꞌiya 7 asaappe 1y Mabarushimana, Bekttoranne Franssisko hanotaa malan deꞌiyoogee bessiyaaba gidenna giidi daroti qoppoosona. Issoti issoti hegaa giigissanau baaxetidosona. Kaalliya huuphe yohoy eti hidootidobaanne oottidobaa qonccissees.
[Sinttaa 3n deꞌiya misiliyaa qonccissuwaa]
Karmena ba naatuppe naaꞌꞌaara shaafaappe haattaa tikkausu