Iitabaa Ubbau Gaaso Gidida Uri Deꞌii?

RUWANDDA biittan 1994n, meqetti baynna hanotan asaa busakkidoogaa beꞌido gishshau, Kawotettatu Issippetettaa wotaaddaratu halaqay, he hanotay Dabloosa beꞌidoba mala gidiyoogaa yootiis. He biittan 1994n butettiyoogaa agganaadan asaa teqqenna mala a halaqay a azaziis. Ammananau deexxiya ha hanotaa beꞌida hara bitanee hagaadan giis: “Seexaanay deꞌiyoogaa ammanenna uri deꞌikko, Ruwandda biittan daro asay issippe moogettidosan tanaara gaytto.” Hegaa mala meqetti baynnabaa oottiyay tumuppe Dabloosee?

Eriiddi asa qohanau meqetti baynnabaa oottiyoogaa daro asay ayfiyan beettenna iita ayyaana mereti oottiyoobadan xeellenna. Daroti hegaa malabay haniyoy asaa naati laattido iitatettaa gaasuwaana, qassi iitatettau waanna gaasoy asay ba xallaa siiqiyoogaa giidi qoppoosona. Alame yuushuwan deꞌiya, durenne wolqqaama gididaageeti, geemettidi alamiyaa haaranau daro layttau asay eta sheniyaa polanaadan oottiyoobadan harati qoppoosona. Pirdda pacaanne tugga ubbau kawotettatinne haariyaageeti oyshettiyaabadan qoppiyaageetikka deꞌoosona.

Intte qofay aybee? Iitatettaa, meqetti baynna hanotaa, danobaanne tuggaa xayssanau baaxetishin, ha wodiyan kumetta saꞌan hegee daridoy aybissee? Zaaretti zaarettidi yootidobaa akeekennan ixxidi, asaa naati yuushshi qoppennan banttana qohiyaabaa oottanau dirbbiyaaba milatiyoy aybissee? Ha ubbabau gaaso gidida uri deꞌii? Alamiyaa tumuppe haariyay oonee? Hegaa zaaroy inttena maalaalissana danddayees.