Geeshsha Maxaafaa Maaraadan DEꞌANA KOSHSHIYOY AYBISSEE?
ASHO gaytotettaa xeelliyaagan Geeshsha Maxaafay yootiyoobay ha wodiyau koshshennabee, qassi ubbabaa diggiyaabee? Akkay. Hegaappe dumma ogiyan, asho gaytotettaa xeelliyaagan Geeshsha Maxaafay yootiyoobay, nuuni kaallidi deꞌiyaabatuppe haakkanaadan maaddana danddayees:
▪ Asho gaytotettan oyqqiya harggiyaa
▪ Aqo lagge gidenna urau shahaariyoogaa
▪ Aqo deꞌoy laalettin gakkiya azzanttiyaabaa
▪ Moorancha gi mootiya zoriyaa wozanaa
▪ Hara uri ba koshshaa poliyooba gidido gishshau bana ziqqi oottidi xeelliyoogaa
Nuna Medhida, Xoossaa Yihoowaya i immido imotan nuuni ufayttanaadaaninne goꞌettanaadan koyees. Xoossay “nena maaddiyaabaa tamaarissiyaagaa.” (Isi. 48:17) Asho gaytotettaa xeelliyaagan Geeshsha Maxaafaa zoriyaa oosuwan peeshshiya uri kaallidi deꞌiya anjjuwaa demmees:
▪ Xoossan nashettiyoogaa
▪ Qofaa sarotettaa
▪ So asaa dabbotay kaseegaappe minniyoogaa
▪ Loꞌꞌo sunttaa
▪ Ba huuphessi loꞌꞌo xeelay deꞌiyoogaa
Gidikkokka, haꞌꞌi neeni deꞌiyoy Geeshsha Maxaafaa kandduwaa maaraadaana gidana xayikko shin? Ne deꞌo ogiyaa laammana danddayay? Neeni kase oottidoban Xoossay nena qaxxayanee?
Hagaa qoppa: Koyro xeetu layttaa Kiristtaane gubaaꞌiyan deꞌiyaageetuppe issoti issoti kase shaaramuxiyaageeta, wodiraa laammiyaageeta, qassi attuma asa gididi attuma asaara shaaramuxiyaageeta. Eti bantta deꞌo ogiyaa laammidosona; qassi daro anjjuwaa demmidosona. (1 Qor. 6:9-11) Ha wodiyan, alame yuushuwan deꞌiya, shaꞌan qoodettiyaageeti hegaa malabaa oottidosona. Eti shori baynna duussaa deꞌiyoogaa aggidi, Geeshsha Maxaafaa maaraadan deꞌiyoogan beettiya anjjuwaa demmidosona. Leemisuwau, koyro huuphe yohuwan yootido, Saara ba deꞌuwan beꞌidobaa akeeka.
“Taani Sohuwaara Woppaa Demmaas”
Saara yeelli baynna deꞌuwaa deꞌiyoogee a amottido laꞌatettaanne woppaa demissibeennaagaa akeekaasu. Hagaadan gaasu: “Ta zoriya wozanay donjjilidabadan tau siyettiis. Taani yeellataas; qassi shahaarays woykko iita harggiyan oyqettays gaada hirggaas. Xoossay deꞌiyoogaa mule sira erikke; qassi ta deꞌo ogee a azzanttiyoogaa erays. Taani tunidabadan tau siyettiis; qassi hegee tana hittissiis.”
Wurssettan, Saara ba deꞌo ogiyaa laammanau wolqqaa demmaasu. Yihoowa Markka gidida, o yelidaageeti maaddanaadan koyaasu. A bantta gubaaꞌiyan deꞌiya, kaymida cimati maaddanaadankka oychaasu. Saara, “Tana yelidaageetunne gubaaꞌiyaa cimatu qaretaaninne siiquwan garamettaasinne ufayttaas. Taani sohuwaara woppaa demmaas” yaagaasu.
Haꞌꞌi Saara ba naaꞌꞌu naata dichausu. A hagaadan gaasu: “Taani oottidobaa ta naatussi qosennan yootays. Xoossay kessido maaraa sheneho giidoogee tana ay keena qohidaakko eti akeekanaadan koyays. Ta halchoy, asho gaytotettaa xeelliyaagan Xoossay kessido maaraadan deꞌiyoogee, asatettaaninne qofan goꞌꞌiyoogaa eti akeekanaadaaninne nashshanaadan maaddiyoogaa. Xoossay nuuni qohettin beꞌanau koyenna gishshau, nuuyyo kandduwaa maaraa immidoogaa ammanays.”
Xoossay siiquwan immiyo kaaletuwaa kaalliyoogee goꞌꞌiyoogaa neenikka ne deꞌuwan beꞌana danddayaasa. Geeshsha Maxaafay, “GODAA wogai likke; wozanaa ufaissees. GODAA azazoi geeshsha; wozanaa poo7issees. . . . Ne higgiyaa naagiyoogan taani daro go7ettais” yaagidi, hidooti deꞌanaadan oottiyaaba yootees.—Maz. 19:8, 11.b
[Tohossa qofata]
a Yihoowa giyaagee Geeshsha Maxaafan qonccida, Xoossaa sunttaa.
b Geeshsha Maxaafan deꞌiya, goꞌꞌiya zoriyaabaa gujjada eranau, ne heeran deꞌiya Yihoowa Markkatuura gayttanau guyye gooppa. Woykko sinttaa 4n deꞌiya adrashatuppe neeyyo injjetiyaasaa xaafana, woy www.watchtower.org giya Weyb saytiyaa goꞌettana danddayaasa.
[Sinttaa 8n deꞌiya misiliyaa qonccissuwaa]
Geeshsha Maxaafaa maaraa sheneho giyaageeti darotoo harati azzananaadan oottoosona
[Sinttaa 9n deꞌiya misiliyaa qonccissuwaa]
Geeshsha Maxaafaa maaraadan deꞌiyaageetu zoriya wozanay eta qumꞌꞌenna; qassi eta so asaa dabbotay kaseegaappe minnees