An Deꞌiya Hiraagay Polettees
“GODAI intte Xoossai intteyyo immana giido lo77o ubbaappe . . . issibinne attennan, ubbai polettiis.” —YAA. 23:14.
GEESHSHA MAXAAFAY DUMMA GIDIDOY AYBA OGIYAANEE? Beni wode kaayoykka ha wodiyan xoolinttiyaa xeellidi sintta wodiyaabaa yootiyoobaykka tuma gidenna; qassi ammanttenna. Ha wodiyan hanettiyaabaa baaso oottidi sinttappe aybi hananaakko xannaꞌiyo xinaatiyan daro layttappe guyyiyan hananabaa yootoosona. SHin Geeshsha Maxaafaa hiraagati, ubba “biron hanibeenna yohota beni wodiyaappe” doommidi yootiyo wodekka darobaa qonccissoosonanne ubbatoo polettoosona.—Isi. 46:10.
LEEMISUWAA: Usuppuntta xeetu layttan K.K., hananabaa yootiya Daaneeli Giriike kawotettay Meedoonanne Parsse kawotettaa xoonanaagaa ajjuutan beꞌiis. Xooniya Giriike kawoy ‘keehi gitati’ simmin gamꞌꞌennan, a kawotettay ‘meqqanaagaakka’ qonccissiis. Daaneeli he kawuwaa ‘kawotettaappe shaahettidi oyddu kawotettati kiyanaagaanne eta wolqqay koyroogaa wolqqaa gakkennaagaa’ yootiis.—Dane. 8:5-8, 20-22.
TAARIKIYAA ERANCHATI GIYOOBAA: Daaneela wodiyaappe 200ppe dariya layttay aadhi simmin, Gita Iskkinddiri Giriike kawo gidiis. Iskkinddiri tammu layttan Meedoonanne Parsse Kawotettaa xoonidi ba haaruwaa Indese SHaafaa (ha wodiyan Pakisttaaneena) gakkanaassi aassiis. SHin i 32 layttaa deꞌidi hayqqiis. Wurssettan, Qeeri Isiyan Aypsses giyo sohuwaa matan denddida olaa gaasuwan a kawotettay kunddiis. He olan xoonida oyddati Giriike Kawotettaa shaakki ekkidosona. Gidikkokka, etappe ooninne Iskkinddiraagaa keena wolqqaamibeenna.
NE QOFAY AYBEE? An deꞌiya hiraagay ubbatoo poletees gaana danddayiyo hara maxaafay deꞌii? Woy qassi Geeshsha Maxaafay dummee?
[Sinttaa 4n deꞌiya misiliyaa qonccissuwaa]
“Geeshsha Maxaafaa hiraagati . . . keehi daro gidiyo gishshau, issi uri qaadadan polettoosona giidi qoppana danddayenna.”
—E LOWYER EGIZAMINS ZI BAYBIL, ERWEN H. LINTEN XAAFIDOOGAA
[Sinttaa 4n deꞌiya misiliyaa qonccissuwaa]
© Robert Harding Picture Library/SuperStock