Nabbabiyaageetu Oyshaa . . .

Armmageedooni Aybee?

▪ “Armmageedoona” giya qaalay daroti niyukileeriyaa olaa, meretay gattiyo wolqqaama daafaa woy qassi alamiyan hombbee gujji gujji biyoogee heeran kaalettiyo daafaa mala, asaanne darobaa issippe xayssiyoogaa hassayanaadan oottees. He qaalay Geeshsha Maxaafan hegeetuppe augaanne malaatenna. Yaatin, Geeshsha Maxaafay yootiyo Armmageedooni aybee?

“Armmageedoona” giya qaalay, Geeshsha Maxaafan Ajjuutaa maxaafan deꞌees. Hegee, ‘saꞌaa kawotetta ubbay’ wurssettan Xoossaara olettanau denddiyo, “Ubbaappe Wolqqaama Xoossaa” gita gallassaa olaa malaatees. He olaabaa yootiya hara daro xiqisetikka deꞌoosona.—Ajj. 16:14-16; Hiz. 38:22, 23; Yuu. 3:12-14; Luq. 21:34, 35; 2 PHe. 3:11, 12.

He olan aybi hananee? Hegaa zaaruwaa Ajjuutaa maxaafay leemiso hanotan, “Paraa toggidaagaaranne a wotaaddaratuura olettanau, . . . sa7aa kawoti qassi eta wotaaddarati issisaa shiiqi” uttidosona yaagidi qonccissees. ‘Paraa toggidaagee,’ olettiya daro shaꞌu kiitanchati Xoossaa morkketa xoonanaadan kaalettiya, Xoossay sunttido, A Naꞌaa Yesuus Kiristtoosa. (Ajj. 19:11-16, 19-21) Xoossaayyo azazettenna ay keena asay xayanaakko Ermmaasa 25:33y hagaadan giidi qonccissees: “GODAI woridoogeetu ahai, biittaa bollan ha gaxaappe hini gaxaa gakkanau laalettana.”

Armmageedoona olay denddana koshshidoy aybissee? Kawotettati Xoossaa haaruwaa ixxidi banttaagaa erissana koyoosona. (Maz. 24:1) Mazamure 2:2y, “Sa7aa kawotinne deriyaa haariyaageeti denddidosona; eti GODAA bollinne GODAI tiyidoogaa bolli issippe shiiqidosona” yaagidi eti eqettiyoogaa qonccissees.

Ha makkalanchati banttabaa gidennabaa banttabaa giyoogaa xalla gidennan, hegaa bessenna ogiyan goꞌettiyaanne mooriya, banttau ekkanau gajajjida asatu mala. Ha wodiyan kawotettati saꞌaa mooriiddinne heeraa hambbalaachiiddi deꞌoosona. Ha iita hanotaa Geeshsha Maxaafay, “Asai hanqqettiis; ne hanqqoikka gakkiis” yaagidi kasetidi yootiis. Xoossay he wode “sa7aa xaissiyaageetakka” xayssana. (Ajj. 11:18) Armmageedooni asaa haaranau bessiyay oonakko xeelliyaagan denddida oyshaa Xoossay zaariyo oge.—Maz. 83:18.

Armmageedoona olay denddanay awudee? Xoossaa Naꞌay, “He gallassaanne he saatiyaa Aawaa xalaalaappe attin, harai atto saluwan de7iya kiitanchchata gidin, woi tana Na7aa gidinkka ooninne eriyaabi baawa” yaagidi geeshshi yootiis. (Maa. 24:36) Hegee tuma gidikkonne, Armmageedoona xeelliyaagan, Olancha Kawuwaa Yesuus Kiristtoosi, “Be7a, taani kaisodan yaana. . . . Xiskkennan ba maayuwaa maayidi naagiya urai anjjettidaagaa!” yaagidikka yootiis. (Ajj. 16:15) Yaatiyo gishshau, ha alame yuusho olay Kiristtoosa yuussaara gayttidaba; Geeshsha Maxaafaa hiraagay he yuussay polettiiddi deꞌiyoogaa bessees.

Armmageedoona olay iitabaa oottanau murttidaageetu xallaa xayssana; qassi “zawai bainna daro” asay he olaappe attana. (Ajj. 7:9-14) “Iitaa oottiyaageeti guutta wodiyaappe guyyiyan de7okkona; neeni eta koyiyaakkokka eti beettokkona. SHin ashkketi biittaa laattana; eti sarotettaaninne duretettaani ufaittidi daana” yaagiya hidootay polettiyoogaa eti beꞌana.—Maz. 37:10, 11.

[Sinttaa 20n deꞌiya misiliyaa qonccissuwaa]

“Ashkketi biittaa laattana; eti sarotettaaninne duretettaani ufaittidi daana”