Abrahaama—Xalatettan Erettidaagaa
Abrahaami ba soo asaynne ba ashkkarati Kanaane baanau giigettiyaageeta xeellees. (Doo. 12:1-5) Abrahaami bantta deꞌuwau koshshiyaabau a yaynniya he cora asaa xeelliyo wode, eta ayssanau bau deꞌiya aawatettaa loyttidi akeekees. I erenna biittan aquwaaban etau koshshiyaabaa waatidi kunttanee? Hegee aaho hentta gadee, aradda biittaynne daro haattay deꞌiyo dure katamaa Uuran metennabeeshsha? I he biyo biittan sahettikko woy hayqqikkoshin? A soo asau koshshiyaabaa kunttanay oonee? Abrahaami hegaa malabau hiriggidaba gidiyaakkonne, he hirggay a guyye giissanaadan paqqadibeenna. I tangguwaa ekkanau, giishin ayba gidikkokka, Xoossaa azazuwaa azazettanau murttiis; hegee tumu xalatettaa bessiyaaba.
XALATETTAY AYBEE? Xalatettay, minonne zirxxa gidiyoogaa, giishin yashshan kokkoriyoogaappe woy yooqiyooqiyoogaappe dummatiya eeshsha. Xala gidiyoogaa giyoogee nuuni mule yayyokko giyoogaa gidenna. Hegaappe dumma hanotan, Xoossay xalatettaa immido uri yayyiyaaba gidikkokka tangguwaa ekkees.
ABRAHAAMI XALA GIDIYOOGAA BESSIDOY AYBA OGIYAANEE? Abrahaami daro asaagaappe dummabaa oottanau dooriis. Abrahaami diccidoy asay daro eeqa xoossatuyyo goynniyo heeraana. Gidikkokka, hara asay woyganddee giidi yayyiyoogee, i eriyo suure gididabaa oottiyoogaappe guyye giissanaadan paqqadibeenna. Hegaappe dumma hanotan, Abrahaami xalan ba deꞌuwan hara asaagaappe dummabaa oottiis; giishin “Ubbaappe Xoqqiya,” issi Xoossaa Yihoowa xalaalau goynnanau dooriis.—Doo. 14:21, 22.
Abrahaami aquwaabaa koshshaappe tumu Xoossau goynniyoogaa kaseyiis. I Uuran deꞌiya ishalo deꞌuwaa aggidi, aquwaassi a koshshiyaabaa Yihooway kunttanaagaa wozanappe ammanettidi, asi baynnasaa biis. Aqi peꞌidi, Abrahaami Uuran ishaluwan deꞌido deꞌuwaabaa qoppana danddayiyoogee tuma. SHin ayyoonne a soo asau koshshiyaabaa Yihooway ubbatoo kunttanaagaa Abrahaami ammanettiis. Abrahaami ba deꞌuwan Yihoowa ubbaappe xoqqu ootti xeellidi, Xoossaa baxuuxiyoogan a azazuwaa azazettanau xaliis.
NUUNI HEGAAPPE TAMAARIYOOBAY AYBEE? Nu heeran deꞌiya asay Yihoowayyo azazettana xayikkokka, nuuni xalan azazettiyoogan Abrahaama leemisuwaa kaallana danddayoos. Leemisuwau, Xoossaa Yihoowa ammaniyo ammanuwau exatiyaageetu bolli, etau loꞌꞌobaa qoppidi, laggetinne dabboti yedetaa gattana danddayiyoogaa Geeshsha Maxaafay yootees. (Yoh. 15:20) Gidikkokka, nuuni Yihoowabaa tamaaridobaa ammaniyo wode, harata bonchiyoogaa bessiya hanotan nu ammanuwau exatoos.—1 PHe. 3:15.
Xoossay banan ammaniyaageetussi koshshiyaabaa kunttanau gelido qaalankka ammanettana danddayoos. Hegaadan ammanettiyoogee nu deꞌuwan aquwaabaa gidennan ayyaanaabaa kaseyanau xalanaadan oottees. (Maa. 6:33) Issi keettaa asay hegaadan waatidi oottidaakko akeeka.
Daginne Beeka, etau naaꞌꞌu guutta attuma naati deꞌiyaaba gidikkokka, Geeshsha Maxaafaa mishiraachuwaa sabbakiyaageeti keehippe koshshiyo biitta baanau koyidosona. Hegaa xeelliyaagan akeekan pilggidinne mintti woossidi, bantta qoppido sohuwaa baanau qofaa qachidosona. Daagi hagaadan giis: “Nuuyyo hanotay waananaakko erennan naata ekkidi baanau xalana koshshiis. SHin nuuni hegaadan oottanau koyro qoppiyo wode, Abrahaamanne Saari leemisuwaabaa tobbida. Eti ayba ogiyan Yihoowan ammanettidaakko, qassi i eta mule aggibeennaagaa qoppiyoogee nuna tumuppe keehi maaddiis.”
Eti asa biittan deꞌido deꞌuwaabaa Daagi, “Nuuni daro ogiyan anjjettida” yaagiis. I hagaadan giidi qonccissiis: “Nu deꞌoy kaseegaappe keehi sima gidiyo gishshau, sabbakiyoogan, issoy issuwaara haasayiyoogaaninne naatuura kaaꞌiyoogan, so asay gallassaappe dariya baggaa issippe aattoos. Laꞌatettaa demmidoogan nuussi siyettiyaabaa qonccissana danddayokko.”
Hegaa mala kuushshaa kuuyana danddayiyay ubba asaa gidennaagee tuma. SHin Xoossay nuna maaddanaagaa ammanettidi ayyo goynniyoogaa kaseyiyoogan, nuuni ubbay Abrahaama leemisuwaa kaallana danddayoos. Hegaadan oottiyo wode, “nuuni xalidi, ‘Godai tana maaddiyaagaa; taani yayyikke’” gaanaadan Geeshsha Maxaafay zoriyo zoriyaa oosuwan peeshshoos.—Ibr. 13:5, 6.
[Sinttaa 7n deꞌiya misiliyaa qonccissuwaa]
Xoossau Yayyiya Alꞌꞌo Machiyo
Saara ammanuwan erettiya bitaniyaa gelaasu. SHin Xoossau yayyiya ha maccaasiyaa ba huuphe loꞌꞌo leemiso gidiyaabaa oottaasu. Saara Xoossau yayyiya maccaasati kaallana koshshiya loꞌꞌo leemiso gidiyoogaa, Geeshsha Maxaafay heezzutoo yootees. (Isi. 51:1, 2; Ibr. 11:11; 1 PHe. 3:3-6) Geeshsha Maxaafay ha loꞌꞌo maccaaseebaa yootiyoobay guutta gidikkokka, iyyo loꞌꞌo eeshshay deꞌiyoogaa nuuni akeekana danddayoos.
Leemisuwau, Uura katamaappe kiyidi baanaadan Xoossay azazidoogaa Abrahaami Saariyyo yootiyo wode, iyyo aybi siyettidaakko qoppa. Eti awa biyaakko, qassi aybissi biyaakko erennaagee o qofissidee? Aquwaaban banttau koshshiyaabau hirggadee? A ba laggetanne bantta soo asaa awude beꞌanaakko, ubba mule beꞌennan attanaakko erennan, eta aggada biyoogaa qoppada azzanadee? A hegaa malabaa qoppidoogee sirissenna. Gidikkokka, azazettido gishshau Yihooway bana anjjanaagaa ammanettada, ba dosan aggada baasu.—Oos. 7:2, 3.
Saara Xoossau azazettiya ashkkara gidiyoogaa bolli, keehippe loꞌꞌo macho. Saara so asaa ayssanau ba azinaara keesettiyoogaappe, a keehippe bonchaasu; so asaa i kaalettiyo wode siiquwan kaafaasu. Hegaadan oottiyoogan, ba loꞌꞌo eeshshan bana puulayaasu woy alleeqettaasu.—1 PHe. 3:1-6.
Hegaa mala eeshshay ha wodiyan deꞌiya machota maaddana danddayii? Aqo deꞌuwan 30 layttaa ufayssan deꞌida Jiilo giyo maccaasiyaa, “Maayettennabaa yayyennan ta azinau yootananne ta qofaa qonccissana koshshiyoogaa Saari leemisuwaappe tamaaraas” yaagaasu. A gujjada hagaadan gaasu: “Hegaadankka, so asau huuphe gidiyoogaadan issibaa wurssettan kuuyana koshshiyay ta azinaa. I kuuyobare, he kuushshay polettanaadan taayyo danddayettiyaabaa ubbaa oottana koshshees.”
Nuuni Saarippe tamaariyoobatu giddon i leemisuwaa kaallanaadan keehi denttettiyaabay, Saara meraa keehippe loꞌꞌiyaaba gidikkokka, hegee a otorettanaadan oottana mala paqqadabeennaagaa gidennan aggenna. (Doo. 12:10-13) A otorettiyoogaappe, bantta deꞌuwan iita wodiyaaninne loꞌꞌo wodiyan ubban ba huuphiyaa kawushshada Abrahaama kaafaasu. Abrahaaminne Saara ammanettiya, bantta huuphiyaa kawushshiyaanne siiqettiya, qassi issoy issuwau tumuppe anjjo demissida azinanne macho gidiyoogee sirissenna.