Alamiyaa Haariyay Tumuppe Oonee?

CITAN danobaa oottiyaageetu halaqa gidida oonanne intte mule beꞌi erennaageeta gidana danddayeeta. Hegaa giyoogee eti deꞌokkona giyoogee? Danobaa oottiyaageetu halaqati bantta hanotaa genttiyoogan woy qashetti uttidikka harati danobaa oottanaadan kaalettiyoogan keehi gooba. Gidoppe attin, jallissiya xaliyaara gayttidaagan denddiya olaa, danobaa oottiya shaaramuxiyaageetu maabaraanne bessenna ogiyan asaa issisaappe harasaa efiyoogaa mala hanotaa xeelliyaagan gaazeexan kiyiyaabati, hegaa mala oosoy qohiyoogaanne iitabaa kaalettiyoogaa, qassi he dano oosuwaa oottanaadan kaalettiya uri deꞌiyoogaa nuuni akeekanaadan oottoosona. Danobaa oottiyaageeta kaalettiyaageeti deretettaa bolli gattiyo qohuwan, eti deꞌiyoogaa eroos.

Seexaanay danobaa oottiyaageeta kaalettiya uradan, ‘worddo malaataaninne’ “iita cimuwan” ba shenee polettanaadan oottiyaagaa gidiyoogaanne i tumuppe deꞌiyoogaa Geeshsha Maxaafay qonccissees. Seexaanay “poo7o kiitanchcha milatanau ba meraa” laammiyoogaa Geeshsha Maxaafay yootees. (2 Tas. 2:9, 10; 2 Qor. 11:14) Dabloosi oottiyooban i deꞌiyoogaa erana danddayoos. SHin daro asay ayfiyan beettenna iita ayyaanay deꞌiyoogaa ammananau metootees. Geeshsha Maxaafay Dabloosabaa yootiyoobaa loyttidi pilgganaappe kase, daroti Dabloosi tumuppe deꞌiyoogaa ammanennaadan oottiya, meeze gidida qofaanne wordduwaa ane beꞌoos.

◼ “Siiqo Xoossay waatidi Dabloosa medhana danddayii?” Geeshsha Maxaafay Xoossay loꞌꞌonne polo giyo gishshau, i iitabaa oottiya, iita meretaa medhiis giidi qoppiyoogee hegaara phalqqettiyaaba milaatees. Hegaa mala ura Xoossay medhibeennaagaa Geeshsha Maxaafay yootees. Hegaappe dumma ogiyan, Geeshsha Maxaafay Xoossaabaa, “I nu zaallaattennee. A oosuwan wotoi baa; a oge ubbaikka suure. Nu Xoossai ammanettiyaagaanne iitatettai bainnaagaa; i tumanchchanne suure” yaagees.—Zaa. 32:4; Maz. 5:4.

Xoossay medhido polo uri suure gidennabaa oottana danddayiyoogaa woy danddayennaagaa qoppana bessees. Xoossay ba medhidobata roobotedan gidennan bantta koyidobaa oottiyo—koyidobaa dooriyo maatay deꞌanaadan oottidi medhiis. Yaatiyo gishshau, polo gidida, issi qoppiya mereti loꞌꞌobaa woy iitabaa oottanau doorana danddayees. Asa gidin ayyaana gidin, qoppiya mereti koyidobaa dooridi oottiyo maati baynnaba gidikko, kandduwaara gayttidaagan iita woy loꞌꞌo giyoobi deꞌana danddayennaagee tuma.

Yaatiyo gishshau, Xoossay ba meretatussi kandduwaa laꞌatettaa immenna; hegaadankka eti oottanau doorikko iitabaa oottennaadan diggenna. Yesuusi Dabloosi, “Tuman minni eqqibeenna” giido wode, koyidobaa dooriyo maataa bala ogiyan goꞌettiyoogaabaa qonccissiis. (Yoh. 8:44, NW) Ha qofay, guyyeppe Dabloosa gididaagee koyro polo gidida ayyaana mereta gidiyoogaa, qassi issi wode ‘tuman minni eqqidoogaa’ bessees.a Yihooway ba meretata siiqiyoonne etan ammanettiyo gishshau, koyidobaa dooriyo maatay deꞌiyoogeeta oottidi medhiis.—“Polo Mereti Polo Gidiyoogee Attana Danddayii?” giya saaxiniyaa sinttaa 6n xeella.

◼ “Dabloosi Xoossaa ashkkaraa” Issotu issootuyyo Geeshsha Maxaafan Iyyooba maxaafay ha qofaa yootiyaaba milatees. Dabloosi ‘saꞌan ubban yaanne haanne yuuyidoogeenne simerettidoogee,’ beni Parsse biittan yuuyidi, beꞌidobaa kawuwau yootiya, biittaa wochiyaageeti oottiyoobaa mala gidiyoogaa, Geeshsha Maxaafaa qofaa qonccissiya issi xuufee yootees. (Iyy. 1:7) SHin, Dabloosi tumuppe Xoossay kiittin wochiyaagaa gidikko, i “sa7an ubban yaanne haanne yuuyiyoosaappenne simerettiyoosaappe” yiidoogaa Xoossaayyo yootana koshshidoy aybissee? Iyyooba maxaafan deꞌiya taarikee Dabloosa Xoossaayyo oottiyaabadan gidennan, “Eqettiyaagaa” giyo birshshettay deꞌiyo, Seexaanaa giya sunttan qonccissiyoogan i Xoossaayyo waanna morkke gidiyoogaa bessees. (Iyy. 1:6) Yaatin, Dabloosi Xoossaayyo oottiyaagaa giya qofay awuppe yiidee?

Koyro xeetu layttaa M. L. heeran xaafettida “Jubliis Maxaafaa,” qassi Kumiran giyoosaa haymaanootiyaa citay goꞌettiyo “Deretettaa Higgiyaa” giyoogaa mala apokirayfal maxaafati Dabloosi Xoossaara palamettiyaaba gidikkokka, Ayyo haarettiyoogaa yootoosona. Haymaanootiyaa mooruwaa eqettida, Protesttantte gidida Martin Luuteri, Dabloosi, “Xoossay goꞌettiyo miishsha, ba ataakilttiyaa bulꞌꞌanaunne giigissanau goꞌettiyoobaa mala” giidoogaa taarikiyaa xaafee J. B. Rasili yootiis. Rasili gujjidi, Luutera xeelan “bulꞌꞌiyoobay sharafaa xayssiyoogan ufayttees”; shin Xoossaa sheniyaa polanau Xoossaa wolqqaama kushiyan deꞌiyoogaa yootiis. Luuteri tamaarissidonne Paransaaye biittaa asa gidida, haymaanootiyaa asttamaaree Jon Kalvini guyyeppe maayidobay, suure pirddaa koyiya ammaniya darotu qofaara moggenna. Siiqo Xoossay iitatettay deꞌanaadan waati paqqadii; ubba qassi waanidi iitabay oosettanaadan koyii? (Yaaq. 1:13) Ha timirtteenne 20tta xeetu layttan hanida yashshiyaabay, daroti Xoossaynne Dabloosi deꞌiyoogaa ammanennaadan oottiis.

◼ “Dabloosi iita qofa” Dabloosi iita qofa xalla giidi qoppiyoogee Geeshsha Maxaafan deꞌiya issi issi qofay akeekanau metanaadan oottiis. Leemisuwau, Iyyooba 2:3-6y yootiyoogaadan Xoossay oonaara haasayidee? I Iyyooba giddon deꞌiya iita qofaara woy barkka baayyo haasayidee? Gujjidikka, Xoossay Iyyooba a loꞌꞌo eeshshaa gishshau nashshidi, hegaappe simmidi sohuwaara i iita qofan paacettanaadan paqqadanee? Xoossau hegaa mala qofay deꞌees giyoogee, “iitatetti” Baynnaagaa gidennan, i keehi iita giyoogaa mala. (Maz. 92:15) Hegaappe dumma ogiyan, Xoossay ‘ba kushiyaa yeddidi’ Iyyooba qohanau koyibeenna. Dabloosi iita qofa woy Xoossau deꞌiya iita eeshsha gidennan, bana Xoossaa Morkke oottida, ayyaana mereta gidiyoogee qoncce.

Tumuppe Alamiyaa Haariiddi Deꞌiyay Oonee?

Dabloosi deꞌees giyoogee ha wodiyau hanenna beni wode ammano giidi daroti qoppoosona. Gidikkokka, oosettiya iitabaayyo gaasoy Dabloosappe attin haraa giidi qoppiyoogee ammanttiyaaba gidenna. Dabloosi baawa giidi qoppiyoogee daro asay Xoossaanne kandduwaa maara ubbaa koyennaadan oottiis.

SHarl Piyer Budileer giyo 19tta xeetu layttan danttuwaa xaafiyaagee, “Dabloosi cimmiyo waanna ogee i deꞌiyoogaa nuuni ammanennaadan oottiyoogaa” yaagiis. Ba hanotaa genttiyoogan, Dabloosi Xoossay deꞌiyoogaa asay siranaadan oottiis. Dabloosi baynnaba gidikko, hegee iitatetta ubbau Xoossay oyshettanaadan oottiyaaba gidennee? Dabloosi asay ammananaadan koyiyoobay hegaa gidennee?

Danobaa oottiyaageetu halaqaadan, Dabloosi ba koyiyoobaa polanau ba hanotaa genttees. I koyiyoobay aybee? Geeshsha Maxaafay hagaadan gees: “Ha sa7aa Xoossai ammanenna asatu qofaa jallissiis; jallissidi Kiristtoosa bonchchuwaa, wonggeliyaa mishiraachchuwaa poo7uwaa banttau poo7iyaagaa, Xoossaa milatiyaagaa eti be7enna mala, eta diggiis.”—2 Qor. 4:4.

SHin zaaroy keehippe koshshiyo issi oyshay dees. Iitabaunne tugga ubbau gaaso gidida, ba hanotaa genttidaagaa Xoossay waatanee? Hegaa kaalliya huuphe yohuwan beꞌana.

[Tohossa qofaa]

[Sinttaa 5n deꞌiya misiliyaa qonccissuwaa]

Dabloosi Xoossaa ashkkareeyye, woy Xoossaara eqettiyaagee?

[Sinttaa 6n deꞌiyaagaa qonccissuwaa]

Polo Mereti Polo Gidiyoogee Attana Danddayii?

Xoossay medhido qoppiya meretatuyyo deꞌiya polotettay zawi deꞌiyoogaa. Addaamee polo gididi merettidaba gidikkonne, Xoossay meretan ayyo wottido zawaa bonchidi deꞌana koshshees. Leemisuwau, i biittaa, shuchaa woy mittaa miikko hegee kaalettiyooban qohettana danddayees. I biittaa dafo higgiyaa sheneho giidi xoqqa sohuwaappe guppiyaaba gidikko, keehippe qohetees woykko hayqqees.

Hegaadan, asa gidin kiitancha gidin, kandduwaaban Xoossay wottido zawaa kanttidi qohettenna polo mereti baawa. Yaatiyo gishshau, qoppiya mereti ba koyidobaa oottiyo maataa bessenna ogiyan goꞌettiyo wode, i sohuwaara balabaanne nagaraa oottees.—Doo. 1:29; Maa. 4:4.