Abrahaama—Ashkketettan Erettidaagaa

Abrahaami issi gallassi hombbee suulliyaagan shemppanau ba dunkkaaniyan uttiis. Abrahaami ba ayfiyaa denttidi haahosaa xeelliyo wode, he heera yiida heezzu asata beꞌiis.a Eesuwaara etakko woxxi biidi, eti ba matan guuttaa shemppi ekkanaadaaninne imatuwaa shoobettanaadan woossiis. ‘Miyo’ guuttabaa etau immanau shoobbiis, shin oyttay, maattay, oyssaynne anqqara mehiyaa ashoy deꞌiyo wolqqaama gibiraa giigissiis. Abrahaami imattatuyyo he qumaa giigissiyoogan, imattaa loyttidi mokkiyoogaa xalla gidennan, nuuni kaallidi beꞌanaagaadan, tumuppe ashkke gidiyoogaa woykko ba huuphiyaa kawushshiyoogaakka bessiis.—Doo. 18:1-8.

BA HUUPHIYAA KAWUSHSHIYOOGAA GIYOOGEE WOYGIYOOGEE? Ba huuphiyaa kawushshiyoogaa woykko ashkke gidiyoogaa giyoogee otorettennaagaa woy axiraarennaagaa giyoogaa. Ba huuphiyaa kawushshiya uri ubba asay issi issiban baappe aadhiyoogaa akeekees. (Pili. 2:3) Harati yootiyoobaa ezggees; qassi bana kawushshiyoogaa bessiya oosuwaa etayyo oottees.

ABRAHAAMI BA HUUPHIYAA KAWUSHSHIYOOGAA BESSIDOY AYBA OGIYAANEE? Abrahaami ufayttidi haratussi oottiis. Ha huuphe yohuwaa doomettan beꞌidoogaadan, Abrahaami he heezzu asata beꞌido wode, eesuwaara etau koshshiyaabaa giigissiyoogaa doommiis. A keettaayiyaa Saara sohuwaara qumaa kattiyoogaa doommaasu. SHin he oosuwaappe dariya baggaa ooni oottidaakko akeeka: Abrahaami imattatuura gayttanau woxxiiddi biis; etau miyoobaa immanau i shoobbiis; woxxi biidi, shukkanau mehiyaappe issuwaa i dooriis; qassi giigissido ubbabaa i imattatu sintti attiis. Ubbabaa ba ashkkarati oottanaadan azaziyoogaappe, ba huuphiyaa kaushshiya ha bitanee koshshiya ubbabaa oottiis. Haraatuyyo oottiyoogaa bana kawushshiyaabadan xeellibeenna.

Abrahaami ba aawatettaa garssan deꞌiyaageeti yootiyoobaa siyiis. Abrahaami Saariira haasayidobaappe Geeshsha Maxaafay yootiyoy keehi guutta. Gidikkokka, Abrahaami Saara yootiyoobaa siyidi oosuwan peeshshidoogee naaꞌꞌutoo xaafettiis. (Doo. 16:2; 21:8-14) Hegeetuppe issuwan, a yootidoban koyro “Abrahaami keehippe metootiis.” SHin Yihooway Saara yootidobaa loꞌꞌobadan qoodidi, Abrahaama haasayissido wode, Abrahaami bana kawushshidi a yootidobaa oosuwan peeshshiis.

NUUNI HEGAAPPE TAMAARIYOOBAY AYBEE? Nuuni tumuppe nu huuphiyaa kawushshiyaageeta gidikko, haratussi oottanau ufayttoos. Eta deꞌoy kaseegaappe injjetanaadan maaddiyaabaa aybanne oottiyoogee nuna ufayssees.

Hara asay yootiyoobaa siyiyoogankka nu huuphiyaa kawushshiyaageeta gidiyoogaa bessana danddayoos. Nuuni qoppibeennaba gidiyo gishshau haratu qofaa siyennan ixxiyoogaappe, eti yootiyoobaa siyiyoogee eratetta. (Lee. 15:22) Hegaa mala loꞌꞌo xeelay aawatettay deꞌiyoogeeta keehippe maaddiyaaba. Issi oosuwaa alaafe gididi daro wodiyaa oottida Joona giyo bitanee, “Loꞌꞌo hanotan oosuwaa bollaara xeelliya uri, asay yayyennan ba qofaa yootanaadan oottiyoogaa akeekaas” yaagiis. I gujjidikka hagaadan giis: “Neeni bollaara xeelliyo oosuwaa oottiya uri neegaappe loꞌꞌo ogiyan oottana danddayiyoogaa ammana ekkanau ne huuphiyaa kawushshana koshshees. SHin oonanne gidin, ubba oosuwaa bollaara xeelliyaagaakka gidin, loꞌꞌo qofaa eriyay a xalla gidenna.”

Haraatu qofaa siyiyoogan, qassi nuna kawushshiyoogaa bessiya oosuwaa etau oottiyoogan Abrahaama leemisuwaa kaalliyo wode, Yihoowan nashettoos. “Xoossai otorettiyaageeta ixxees; shin banttana kaushshiyaageetuyyo aaro kehatettaa immees.”—1 PHe. 5:5.

[Tohossa qofaa]