An Deꞌiya Taarikee Hayse Gidenna; Tuma
“Taani qassi koiruwaappe doommada, ubbaa akeekan [qoraas].”—LUQ. 1:3.
GEESHSHA MAXAAFAY DUMMA GIDIDOY AYBA OGIYAANEE? Haysiyan sohoy, gallassaynne erettida asaa sunttay odettana xayikkonne, maalaalissiyaabay odettees. Hegaappe dumma hanotan, Geeshsha Maxaafay a nabbabiyaageeti an deꞌiya ‘qaalay tuma’ gidiyoogaa ammanettanaadan oottiya, hanettida darobaa yootees.—Maz. 119:160.
LEEMISUWAA: Geeshsha Maxaafay, “Baabiloone Kawoi Naabukadanaxoori . . . [Yihudaa Kawuwaa] Yo7aakiina omooddidi, Baabiloone efiis” yaagees. Guyyeppe, Baabiloone kawoy “Ewiili-Marodaaki kawotido laitti Yihudaa Kawuwaa Yo7aakiina qashuwaappe birshshidi maariis.” Hegaa bollikka, Yoꞌaakiinayyo attida a deꞌo laytta ubban “hachchi hachchi ayyo koshshiyaabaa ubbaa Baabiloone kawoi immiis.”—2 Kaw. 24:11, 15; 25:27-30.
BENI WODEBAA XANNAꞌIYAAGEETI ERIDOBAA: Xannaꞌiyaageeti beni Baabiloone katamay qoqqofettido sohuwaa bookkidi, Naaꞌꞌantto Naabukadanaxoora aysuwan oosettidabay xaafettido xuufiyaa demmidosona. He xuufee oosanchatuyyoonne omoodetti biidi Baabiloonen deꞌiyaageetussi imettiyaabaa qonccissees. He xuufiyan “Yahuda (Yihudaa) biittaa kawoy” “Yaukininne [Yoꞌaakiininne]” a soo asaykka xaafettiis. Naabukadanaxoora sohuwan kawotida Ewiili-Marodaaki paxa deꞌida asa gidiyoogaa aybin eriyoo? Suusa katamaa matan demmido, urqqaappe merettidabaa bolli xaafidobay, “Baabiloone Kawuwaa Naabukadanaxoora naꞌaa, Baabiloone Kawuwaa Amil-Marduka [Ewiili-Marodaaka] kawo keettaa” yaagees.
NE QOFAY AYBEE? Taarikiyaara gayttidaban likke gidida darobaa geeshshidi yootiya beni wode haymaanoote maxaafi haray deꞌii? Woy qassi Geeshsha Maxaafay dummee?
[Sinttaa 5n deꞌiya misiliyaa qonccissuwaa]
“Issibay hanido wodiyaanne sohuwaa xeelliyaagan Geeshsha Maxaafay yootiyoobay, beni wode xuufetu haratuugaappe aaruwan likkenne ammanttiyaagaa.”
—E SAYNTIFIK INVESTTIGEESHIN OF ZI OLD TESTTAMENT, ROBERT D. WILSENI XAAFIDOOGAA
[Sinttaa 5n deꞌiya misiliyaa qonccissuwaa]
YIHUDA KAWUWAA YOꞌAAKIINA SUNTTAY DEꞌIYO BAABILOONETU XUUFIYAA
[Sinttaa 5n deꞌiya misiliyaa qonccissuwaa]
© bpk, Berlin/Vorderasiatisches Museum, SMB/Olaf M. Tessmer/Art Resource, NY